နေပြည်တော် နိုဝင်ဘာ ၂၀
ဘရူနိုင်းဒါရူဆလမ်နိုင်ငံ ဘန်ဒါဆရီဘီဂါဝန်မြို့တွင် နိုဝင်ဘာ ၂၂ ရက်မှ ၂၄ ရက်အတွင်း ကျင်းပမည့် (၁၂) ကြိမ်မြောက် အာဆီယံ+၃ ကူးစက်ရောဂါဗေဒဆိုင်ရာ သင်တန်းကွန်ရက်၏ ကြီးကြပ်ရေးကော်မတီ အစည်းအဝေးနှင့် ဆက်စပ်အစည်းအဝေးများသို့ တက်ရောက်ရန်အတွက် ကျန်းမာ ရေးဝန်ကြီးဌာန ပြည်သူ့ကျန်းမာရေးဦးစီးဌာနမှ ကိုယ်စားလှယ်နှစ်ဦးသည် ယနေ့တွင် ထိုင်းနိုင်ငံမှတစ်ဆင့် ဘရူနိုင်းနိုင်ငံသို့ ရန်ကုန်မြို့မှ လေကြောင်းခရီးဖြင့် ထွက်ခွာသွားသည်။
အာဆီယံ+၃ ကူးစက်ရောဂါ ဗေဒဆိုင်ရာ သင်တန်းကွန်ရက်သည် လေးကြိမ်မြောက် အာဆီယံနိုင်ငံများရှိ ကျန်းမာရေးဝန်ကြီးများ အစည်းအဝေး၏ရလဒ်အဖြစ် ၂၀၁၁ ခုနှစ်တွင် စတင်ခဲ့ခြင်းဖြစ်ပြီး အဆိုပါသင်တန်းကွန်ရက်၏ ကြီးကြပ်ကော်မတီတွင် နိုင်ငံပေါင်း ၁၃ နိုင်ငံမှ ကိုယ်စားလှယ် များပါဝင်ကြောင်းနှင့် ရည်ရွယ်ချက်များအနေဖြင့် ကူးစက်ရောဂါများနှင့်ပတ်သက်၍ ဒေသတွင်း နိုင်ငံများအကြား ပူးပေါင်းဆောင်ရွက်ရန် အတွေ့အကြုံနှင့်သတင်း အချက်အလက်များမျှဝေရန်၊ ကျန်းမာရေးဝန်ထမ်းများ၏ စွမ်းဆောင်ရည်မြင့်မားရေးအတွက် သင်တန်းများပေးရန် အစရှိသည်တို့ ပါဝင်ကြောင်း သိရသည်။
ကိုဗစ်-၁၉ ကပ်ရောဂါ ဖြစ်ပွားခြင်းကြောင့် ဒစ်ဂျစ်တယ်ကျန်းမာရေးစနစ်သည် မရှိမဖြစ်လိုအပ်ကြောင်း တစ်ကမ္ဘာလုံးအတိုင်းအတာဖြင့် သက်သေပြလျက်ရှိရာ ယခုနှစ်တွင်ကျင်းပမည့် (၁၂)ကြိမ်မြောက် အာဆီယံ+၃ ကူးစက်ရောဂါဗေဒဆိုင်ရာ သင်တန်းကွန်ရက်၏ ကြီးကြပ်ရေးကော်မတီအစည်းအဝေးတွင် ဒစ်ဂျစ်တယ် ကျန်းမာရေးနည်းပညာကို နိုင်ငံများအကြားဆက်သွယ်ခြင်း၊ သတင်းအချက်အလက် မျှဝေခြင်း၊ ကူးစက်ရောဂါရှာဖွေခြင်းနှင့် စောင့်ကြပ်ကြည့်ရှုခြင်း၊ ကျန်းမာရေးဝန်ဆောင်မှုပေးခြင်းနှင့် ကာကွယ်ဆေးများထိုးနှံပေးခြင်း ကိစ္စရပ်များတွင် ထိရောက်စွာ အသုံးပြုနိုင်ရေး ဆွေးနွေးသွား မည်ဖြစ်ကြောင်း သိရသည်။
သတင်းစဉ်
No comments:
Post a Comment