ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဒေါက်တာကျော်ထွန်း မိုင်းဆတ်ခရိုင်/မြို့နယ်စီမံ အုပ်ချုပ်ရေးအဖွဲ့ဥက္ကဋ္ဌနှင့် ဌာနဆိုင်ရာများအား တွေ့ဆုံပြီး အခြေခံစားသောက်ကုန်များ ထောက်ပံ့ပေးအပ်

 

မိုင်းဆတ် ဇန်နဝါရီ ၂၆

ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဒေါက်တာကျော်ထွန်း၊ အစိုးရအဖွဲ့ဝင် ဝန်ကြီးများ နှင့် တာဝန်ရှိသူများသည် ယမန်နေ့ မွန်းလွဲ ၁ နာရီက မိုင်းဆတ်ခရိုင်/မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌနှင့် ဌာနဆိုင်ရာများအား ဇီအုန်ဟိုတယ်ခန်းမဆောင်တွင် တွေ့ဆုံခဲ့ကြောင်း သိရသည်။

ရှေးဦးစွာ ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးအောင်ဟိန်းကျော်က ရှမ်းပြည်နယ်(အရှေ့ပိုင်း)သို့ နိုင်ငံ တော်စီမံအုပ်ချုပ်ရေးကောင်စီဥက္ကဋ္ဌနှင့် ရှမ်းပြည်နယ်ဝန်ကြီးချုပ် ခရီးစဉ်တွင် လမ်းညွှန်မှာကြားချက်များအပေါ် ဆောင်ရွက်ပြီးစီးမှုနှင့် မိုင်းဆတ်ခရိုင်အတွင်း မြို့ရေရရှိ ရေးလုပ်ငန်းများကို ရှင်းလင်းတင်ပြပြီး ခရိုင်စိုက်ပျိုးရေးဦးစီးဌာန လက်ထောက်ညွှန်ကြားရေးမှူး ဦးထွန်းလွင်က စမ်းသပ်စိုက်ပျိုးအောင်မြင်ခဲ့သော ပေါ်ဆန်းရင်စပါး စိုက်ပျိုးထွက်ရှိမှုနှင့် စပ်လျဉ်း၍ ရှင်းလင်းတင်ပြခဲ့ပြီး ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဒေါက်တာကျော်ထွန်းက မိုင်းဆတ်ခရိုင်အတွင်း တာဝန်ထမ်းဆောင်လျက်ရှိသည့် ဝန်ထမ်းများအတွက် အခြေခံစားသောက်ကုန်များကို ပေးအပ်ရာ ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးအောင်ဟိန်းကျော်နှင့် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးအားလွန်တို့က လက်ခံရယူခဲ့ကြသည်။

ဆက်လက်၍ ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဒေါက်တာကျော်ထွန်းက နိုင်ငံတော် အကြီးအကဲ၏ လမ်းညွှန်ချက်များနှင့်အညီ ဒေသဖွံ့ဖြိုးရေးလုပ်ငန်းများ ဝိုင်းဝန်းကူညီ ဆောင်ရွက်ကြရန်၊ ကျန်းမာရေး၊ ပညာရေး၊ စိုက်ပျိုးရေးကဏ္ဍ၊ မွေးမြူရေး၊ အားကစားကဏ္ဍများအပါအဝင် တစ်ပိုင်တစ်နိုင် အသေးစားစက်မှု၊ လက်မှုလုပ်ငန်းများအား ခရိုင်/မြို့နယ်တာဝန်ရှိသူများမှ  အားပေးဆောင် ရွက်ကြရန်၊ လမ်းညွှန်အမှာစကား ပြောကြားပြီး ခရိုင်/မြို့နယ်ဌာနဆိုင်ရာများနှင့် မြို့မိမြို့ဖတို့အား ရင်းရင်းနှီးနှီး နှုတ်ဆက်ခဲ့သည်။

ထို့နောက် ရှမ်းပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဒေါက်တာကျော်ထွန်းနှင့်အဖွဲ့သည် (Working Group) မြေပြင်တစ်အိမ်တက်ဆင်းကွင်းဆင်းစာရင်း ကောက်ယူနေမှုနှင့် ၂၀၂၂-၂၀၂၃ ဘဏ္ဍာနှစ် ပြည်နယ်ခွင့်ပြုရန်ပုံငွေကျပ် (၂၃၉)သန်းဖြင့် အောင်ဇေယျဘက်စုံ အားကစားကွင်းအတွင်း (RC) နှစ်ထပ် ပွဲကြည့်စင် (၈၅)ရာခိုင်နှုန်း တည်ဆောက်ပြီးစီးမှု အခြေအနေတို့ကိုကြည့်ရှုစစ်ဆေးခဲ့ကြောင်း သိရသည်။

မြင့်မောင်(ပြန်/ဆက်)