ဆယ်ကျော်သက်တို့ကိုယ်တိုင် ပြုပြင်ပြောင်းလဲလာတဲ့ အတွေး အခေါ် အလေ့အကျင့် အလေ့အထများ

ဖယောင်းရုပ်ပမာ

ဆယ်ကျော်သက်တို့အကြောင်းတွေးတိုင်း၊ ကြားတိုင်း၊ တွေ့တိုင်း၊ မြင်တိုင်း ဖယောင်းရုပ်လေးတွေလို ပုံသွင်းရင် ကိုယ်သွင်းတဲ့ ပုံအတိုင်း ဝင်တယ်ဆိုတာကို ဆယ်ကျော်သက် စီမံချက်လုပ်တဲ့ ကျွန်မတို့မျက်ဝါးထင်ထင် တွေ့ရပါတယ်။

မနှစ်က ဆယ်ကျော်သက်လေးတွေအတွက် လှိုင်သာယာမြို့နယ်က ရပ်ကွက် နှစ်ခု၊ ကျေးရွာ တစ်ခုမှာ ဆယ်ကျော်သက် အမျိုးသမီးငယ်လေးတွေကို ကျား/ မအခြေပြု အကြမ်းဖက်ခံရခြင်းမှ ကင်းဝေးအောင်၊ အကြမ်းဖက်ခံရတဲ့ ဆယ်ကျော် သက်လေးတွေရဲ့ဘ၀ ပြန်လည်ရှင်သန်လာအောင် လူမှုရေးအဖွဲ့တစ်ခုဖြစ်တဲ့ အန်ဂျီအိုဂျီဂျီနဲ့ စတင်ဆောင်ရွက်ခဲ့ပါတယ်။

စီမံချက်ကာလမှာ ဆယ်ကျော်သက်အရွယ် (၁၄ နှစ်ဝန်းကျင်) မိန်းကလေးအယောက် ၃၀ နဲ့ စတင်ဆောင်ရွက်ခဲ့တာပါ။ ကျောင်းသူလေးတွေလည်းပါတယ်။ စက်ရုံမှာ လုပ်နေတဲ့ သူတွေလည်းပါပါတယ်။ အိမ်မှာနေတဲ့ သူတွေလည်းပါပါတယ်။

တချို့က အလွန်ကိုရဲတင်းပြီး တချို့က လူအလွန်ကြောက်ပါတယ်။ သင်တန်းတွေပေးနေ တဲ့ အချိန်တွေမှာ အားလုံး ပါဝင် လေ့ကျင့်နိုင်အောင် လုပ်ပေးတဲ့အတွက် ကြောက်တတ်တဲ့ ကလေးတွေ တဖြည်းဖြည်း ရဲတင်း လာကြပါတယ်။ ဝင်ရောက် ဆွေးနွေးရဲလာပါတယ်။

ကလေးတစ်ယောက်က ကျောင်းသွားကျောင်းပြန် အဖေက လိုက်ပို့ပေးရတယ်။ ကျောင်းရောက်ရင် ဘယ်သူနဲ့မှ စကားမပြောဘူး။ အဖေက ဒီစီမံချက်မှာ သူ့သမီးကို ပါဝင်စေပါတယ်။ သင်တန်းတွေ လုပ်ပေးနေတဲ့ ကာလအတွင်းမှာပဲ ဝင်ရောက်ဆွေးနွေးလာတတ်ပါတယ်။ အနေအေးလို့ မတွေးတတ်ဘူးလို့ ထင်လို့မရပါဘူး။ အတွေးတွေကို ထုတ်ဖော် ပြောရဲတဲ့အထိ ပြောတတ်လာပါတယ်။ သူ့မိဘတွေလည်း ဝမ်းသာလာကြပါတယ်။

တစ်ယောက်သော မိန်းကလေးတစ်ဦး က စက်ရုံမှာ အလုပ်လုပ်တယ်။ သင်တန်းအတွေ့အကြုံတွေကို အလုပ်ရှင်ကို ပြန်ပြောပြတဲ့အခါ အလုပ်ရှင်က တက်တက်ကြွကြွအားပေးပြီး သင်တန်းခေါ် ချိန်တွေကို မပျက်မကွက်တက်နိုင်အောင် အားပေးခဲ့ပါတယ်။

စီမံချက်ကာလအတွင်း ပေးခဲ့သောသင်တန်းများ

စီမံချက်မှာပါတဲ့ မိန်းကလေးတိုင်းက သူတို့မိဘတွေကို သင်တန်းအတွေ့အကြုံတွေ ပြန်ပြောပြကြပါတယ်။ မိဘ အုပ်ထိန်းသူတွေက ပထမထင်သလောက် စိတ်ဝင်စားမှုမရှိပေမယ့် သမီးတွေပြန်ပြောပြတဲ့အခါ ပိုမိုစိတ်ဝင်စားလာပြီး သင်တန်းပေးချိန်၊ ဆွေးနွေးပွဲတွေ ပြုလုပ်ချိန်တွေမှာသူတို့ပါ ပါဝင်တက်ရောက်ပြီး သူတို့သမီးတွေအတွက် နှစ်ထောင်း အားရရှိလာတာကိုတွေ့ရပါတယ်။

သင်တန်းတွေပေးတဲ့အခါ ကျား/မ အကြောင်း၊ အမျိုးသမီးတွေနဲ့ လူငယ်အခွင့် အရေးတွေအကြောင်း၊ ဆယ်ကျော်သက်နဲ့ မျိုးဆက်ပွားကျန်းမာရေးအကြောင်း၊ ကျား/မ အခြေပြု အကြမ်းဖက်ခြင်းအကြောင်း၊ အမျိုးသမီးငယ်တွေ အကြမ်းဖက်မခံရ အောင် မိမိကိုယ်မိမိ ကာကွယ်ပုံအကြောင်း၊ ဖြစ်လာရင် ဘာတွေလုပ်ရ မယ်ဆိုတာတွေ၊ အချင်းချင်းဘယ်လို စောင့်ရှောက် ရမယ်ဆိုတာတွေကို စာတွေ့လက်တွေ့ လေ့ကျင့်ပေးတဲ့အခါ မိမိကိုယ်တိုင် လိုက်နာကျင့်သုံးဖို့လိုပြီး မိမိကိုယ်မိမိ တန်ဖိုးရှိအောင်နေဖို့တွေ နားလည်သဘောပေါက်လာကြပါတယ်။ မိမိကိုယ်မိမိ တန်ဖိုးထားတတ်လာကြပါတယ်။

သူတို့အတွက်လိုအပ်တဲ့ ကိုယ်လုံ ကိုယ်ခံပညာကို မြန်မာနိုင်ငံ ကရာတေးအဖွဲ့ချုပ်ရဲ့ မြန်မာ့လက်ရွေးစင် ၁၀ ဦးက လာရောက်လေ့ကျင့်ပေးတဲ့ အခါ ကျား/မအခြေပြု အကြမ်းဖက်ခံရရင် ဘယ်လို ကာကွယ်ရမယ်ဆိုတာကို သိရှိပြီး ကိုယ်တိုင် အားအင်တွေ မွေးထုတ်ရရှိလာကြပါတယ်။ သူတို့အထဲက သင်တန်းသူခြောက်ဦးကို အောင်ဆန်းကွင်းမှာ ခေါ်ယူပြီး ဆက်လက်လေ့ကျင့်စေခဲ့ပြီး မိမိသူငယ်ချင်းတွေကြား ပြန်လည်ဖြန့်ဝေ လေ့ကျင့်ပေးနိုင်အောင် အဖွဲ့ချုပ်က ဆက်လက်ကူညီပေးကြ ပါတယ်။

စာဖတ်ဝိုင်းနှင့် ဆွေးနွေးပွဲများပြုလုပ်ပေးခြင်း

သင်တန်းပေးတာအပြင် တစ်လတစ်ခါ စာဖတ်ဝိုင်းလုပ်ပြီး စာဖတ်လေ့ကျင့်ပေးတဲ့ အခါ သူတို့အရွယ်မှာ ဖတ်သင့်တဲ့ စာအုပ်တွေကို အဓိကထားပြီး သမီးတွေရော မိဘအုပ်ထိန်း သူတွေပါပါဝင်ပြီး ဖတ်လာကြတာကို တွေ့ရပါတယ်။

စာရေးဆရာ ကောင်းသန့်ရဲ့ ‘သမီးလေးဖတ်ဖို့’ ဆိုတဲ့ စာအုပ်တွေနဲ့ လေ့ကျင့်ခဲ့ကြတာပါ။ အလွန်စိတ်ဝင်စားကြပြီး ကိုယ်ပိုင်လိုချင်ကြ တာကို တွေ့ရပါတယ်။ စာဘယ်လို ဖတ်မလဲ၊ ဘယ်လိုနားလည်လဲ၊ ဘယ်လို လေ့ကျင့်မလဲ၊ ဘယ်သူတွေကို ဆက်လက်ဖြန့်ဝေမလဲ ဆိုတဲ့ စနစ်လေးတစ်ခုကို သုံးခဲ့ကြတဲ့အခါ နောက်ပိုင်း ဆယ်ကျော်သက် ယောက်ျားလေးတွေလည်း ပါဝင်လာတာကို တွေ့ရပါတယ်။ သူတို့ကိုယ်တိုင် သူတို့အရွယ်မှာ ဖတ်သင့်ဖတ်ထိုက် တဲ့ စာအုပ်စာပေတွေကို မိတ်ဆွေဖွဲ့တတ်လာပါတယ်။

သင်တန်းက လေ့ကျင့်ပေးလိုက်တဲ့ ခေါင်းစဉ်တွေ၊ စာဖတ်ဝိုင်းက ရရှိလာတဲ့ အသိတွေ၊ အတွေ့အကြုံတွေအပေါ် မူတည်ပြီး သူတို့လိုချင်တဲ့ ခေါင်းစဉ်တွေကို သူတို့ကိုယ်တိုင်၊ သူတို့မိဘတွေကိုယ်တိုင် တောင်းဆိုလာကြပါတယ်။

တောင်းဆိုလာတဲ့ ခေါင်းစဉ်တွေက အကြမ်းဖက်ခံရရင် ဖြစ်ပေါ်လာတဲ့ မျိုးဆက်ပွားကျန်းမာရေး ပြဿနာတွေ မိမိတို့ ပတ်ဝန်းကျင်မှာရှိလာရင် မိမိတို့ ဘာတွေလုပ်ပေးရမလဲဆိုတာတွေ၊ အမျိုးသမီးတွေကို အကာအကွယ်ပေးတဲ့ ဥပဒေ အကြောင်းတွေ၊ ဆယ်ကျော်သက်နဲ့ မူးယစ်ဆေးဝါးအန္တရာယ်အကြောင်းတွေ၊ အကြမ်းဖက်သူတွေက ဆယ်ကျော်သက် အရွယ်တွေကို ဘာကြောင့် အကြမ်းဖက်ကြတာလဲဆိုတာတွေ၊ မိမိတို့ကိုယ်တိုင် ဦးဆောင်မှု၊ ခေါင်းဆောင်မှုတွေ ဘယ်လို လုပ်ရမလဲဆိုတာတွေကို ဆက်လက်သိလိုလာကြပါတယ်။ တာဝန်ယူလို၊ တာဝန်ခံလိုစိတ်တွေ စတင်ပေါ်ပေါက်လာတာကို တွေ့လာရပါတယ်။

ဒါကြောင့်စီမံချက်ကာလအတွင်းမှာပဲ သူတို့လိုချင်တဲ့ ခေါင်းစဉ်တွေကို သူတို့လိုလားတောင့်တချိန်မှာ ရောက်နိုင်ဖို့ သက်ဆိုင်ရာဝါရင့်ပညာရှင်တွေက သူတို့နဲ့လိုက်ဖက်တဲ့ ခေါင်းစဉ်တွေကို လာရောက်ပို့ချကြပါတယ်။

မျိုးဆက်ပွားကျန်းမာရေးပြဿနာတွေကို မိမိတို့ပတ်ဝန်းကျင် မှာရှိလာရင် ဘာလုပ်ရမယ်ဆိုတာကို မာရီစတုပ်စ်အင်တာ နေရှင်နယ်က ဒေါက်တာစစ်နိုင်၊ အမျိုးသမီးတွေကို အကာအကွယ်ပေးတဲ့ ဥပဒေအကြောင်းတွေကို ပါမောက္ခ ဒေါက်တာ မွန်မွန်တာနဲ့ ဒေါ်တင်တင်ရီ၊ ဆယ်ကျော်သက်နဲ့ မူးယစ်ဆေးဝါး အန္တရာယ်အကြောင်းတွေကို မြန်မာနိုင်ငံ မူးယစ်ဆေးဝါး ဆန့်ကျင်ရေးအသင်းက ဒေါက်တာဖြိုးမြတ်၊ အကြမ်းဖက်သူတွေက ဆယ်ကျော်သက်အရွယ်တွေကို ဘာကြောင့် အကြမ်းဖက်ကြတာလဲ ဆိုတာတွေကို နာမည်ကြီးစာရေး ဆရာလည်းဖြစ် မျိုးဆက်ပွားကျန်းမာရေး အကြောင်းတွေကို ပြည်သူလူထုကြား အသိပညာပေးဟောပြောပွဲတွေမှာ အောင်မြင်စွာ ဟောပြောမျှဝေပေးနေသူ လည်းဖြစ်တဲ့ ဒေါက်တာ ဖြိုးသီဟ၊၊ မိမိတို့ကိုယ်တိုင် ဦးဆောင်မှု၊ ခေါင်းဆောင်မှုတွေ ဘယ်လိုလုပ်ရမလဲဆိုတာတွေကို အမျိုးသမီးငယ် ကိစ္စတွေမှာ အားကြိုးမာန်တက် စိတ်ပါဝင်စားစွာ ကူညီဆောင်ရွက်ပေးတဲ့ အဆိုတော်မော်ဒယ် မေဖြူဖြူတို့က သူတို့ကို ဟောပြောပို့ချ ပေးသွားတာတွေကို တာဝန်ယူမယ်ဆိုတဲ့အသိနဲ့ နားထောင်ပြီး ပြန်လည်ဆွေးနွေးနိုင်ခဲ့ပါတယ်။

ဆင့်ပွားမျှဝေကြခြင်း၊ ဝိုင်းဝန်းပံ့ပိုးခြင်း

သူတို့ အယောက် ၃၀ က တစ်ယောက်ကို သူငယ်ချင်းငါးယောက်ကနေ ၁၀ ယောက်အထိ ပြန်လည်ဖြန့်ဝေပေးဖို့ စီမံချက်က တောင်းဆိုလာတာကိုလည်း ကိုယ့်ကိုယ်ကိုယ် ယုံကြည်ချက်အပြည့်နဲ့ သူငယ်ချင်းတွေကို သင်ပေးထားတဲ့ အတိုင်း ပြန်လည်ဖြန့်ဝေပေးနိုင်တာကိုလည်း တွေ့မြင်ကြရပါတယ်။

လူမှုရေးအသိ လူမှုရေးသတိ၊ ကျန်းမာရေးအသိ ကျန်းမာရေး သတိရှိလာတဲ့ စီမံချက်ဝင်အမျိုးသမီးလေးတွေဟာ သူတို့ ကိုယ်သူတို့ ကာကွယ်စောင့်ရှောက် လာသလို သူတို့နဲ့ အနီးအနားမှာ အကြမ်းဖက်ခံရတဲ့ ဆယ်ကျော်သက်လေးတွေကို ဝိုင်းဝန်းဆောင်ရွက်ပေးနေတဲ့ လူကြီးတွေနဲ့အတူ ဝိုင်းဝန်းစောင့်ရှောက် အားပေးတတ်လာတာကိုလည်း တွေ့ရပါတယ်။ အဲဒီလိုအားပေးတတ်ဖို့ သူတို့ကို တာဝန်ပေးတဲ့အခါမှာ စောင့်ထိန်းရမယ့် ကျင့်ဝတ်တွေကို စောင့်ထိန်းတာ တကယ့်ကို ဂုဏ်ယူလောက်ဖွယ် တွေ့လာကြပါ တယ်။ သင်တန်းသူချင်းမသိရဘူး၊ သက်ဆိုင်သူမဟုတ်သူတွေကို မိမိရဲ့ မိဘကို တောင်ပေးမသိဘဲ ကူညီသွားတာ သက်တူ ရွယ်တူတွေခံစားရသူအတွက် ခွန်အားကို ပိုမိုရရှိစေပါတယ်။

စီမံချက်အတွင်း သင်ယူခြင်းမှ အတွေးအခေါ် အလေ့အကျင့် အလေ့အထများ ပြောင်းလဲလုပ်ဆောင်လာခြင်း

စီမံချက်က တစ်နှစ်တာကာလပါ၊ စီမံချက်ကာလကုန်ခါနီးမှာ သူတို့အတွက် ဆယ်ကျော်သက် အမျိုးသမီးငယ် များရဲ့တွေ့ဆုံပွဲကို ကျင်းပခဲ့ပါတယ်။ စင်မြင့်ထက်အများရှေ့မှာ ကျင်းပတဲ့ စကားဝိုင်း ဆွေးနွေးပွဲမှာ အဆိုတော်မော်ဒယ် မေဖြူဖြူ ဦးဆောင်ပြီး အမျိုးသမီးရာအိမ်မှူး တစ်ဦးနဲ့အတူ စီမံချက်တာဝန်ရှိသူတစ်ဦး၊ သမီးငယ်သုံးဦးတို့က တည်ငြိမ်ရင့်ကျက်စွာ ဆွေးနွေးသွားနိုင်ခဲ့ ပါတယ်။

စီမံချက်ကြီးပြီးမြောက်သွားတဲ့အခါ မိမိတို့လုပ်ဆောင်ချက်တွေကို နေပြည်တော် လူမှုဝန်ထမ်းဦးစီးဌာနကို သွားရောက်ပြီး ပြန်လည်တင်ပြခဲ့ကြပါတယ်။ တက်ရောက်သူလူကြီးတွေရဲ့ရှေ့မှာ စာရွက်တစ်ရွက်မှမကိုင်ဘဲ စီမံချက်မှာပါဝင်တဲ့ သူငယ်ချင်းတွေ ရဲ့ကိုယ်စား သမီးငယ်တစ်ယောက်က တက်ရောက်ပြောကြား သွားတာတဲ့။ သူတို့ရဲ့ အတွေ့အကြုံတွေ၊ သူတို့ရဲ့ ပြောင်းလဲရင့်ကျက်လာတဲ့ အတွေးအခေါ်တွေ၊ တန်ဖိုးထားမှုတွေကို ကြည့်လိုက်၊ မြင်လိုက်၊ ကြားလိုက်ရတဲ့ လူကြီးတွေအားလုံး သူ့ရဲ့ ယဉ်ကျေးသိမ်မွေ့စွာ၊ တည်ငြိမ်စွာ ပြောတတ်၊ ဆိုတတ်တာတွေကို ချီးကျူးဂုဏ်ယူခဲ့ကြ ရပါတယ်။

မိန်းကလေးအယောက် ၃၀ ကို တစ်နှစ်အတွင်း လေ့ကျင့်ပေးခဲ့ကြတဲ့အခါ တစ်ဦးကောင်း၊ တစ်ယောက်ကောင်းပဲ ပေါ်ထွက်လာတာမဟုတ်ပါဘူး။ အားလုံးနီးပါး အတွေးအခေါ် အလေ့အကျင့် အလေ့အထတွေကို ကိုယ်တိုင်ပြုပြင် ပြောင်းလဲလာတာကို တွေ့ ကြရပါတယ်။ သူငယ်ချင်းတွေကို သူတို့လိုကောင်းတဲ့ အလေ့အထတွေရအောင် ဆွဲခေါ်လာ နိုင်ကြပါတယ်။ မိသားစုဝင်တွေ၊ ရပ်ကွက်သူ ရပ်ကွက် သားတွေ၊ အချင်းချင်းတွေကို စိတ်ဝင်စားအောင် ပြန်လည် ပြောပြနိုင်ခဲ့တယ်။ ထောက်ခံအားပေးတာတွေရလိုက်ကြတယ်။

သူတို့ရဲ့ သူငယ်ချင်းတွေအတွက်လည်း သူတို့လိုမျိုးလုပ်ပေးဖို့ ဆက်လက်တောင်းဆိုခဲ့ကြပါတယ်။ စီမံချက်ဝန်ထမ်းတွေ ဟာ တစ်ဦးကောင်း၊ တစ်ယောက်ကောင်း အကောင်အထည် မဖော်ကြပါဘူး။ သင့်တင့်လျောက်ပတ်စွာ သုံးနိုင်ခွင့်ရှိဖို့ ကုန်ကျစရိတ်ကို ထောက်ပံ့နိုင်တဲ့ အလှူရှင်ရှိရပါမယ်။ ကိုက်ညီတဲ့နည်းပညာတွေကို ထည့်ကြရပါတယ်။ ပြည်သူများကြား စနစ်တကျဆောင်ရွက်ခွင့်ရအောင် သက်ဆိုင်ရာ ဝန်ကြီးဌာနရဲ့ သဘောတူခွင့်ပြုချက်တွေ လိုတယ်။ ရပ်/ကျေးအုပ်ချုပ်သူ တို့ရဲ့ ဝိုင်းဝန်းအားပေး ပံ့ပိုးမှုတွေ လိုပါတယ်။

ဘက်စုံထောင့်စုံ ဟန်ချက်ညီညီနဲ့ အချိန်နဲ့တစ်ပြေးညီ ဝိုင်းဝန်းပူးပေါင်း အကောင်အထည်ဖော်ခဲ့ကြလို့ အောင်မြင်ခဲ့ကြ ပါတယ်။ ဝိုင်းဝန်းအားပေးထောက် ခံမှုနဲ့အတူ ဒုတိယနှစ်အဖြစ် ဆက်လက်ဆောင်ရွက်ခွင့် ရကြပြန်ပါတယ်။

ဒုတိယနှစ်မှာတော့ ဆယ်ကျော်သက်သားငယ်လေးတွေလည်း ပါဝင်လာကြပါတယ်။ ဒီနေ့ဒီအချိန်မှာ သက်ငယ်မုဒိမ်းဖြစ်မှု တွေအတွက် သက်ဆိုင်သူတို့ စွမ်းစွမ်းတမံ ဆောင်ရွက်နေချိန်မှာ ထိခိုက်လွယ်ဖြစ်လွယ် အုပ်စုတွေရဲ့ကြား ဆောင်ရွက်ခွင့် ရကြတာ ကျေနပ်စရာပါ။ တစ်နိုင်ငံလုံးကို မလွှမ်းခြုံနိုင်လို့ အားမလို အားမရ ဖြစ်ရသူတွေလည်း တွေ့ရပါတယ်။ သို့သော်လည်း ကိုယ်နိုင်သလောက်လေးကို တာဝန်ယူရင်း ဆယ်ကျော်သက်တို့ရဲ့ ပြောင်းလဲခွင့်ရလိုက်တဲ့ သူတို့ရဲ့ အတွေးအခေါ်၊ အလေ့အကျင့်၊ အလေ့အထတွေကြောင့် သူတို့ဘ၀ လှပစေပါတယ်။ သူတို့ ပတ်ဝန်းကျင်ကို လှပစေပါ တယ်။ သူတို့မျိုးဆက်တွေကို သူတို့စနစ်တကျ တာဝန်ယူတတ်သွားစေနိုင်လို့ကောင်းသော လုပ်ဆောင်ချက်ဆိုတာ မလွဲမသွေလက်ခံရမယ့် အရာဖြစ်ကြောင်း တင်ပြလိုက်ရပါတယ်။ ။

ဒေါက်တာအေးမြတ်လွင်(ဟသာင်္တ)