ပြည်ထောင်စုလွှတ်တော်နာယက၊ အမျိုးသားလွှတ်တော်ဥက္ကဋ္ဌ ဦးအောင်လင်းဒွေး ချင်းပြည်နယ်လွှတ်တော်ဥက္ကဋ္ဌ ဦးဆောင်သည့် လေ့လာရေးကိုယ်စားလှယ်အဖွဲ့အား တွေ့ဆုံ

 

နေပြည်တော် ဇူလိုင် ၃

ပြည်ထောင်စုလွှတ်တော်နာယက၊ အမျိုးသားလွှတ်တော်ဥက္ကဋ္ဌ ဦးအောင်လင်းဒွေးသည် ယနေ့နံနက်ပိုင်းတွင် နေပြည်တော်ရှိ လွှတ်တော်အဆောက်အအုံ အမျိုးသားလွှတ်တော်ဧည့်ခန်းမအဆောင်၌ ချင်းပြည်နယ်လွှတ်တော်ဥက္ကဋ္ဌ ဦးဆောင်သည့် လေ့လာရေးကိုယ်စားလှယ်အဖွဲ့အား တွေ့ဆုံသည်။

တွေ့ဆုံစဉ် ပြည်ထောင်စုလွှတ်တော်နာယက၊ အမျိုးသားလွှတ်တော်ဥက္ကဋ္ဌက ပြည်ထောင်စုအဆင့်တွင် ဥပဒေပြုရေး၊ အုပ်ချုပ်ရေး၊ တရားစီရင်ရေးကဏ္ဍများကို တတ်နိုင်သမျှ ပိုင်းခြားကျင့်သုံးမှု၊ အာဏာသုံးရပ်ကို သီးခြားစီထားရှိပြီး အပြန်အလှန်ထိန်းကျောင်းခြင်းတွင် ကဏ္ဍတစ်ရပ်နှင့်တစ်ရပ် အပြုသဘောအမြင်ဖြင့် ညှိနှိုင်းဆောင်ရွက်မှု၊ တိုင်းဒေသကြီး/ပြည်နယ်အဆင့်တွင် ပါလီမန်စနစ် စစ်စစ်မဟုတ်သော်လည်း ဥပဒေပြုရေးနှင့် အုပ်ချုပ်ရေးကဏ္ဍတို့၌ ယင်းစနစ်အပေါ် အခြေခံထားမှုအခြေအနေများနှင့် စပ်လျဉ်း၍ မှာကြားသည်။

တွေ့ဆုံပွဲသို့ ပြည်ထောင်စုလွှတ်တော်နာယက၊ အမျိုးသားလွှတ်တော်ဥက္ကဋ္ဌနှင့်အတူ အမျိုးသားလွှတ်တော်ဒုတိယဥက္ကဋ္ဌ Jeng Phang နော်တောင်၊ အမျိုးသားလွှတ်တော်ရုံးမှ တာဝန်ရှိသူများ တက်ရောက်ကြသည်။

အဆိုပါလေ့လာရေးအဖွဲ့သည် ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော်တို့၏ လွှတ်တော်ဆိုင်ရာလုပ်ငန်းစဉ်များကို လေ့လာမည့်အပြင် ရန်ကုန်တိုင်းဒေသကြီးလွှတ်တော်နှင့် မန္တလေးတိုင်းဒေသကြီးလွှတ်တော်တို့ကိုလည်း သွားရောက်လေ့လာမည်ဖြစ်ကြောင်း သိရသည်။                          

သတင်းစဉ်