မကွေးတိုင်းဒေသကြီးအစိုးရအဖွဲ့၊ ကိုဗစ်-၁၉ရောဂါ ထိန်းချုပ်ရေးနှင့်အရေးပေါ်တုံ့ပြန်ရေး ကော်မတီမှ တိုင်းဒေသကြီးအတွင်းရှိ ကျန်းမာရေးဦးစီးဌာနဝန်ထမ်းများနှင့် တွေ့ဆုံဆွေးနွေး

 

မကွေး စက်တင်ဘာ   ၂

မကွေးတိုင်းဒေသကြီးအတွင်း ကိုဗစ်-၁၉ရောဂါဖြစ်ပွားမှု ကာကွယ်တားဆီးနိုင်ရေး အတွက် ယနေ့မွန်းလွဲ ၁နာရီအချိန်က မကွေးတိုင်းဒေသကြီးအစိုးရအဖွဲ့ ကိုဗစ်-၁၉ ရောဂါ ထိန်းချုပ်ရေးနှင့် အရေးပေါ် တုံ့ပြန်ရေးကော်မတီအဖွဲ့ဝင် လူမှုရေးရာဝန်ကြီး ဦးစိုးပိုင်မြင့်က Video Conferencing စနစ်ဖြင့် တိုင်းဒေသကြီးအတွင်းရှိ ကျန်းမာရေးဦးစီးဌာန ဝန်ထမ်းများနှင့် တွေ့ဆုံဆွေးနွေးခဲ့ကြောင်း သိရသည်။

အစည်းအဝေးတွင် မကွေးတိုင်းဒေသကြီးအစိုးရအဖွဲ့ လူမှုရေးရာဝန်ကြီးဌာန၊ ဝန်ကြီး ဦးစိုးပိုင်မြင့်က တိုင်းဒေသကြီးအတွင်း မြို့နယ်အလိုက် ကိုဗစ်-၁၉ ရောဂါကာကွယ်ဆေး ထိုးနှံ ပေးမှုအခြေအနေများ၊ ရွေ့လျားမော်တော်ယာဉ်ဖြင့် ကျေးရွာအရောက် RDT Test Kit စစ်ဆေး ပေးနေမှုအခြေအနေများ၊ ကိုဗစ်-၁၉ရောဂါကာကွယ်ထိန်းချုပ်နိုင်ရေး အသိပညာပေး ဆောင်ရွက်ပေးနေမှုအခြေအနေများ၊ အောက်ဆီဂျင်လိုအပ်ချက်များ ဖြည့်ဆည်းပေးနိုင်ရေး ဆောင်ရွက်ထားရှိမှု အခြေအနေများနှင့် စပ်လျဉ်း၍ ဆွေးနွေးပြောကြားခဲ့ပြီး လိုအပ်သည့် အခက်အခဲများအား တင်ပြဆွေးနွေးရန် ရှင်းလင်းပြောကြားခဲ့သည်။

ဆက်လက်၍ မကွေးတိုင်းဒေသကြီး ကျန်းမာရေးဦးစီးဌာန၊ တိုင်းဒေသကြီးဦးစီးမှူး ဒေါက်တာသောင်းလှိုင်က တိုင်းဒေသကြီးအတွင်း ကိုဗစ်-၁၉ ရောဂါပိုး စစ်ဆေးတွေ့ရှိမှု အခြေအနေများ၊ အောက်ဆီဂျင်ဖြန့်ဖြူးဆောင်ရွက်နေမှု အခြေအနေများနှင့်စပ်လျဉ်း၍ ရှင်းလင်းပြောကြားရာ မြို့နယ်အလိုက် ပြည်သူ့ဆေးရုံများရှိ ဆေးရုံအုပ်ကြီးများနှင့် ကျန်းမာရေးဦးစီးဌာန တာဝန်ခံများက ကိုဗစ်-၁၉ ရောဂါပိုးတွေ့လူနာများအား Quarantine ထားရှိမှုအခြေအနေများ၊ အောက်ဆီဂျင်ရရှိမှု အခြေအနေများ၊ မြို့နယ်အလိုက် RDT Test Kit ဖြင့်စစ်ဆေးပေးနေမှု အခြေအနေများအား အသီးသီးရှင်းလင်းတင်ပြရာ တင်ပြချက်များအပေါ် တိုင်းဒေသကြီး လူမှုရေးရာဝန်ကြီး ဦးစိုးပိုင်မြင့်က လိုအပ်သည်များ ပေါင်းစပ်ညှိနှိုင်း ဆွေးနွေးပေးခဲ့ကြောင်း သိရသည်။

အဆိုပါ Video Conferencing စနစ်ဖြင့်ပြုလုပ်သည့် ကိုဗစ်-၁၉ ရောဂါ ထိန်းချုပ်ရေးနှင့် အရေးပေါ် တုံ့ပြန်ရေးကော်မတီအစည်းအဝေးအား တိုင်းဒေသကြီး အစိုးရ အဖွဲ့ လူမှုရေးရာ ဝန်ကြီးဌာန၊ ဝန်ကြီးဦးစိုးပိုင်မြင့်၊ တိုင်းဒေသကြီး ကျန်းမာရေးဦးစီး ဌာန၊ တိုင်းဒေသကြီး ဦးစီမှူး ဒေါက်တာသောင်းလှိုင်နှင့် တိုင်းဒေသကြီးအတွင်းရှိ မြို့နယ်များမှ ပြည်သူ့ဆေးရုံ အုပ်ကြီးများနှင့် ကျန်းမာရေးဦးစီးဌာန တာဝန်ရှိသူများ တက်ရောက်ခဲ့ကြောင်း သိရသည်။

ကိုအောင်