မြန်မာ့စိုက်ပျိုးမွေးမြူရေးထုတ်ကုန်ဈေးကွက်သစ်ဖော်ဆောင်နိုင်ရေးဆွေးနွေး

နေပြည်တော် ဇွန် ၃၀

မြန်မာနိုင်ငံနှင့်ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသတို့ အကြားလယ်ယာကဏ္ဍ ဖွံ့ဖြိုးရေး ၊ စိုက်ပျိုး မွေးမြူရေးဆိုင်ရာ သုတေသနလုပ်ငန်းများတွင် ပူးပေါင်းဆောင်ရွက်ရန်၊ ချစ်ကြည်ရင်းနှီးမှုပိုမိုရရှိ စေရန် ရည်ရွယ်၍ ကွမ်ရှီးကျွမ့်ကိုယ်ပိုင် အုပ်ချုပ် ခွင့်ရဒေသ ပြည်သူ့ကွန်ဂရက်အမြဲတမ်း ကော်မတီ ဒုတိယဥက္ကဋ္ဌ Mr. Zhang Xiu Long နှင့်အဖွဲ့သည် ယမန်နေ့နံနက် ၁၀နာရီတွင် နေပြည်တော်ရှိ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စု ဝန်ကြီးရုံး အစည်းအဝေးခန်းမ၌ ဒုတိယဝန်ကြီးဦးလှကျော် နှင့် တာဝန်ရှိသူများအား လာရောက် တွေ့ဆုံသည်။

နှစ်ဘက်ဆွေးနွေးရာတွင် ကွမ်ရှီးကျွမ့်ကိုယ်ပိုင်အုပ်ချုပ်ခွင့် ရဒေသအနေဖြင့် ဒေသ၏ စားသုံးမှုလိုအပ် ချက်အရ ဈေးကွက်လိုအပ်ချက် ရှိနေမှု၊ နှစ်ဘက် ပညာရှင် များအကြား စိုက်ပျိုးမွေးမြူရေးဆိုင်ရာ နည်းပညာနှင့်သုတေသန လုပ်ငန်းများ ပူးပေါင်းဆောင်ရွက်ရန် ၊ ကွမ်ရှီးကျွမ့်ဒေသတွင်လက်ရှိ အောင်မြင်နေသည့် အစေ့ထုတ်ပြောင်းစိုက်ပျိုးမှုသည် မြန်မာနိုင်ငံ၌ ဖြစ်ထွန်းနိုင်မှု၊ ဓါတုပိုးသတ် ဆေးများ လျော့ ချပြီး သဘာဝနည်းဖြင့် အဖျက်ပိုးကာကွယ်နှိမ်နင်းမှု နည်းပညာဖလှယ်ရေး ၊ မြန်မာ့ စိန်တစ်လုံးသရက်၏ အရည်အသွေးသည် ကွမ်ရှီးကျွမ့်ဒေသ၌ ဈေးကွက် ဝင်ဈေးကောင်း ရရှိနိုင်မှု၊ ကြံဝယ်ယူနိုင်ရေးအတွက် နှစ်ဘက်တာဝန်ရှိသူများနှင့် လုပ်ငန်း ရှင်များအကြား ညှိနှိုင်းဆွေးနွေးရန်လိုအပ်ချက်၊ တရုတ်နိုင်ငံတွင် အောင်မြင်လျက်ရှိသည့် ဝက်မွေးမြူရေး နည်းစနစ်သစ် အသုံးပြုနိုင် ရေးဆိုင်ရာ ကိစ္စရပ်များနှင့် စပ်လျဉ်း၍ ဆွေးနွေးခဲ့ကြကြောင်းသိရသည်။

(သတင်းစဉ်)