နေပြည်တော် ဇန်န၀ါရီ ၂၅
ပြန်ကြားရေးဝန်ကြီးဌာန ဒုတိယ၀န်ကြီး ဦးအောင်လှထွန်းသည် ယနေ့ နံနက်ပိုင်းတွင် နေပြည်တော် ဇေယျာသီရိမြို့နယ် ခရေပင်လမ်းခွဲရှိ ပြန်ကြားရေးဝန်ကြီးဌာန သတင်းနှင့်စာနယ်ဇင်းလုပ်ငန်း ၊ မြန်မာ့အလင်းသတင်းစာတိုက်၊ ကြေးမုံသတင်း စာတိုက်၊ နေပြည်တော် သတင်းစာတိုက်နှင့် ပုံနှိပ်ရေးနှင့်စာအုပ်ထုတ်ဝေရေး ဦးစီးဌာန ပုံနှိပ်စက်ရုံတို့ကို လှည့်လည်ကြည့်ရှု စစ်ဆေးပြီး ၀န်ထမ်းများနှင့် တွေ့ဆုံသည်။
ရှေးဦးစွာ ဒုတိယ၀န်ကြီးနှင့် တာဝန်ရှိသူများသည် ခရေပင်လမ်းခွဲရှိ သတင်းနှင့် စာနယ်ဇင်းလုပ်ငန်း နေပြည်တော် သတင်းစာတိုက်အတွင်း ဆေးခန်းနှင့် ၀န်ထမ်းများ အပန်းဖြေခန်း ဖွင့်လှစ်ထားရှိမှု အခြေအနေများအား လှည့်လည်ကြည့်ရှု စစ်ဆေးပြီး လိုအပ်သည်များ မှာကြားသည်။
ထို့နောက် ဒုတိယ၀န်ကြီးနှင့် တာဝန်ရှိသူများသည် နေပြည်တော် သတင်းစာတိုက်ရှိ အစည်းအဝေးခန်းမ၊ စာကြည့်တိုက်၊ ပုံနှိပ်စီစဉ်ရေးဌာန၊ ကွန်ပျူတာ သင်တန်းခန်းမနှင့် ပုံနှိပ်စက်ဟောင်းပြတိုက် ဖွင့်လှစ်ထားရှိမှု အခြေအနေများကို ကြည့်ရှု စစ်ဆေးသည်။
ယင်းနောက် ၀န်ထမ်းမိသားစု မူကြိုကျောင်းသို့ ရောက်ရှိပြီး ကလေးများအား အမှတ်တရ လက်ဆောင်ပစ္စည်းများ ပေးအပ်ကာ မူကြိုကျောင်း ပြင်ပကလေးကစားကွင်း၊ သတင်းနှင့် စာနယ်ဇင်းဝန်ထမ်းများ ကျန်းမာကြံ့ခိုင်စေရန်အတွက် ဖွင့်လှစ်ထားသည့် ဖူဆယ်ဘောလုံးကွင်း၊ ဘော်လီဘောကွင်းနှင့် ပိုက်ကျော်ခြင်းကွင်းတည် ဆောက်ထားမှု အခြေအနေများအား ကြည့်ရှုစစ်ဆေးသည်။
ဆက်လက်၍ ၀န်ထမ်းအိမ်ရာများနှင့် လူပျိုဆောင်/အပျိုဆောင်များရှိ သီးပင်စားပင် စိုက်ပျိုးထားရှိမှုများ၊ ပန်းခြံစိုက်ပျိုး ထားရှိမှု အခြေအနေများနှင့် ၀န်ထမ်း သက်သာ ဈေးဆိုင်တန်းများ ဖွင့်လှစ်ရောင်းချမှု အခြေအနေများအား လှည့်လည် ကြည့်ရှုစစ်ဆေးသည်။
ယင်းနောက် ပုံနှိပ်ရေးနှင့်စာအုပ် ထုတ်ဝေရေးဦးစီးဌာန ပုံနှိပ်စက်ရုံတွင် ပညာရေး ဝန်ကြီးဌာနအတွက် ကျောင်းသုံး ပြဋ္ဌာန်းစာအုပ်များ ရိုက်နှိပ်နေမှုကို ကြည့်ရှုစစ်ဆေးပြီး အချိန်မီပြီးစီးနိုင်ရေး တာဝန်ရှိသူများအား လမ်းညွှန်မှာကြားသည်။
ထို့နောက် ဒုတိယ၀န်ကြီးနှင့် တာဝန်ရှိသူများသည် မြန်မာ့အလင်း သတင်းစာတိုက်နှင့် ကြေးမုံ သတင်းစာတိုက်တို့ရှိ သတင်းခန်းနှင့် ပုံနှိပ်စက်တို့အား ကြည့်ရှုစစ်ဆေးပြီး တာဝန်ရှိသူများ၏ ရှင်းလင်း တင်ပြမှုများအပေါ် ပေါင်းစပ်ညှိနှိုင်း ဆောင်ရွက်ပေးသည်။
မွန်းလွဲပိုင်းတွင် ဒုတိယ၀န်ကြီးသည် သတင်းနှင့်စာနယ်ဇင်း လုပ်ငန်းနှင့် ပုံနှိပ်ရေးနှင့် ထုတ်ဝေရေး ဦးစီးဌာနတို့မှ ၀န်ထမ်းများနှင့် ဘိုးဝဇီရခန်းမ၌ တွေ့ဆုံစဉ် ဒုတိယ ၀န်ကြီးက အခြေအနေအရ ဝန်ထမ်းများနှင့် မကြာခဏ တွေ့ဆုံခွင့် မရရှိသော်လည်း ယခုကဲ့သို့ တွေ့ဆုံခွင့်ရရှိရန် အစဉ်သဖြင့် ဆန္ဒရှိပါကြောင်း၊ ၀န်ထမ်း များအနေဖြင့် မိမိတို့၏ လိုအပ်ချက်နှင့် အခက်အခဲများကို ပွင့်လင်းစွာ တင်ပြကြမှသာ ဆောင်ရွက်နိုင်သည်များကို အမြန်ဆုံး၊ အဖြစ်နိုင်ဆုံး လုပ်ဆောင်ပေးနိုင်မည်ဖြစ် ကြောင်း ပြောကြားသည်။
ထို့နောက် ပုံနှိပ်ရေးနှင့် ထုတ်ဝေရေးဦးစီးဌာနမှ ၀န်ထမ်းများ၊ သတင်းနှင့်စာနယ် ဇင်းလုပ်ငန်း လက်အောက်ရှိကြေးမုံ၊ မြန်မာ့အလင်း သတင်းစာတိုက်များနှင့် နေပြည်တော် သတင်းစာတိုက်၊ သတင်းစဉ်တို့မှ ၀န်ထမ်းများက ကျန်းမာရေးနှင့် လူမှုဖူလုံရေး အသိပညာပေး ဟောပြောပွဲများ ဆောင်ရွက်နိုင်ရေး၊ ရွေ့လျားမိုဘိုင်းဆေးစမ်းသပ်ကုသပေးမှု အစီအစဉ်များဆောင်ရွက်ပေးရေး၊ ၀န်ထမ်းများ အပန်းဖြေခရီးစဉ်များ ပြုလုပ်ပေးရေး၊ ဝန်ထမ်း ကလောင်သစ်များအတွက် သတင်းစာ ဆောင်းပါးများ ရေးသားခွင့် ပိုမိုရရှိရေး၊ အခြားဌာနများနှင့် ဆက်သွယ်သတင်းရယူရာတွင် ကြုံတွေ့ရ သည့် အခက်အခဲများကို တင်ပြဆွေးနွေးကြရာ ဒုတိယ၀န်ကြီးက တင်ပြဆွေးနွေးမှုများ အပေါ် ပြန်လည်သုံးသပ်ဆွေးနွေးသည်။
ယင်းနောက် ပုံနှိပ်ရေးနှင့် ထုတ်ဝေရေးဦးစီးဌာနမှ ညွှန်ကြားရေးမှူးချုပ် ဦးအောင်မျိုးမြင့်နှင့် သတင်းနှင့် စာနယ်ဇင်းလုပ်ငန်း ဦးဆောင်ညွှန်ကြားရေးမှူး ဦးရဲနိုင်တို့က ၀န်ထမ်းများ၏ တင်ပြချက်များအပေါ် ဆောင်ရွက်ပြီးစီးမှုနှင့် ဖြည့်ဆည်းဆောင် ရွက်ပေးမည့် လုပ်ငန်းများနှင့်စပ်လျဉ်း၍ ရှင်းလင်းပြောကြားသည်။
ထို့နောက် ဒုတိယ၀န်ကြီးက နိဂုံးချုပ်စကားပြောကြားပြီး အခမ်းအနားကို ရုပ်သိမ်းလိုက်သည်။
(သတင်းစဉ်)
No comments:
Post a Comment