ဒုတိယသမ္မတ ဒေါက်တာစိုင်းမောက်ခမ်း ရခိုင်ပြည်နယ်အတွင်း ရေကြီးရေလျှံမှုဖြစ်ပေါ်ခဲ့သည့် နေရာများအား ကြည့်ရှုစစ်ဆေး

နေပြည်တော် ဇူလိုင် ၁၇

ရခိုင်ပြည်နယ်အတွင်း ရေကြီးရေလျှံမှုဖြစ်ပေါ်ခဲ့သည့်နေရာများ၌ ပြည်လည်ထူ ထောင်ရေးလုပ်ငန်းများ ဆောင်ရွက်မှု အခြေ အနေကို ကြည့်ရှု စစ်ဆေးရန် သံတွဲမြို့၌ ရောက်ရှိနေသည့် ပြည်ထောင်စုသမ္မတ မြန်မာနိုင်ငံတော် ဒုတိယ သမ္မတ ဒေါက်တာ စိုင်းမောက်ခမ်းသည် ပြည်နယ်ဝန်ကြီးချုပ် ဦးမောင်မောင်အုန်း၊ ဒုတိယဝန်ကြီးများ၊ တာဝန်ရှိသူများနှင့်အတူ ယနေ့နံနက်ပိုင်းတွင်

 

အမ်းမြို့သို့ရောက်ရှိကြပြီး ရွှေအမ်းတောင် ခန်းမ၌ ရခိုင်ပြည်နယ်အစိုးရအဖွဲ့ဝင်များ၊ လွှတ်တော်ကိုယ်စားလှယ်များ၊ ဖွံ့ဖြိုးတိုး တက်ရေး အထောက် အကူပြု ကော်မတီအဖွဲ့များ၊ မြို့မိမြို့ဖများ၊ လူမှုရေးအသင်းအဖွဲ့ များ၊ ရေဘေးသင့်ပြည်သူများနှင့်တွေ့ဆုံ၍ လတ်တလောလိုအပ်သည့် ထောက်ပံ့ ပစ္စည်းများကို ပေးအပ်သည်။

ထိုသို့တွေ့ဆုံရာတွင် ဒုတိယသမ္မတက ရခိုင်ပြည်နယ်ရှိ အမ်းမြို့နယ်အပါအ၀င် မြို့နယ် (၁၄)မြို့နယ်သည် မိုးသည်းထန်စွာ ရွာသွန်းမှုကြောင့် ရေးဘေးဒဏ်ခံခဲ့ရပြီး လူ၊ တိရစ္ဆာန်၊ နေအိမ်၊ စာသင်ကျောင်း၊ လမ်းနှင့် တံတားများ ပျက်စီးဆုံးရှုံးခဲ့သည့် အတွက် အရေးပေါ် ကူညီထောက်ပံ့နိုင်ရန် နိုင်ငံတော်သမ္မတ၏ သီးသန့် ရန်ပုံငွေမှ ကျခံဆောင်ရွက်ပေးလျက်ရှိပါကြောင်း၊ အမ်းမြို့နယ်အတွင်း ပျက်စီးဆုံးရှုံးခဲ့သည့် လမ်း၊ တံတား၊ စာသင်ကျောင်း စသည့်ဆုံးရှုံးနစ်နာမှုများကို အချိန်တိုအတွင်း ပြန်လည် တည်ဆောက်နိုင်ရန် ဗဟို ကော်မတီနှင့် လုပ်ငန်းကော်မတီများဖွဲ့စည်း၍ စနစ်တကျ ဆောင်ရွက်လျက်ရှိပါကြောင်း။

ထို့ပြင် ရေတို၊ ရေရှည် စီမံချက်များချမှတ်၍ ဆောင်ရွက်သင့်သည့် လုပ်ငန်းများ ကိုလည်း ဦးစားပေး အစီအစဉ်အလိုက် ဆောင်ရွက်ပေးသွားမည်ဖြစ်ပါကြောင်း၊ ရခိုင် ပြည်နယ်အတွင်းရှိ လမ်း၊ တံတားများ ရေရှည်တည်တံ့ ခိုင်မြဲရေးအတွက်လည်း သက်ဆိုင်ရာဝန်ကြီးဌာနများက စီမံချက်များချမှတ် ဆောင်ရွက် ပေးသွား မည်ဖြစ်ပါကြောင်း။

ရခိုင်ပြည်နယ်ဖွံ့ဖြိုး တိုးတက်ရေး အတွက် လိုအပ်ချက်များ၊ ရေဘေးကြောင့် လတ်တလောဖြည့်ဆည်း ဆောင်ရွက် ပေးရမည့် အခြေအနေများနှင့် ရေရှည်တွင် သဘာဝဘေးအန္တရာယ် ဖြစ်ပေါ်လာနိုင်မှုအတွက် လိုအပ်ချက်များကို တင်ပြဆွေးနွေး ကြရန်နှင့် လိုအပ်သည်များ ပေါင်းစပ်ညှိနှိုင်း ဆောင်ရွက်ပေးသွားမည် ဖြစ်ကြောင်း ပြောကြားသည်။

ဆက်လက်၍ ပြည်နယ်ဝန်ကြီးချုပ် ဦးမောင်မောင်အုန်းက ရခိုင်ပြည်နယ်အတွင်း ရေဘေးကြောင့် ပျက်စီးဆုံးရှုံး မှုများအပေါ် ဖြည့်ဆည်းဆောင်ရွက်ပေးခဲ့မှုများနှင့် ဆက်လက်ဆောင်ရွက်မည့် အစီအစဉ်များကို ရှင်းလင်း တင်ပြသည်။

ထို့နောက် ဒုတိယသမ္မတနှင့် တာဝန်ရှိသူများက အမ်းမြို့နယ်အတွင်းရှိ ကျေးရွာ ပေါင်း(၃၅)ရွာအတွက် လတ်တလောလိုအပ်သည့် ထောက်ပံ့ပစ္စည်းများနှင့် ဆိုလာ မီးအိမ်များကို ပေးအပ်ကြရာ တာဝန်ရှိသူများက လက်ခံရယူကြသည်။

ယင်းနောက် အမ်းမြို့နယ် စည်ပင်သာယာရေးကော်မတီဥက္ကဋ္ဌ ဦးသန်းထွန်းက အမ်းမြို့နယ်အတွင်း ယခုကဲ့သို့ရေကြီးရေလျှံမှုမျိုး ထပ်မံမဖြစ်ပွားစေရန် ဆောင်ရွက် ရမည့်လုပ်ငန်းစဉ်များကို ရှင်းလင်းတင်ပြသည်။

ထို့နောက် ဒုတိယသမ္မတက ပြန်လည်သုံးသပ်ဆွေးနွေးပြီး နိုင်ငံတော်သမ္မတ၏ သီးသန့်ရန်ပုံငွေဖြင့် လတ် တလော ရေဘေးကြောင့်ကြုံတွေ့နေရသည့် အခက်အခဲ များကို ဖြေရှင်းဆောင်ရွက်နေပါကြောင်း၊ ချောင်းများ၊ မြောင်းများ တူးဖော်ခြင်းနှင့် လမ်းတံတားများတည်ဆောက်ပေးရန် စသည့်ကိစ္စရပ်များကို ရေရှည်စီမံချက်များ ချမှတ်၍ ဆောင်ရွက်ရမည့် လုပ်ငန်းစဉ်များဖြစ်၍ နိုင်ငံတော်၏ ဘဏ္ဍာရေးအခြေအနေ ပေါ်မူတည်ပြီး စီမံကိန်းလျာထားချက်တွင် ပါဝင်အောင် ဆောင်ရွက်ပေးမည် ဖြစ်ပါကြောင်း၊ ဒေသခံပြည်သူများ အနေဖြင့် လည်း ချောင်းနှင့်ရေနုတ်မြောင်းများ တူးဖော်ရှင်းလင်းဖယ်ရှားရာတွင် နိုင်ငံတော်အစိုးရနှင့်အတူ ပူးပေါင်းပါဝင် ဆောင်ရွက် ကြရန် တိုက်တွန်းလိုပါကြောင်း အမ်းမြို့နယ် ပြည်သူများ၏ တင်ပြချက်များကိုလည်း တတ်နိုင် သရွေ့ ညှိနှိုင်းကူညီဆောင်ရွက်ပေးသွားမည်ဖြစ်ကြောင်း မှာကြားသည်။

ဆက်လက်၍ ဒုတိယသမ္မတနှင့်အဖွဲ့ဝင်များသည် အမ်းမြို့နယ်ရှိ လုံးကျေးရွာသို့ ရောက်ရှိကြပြီး ရေဘေးသင့်ပြည်သူများနှင့်တွေ့ဆုံ အားပေးစကားပြောကြားကာ  ဒေသခံများ၏ စီးပွားရေး၊ ကျန်းမာရေးနှင့် ဖြည့်ဆည်းဆောင်ရွက်ပေးရမည့် လိုအပ်ချက် များကို မေးမြန်းသည်။

ထို့နောက် ဒုတိယသမ္မတနှင့်အဖွဲ့ဝင်များသည် လတ်တလောလိုအပ်သည့် ထောက်ပံ့ပစ္စည်းများပေးအပ်ခြင်း အခမ်းအနားသို့တက်ရောက်၍ ရေးဘေးသင့် လုံးကျေးရွာအတွက် ဆန်၊ ဆီ၊ ပဲ၊ အ၀တ်အထည်၊ ခြင်ထောင်၊ စောင် စသည့် ထောက်ပံ့ပစ္စည်းများနှင့် ဆိုလာမီးအိမ်များကို ရေဘေးသင့်ပြည်သူများထံ ပေးအပ် သည်။

ယင်းနောက် ဒုတိယသမ္မတနှင့်အဖွဲ့ဝင်များသည် အမ်းမြို့မှ လေကြောင်းခရီးဖြင့် ပြန်လည်ထွက်ခွာရာ မွန်းလွဲပိုင်းတွင် ရန်ကုန်မြို့သို့ရောက်ရှိကြပြီး ရန်ကုန်ပြည်သူ့ ဆေးရုံကြီး Training Centre ၌ကျင်းပသည့်  ရန်ကုန်ပြည်သူ့ဆေးရုံကြီး တိုးချဲ့ ပြုပြင်မွမ်းမံပြင်ဆင်ရေးလုပ်ငန်းကော်မတီနှင့် ဆပ်ကော်မတီများ တွေ့ဆုံညှိနှိုင်း အစည်းအဝေးသို့ တက်ရောက်သည်။

အစည်းအဝေးတွင် ဒုတိယသမ္မတက ရန်ကုန်ပြည်သူ့ဆေးရုံကြီး တိုးချဲ့မွမ်းမံ ပြင်ဆင်ခဲ့သည်မှာ တစ်နှစ်ကျော် ကာလကြာမြင့်ခဲ့ပြီး ပြုပြင်မှုများလည်း အတော်အတန် ခရီးရောက်နေပြီဖြစ်ပါကြောင်း၊ အဆိုပါ ပြုပြင်မွမ်းမံ မှုများနှင့် ပတ်သက်၍ ပြည်သူများ၏ သဘောထားကို ထည့်သွင်းစဉ်းစားရန် လိုအပ်ပါကြောင်း၊ တိုးချဲ့မွမ်းမံ ပြင်ဆင်ခြင်း လုပ်ငန်းများ တိုးတက်မှုရှိလာပြီဖြစ်သော်လည်း လိုအပ်ချက်များ ရှိနေဆဲဖြစ်ပါကြောင်း၊ ယင်းလိုအပ်ချက်များကို ဆပ်ကော်မတီအသီးသီးက သက်ဆိုင်ရာကဏ္ဍများအလိုက် ဆောင်ရွက်ပြီးစီးမှုနှင့် ဆက်လက်ဆောင်ရွက်မည့် လုပ်ငန်းစဉ်များအား အချိန်မီ ပြီးစီးနိုင်ရေး ဆောင်ရွက်ထားရှိမှုအခြေအနေများကို ရှင်းလင်းတင်ပြကြရန် ပြောကြား သည်။

ထို့နောက် ရန်ကုန်ပြည်သူ့ဆေးရုံကြီး တည်ဆောက်ရေးလုပ်ငန်းကော်မတီဥက္ကဋ္ဌ ရန်ကုန်တိုင်းဒေသကြီး ၀န်ကြီးချုပ် ဦးမြင့်ဆွေ၊ တိုင်းဒေသကြီး လူမှုရေးဝန်ကြီး ဒေါက်တာမြင့်သိန်းနှင့် သက်ဆိုင်ရာဆပ်ကော်မတီ များမှ တာဝန်ရှိသူများက ရန်ကုန် ဆေးရုံကြီး၏ တိုးချဲ့မွမ်းမံပြင်ဆင်ခြင်းလုပ်ငန်းများ အကောင်အထည်ဖော် ဆောင်ရွက် နေမှု၊ လျှပ်စစ်မီးကဏ္ဍ စီစဉ်ဆောင်ရွက်ထားရှိမှု၊ တိုးချဲ့(၅)ထပ်ဆောင်သစ်သို့ လူနာများရွှေ့ ပြောင်းထားရှိမှု၊ ခွဲစိတ်ခန်းသုံးပစ္စည်းနှင့် စက်ကိရိယာများ ဖြည့်ဆည်းပေး နိုင်မှု၊ ရန်ကုန်ပြည်သူ့ဆေးရုံကြီး ပင်မဆောင်အကြီးစားပြုပြင်ခြင်းလုပ်ငန်း ဆောင်ရွက် ပြီးစီးမှု၊ ဆေးရုံကြီးဘက်စုံပြုပြင်မွမ်းမံမှုအတွက် ဘဏ္ဍာရန်ပုံငွေ ရရှိမှုနှင့် သုံးစွဲမှု အခြေ အနေများကို မှတ်တမ်းဓာတ်ပုံများဖြင့် ရှင်းလင်းတင်ပြပြီး ဒုတိယ၀န်ကြီး ဒေါက်တာ ၀င်းမြင့်ကလည်း ဖြည့်စွက်ရှင်းလင်းတင်ပြသည်။

ဆက်လက်၍ ဒုတိယသမ္မတက လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးပြီး ရန်ကုန်ပြည်သူ့ ဆေးရုံကြီး ပြုပြင်မွမ်းမံ တည်ဆောက်ရေးလုပ်ငန်း များအား သတ်မှတ်ချိန်အတွင်းပြီးစီးအောင် ဆောင်ရွက် သွားကြရန်နှင့် တိုးချဲ့တပ်ဆင် ထားသည့် စက်ပစ္စည်းများအတွက် လျှပ်စစ်ဓာတ်အား အလုံအလောက်ရရှိရန် ဆပ်ကော်မတီများနှင့် သက်ဆိုင်ရာဝန်ကြီးဌာနများ ညှိနှိုင်းပေါင်းစပ်ဆောင်ရွက်ကြရန် မှာကြားသည်။

ထို့နောက် ဒုတိယသမ္မတသည် ပင်မအဆောက်အအုံနှင့် တိုးချဲ့(၅)ထပ်ဆောင် သို့ လူနာများပြောင်းရွှေ့ နေရာချထားမှု၊ စက်ပစ္စည်းများ တပ်ဆင်ပြီးစီးမှုအခြေအနေ များကို ကြည့်ရှုစစ်ဆေးပြီး တက်ရောက် ကုသမှုခံယူနေကြသည့် လူနာများနှင့် လူနာ စောင့်များ၊ ဆရာ ဆရာမများအား နှုတ်ဆက်အားပေးစကား ပြောကြားသည်။