နေပြည်တော် ဇူလိုင်
၂၉
မြန်မာနိုင်ငံအတွင်း
ကျားများကျင်လည်ကျက်စားနေသည့် နယ်မြေသည် နိုင်ငံဧရိယာ၏ ခုနစ်ရာခိုင်နှုန်းခန့် ဧကအားဖြင့်
၁၂ သန်းကျော်ရှိပြီး လေ့လာမှုများအရ ကျင်လည်ကျက်စားသည့် နယ်မြေရှစ်ရာခိုင်နှုန်း အတွင်း
အနည်းဆုံးကျား ၂၂ ကောင် ရှင်သန်ကျက်စားနေကြောင်း သစ်တောဦးစီးဌာနက ယနေ့ကျရောက်သည့် ကမ္ဘာ့ကျားများနေ့တွင်
ထုတ်ပြန်သည်။
အဆိုပါ အရေအတွက်သည်
ကျားကျက်စားနယ်မြေ စုစုပေါင်း ရှစ်ရာခိုင်နှုန်းခန့်အတွင်း ၂၀၁၆ ခုနှစ်မှ ၂၀၁၈ ခုနှစ်အတွင်း
တပ်ဆင်ခဲ့သည့် ကင်မရာထောင်ချောက်များမှ ရရှိသည့် ကျားမှတ်တမ်း ဓာတ်ပုံများကို တစ်ကောင်ချင်း
စိစစ်ခွဲခြားရာမှ ရရှိသည့် အရေအတွက်ဖြစ်ကြောင်း သိရသည်။
“ ကမ္ဘာပေါ်က ကျားရှိတဲ့
နိုင်ငံ ၁၃ နိုင်ငံသာရှိတဲ့အထဲမှာ မြန်မာနိုင်ငံက တစ်နိုင်ငံအပါအဝင် ဖြစ်တဲ့အတွက် ဂုဏ်ယူပါတယ်။
နိုင်ငံထဲမှာ အရည်အသွေးကောင်းမွန်တဲ့ သစ်တောတွေရှိနေဆဲဖြစ်ပြီး ကျားတွေပေါက်ပွားနိုင်နေ
သေးတယ်ဆိုတဲ့အချက်က အနာဂတ်မှာ ကျားကောင်ရေတိုးပွားလာဖို့ ကျွန်တော်တို့ရဲ့ မျှော်လင့်ချက်ကို
ပိုမိုခိုင်မာစေ ပါတယ်။ မြန်မာ့အနာဂတ်မျိုးဆက်တွေက အာရှရဲ့ အထင်ကရမျိုးစိတ်ဖြစ်တဲ့
ကျားတွေနဲ့အတူ ယှဉ်တွဲနေထိုင်ရင်း ဂုဏ်ယူနိုင်ဖို့အတွက် ကျွန်တော်တို့ရဲ့ ကျားတွေကို
ကာကွယ်ပေးဖို့နဲ့ သူတို့ပေါက်ပွားရှင်သန်နိုင်ဖို့ လုံလောက်တဲ့ ကျက်စားနယ်မြေတွေ ရှိနေစေဖို့
အားလုံးပူးပေါင်းပြီး အထူးကြိုးစားလုပ်ဆောင် သွားကြရမှာပါ” ဟု သယံဇာတနှင့် သဘာဝ ပတ်ဝန်းကျင်ထိန်းသိမ်းရေး
ဝန်ကြီးဌာန ပြည်ထောင်စုဝန်ကြီးဦးအုန်းဝင်းက ပြောကြားသည်။
မြန်မာနိုင်ငံအတွင်း
ကျင်လည်ကျက်စားနေဆဲ ကျားများကို တန်ဖိုးထား ထိန်းသိမ်းရေးအတွက် ရည်ရွယ်၍ မြန်မာ အနုပညာရှင်များကလည်း
အနုပညာလှုပ်ရှားမှုတစ်ခုကို ပြုလုပ်သွားရန် စီစဉ်လျက်ရှိသည်။
“အဖိုးတန် အနုပညာလက်ရာတွေလိုပါပဲ၊
ကျားတစ်ကောင်ချင်းစီဟာ မြန်မာနိုင်ငံရဲ့ဂုဏ်ယူစရာ အမွေအနှစ်ဖြစ်ပါတယ်။ ကျွန်တော်တို့ဟာ
ဇီဝမျိုးစုံမျိုးကွဲ ထိန်းသိမ်းရေးဆိုင်ရာ မိတ်ဖက်အဖွဲ့အစည်းတွေ၊ ဆက်စပ် ဌာနအဖွဲ့အစည်းတွေနဲ့
ပူးပေါင်းပြီး ကျွန်တော်တို့ရဲ့ ကျားတွေကို ကာကွယ်စောင့်ရှောက်သွားမှာဖြစ်ပါတယ်။ ကျားအပါအဝင်တောရိုင်း
တိရစ္ဆာန် တွေကို အမဲလိုက်သတ်ဖြတ်တာတွေ အားမပေးဖို့၊ ကိုယ်တိုင် လည်း မကျူးလွန်ကြဖို့နဲ့
ကျားတွေ ပိုင်ဆိုင်တဲ့နိုင်ငံ တစ်နိုင်ငံအဖြစ် ဆက်လက်တည်တံ့နေစေရေးအတွက် ပြည်သူတွေအနေနဲ့လည်း
အတူတကွကြိုးပမ်းကြဖို့ တိုက်တွန်း လိုပါတယ်” ဟု သစ်တောဦးစီးဌာန ညွှန်ကြားရေးမှူးချုပ်
ဒေါက်တာ ညီညီကျော်က ပြောကြားသည်။
IUCN မှ ထုတ်ပြန်ထားသည့်
ခြိမ်းခြောက်မှုခံနေရသော မျိုးစိတ်များ စာရင်းတွင် ကျားကိုမျိုးသုဉ်းရန်အန္တရာယ်ရှိသော
မျိုးစိတ်အဖြစ် ထည့်သွင်းသတ်မှတ်ထားပြီး IUCN ၏၂၀၁၄ ခုနှစ်တွင် ဆောင်ရွက် ခဲ့သော နောက်ဆုံးစစ်တမ်းအရ
ကမ္ဘောဒီးယားနှင့် ဗီယက်နမ်နိုင်ငံ တို့တွင် ကျားများမျိုးသုဉ်းသွားနိုင်ခြေရှိကြောင်း
သိရသည်။
ထို့ပြင် တစ်ကမ္ဘာလုံးအတိုင်းအတာဖြင့်
သဘာဝကျားကောင်ရေ ၄၀၀၀ အောက်သာရှိကာ အများစုမှာ အိန္ဒိယတွင်ဖြစ်ပြီး အရှေ့တောင် အာရှ
အနေဖြင့် မကြာသေးမီ ဆယ်စုနှစ်များအတွင်းက သဘာဝကျားကောင်ရေ တစ်ရှိန်ထိုးကျဆင်းမှုနှင့်
အတူ ကျားများမျိုးသုဉ်းပျောက်ကွယ်မည့်အန္တရာယ်နှင့် ရင်ဆိုင်နေရကြောင်း သိရသည်။
သတင်းစဉ်
No comments:
Post a Comment