မြန်မာဖွံ့ဖြိုးမှု အဖွဲ့အစည်း ရုံးအဆောက်အဦ မြေနေရာ သိဒ္ဓိတင် မင်္ဂလာအခမ်းအနား ကျင်းပ

နေပြည်တော် ဇန်န၀ါရီ ၂၄

မြန်မာဖွံ့ဖြိုးမှု အဖွဲ့အစည်း၏ ရုံးအဆောက်အဦ မြေနေရာ သိဒ္ဓိတင်မင်္ဂလာ အခမ်းအနားကို ယနေ့နံနက် ၇ နာရီခွဲတွင် နေပြည်တော် ဒက္ခိဏသီရိမြို့နယ် အမှတ် (ဒီ-၀၂) ရှိ အဆိုပါ ရုံးအဆောက်အဦ ဆောက်လုပ်လျက်ရှိသည့် မြေနေရာ၌ မြန်မာ့ရိုးရာ ထုံးတမ်းစဉ်လာများနှင့်အညီ ကျင်းပသည်။

အခမ်းအနားတွင် ပြည်ထောင်စုဝန်ကြီး ဒေါက်တာသန်းမြင့်နှင့် ဦးစိုးဝင်း၊ နေပြည်တော် ကောင်စီဥက္ကဋ္ဌ ဒေါက်တာ မျိုးအောင်နှင့် တာဝန်ရှိသူများက ရုံးအဆောက်အဦ၏ မင်္ဂလာတိုင်တော်များကို အမွှေးနံ့သာရည်ဖြင့် ပက်ဖြန်းကြသည်။

ယင်းနောက် ပြည်ထောင်စုဝန်ကြီး ဦးစိုးဝင်းက အဖွင့်အမှာစကား ပြောကြားရာတွင် မြန်မာဖွံ့ဖြိုးမှု အဖွဲ့အစည်းသည် နှစ်နှစ်တာ ကာလအတွင်း မြန်မာနိုင်ငံ၏ ရေရှည်တည်တံ့ခိုင်မြဲ၍ ဟန်ချက်ညီသည့် ဖွံ့ဖြိုးတိုးတက်မှု စီမံကိန်း (MSDP) နှင့် Project Bank တို့ကို ရေးဆွဲအကောင်အထည်ဖော်ခြင်း၊ နိုင်ငံတော်ပိုင် စီးပွားရေး လုပ်ငန်းများ ပြုပြင်ပြောင်းလဲခြင်း၊ ဘဏ္ဍာရေးဆိုင်ရာ မူဝါဒများ ရေးဆွဲချမှတ်ခြင်း၊ နိုင်ငံတော်အစိုးရအတွင်းရှိ လုပ်ထုံးလုပ်နည်းများ စံသတ်မှတ်ခြင်းစသည့် မြန်မာနိုင်ငံ၏ စီးပွားရေးဆိုင်ရာ ပြုပြင်ပြောင်းလဲမှုများတွင် တန်ဖိုးရှိသည့် အထောက်အကူများ ပေးအပ်လျက်ရှိပါ ကြောင်း။

မြန်မာဖွံ့ဖြိုးမှု အဖွဲ့အစည်း တည်ထောင်ရန်အတွက် ကိုရီးယားသမ္မတနိုင်ငံက ပေးအပ်သည့် အထောက်အကူများသည် မြန်မာ-ကိုရီးယား နှစ်နိုင်ငံအကြား ခိုင်မာလေးနက်သည့် ပူးပေါင်းဆောင်ရွက်မှု အနေအထားကို ပြသခြင်းဖြစ်ပါကြောင်း၊ ကိုရီးယားသမ္မတနိုင်ငံ၏ စီးပွားရေး ဖွံ့ဖြိုးတိုးတက်မှုအတွက် Korea Development Institute သည် အရေးပါသည့် အခန်းကဏ္ဍမှ ပါဝင်သကဲ့သို့ မြန်မာဖွံ့ဖြိုးမှု အဖွဲ့အစည်းသည်လည်း မြန်မာနိုင်ငံ၏ စီးပွားရေးဖွံ့ဖြိုး တိုးတက်မှုအတွက် ပိုမိုလေးနက် အားကောင်းသည့် အထောက်အကူများကို ဆောင်ရွက်ပေးနိုင်မည်ဖြစ်ပါကြောင်း။

မြန်မာဖွံ့ဖြိုးမှု အဖွဲ့အစည်း ရုံးအဆောက်အဦ ဆောက်လုပ်ပြီးစီးပါက နိုင်ငံတော်စီးပွားရေး အကြံပေးအဖွဲ့အစည်း တစ်ခုအဖြစ် မြန်မာဖွံ့ဖြိုးမှု အဖွဲ့အစည်း၏ အခန်းကဏ္ဍသည် ပိုမိုကြီးမား အားကောင်းလာမည်ဟု ယုံကြည်ပါကြောင်း ပြောကြားသည်။

ထို့နောက် ကိုရီးယားသမ္မတနိုင်ငံ နိုင်ငံခြားရေးဝန်ကြီးဌာန ဒုတိယ၀န်ကြီး H.E.Mr. Lee Taeho က အမှာစကား ပြောကြားပြီး KDI School of Public Policy and Management မှ တက္ကသိုလ်အဓိပတိ Dr. You Jong-il က မြန်မာဖွံ့ဖြိုးမှု အဖွဲ့အစည်းနှင့် ပတ်သက်၍ ရှင်းလင်းတင်ပြသည်။

အခမ်းအနားသို့ ဒုတိယ၀န်ကြီး ဦးလှကျော်၊ ဦးဝင်းမော်ထွန်းနှင့် ဦးဆက်အောင်၊ ဒုတိယရှေ့နေချုပ် ဦးဝင်းမြင့်၊ မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ ဦးစိုးမင်းနှင့် ဦးဘိုဘိုငယ်၊ မြန်မာနိုင်ငံဆိုင်ရာ ကိုရီးယားသမ္မတနိုင်ငံ သံအမတ်ကြီး H.E.Mr.Lee Sang-hwa၊ မြန်မာနိုင်ငံ ဖွံ့ဖြိုးမှုအဖွဲ့အစည်း ဥက္ကဋ္ဌ ဦးမျိုးမြင့်၊ KOICA Myanmar Office ၏ ဌာနေကိုယ်စားလှယ် Ms. Lee Youn Soo၊ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ မြန်မာဖွံ့ဖြိုးမှု အဖွဲ့အစည်းမှ တာဝန်ရှိသူများနှင့် ဖိတ်ကြားထားသည့် ဧည့်သည်တော်များ တက်ရောက်ကြသည်။

မြန်မာဖွံ့ဖြိုးမှု အဖွဲ့အစည်း ရုံးအဆောက်အဦကို ၂၀၁၈ ခုနှစ် နှစ်ကုန်ပိုင်းက စတင်တည်ဆောက်လျက်ရှိပြီး ၂၀၁၉ ခုနှစ် နှစ်ကုန်ပိုင်းတွင် အပြီးသတ် ဆောက်လုပ်နိုင်ရန် မျှော်မှန်းထားကြောင်း သိရသည်။

(သတင်းစဉ်)