Saturday, October 15, 2016

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ် လက်မှတ်ရေးထိုးခြင်း နှစ်ပတ်လည် အခမ်းအနား၏ ထုတ်ပြန် ကြေငြာချက်

၂၀၁၆ ခုနှစ်၊ အောက်တိုဘာလ (၁၅)ရက်
၁။         ပြည်ထောင်စု သမ္မတမြန်မာနိုင်ငံတော် အစိုးရနှင့် တိုင်းရင်းသား လက်နက်ကိုင် အဖွဲ့အစည်းများအကြား ငြိမ်းချမ်းရေး ကြိုးပမ်းမှု၏ အဓိက သမိုင်းမှတ်တိုင် တစ်ခုဖြစ်သော တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (Nationwide Ceasefire Agreement - NCA) ကို ၂၀၁၅ ခုနှစ်၊ အောက်တိုဘာလ (၁၅)ရက်နေ့တွင် နှစ်ဖက် သဘောတူ လက်မှတ်ရေးထိုးခဲ့ကြပါသည်။

၂။         စာချုပ်မူကြမ်းကို စတင် ညှိနှိုင်းစဉ်က နိုင်ငံတော် အစိုးရနှင့် တိုင်းရင်းသား လက်နက်ကိုင် အဖွဲ့အစည်း (၁၇)ဖွဲ့မှ ကိုယ်စားလှယ်များ ပါဝင်ညှိနှိုင်းခဲ့ကြပြီး ၂၀၁၅ ခုနှစ်၊ မတ်လ (၃၁)ရက်နေ့တွင် မူကြမ်းအဆင့်အား နိုင်ငံတော် သမ္မတထံ အပ်နှံခဲ့ပြီးနောက် သြဂုတ်လ (၇)ရက်နေ့တွင် လော်ခီးလာ ညီလာခံမှ မူချောအဖြစ် ထပ်မံ အတည်ပြုနိုင်ခဲ့ကြပါသည်။ (၁၇)လအကြာ ညှိနှိုင်း ဆွေးနွေးမှုများအပြီး အခန်း (၇)ခန်းနှင့် အချက်ကြီး (၃၃)ချက်ပါ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ်ကို နိုင်ငံတော် အစိုးရနှင့် တိုင်းရင်းသား လက်နက်ကိုင် အဖွဲ့အစည်း (၈)ဖွဲ့တို့အကြား နိုင်ငံတကာနှင့် ပြည်တွင်း သက်သေများ ရှေ့မှောက်တွင် သဘောတူ လက်မှတ် ရေးထိုးခဲ့ကြပါသည်။ အားလုံး ပါဝင် ညှိနှိုင်းပြုစုထားသည့် NCA သဘောတူ စာချုပ်သည် ၂၀၁၅ ခုနှစ် ဒီဇင်ဘာလတွင် ပြည်ထောင်စုလွှတ်တော်က တရားဝင်၊ ကန့်ကွက်သူမရှိ အတည်ပြုပေးလိုက်သည့်နောက် မြန်မာနိုင်ငံ၏ ငြိမ်းချမ်းရေး ဖြစ်စဉ်တစ်ခုလုံးအတွက် သမိုင်းဝင် အခြေခံ အုတ်မြစ်တစ်ခုအဖြစ် မှတ်တမ်းတင်နိုင်ခဲ့ပါသည်။
၃။         NCA လက်မှတ်ရေးထိုးခဲ့သည့် တစ်နှစ်တာအတွင်း စာချုပ်ပါ အချက်များကို အတိုင်းအတာတစ်ခုအထိ သက်ဆိုင်သူများအားလုံးမှ ကြိုးစား အကောင်အထည်ဖော်ခဲ့ကြပါသည်။ စိတ်ရှည်သည်းခံမှု၊ အပြန်အလှန် နားလည်မှု၊ လေးစားမှုတို့ကို အခြေခံ၍ ရရှိခဲ့သည့် ယုံကြည်မှုကို အရင်းအနှီးပြုကာ NCA ကို ထိန်းသိမ်းလျက် ငြိမ်းချမ်းရေး လုပ်ငန်းများ ပူးတွဲ အကောင် အထည်ဖော်မှုတို့ကို တစ်ဆင့်ပြီး တစ်ဆင့် တက်လှမ်း လုပ်ဆောင်လျက် ရှိပါသည်။
၎။         NCA ပါ စစ်ဘက်ဆိုင်ရာ စည်းမျဉ်းစည်းကမ်းများနှင့် စစ်ဘက်ဆိုင်ရာ ကျင့်ဝတ်များကို ထိထိ ရောက်ရောက် လိုက်နာမှု ရှိစေရန် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC)ကို ဖွဲ့စည်းပြီး စောင့်ကြည့် ကြီးကြပ်ရေး လုပ်ငန်းများကို တာဝန်ယူမှု၊ တာဝန်ခံမှု၊ ပွင့်လင်းမြင်သာမှုတို့ဖြင့် အကောင်အထည်ဖော် ဆောင်လျက်ရှိပါသည်။
၅။         ငြိမ်းချမ်းရေး လုပ်ငန်းစဉ်တစ်ခုလုံးကို အကောင်အထည် ဖော်နိုင်ရေးအတွက် နိုင်ငံရေးလမ်းပြမြေပုံ တစ်ခုကိုလည်း NCA တွင် သဘောတူညီခဲ့ကြသည့်အလျောက် ပါဝင်သင့် ပါဝင်ထိုက်သူ အားလုံး ပါဝင်မည့် နိုင်ငံရေး ဆွေးနွေးပွဲများ ကျင်းပနိုင်ရေး အတွက် ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ (UPDJC) ကို ဖွဲ့စည်းကာ အကောင်အထည်ဖော်လျက် ရှိပါသည်။ ရလဒ်အဖြစ် နိုင်ငံရေး ဆွေးနွေးမှုဆိုင်ရာ မူဘောင်တစ်ခုကို ရေးဆွဲ၍ ပထမအကြိမ် ပြည်ထောင်စု ငြိမ်းချမ်းရေးညီလာခံကြီးကို ၂၀၁၆ ခုနှစ်၊ ဇန်န၀ါရီလ (၁၂)ရက်နေ့မှ (၁၆)ရက်နေ့အထိ ကျင်းပနိုင်ခဲ့ပါသည်။
၆။         နိုင်ငံတော်၏ ပြောင်းလဲလာသော အခြေအနေများနှင့်အညီ နိုင်ငံရေးဆွေးနွေးမှုဆိုင်ရာ မူဘောင်ပြင်ဆင်ရေးဆွဲရေး ဆောင်ရွက်လျက် ရှိပါသည်။ ပြည်ထောင်စု ငြိမ်းချမ်းရေးညီလာခံ (၂၁)ရာစု ပင်လုံကို ၂၀၁၆ ခုနှစ်၊ သြဂုတ်လ (၃၁)ရက်နေ့မှ စက်တင်ဘာလ (၃)ရက်နေ့အထိ အောင်မြင်ခမ်းနားစွာ ကျင်းပနိုင်ခဲ့ပါသည်။ ၎င်းညီလာခံတွင် အားလုံး ပါဝင် တက်ရောက်နိုင်ခဲ့ကြပြီး လွတ်လပ်စွာ ဆွေးနွေး တင်ပြနိုင်ခဲ့ ကြပါသည်။ ပြည်ထောင်စု ငြိမ်းချမ်းရေး ညီလာခံ- (၂၁)ရာစု ပင်လုံမှတဆင့် အမျိုးသားအဆင့် နိုင်ငံရေး ဆွေးနွေးပွဲများ ဆက်လက် ကျင်းပရေး အပါအ၀င် ငြိမ်းချမ်းရေး လုပ်ငန်းစဉ် အောင်မြင် ပေါက်မြောက်စေရန် အတွက် နောက်ထပ် သမိုင်းစာမျက်နှာအသစ်တစ်ရပ် ဖွင့်လှစ်လိုက်ခြင်းလည်း ဖြစ်ပါသည်။

၇။         NCA ပြဌာန်းချက်များကို စောင့်ထိန်းလိုက်နာခြင်းနှင့် နိုင်ငံရေး ဆွေးနွေးပွဲများကို နိုင်ငံရေးနည်းဖြင့် ငြိမ်းချမ်းစွာ ဆွေးနွေး အဖြေရှာခြင်းအားဖြင့် ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စု တည်ဆောက်ရေး လမ်းကြောင်းပေါ်သို့ လျှောက်လှမ်းနိုင်မည် ဖြစ်ပါသည်။ NCA သည် ပစ်ခတ်တိုက်ခိုက်မှု ရပ်စဲရေးသာမက ပစ်ခတ်တိုက်ခိုက်မှု ရပ်စဲရေးအပေါ် စောင့်ကြည့်၍ ညှိနှိုင်း ဖြေရှင်းသည့် လုပ်ငန်းစဉ်များကို သဘောတူညီခြင်းဖြစ်သည့်အပြင် နိုင်ငံရေး ဆွေးနွေးမှု လုပ်ငန်းစဉ်များအတွက်ပါ နှစ်ဦးနှစ်ဖက်အကြား အာမခံချက်များ ထားရှိခြင်း ဖြစ်ပါသည်။ NCA ပါ အချက်များသည် အင်အားစုများအကြား ညှိနှိုင်း သဘောတူညီထားသော ငြိမ်းချမ်းရေး အခြေခံအုတ်မြစ် ဖြစ်သည့်အတွက် ၎င်းအချက်များကို အောင်မြင်စွာ အကောင်အထည်ဖော်နိုင်ရေးသည် အနာဂတ်ပြည်ထောင်စုအတွက် အရေးပါသော ခြေလှမ်းများ ဖြစ်ပါလိမ့်မည်။ NCA ပါ လုပ်ငန်းများကို ပူးပေါင်း အကောင်အထည်ဖော်ခြင်းဖြင့် ပဋိပက္ခ ဖြေရှင်းရေးကို အခြေခံသည့် ရေရှည် တည်တံ့သော ငြိမ်းချမ်းရေး လုပ်ငန်းစဉ်အသစ်တစ်ရပ်ကို တည်ဆောက်ပြီး ဒီမိုကရေစီနှင့် ဖက်ဒရယ် စနစ်တို့ကို အခြေခံသည့် ပြည်ထောင်စုကို နိုင်ငံရေး ဆွေးနွေးပွဲများ၏ ရလဒ်များနှင့်အညီ တည်ဆောက်သွားနိုင်မည် ဖြစ်ပါသည်။

No comments:

Post a Comment