မြန်မာနိုင်ငံ အင်ဂျင်နီယာအသင်းနှင့် အာဆီယံအင်ဂျင်နီယာအဖွဲ့ချုပ် ဂုဏ်ထူးဆောင်လက်မှတ်နှင့် ဆုတံဆိပ်များ ပေးအပ်

နေပြည်တော် ဇန်နဝါရီ ၂၂

မြန်မာနိုင်ငံ အင်ဂျင်နီယာအသင်းနှင့် အာဆီယံ အင်ဂျင်နီယာ အဖွဲ့ချုပ် ဂုဏ်ထူးဆောင်လက်မှတ်နှင့် ဆုတံဆိပ် များပေးအပ်ပွဲ၊ အလှူရှင်များအား ဂုဏ်ပြုလွှာပေးအပ်ပွဲနှင့် မြန်မာနိုင်ငံ အင်ဂျင်နီယာအသင်း အသင်းသား စုံညီ ညီလာခံအထိမ်းအမှတ် ညစာ စားပွဲကို ဇန်နဝါရီ ၂၁ ရက် ညနေ ၆ နာရီတွင် ရန်ကုန်မြို့ နိုဗိုတယ် ဟိုတယ်၌ ကျင်းပသည်။



အခမ်းအနားတွင် လျှပ်စစ်နှင့် စွမ်းအင်ဝန်ကြီးဌာန ပြည်ထောင်စု ဝန်ကြီး ဦးဝင်းခိုင်၊ ဆောက်လုပ်ရေး ဝန်ကြီးဌာန ပြည်ထောင်စု ဝန်ကြီး ဦးဟန်ဇော်၊ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း၊ မြန်မာ နိုင်ငံအင်ဂျင်နီယာအသင်း ဥက္ကဋ္ဌ ဦးအောင်မြင့်၊ အာဆီယံအင်ဂျင်နီယာ အဖွဲ့ချုပ် ဥက္ကဋ္ဌ Dr. HiruDewanto တို့က နှုတ်ခွန်းဆက် အမှာစကားများ ပြောကြားခဲ့ကြသည်။

ပေးအပ်ချီးမြှင့်

ယင်းနောက် မြန်မာနိုင်ငံ အင်ဂျင် နီယာအသင်း ဥက္ကဋ္ဌနှင့် အာဆီယံ အင်ဂျင်နီယာအဖွဲ့ချုပ် ဥက္ကဋ္ဌတို့က အာဆီယံ အင်ဂျင်နီယာအဖွဲ့ချုပ် ဂုဏ်ထူးဆောင်လက်မှတ်နှင့် ဆုတံဆိပ် ရရှိသူများအား လည်းကောင်း၊ မြန်မာ နိုင်ငံ အင်ဂျင်နီယာအသင်း ဥက္ကဋ္ဌနှင့် AER Head Commissioner တို့က အာဆီယံအင်ဂျင်နီယာ မှတ်ပုံတင် လက်မှတ်ရရှိသူများအားလည်းကောင်း၊ မြန်မာနိုင်ငံ အင်ဂျင်နီယာ အသင်း ဥက္ကဋ္ဌက မြန်မာနိုင်ငံ အင်ဂျင်နီယာ အသင်း ဂုဏ်ထူးဆောင် လက်မှတ်နှင့် ဆုတံဆိပ်ရရှိသူများအားလည်းကောင်း ဆုတံဆိပ်နှင့် ဂုဏ်ထူးဆောင်လက်မှတ် များ အသီးသီးပေးအပ် ချီးမြှင့်ခဲ့သည်။

အခမ်းအနားတွင် မြန်မာနိုင်ငံ အင်ဂျင်နီယာအသင်းက ထူထောင် ဖွင့်လှစ်သွားရန်ရှိသည့် Myanmar Engineering Society (MES) Academy အတွက် အင်ဂျင်နီယာ နည်းပညာဆိုင်ရာပညာရပ် ဖွံ့ဖြိုး တိုးတက်ရေး ပူးပေါင်းဆောင်ရွက်မှု များ ပြုလုပ်သွားရန် မြန်မာနိုင်ငံ အင်ဂျင်နီယာအသင်းနှင့် မလေးရှား အင်ဂျင်နီယာအသင်းတို့အကြား နားလည်မှုစာချွန်လွှာကို လက်မှတ် ရေးထိုးခဲ့ပြီး MES Academy မှ AGTI လက်မှတ်ရရှိပြီးနောက် ထိုက်သင့်သော လုပ်သက်ရှိပြီးသူများ မှတ်ပုံတင်အင်ဂျင်နီယာလက်မှတ် ပိုမို လျင်မြန်စွာ ရယူနိုင်ရန် အဆင့်မြင့် သင်ကြားပို့ချမှုများနှင့် Graduate နှင့်Diploma စာမေးပွဲများ ကျင်းပ ခြင်း၊ မှတ်ပုံတင်အင်ဂျင်နီယာလက်မှတ် ရယူမည့် နည်းပညာတက္ကသိုလ်များ မှ ဘွဲ့ရအင်ဂျင်နီယာများ အတွက်Immediate Professional Development Program များ ပို့ချ ခြင်း၊ အင်ဂျင်နီယာနှင့် နည်းပညာ အသက်မွေးဝမ်းကျောင်း ဖွံ့ဖြိုး တိုးတက်ရေး အရည်အသွေးမြှင့် သင်တန်းများပို့ချခြင်းများ ဆောင် ရွက်သွားမည်ဖြစ်ကြောင်း သိရ သည်။

သတင်းစဉ်