အကြားအာရုံမသန်စွမ်းသူများနှင့် သတင်းအချက်အလက်ရပိုင်ခွင့်

အကြားအာရုံ မသန်စွမ်းသူများ မြန်မာနိုင်ငံ၏ မသန်စွမ်းမှု အမျိုးအစား သတ်မှတ်ချက် လေးမျိုးထဲတွင် အကြားအာရုံမသန်စွမ်းခြင်းကိုလည်း မသန် စွမ်းအမျိုးအစားတစ်ခုအဖြစ် သတ်မှတ်ထားသည်။ မသန်စွမ်း မှုသည် အသက်အရွယ်မရွေး၊ ကျား/မ မရွေး၊ ဆင်းရဲချမ်းသာ မရွေး၊ လူမျိုးဘာသာမရွေး ဖြစ်နိုင်သည့်အတွက် နေရာတိုင်းတွင် မသန်စွမ်းသူများ ရှိနေသည်။ ၂၀၁၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းကောက်ယူမှုအရ မြန်မာနိုင်ငံလူဦးရေ စုစုပေါင်း၏ ၄ ဒသမ ၆ ရာခိုင်နှုန်းသည် မသန်စွမ်းသူများဖြစ်သည်ဟု ဆိုပါသည်။ ယင်းတို့အနက်မှ ၁ ဒသမ ၃ ရာခိုင်နှုန်းသည် အကြားအာရုံမသန်စွမ်းသူများ တစ်နည်းအားဖြင့် ခြောက်သိန်းကျော်သော လူဦးရေသည် နားမကြား သူများဖြစ်သည်။

မသန်စွမ်းသူများသည်လည်း မသန်စွမ်းမဟုတ်သူများ နည်းတူ မွေးရာပါဂုဏ်သိက္ခာ ရှိကြသူများ ဖြစ်သကဲ့သို့ အခွင့်အရေးလည်း ညီမျှစွာ ရရှိခွင့်ရှိသူများဖြစ်သည်။ မသန်စွမ်း မဟုတ်သူများနည်းတူ သတင်းအချက်အလက်များကို ရရှိခွင့်ရှိသူများလည်းဖြစ်သည်။ အကြားအာရုံ မသန်စွမ်းသူများ ဖြစ်စေကာမူ လူသားတစ်ယောက်၊ နိုင်ငံသားတစ်ယောက် ဖြစ်သည့်အတွက် လူ့အခွင့်အရေး၊ နိုင်ငံသား အခွင့်အရေးများကိုလည်း သာမန် သန်စွမ်းသည့်လူများနည်းတူ တစ်ပြေးညီ ရရှိခွင့် ရှိသူများ ဖြစ်သည်။

သတင်းအချက်အလက်ရရှိမှု

မြန်မာနိုင်ငံ၌ အကြားအာရုံ မသန်စွမ်းသူများအတွက် သတင်းအချက်အလက် ရရှိမှုသည် ပြီးခဲ့သည့် ဆယ်စုနှစ်များနှင့် နှိုင်းယှဉ်ကြည့်ပါက တိုးတက်မှု ရှိလာသည်ကို တွေ့ရှိရ မည်ဖြစ်သည်။ လက်ကိုင်ဖုန်း များပေါများလာခြင်းနှင့် အင်တာနက်အသုံးပြုနိုင်မှုတို့ကြောင့် သတင်းအချက်အလက် လက်လှမ်းမီ ရရှိနိုင်ခြင်းနှင့် ညအချိန် ၈ နာရီသတင်းတွင် လက်သင်္ကေတပြ ဘာသာစကားဖြင့် သတင်းထုတ်လွှင့်ပေး ခြင်းများ ရှိလာခြင်းတို့ကြောင့်ဖြစ်သည်။ သို့သော်လည်း တစ်ဖက်တွင် အခက်အခဲအတားအဆီးများလည်း ရှိနေသည်။ အဓိက အခက်အခဲအတားအဆီးများမှာ ရုပ်ပိုင်းဆိုင်ရာ (သို့) နည်းပညာပိုင်းဆိုင်ရာ အတား အဆီးများ (Physical/ Technology Barrier)၊ သဘောထားခံယူချက် အတားအဆီးများ (Attitudinal Barrier) နှင့် မူဝါဒဆိုင်ရာ အတားအဆီးများ(Policy Barrier)များ ဖြစ်သည်။

မြန်မာနိုင်ငံသည် ကုလသမဂ္ဂမသန်စွမ်းအခွင့်အရေး ဆိုင်ရာသဘောတူစာချုပ် (United Nations Convention on the Rights of People with Disability, UNCRPD) ၏ စာချုပ်အဖွဲ့ဝင်နိုင်ငံအဖြစ် ၂၀၁၁ ခုနှစ်ကပင် လက်မှတ်ရေးထိုးအတည်ပြု ပါဝင်ခဲ့ပြီးဖြစ်ပါသည်။ စာချုပ်အဖွဲ့ဝင်နိုင် ငံဖြစ်သည်နှင့်အညီ နိုင်ငံအတွင်းရှိ မသန် စွမ်းသူများအတွက် မသန်စွမ်းအခွင့်အရေးများကို စာချုပ်ပါပြဋ္ဌာန်းချက်များနှင့်အညီ အခွင့်အရေးများခံစားရရှိနိုင်ရေး အကောင်အထည်ဖော် ဆောင်ရွက်ပေးရမည့် တာဝန်ရှိပါသည်။

မသန်စွမ်းသူများ သတင်းအချက်အလက် ရပိုင်ခွင့်နှင်စပ်လျဉ်းပြီး အဆိုပါစာချုပ် အပိုဒ် (၁၇)တွင် လည်းကောင်း၊ မြန်မာနိုင်ငံ၏ အထူးဥပဒေတစ်ခုဖြစ်သော မသန်စွမ်းသူများ ၏အခွင့်အရေးဥပဒေ ပုဒ်မ ၃ (က) နှင့် (စ)၊ ပုဒ်မ ၇(ဈ) နှင့် (ည) တို့တွင်လည်းကောင်း ဖော်ပြထားသလို ကမ္ဘာ့လူ့အခွင့် အရေး ကြေညာစာတမ်း အပိုဒ်(၁၉)တွင်လည်း လူတိုင်းသတင်းအချက်အလက်များရယူခွင့်ရှိသည်ဟု ဆိုထားပြန်ရာ လူသားများဖြစ်သည့် အကြားအာရုံမသန်စွမ်းသူများသည်လည်း သန်စွမ်းသူများနည်းတူ သတင်းအချက်အလက်များ ရယူခံစားခွင့်ရှိသူများဖြစ်ပါသည်။

အခက်အခဲ စိန်ခေါ်မှုများ

မြန်မာနိုင်ငံအတွင်းရှိ အကြားအာရုံမသန်စွမ်းသူများအတွက် သတင်းအချက်အလက်ရပိုင်ခွင့် အခြေအနေ များ၊ စိန်ခေါ်မှုများကို လေ့လာဆန်းစစ်ကြည့်ရာ အကြားအာရုံမသန်စွမ်းသူများ တစ်နည်းအားဖြင့် နားမကြားသူများ အသုံးပြုသည့် လက်သင်္ကေတဘာသာ (Sign Language) အမျိုးမျိုးအကြောင်းနှင့် နားမကြားသူများ၏ သတင်းအချက် အလက်ရယူရေးတွင် ကြုံတွေ့ရသည့် အခက်အခဲ စိန်ခေါ်မှုများကို လည်း သိရှိခဲ့ရသလို အဓိကအခက်အခဲမှာ ဘာသာစကားဆိုင်ရာအတားအဆီးဖြစ်ကြောင်း လေ့လာ သိရှိရသည်။

လက်သင်္ကေတ ငါးမျိုး

မြန်မာနိုင်ငံအတွင်း အကြားအာရုံ မသန်စွမ်းသူများ အသုံးပြုသည့် လက်သင်္ကေတ ငါးမျိုးရှိသည်။ ယင်းတို့မှာ (၁) Home Sign ဟုခေါ်သည့် အိမ်တွင်းမိသားစုအချင်းချင်း ဆက်သွယ်ရာတွင်သာ သုံးသည့် ကိုယ်ပိုင်သုံး လက်သင်္ကေတ၊ (၂) Yangon Sign Language ဟု ဆိုကြသည့် ၁၉၂၀ ခုနှစ်ဝန်းကျင် မေရီချက်ပ်မင်း နားမကြားကျောင်း စတင် တည်ထောင်ခဲ့စဉ်ကတည်းက သုံးခဲ့သည့် လက်သင်္ကေတ (၃) Mandalay Sign Language ဟုဆိုကြသည့် ၁၉၆၂ ဝန်းကျင် မန္တလေး ဒိုင်အိုသံတဲကျောင်းမှ စတင်ခဲ့သည့် လက် သင်္ကေတ၊ (၄) angon Sign Language နှင့် Mandalay Sign Language တို့ကို အခြေခံပြီး ၂၀၀၇-၂၀၀၈ ပတ်ဝန်းကျင်တွင် လူမှုဝန်ထမ်းဦးစီးဌာနမှ ဦးဆောင်ဆောင်ရွက်မှုဖြင့် JICA နှင့် ပူးပေါင်းဖော် ထုတ်ခဲ့သည့် မြန်မာစံ လက်သင်္ကေတဘာသာစကား (Standardized Sign Language) နှင့် (၅) Yangon Sign Language အများစု၊ Mandalay Sign Language တို့ကို အခြေခံရောထွေးသုံးနေသည့် ကလေး Home Sign Language စသည့် လက်သင်္ကေတဘာသာစကား ငါးမျိုး ရှိကြောင်း လေ့လာသိရှိရပါသည်။

သဒ္ဒါဖွဲ့စည်းပုံ အခက်အခဲ

အဓိက အခက်အခဲ စိန်ခေါ်မှုမှာ မြန်မာစာအရေးအသား သဒ္ဒါဖွဲ့စည်းပုံနှင့် Sign Language တို့၏ သဒ္ဒါဖွဲ့စည်းပုံ မတူညီခြင်းပင်ဖြစ်သည်။ နားမကြားသူ အချင်းချင်းအကြားသုံးစွဲသည့် Sign Language မတူညီစေကာမူ Sign Language ၏ အခြေခံသဒ္ဒါဟု ဆိုကြသည့် Non manual Makers(NMM) တူညီသည့်အတွက် အချင်းချင်း ဆက်သွယ်ပြောဆိုရာတွင် အခက်အခဲသိပ်မရှိသော်လည်း နားမကြား ကျောင်းများရှိ နားကြားသူ ဆရာ/ဆရာမများနှင့် Sign Language Supporter များအတွက် ရှုပ်ထွေးမှု များနှင့် လေ့လာရာတွင် အခက်အခဲများရှိကြောင်း သိရှိရပါသည်။

နားကြားသူများအတွက် မြန်မာစာသည် ၎င်းတို့၏ မိခင်ဘာသာ စကားဖြစ်သော်လည်း နားမကြားသူများ အတွက်မူ Sign Language သည် မိခင်ဘာသာစကား ဖြစ်ပါသည်။ ယနေ့ မြန်မာအသံနှင့် ရုပ်မြင်သံကြားမှ ထုတ်လွှင့်ပြသနေသည့် Sign Language ပြသနေသူများသည် နားကြားသူများဖြစ်ပြီး မြန်မာစံ လက်သင်္ကေတဘာသာစကား (Standardized Sign Language)ကို အသုံးပြုပြသနေခြင်းဟု သိရှိရသည်။

ရုပ်မြင်သံကြားမှ လက်သင်္ကေတပြ ဘာသာစကား

မြန်မာနိုင်ငံတွင် နားမကြားသူများ သတင်းအချက်အလက ရရှိရေးအတွက် ၂၀၁၄ ခုနှစ်နှောင်းပိုင်းမှ စတင်ပြီး နားမကြားသူများအတွက် လက်သင်္ကေတပြ ဘာသာစကားဖြင့်နိုင်ငံ ပိုင်ရုပ်သံဌာနတစ်ခုဖြစ်သော မြန်မာ့အသံနှင့်ရုပ်မြင်သံကြား ညပိုင်း ၈ နာရီ သတင်းအစီအစဉ်၊ MNTV ၏ စနေ၊ တနင်္ဂနွေတွင် ထုတ်လွှင့်သော တစ်ပတ်အတွင်းသတင်း (အနှစ်ချုပ်)အစီအစဉ်၊ DVB ရုပ်သံလိုင်းတွင် စီစဉ်ထုတ် လွှင့်ပြသနေခြင်း၊ ၂၀၁၅ ခုနှစ် ရွေးကောက်ပွဲနှင့် စပ်လျဉ်းပြီး မဲပေးပုံနည်းစနစ်တို့ကို လက်သင်္ကေတပြ ဘာသာစကားဖြင့် ထုတ်လွှင့်ပေးခဲ့ခြင်း၊ SEA Games တွင်ပါ ထုတ်လွှင့်ပေး နိုင်ခဲ့ခြင်းတို့သည် နားမကြားသူများ တစ်နည်းအားဖြင့် အကြားအာရုံ မသန်စွမ်းသူများအတွက် သတင်းအချက် အလက်ရယူ ခွင့်ဆိုသည့် အခွင့်အရေးကို ဖြည့်ဆည်းဆောင် ရွက်ပေးသည့် နိုင်ငံတော်၏ ကြိုးပမ်းချက်များ ဖြစ်ပါသည်။

သို့သော်လည်း အထက်တွင်ဆိုခဲ့သလို မြန်မာနိုင်ငံအတွင်း ကျင့်သုံးနေသည့် လက်သင်္ကေတပြ ဘာသာစကားမှာ အမျိုး မျိုးကွဲလွဲနေခြင်း၊ မြန်မာသဒ္ဒါမှ လက်သင်္ကေတပြဘာသာ စကား သဒ္ဒါသို့ ဘာသာပြန်ဆိုမှုအပိုင်း အားနည်းခြင်း (တစ်နည်းအားဖြင့် SL ဘာသာစကားကျွမ်းကျင်မှု လိုအပ် နေသေးခြင်း) မြန်မာစံ လက်သင်္ကေတပြဘာသာရပ်အတွက် ဝေါဟာရများ နည်းပါးနေသေးခြင်း၊ အချိန်နှင့် တစ်ပြေးညီ သတင်းထုတ်လွှင့်မှုအတွက် သတင်းပါအတိုင်း လက်သင်္ကေ တပြရာတွင် အချို့ဝေါဟာ ရများ မရှိသေးသည့်အတွက် သတင်းအချက်အလက် အပြည့်အဝမရဘဲ နားလည်မှု အတိုင်းအတာ နည်းပါး နေသေးခြင်း စသည့် အခက်အခဲများ ရှိနေသည်။

ထို့အတွက် သတင်းကို လုံးစေ့ပတ်စေ့ လက်သင်္ကေတပြခြင်းထက် အနှစ်ချုပ်အဓိပ္ပာယ်ကို ပြသပါက ပိုမိုနားလည် လွယ်မည်ဟု နားမကြားသူများက ဆိုကြသလို လက်သင်္ကေတပြ သတင်းထုတ်လွှင့် သူများကိုလည်း မြန်မာစာလက်သင်္ကေတဘာသာစကား (Standardized Sign Language) ကျွမ်းကျင် သူများက စဉ်ဆက်မပြတ် ကူညီပံ့ပိုး သင်ကြားပေးဖို့ရာ အရေးကြီးပါကြောင်းနှင့် သတင်းထုတ် လွှင့်ရာတွင် မြန်မာစံလက်သင်္ကေတ ဘာသာစကား (Standardized Sign Language)နှင့် ထုတ်လွှင့်နေသော်လည်း အဆိုပါဘာသာစကားသည် တစ်နိုင်ငံလုံးအတိုင်းအတာအထိ လွှမ်းခြုံရောက်ရှိနိုင်မှုနှင့် ဝေါဟာရ နည်းပါး နေခြင်းကြောင့် သိရှိနားလည်နိုင်မှု အားနည်းနေရကြောင်း ဆိုကြပါသည်။ ထို့အပြင် နိုင်ငံလူဦးရေ၊ အကြားအာရုံ မသန်စွမ်းဦးရေနှင့် နှိုင်းယှဉ်ပါက Sign Language ဆရာ/ဆရာမများ လွန်စွာနည်းနေ သည်ကိုလည်း ဝမ်းနည်းဖွယ် တွေ့ရှိရပါသည်။

အကြံပြုချက်များ

သတင်းအချက်အလက်ဖြန့်ဝေခြင်းတွင် နားမကြားသူများ အတွက် မိုးလေ၀သ၊ သဘာဝဘေးအ္တရာယ်နှင့် အရေးကြီး၊ အရေးပေါ် သတင်းကြေညာချက်များကိုလည်း လက်သင်္ကေတပြ ဘာသာစကားဖြင့် သတင်းထုတ်လွှင့်ပေးနိုင်ရေး လိုလားလျက်ရှိကြပါသည်။ မှန်ပါသည်။ နားမကြားသူ များအတွက် မိုးလေ၀သသတင်း၊ သဘာဝဘေးအန္တရာယ် သတင်းများနှင့် အရေးပေါ်သတင်း များသိရှိနေမှသာ၎င်းတို့ အတွက် ကြိုတင်ကာကွယ်နိုင်မည့်နည်းလမ်းများ စီမံနိုင်မည် ဖြစ်သည်။

ယနေ့အချိန်တွင် MRTV ၊ DVB ၊ MNTV တို့မှ လက်သင်္ကေတပြဖြင့် သတင်းများထုတ်လွှင့်ပေးနေသလို အခြားသော ရုပ်သံမီဒီယာများမှလည်း ထုတ်လွှင့်ပေးဖို့ လိုလားတောင်းဆိုနေကြတာကို တွေ့ရှိရပါသည်။ နားမကြား သူများအတွက် သတင်းအနှစ်ချုပ်ကို သီးသန့်နေရာပေး၍ လိုရင်းတိုရှင်းဖော်ပြပေးခြင်း၊ မိခင်ဘာသာစကားဖြစ်သော SL ကျွမ်းကျင်သည့် နားမကြားသူများအား သတင်းတင်ဆက်သူအဖြစ် အလုပ်ခန့်ထားပေးခြင်းများ ဆောင်ရွက်ပေးစေလိုကြောင်း အချို့သောနားမကြားသူများမှ အကြံပြု ပြောဆိုခြင်းများလည်းရှိပါသည်။

အားတက်ဝမ်းသာဖွယ် သတင်းတစ်ပုဒ်

ယနေ့ချိန်ခါတွင် နိုင်ငံတော်အနေဖြင့် မြန်မာနိုင်ငံ အတွင်းရှိ မသန်စွမ်းသူများ၏ အခွင့်အရေးများအား အသိအမှတ်ပြု ကာကွယ်သည့်အနေဖြင့် မသန်စွမ်းများ၏ အခွင့်အရေးဥပဒေ နှင့်နည်းဥပဒေများကို ထုတ်ပြန်ပြဋ္ဌာန်းခဲ့ပြီးဖြစ်သည်။ ထို့ အပြင် CEDAW ၊ CRPDနှင့် မသန်စွမ်းသူများ၏အခွင့် အရေးဥပဒေ တို့ကို လက်သင်္ကေတပြ ဘာသာစကားဖြင် ဘာသာပြန်ဆို ဆောင်ရွက်ပေးနိုင်ခဲ့ပြီး ဖြစ်သည်။

ယခုတစ်ဖန် အကြားအာရုံမသန်စွမ်းသူများအတွက်အား တက်ဝမ်းသာဖွယ် သတင်းတစ်ပုဒ်မှာ လူမှုဝန်ထမ်း၊ ကယ်ဆယ်ရေးနှင့်ပြန်လည်နေ ရာချထားရေးဝန်ကြီးဌာနအောက်ရှိ ပြန်လည်ထူထောင်ရေး ဦးစီးဌာန၊ နားမကြားအသင်းအဖွဲ့၊ UNICEF နှင့် MCDCA တို့ ပူးပေါင်းပြီး မသန်စွမ်းသူ များအခွင့်အရေး နည်းဥပဒေများအား Sign Language ဖြင့် ဘာသာပြန်ဆိုနိုင်ရေး ပြင်ဆင်နေကြပြီဆိုသည့် သတင်း ကောင်းပင်ဖြစ်သည်။ အကြားအာရုံ မသန်စွမ်းသူများအနေနှင့် မိမိတို့အတွက် ထုတ်ပြန်ထားပြီး အကာ အကွယ်ပေးထားသည့် မသန်စွမ်းသူများ၏ နည်းဥပဒေများကို ကိုယ်တိုင် နားလည်လာပြီး ဥပဒေ၏ အကာအကွယ်ကို ပိုမိုရယူနိုင်တော့ မည်ဖြစ်သည်။

အချုပ်ဆိုရပါလျှင် အကြားအာရုံမသန်စွမ်းသူများအတွက် ၎င်းတို့၏ အခွင့်အရေးတစ်ခုဖြစ်သော သတင်း အချက်အလက်ရပိုင်ခွင့်ကို နိုင်ငံတော်မှ ဖြည့်ဆည်းပေးသည် အနေဖြင့် လက်သင်္ကေတပြ ဘာသာစကား အစီအစဉ်ဖြင့် သတင်းထုတ်လွှင့်ပေးမှုနှင့် အခြားသောအစီအစဉ်များ ဆောင်ရွက်ပေး နေမှုများအတွက် ပြည်သူတစ်ဦးအနေဖြင့် ကျေးဇူးတင်ဝမ်းမြောက်ရပါသော်လည်း အကြားအာရုံမသန် စွမ်းသူများ အတွက် သတင်းအချက်အလက်ရယူနိုင်ရေးတွင် အခက်အခဲအတားအဆီးများ ရှိနေသေး ကြောင်း လေ့လာ သိရှိရပါသည်။

အဆိုပါ အခက်အခဲအတားအဆီးများ၊ အထူးသဖြင့် ဘာသာစကားဆိုင်ရာ အတားအဆီးကို ကျော်လွှား နိုင်ဖို့ရာ မသန်စွမ်းအဖွဲ့အစည်းများ၊ အကြားအာရုံ မသန်စွမ်းသူများ ကိုယ်တိုင်နှင့် အခြားသက်ဆိုင်သည့် အစိုးရအဖွဲ့အစည်းများသည် ကဏ္ဍအသီးသီးတွင် ယခုထက်ပိုမို၍ ပူးပေါင်းညှိနှိုင်း ဆောင်ရွက်သွား ကြလျှင်ဖြင့် အကြားအာရုံ မသန်စွမ်းသူများ သတင်းအချက်အလက်ရရှိရေးတွင် ကြုံတွေ့နေရသည့် အခက်အခဲများကို အချိန်တိုအတွင်း အောင်မြင်စွာကျော်လွှားနိုင် မည်ဟု ယုံကြည်ပါကြောင်း စေတနာ အရင်းခံဖြင့် ရေးသားလိုက်ရပါသည်။ ။

ဒေါက်တာခိုင်ခိုင်ဝင်း