ကရင်ပြည်နယ်ဝန်ကြီးချုပ်ဦးစောမြင့်ဦး မြိုင်ကလေးဘိလပ်မြေစက်ရုံ တန်(၄၀၀၀)နှင့် တန်(၉၀၀)စက်ရုံများမှ ဝန်ထမ်းများအား ကိုဗစ်-၁၉ ကာကွယ်ရေးပစ္စည်းများ သွားရောက်ထောက်ပံ့လှူဒါန်း

 

ဘားအံ ဩဂုတ် ၂၄

ကရင်ပြည်နယ်အစိုးရအဖွဲ့ ပြည်နယ်ဝန်ကြီးချုပ်ဦးစောမြင့်ဦးနှင့် အစိုးရအဖွဲ့ဝင်ဝန်ကြီးများသည် ဘားအံမြို့ မြိုင်ကလေး အမှတ် (၂) ဘိလပ်မြေစက်ရုံတန် (၄၀၀၀) နှင့် တန် (၉၀၀) ဘိလပ်မြေစက်ရုံများမှ ဝန်ထမ်းများအား ယမန်နေ့မွန်းလွဲပိုင်းက ကိုဗစ်-၁၉ ကာကွယ်ရေးပစ္စည်းများ သွားရောက်ထောက်ပံ့လှူဒါန်းခဲ့ကြသည်။

 ထို့သို့ သွားရောက်ထောက်ပံ့လှူဒါန်းရာတွင် အမှတ် (၂) ဘိလပ်မြေစက်ရုံ တန်(၄၀၀၀) စက်ရုံမှူးကြီးရုံးခန်း အစည်း အဝေးခန်းမ၌ ဘိလပ်မြေစက်ရုံ တာဝန်ရှိသူများနှင့်တွေ့ဆုံရာ စက်ရုံမှူးကြီး ဦးကျော်ကျော်စိုး၊ ဒုတိယစက်ရုံမှူးများနှင့် တာဝန်ရှိသူများက စက်ရုံဆိုင်ရာအချက်အလက်များ၊ တည်နေရာ၊အကျယ်အဝန်းနှင့်သမိုင်း၊ လုံခြုံရေးဆိုင်ရာစီမံ ဆောင်ရွက်ထားမှုများ၊ စက်ရုံဖွဲ့စည်းပုံနှင့် ဝန်ထမ်းအင်အားခန့်ထားမှုများ၊ ရင်းနှီးမြှုပ်နှံဆောင်ရွက်ခဲ့မှု၊ မြေယာလွဲပြောင်း ပြီးစီးခဲ့မှု့၊ ဘိလပ်မြေလျာထား၊ ထုတ်လုပ်၊ဖြန့်ဖြူးနိုင်မှုအခြေအနေ၊ ဝင်ငွေ/အသုံးစရိတ်နှင့်အမြတ်ရရှိမှုအခြေအနေ၊ ပတ်ဝန်းကျင်ထိန်းသိမ်းရေးဆိုင်ရာ ဆောင်ရွက်မှုအခြေအနေများကို ရှင်းလင်းတင်ပြခဲ့ကြရာ ပြည်နယ်ဝန်ကြီးချုပ်က သိရှိလိုသည်များ မေးမြန်းဆွေးနွေးပြီး စက်ရုံဝန်ထမ်းများအား ကိုဗစ်-၁၉ ကာကွယ်ဆေးထိုးနှံပေးနိုင်ရေး၊ ဝန်ထမ်း မိသားစုဝင်များအား နိုင်ငံသားစိစစ်ရေးကတ်ပြားများဆောင်ရွက်ပေးနိုင်ရေးနှင့် လိုအပ်သည်များအား ပေါင်းစပ်ညှိနှိုင်း ဆောင်ရွက်ပေးခဲ့ကာ တန်(၄၀၀၀)ဘိလပ်မြေစက်ရုံဝန်ထမ်းများအတွက် ပါးစပ်နှင့်နှာခေါင်းစည် Mask ၆၀၀၀နှင့် တန်(၉၀၀) ဘိလပ်မြေစက်ရုံဝန်ထမ်းများအတွက် Mask ၄၀၀၀ တို့ကို ထောက်ပံ့လှူဒါန်းပေးခဲ့သည်။

 ထို့နောက် ပြည်နယ်ဝန်ကြီးချုပ်နှင့် တာဝန်ရှိသူများသည် အမှတ် (၂) ဘိလပ်မြေစက်ရုံ (တန်-၄၀၀) ၏ မီးသင်းဖို ပြင်ဆင်ပြီးစီးမှုနှင့် တန်-၉၀၀ ဘိလပ်မြေစက်ရုံ လည်ပတ်နေမှု အခြေအနေများအား သွားရောက်ကြည့်ရှု့စစ်ဆေးခဲ့ရာ စက်ရုံမှူးကြီးနှင့် တာဝန်ရှိသူများက လိုက်လံရှင်းလင်းတင်ပြခဲ့ကြပြီး ပြည်နယ်ဝန်ကြီးချုပ်က လိုအပ်သည်များ လမ်းညွှန်မှာကြားခဲ့ကြောင်း သတင်းရရှိသည်။

 စောမျိုးမင်းသိန်း