နေပြည်တော် ဧပြီ ၁၈
မွန်ပြည်နယ်၊
သံဖြူဇရပ်မြို့နယ်၊ ပငကျေးရွာ ရေကစားမဏ္ဍပ်အား လက်ပစ်ဗုံးဖြင့် အကြမ်းဖက်ဖောက်ခွဲရန်
ပြုလုပ်ခဲ့သော PDF အမည်ခံအကြမ်းဖက်သမား ၂ ဦးအား ဧပြီ ၁၇ ရက် မွန်းလွဲ ၂ နာရီ ၁၅ မိနစ်ခန့်တွင်
ဒေသခံပြည်သူများက ဝိုင်းဝန်းဖမ်းဆီးရမိခဲ့ကြောင်း သိရှိရသည်။
ဖြစ်စဉ်မှာ
KNLA တပ်မဟာ(၆)၊ ရင်း(၁၆)မှ ဒုခွဲမှူးအဆင့်ရှိချနေလား၏ စေခိုင်းချက်အရ ဧရာဝတီတိုင်းဒေသကြီး၊
ပုသိမ်မြို့နယ်၊ တလက်ခွကျေးရွာနေ အာကာမင်းနှင့် ရန်ကုန်တိုင်းဒေသကြီး၊ ကြည့်မြင်တိုင်မြို့နယ်နေ
အောင်မျိုးထက်တို့ ၂ ဦးသည် သံဖြူဇရပ်မြို့နယ် ပငကျေးရွာရေကစားမဏ္ဍပ်အား လက်ပစ်ဗုံးဖြင့်
ဖောက်ခွဲဖျက်ဆီးရန်အတွက် ရေးမြို့နယ်၊ လိမ္မော်ခြံကျေးရွာမှ ဧပြီ ၁၇ ရက် နံနက် ၉ နာရီခန့်တွင်
မော်တော်ဆိုင်ကယ်ဖြင့် ထွက်ခွာခဲ့ပြီး ရေကစားမဏ္ဍပ်အနီး၌ အခြေအနေစောင့်ကြည့်ခဲ့ကြောင်း၊
မွန်းလွဲ ၂ နာရီ ၁၅ မိနစ်ခန့်တွင် အာကာမင်းကလက်ပစ်ဗုံးအား ဘောင်းဘီအိတ်အတွင်းမှ ပစ်ခတ်ရန်ထုတ်ယူစဉ်
လက်ပစ်ဗုံး၏လုံခြုံရေးပင်မှာ ဘောင်းဘီအိတ်အတွင်း ပြုတ်၍ကျန်ရှိခဲ့သဖြင့် လက်ပစ်ဗုံးကို
လမ်းဘေးရေမြောင်းအတွင်းသို့ ထိတ်လန့်စွာဖြင့်လွှင့်ပစ်ခဲ့ရာ ပေါက်ကွဲမှုဖြစ်ပွားခဲ့ကြောင်း၊
ပေါက်ကွဲမှုကြောင့် လူနှင့်အဆောက်အဦ ထိခိုက်မှုမရှိကြောင်းနှင့် အဆိုပါအကြမ်းဖက် သမား
၂ ဦးအား ဒေသခံပြည်သူများက ဝိုင်းဝန်းဖမ်းဆီးခဲ့ပြီး လုံခြုံရေးတပ်ဖွဲ့ဝင်များထံသို့
အပ်နှံခဲ့ကြောင်း သိရှိရသည်။
အဆိုပါဖမ်းဆီးရမိသူများ၏
ပြောကြားချက်အရ သံဖြူဇရပ်မြို့နယ်၊ သက္ကောကျေးရွာ၏ အရှေ့တောင်ဘက် မီတာ ၁၃၀၀ ခန့်အကွာရှိလျှိုအတွင်း၌
လက်လုပ်မိုင်း ၃ လုံးသိမ်းဆည်းထားကြောင်းသိရှိရသဖြင့် လုံခြုံရေးတပ်ဖွဲ့ဝင်များက ၎င်းတို့နှင့်အတူ
သွားရောက်ရှာဖွေခဲ့ရာ လက်လုပ်မိုင်း ၃ လုံးအား သိမ်းဆည်းရမိခဲ့ပြီး ၎င်းနေရာ၌ပင် ဖောက်ခွဲဖျက်ဆီးရှင်းလင်းခဲ့ကြောင်း၊
ထို့နောက်အဆိုပါနေရာမှ ပြန်လည်ထွက်ခွာလာစဉ် ဖမ်းဆီးရမိအကြမ်းဖက်သမား ၂ ဦးက ထွက်ပြေးခဲ့သဖြင့်
လုံခြုံရေးတပ်ဖွဲ့ဝင်များက ခြောက်လန့်ပစ်ခတ်တားဆီးခဲ့သော်လည်း ရပ်တန့်ခြင်းမရှိသောကြောင့်
ပစ်ခတ်ဖမ်းဆီးခဲ့ရာ အကြမ်းဖက်သမား ၂ ဦးသည် ကျည်ထိမှန်ဒဏ်ရာများရရှိကာ သေဆုံးသွားခဲ့သည်။
အထက်ပါဖြစ်စဉ်မှ
အကြမ်းဖက်သမား ၂ ဦးသေဆုံးမှုနှင့်ပတ်သက်၍ ဉပဒေနှင့်အညီ သေမှုသေခင်းရေးဖွင့်ဆောင်ရွက်လျက်ရှိကြောင်းနှင့်
၎င်းတို့၏ရုပ်အလောင်းများအား သံဖြူဇရပ်မြို့နယ်၊ ဝဲကလိကျေးရွာသုဿာန်၌ ကောင်းမွန်စွာမီးသင်္ဂြိုဟ်
ပေးခဲ့ကြောင်း သတင်းရရှိသည်။
No comments:
Post a Comment