လူရည်ချွန်ကြီးတွေနဲ့ တွေ့တဲ့အခါမှာလည်း သူတို့ပြောတာတွေက မှတ်သားစရာတွေ၊ ဗဟုသုတတွေ အများကြီးရပါတယ် (သုံးထပ်ကွမ်းလူရည်ချွန် မစိန်စီတိုး)

“ယနေ့လူငယ်၊ နောင်ဝယ်လူကြီး'' ဆိုသည့် စကားနှင့်အညီ နိုင်ငံတော်ခေတ်မီဖွံ့ဖြိုး တိုးတက်စေရေးအတွက် မျိုးဆက်သစ်များဖြစ်သည့် ကျောင်းသားလူငယ်များကို ဘက်စုံထူးချွန် ထက်မြက်သော နိုင်ငံ့သားကောင်းများ ဖြစ်လာစေ ရန် ကျောင်းသားလူငယ်များ၏ ကာယ၊ ဉာဏ၊ စာရိတ္တ၊ မိတ္တ စသည်တို့အပေါ်တွင် စိစစ်ရွေးချယ်ပြီး ဂုဏ်ပြုချီးမြှင့် အစီအစဉ်ကို ခေတ်အဆက်ဆက် ဆောင်ရွက်ခဲ့ကြသည်။

ယခုနှစ်တွင်လည်း အခြေခံပညာကျောင်းများမှ အဋ္ဌမတန်း၊ န၀မတန်း၊ ဒသမတန်း လူရည်ချွန် ကျောင်းသား ကျောင်းသူ များကို ပုဂံ၊ အင်းလေး၊ ငွေဆောင် လူရည်ချွန်စခန်းများ ဖွင့်လှစ်ပြီး လူရည်ချွန်လူငယ်များ နေထိုင်အပန်းဖြေကာ ဒေသန္တရ ဗဟုသုတများ တိုးပွားစေရန် လေ့လာရေးခရီးစဉ်များ စီစဉ်ဆောင်ရွက်ပေးလျက်ရှိသည်။

ဧရာဝတီတိုင်းဒေသကြီး၊ ပုသိမ်ခရိုင် ငွေဆောင်ကမ်းခြေရှိ လူရည်ချွန်စခန်း (ငွေဆောင်)သို့ ရောက်ရှိနေသည့် တိုင်းဒေသကြီးနှင့် ပြည်နယ်များမှ ၂၀၁၈-၂၀၁၉ ဒသမတန်း လူရည်ချွန်မောင်မယ်များနှင့် တွေ့ဆုံမေးမြန်းထားသည်များ ကို ရေးသားတင်ပြလိုက်ရပါသည်။

နှစ်ထပ်ကွမ်းလူရည်ချွန် မောင်ရှန်ကျုံးလျန်

အထက(၁)ဟားခါး၊ ချင်းပြည်နယ်

ချင်းပြည်နယ်တောင်ပေါ်မှာနေတာဆိုတော့ ဟားခါးမြို့က အထူးသဖြင့်အေးတယ်။ ရာသီဥတု က ဒီမှာနဲ့ဆို ကွာခြားတယ်။ ငယ်ငယ်ကတည်းက ပင်လယ်ပြင်ကြီးကို မြင်ချင်ခဲ့တာပါ။ ကိုယ်တိုင် မြင်တွေ့ခွင့်ရလို့ ဝမ်းသာပီတိဖြစ်မိပါတယ်။ ပင်လယ် ပြင်ကြီးက ဘယ်လိုအလှတရားမျိုး ရှိသလဲဆိုတာ ကိုယ်တိုင်ကြုံတွေ့ခွင့်ရခဲ့တယ်။ မန္တလေးမြို့ကိုလည်း ရောက်ခဲ့တော့ မန္တလေးမြို့မှာရှိတဲ့ စာသင်ကျောင်းတွေ၊ မြို့ကြီးရဲ့ သန့်ရှင်းသာယာ လှပမှုတွေကိုလည်း လေ့လာခွင့်ရတယ်။ ရန်ကုန်မှာ ဆိုလည်း အများကြီးလေ့လာခွင့်ရခဲ့ပါတယ်။ ဘ၀ရည်မှန်းချက်ကတော့ ဆရာဝန် တစ်ယောက်ဖြစ်ချင်ပါတယ်။ နိုင်ငံ ဝန်ထမ်း တာဝန်ထမ်းဆောင်ရင်း ပရဟိတ ဆရာဝန် တစ်ယောက်အနေနဲ့လည်း ပြည်သူတွေကို ဆေးကုသပေးချင်တယ်။ ချင်းပြည်နယ်က တစ်နိုင်ငံလုံးမှာ ဖွံ့ဖြိုးမှု အနည်းဆုံးပြည်နယ်ပါ။ ချင်းပြည်နယ်က သယံဇာတတွေလည်း မထွက်ဘူး။ ပညာရေးပိုင်းမှာ အားပေးဖို့လိုပါတယ်။ ပညာရေးပိုင်းမှာ ဘာကြောင့် အားပေးဖို့ လိုသလဲဆိုရင် ပညာရေးက မြန်မာနိုင်ငံ အတွက် အထူးအရေးကြီးပါတယ်။ မြန်မာနိုင်ငံအတွက် စံပြဂုဏ်ယူရမယ့် ပုဂ္ဂိုလ်တွေ ဖြစ်အောင် ချင်းပြည်နယ်မှာရှိကြတဲ့ ညီငယ်ညီမငယ်တွေလည်း ကြိုးစားကြပါလို့ ပြောချင်ပါတယ်။

သုံးထပ်ကွမ်းလူရည်ချွန် မောင်စောလင်းထက်ကိုကို

အထက(၂) လွိုင်ကော်၊ ကယားပြည်နယ်

လူရည်ချွန်တစ်ယောက်ဖြစ်ဖို့ အားကစားကနေ ကျောင်းစာအထိ ဘက်စုံထူးချွန်နေရမယ်။ တစ်ချို့က ကျောင်းစာတော်ပြီး အားကစားမှာ အားနည်းကြတယ်။ ဒီမှာရောက်လာတဲ့သူတွေ ကတော့ အားကစားမှာရော ပညာရေးမှာပါ ထူးချွန်ကြတယ်။ အသိပညာ ဗဟုသုတတွေလည်း ကြွယ်ဝကြတယ်။ ကျွန်တော်က အားကစားထဲမှာတော့ ဘတ်စကက်ဘောကို ဝါသနာပါ တယ်။ ဘ၀ရည်မှန်းချက်ကတော့ စာရေးဆရာကြီး တစ်ယောက်ဖြစ်ချင်တယ်။ စာအုပ်စာပေတွေ အများကြီးဖတ်ဖြစ်ပါ တယ်။ ဘာသာပြန်စာပေတွေ အများဆုံးဖတ်ဖြစ်ပါတယ်။ စာရေးဆရာကြီးတွေရဲ့ သူတို့အတွေ့အကြုံတွေ ရေးထားတဲ့ စာအုပ်တွေ ဖတ်ဖြစ်ပါတယ်။ စာရေးဆရာကြီးတွေ ရေးထားတဲ့ စာပေတွေထဲက စာတွေကို မှီငြမ်းလေ့လာပြီး ကိုယ်တိုင် လည်း ရေးနိုင်အောင် ကြိုးစားနေတယ်။ ကျောင်းက စာစီစာကုံးပြိုင်ပွဲတွေကိုလည်း ဝင်ပြိုင် ဖြစ်ပါတယ်။ လူရည်ချွန်ဖြစ်ပြီး စခန်းသုံးခုလုံးကိုသွားခဲ့ရတဲ့အတွက် ဗဟုသုတတွေလည်းရခဲ့ပါတယ်။

သုံးထပ်ကွမ်းလူရည်ချွန် မစိန်စီတိုး

အထက (၁) ပြည်၊ ပဲခူးတိုင်းဒေသကြီး

လာခဲ့တဲ့ လမ်းခရီးတစ်လျှောက်မှာ အသစ်အဆန်းတွေလည်း မြင်ခဲ့ရတယ်။ ကျောင်းသား ကျောင်းသူတွေကလည်း လမ်းတစ်လျှောက် ကြိုဆိုကြတယ်။ ပျော်စရာလည်း ကောင်းသလို ဗဟုသုတတွေလည်းရပါတယ်။ လူရည်ချွန်တွေထဲမှာ တိုင်းဒေသကြီးနဲ့ပြည်နယ်အနှံ့က လာကြတော့ သူငယ်ချင်းတွေဖြစ်သွားပြီး ခင်မင်ခွင့်ရပါတယ်။ သူတို့ဒေသ အကြောင်း ကိုလည်း သိရှိခွင့်ရခဲ့ပါတယ်။ လူရည်ချွန်ကြီးတွေနဲ့ တွေ့တဲ့အခါမှာလည်း သူတို့ပြောတာတွေက မှတ်သားစရာတွေ၊ ဗဟုသုတတွေ အများကြီးရပါတယ်။ အတုယူစရာလည်း ကောင်းပါတယ်။ ဘ၀ရည်မှန်းချက်ကတော့ ဆရာဝန် တစ်ယောက်ဖြစ်ချင်ပါတယ်။

သုံးထပ်ကွမ်းလူရည်ချွန် မနှင်းသီရိကျော်

အထက (၁) မြစ်ကြီးနား၊ ကချင်ပြည်နယ်

ဒီခရီးစဉ်က အတွေ့အကြုံတွေအများကြီးရပါတယ်။ ရန်ကုန်မှာဆိုရင်လည်း မြန်မာနိုင်ငံရဲ့ အထင်ကရဖြစ်တဲ့ ရွှေတိဂုံ စေတီတော်ကြီးကို ဖူးမြော်ခွင့်ရရှိခဲ့ပါတယ်။ ရွှေတိဂုံစေတီတော်ရဲ့ ဘုရားသမိုင်းတွေကိုလည်း လေ့လာသိရှိခွင့် ရခဲ့ပါတယ်။ လူမျိုးအသီးသီးရဲ့ ရိုးရာဓလေ့တွေကိုလည်း လေ့လာခွင့်ရပါတယ်။ ဒီခရီးစဉ်က ပျော်စရာလည်း ကောင်းသလို ဗဟုသုတ တွေလည်းရပါတယ်။ ပင်းတယမီးအိမ်ရှင်လို မိမိအလုပ်ကိုချစ်မြတ်နိုးတဲ့ ဆရာဝန်ကောင်းတစ်ယောက်ဖြစ်အောင် ကြိုးစား သွားမယ်။ လူရည်ချွန်တစ်ယောက်ဖြစ်ဖို့အတွက်လည်း ငယ်ငယ်ကတည်းက ကြိုးစားခဲ့ပါတယ်။ ကျောင်းစာတွေအပြင် ဗဟုသုတတိုးပွားစေမယ့် ရသစာပေတွေကိုလည်း ဖတ်ရှုလေ့လာခဲ့ပါ တယ်။

သုံးထပ်ကွမ်းလူရည်ချွန် မခိုင်သဇင်နှင်း

တာချီလိတ်မြို့၊ ရှမ်းပြည်နယ်အရှေ့ပိုင်း

လူရည်ချွန်ဖြစ်အောင် ငယ်ငယ်ကတည်းက ရည်မှန်းချက်ထားပြီး ကြိုးစားခဲ့တယ်။ ကျောင်းစာတွေအပြင် ဗဟုသုတ ဖြစ်စေမယ့် စာပေတွေကိုလည်း ဖတ်ရှုပါတယ်။ စာပေတွေ ဖတ်ရှုလေ့လာ ခွင့်ရတဲ့အတွက် အရင်က စာမဖတ်ခင်ကနဲ့ အခု စာပေတွေဖတ်ရှုပြီးနောက်ပိုင်း အတွေးအခေါ်ကအစ ပြောင်းလဲလာတယ်။ ဒီခရီးစဉ်မှာ ဒေသအသီးသီးက လာကြတဲ့ သူငယ်ချင်းအသစ်တွေရတယ်။ ငွေဆောင်ဒေသက ရာသီဥတုအခြေအနေတွေ၊ ပတ်ဝန်းကျင် ရှုခင်းတွေ ခံစားရတယ်။ ကမ်းခြေရဲ့ အလှအပတွေကိုလည်း ခံစားရတယ်။ ဒီဒေသက လူတွေရဲ့ လူမှုဘ၀တွေကိုလည်း လေ့လာခွင့်ရတယ်။ ဗဟုသုတတွေအများကြီး ရပါတယ်။

တွေ့ဆုံမေးမြန်း-မင်းသစ် (MNA)

ဓာတ်ပုံ-စိုးမင်းဦး(ပြန်/ဆက်)