ဆန်ကြောင့် ဂယက်ရိုက်သွားရတဲ့ နှစ်သစ်ကူးနေ့ရက်များ

သင်္ကြန်ရက်တွေ ကုန်ဆုံးပြီးသွားလို့ နွေစပါးတွေလည်း မကြာမီ ရိတ်သိမ်းရတော့မယ့် အချိန်ရောက်လာပါပြီ။ ဒီလိုရက်မှာ မြန်မာ့ဆန်တွေကို အိုင်ဗရီကို့စ်နိုင်ငံမှာ ကျန်းမာရေးနဲ့မညီညွတ်ဘဲ အန္တရာယ်ရှိတဲ့အတွက် ဖျက်ဆီးခြင်းခံရတယ်ဆိုတဲ့ သတင်းကြောင့်

တောင်သူများ၊ ကုန်သည်များနဲ့ သက်ဆိုင်ရာ အသင်းအဖွဲ့များ၊ အာဏာပိုင်များအားလုံးအပါအဝင် မြန်မာပြည်သူတွေလည်း စိုးရိမ်ပူပန်ခဲ့ရတယ်။ ဥရောပသမဂ္ဂ (အီးယူ) လို နိုင်ငံတွေကိုတောင် တင်ပို့နိုင်ပြီး အဆင်ပြေခဲ့တဲ့ မြန်မာ့ဆန်တွေဟာ ဘယ်လိုကြောင့်များ အာဖရိကနိုင်ငံတွေမှာ အခုလို အဖြစ်ဆိုးနဲ့ ကြုံရသလဲဆိုတာသိနိုင်အောင် အားလုံးကလည်း စိတ်ဝင်စားနေကြပါတယ်။

▲ ကျန်းမာရေးနဲ့ မညီညွတ်တဲ့ဆန်တွေတဲ့ ▲

အိုင်ဗရီကို့စ်နိုင်ငံရဲ့ အစိုးရကနေ သူတို့နိုင်ငံထဲကို တင်သွင်းရောက်ရှိ လာခဲ့တဲ့ မြန်မာ့ဆန် တန်ချိန်ပေါင်း ၁၈၀၀၀ ခန့်ကို အန္တရာယ်ရှိတဲ့ စားသောက်ကုန်အဖြစ် သတ်မှတ်ခဲ့ပြီး ဖျက်ဆီးပစ်ခဲ့တယ်လို့ နိုင်ငံတကာ သတင်းစာမျက်နှာတွေမှာ မြင်တွေ့ရပါတယ်။ “သတင်းက အမှန်ဖြစ်ပါတယ်။ ကျွန်တော်တို့ ဆန်စပါးလုပ်ငန်းရှင် များ အသင်းချုပ်ကနေ အချက်အလက် ပိုမိုပြည့်ပြည့်စုံစုံနဲ့ တိတိကျကျ ဖြေရှင်းထုတ်ပြန် ပေးသွားဖို့ ရှိပါတယ်။ လက်ရှိမှာ ဖြစ်စဉ်ကိုလည်း အသေအချာ စုံစမ်းဖော်ထုတ်နေပါတယ်” လို့ မြန်မာနိုင်ငံ ဆန်စပါးလုပ်ငန်းရှင်များ အသင်းချုပ်ဥက္ကဋ္ဌ ဦးရဲမင်းအောင်က ပြောပါတယ်။

မြန်မာ့ဆန်တွေ အန္တရာယ်ရှိတယ်ဆိုပြီး တိုင်းတစ်ပါးမှာ ဖျက်ဆီးခံရမှုက မြန်မာ့ဆန် ပြည်ပတင်ပို့မှုဈေးကွက်ကို များစွာ ဂယက်ရိုက် စေရုံမျှမကဘဲ ပြည်ပဈေးကွက်ကို အားထားနေ ကြရတဲ့ မြန်မာ့သီးနှံဈေးကွက်၊ ရေထွက်ကုန် ဈေးကွက်စတဲ့ ပို့ကုန်ဈေးကွက်ကြီးတစ်ခုလုံးကို အနည်းနှင့်အများ ထိခိုက်သွားစေနိုင်တဲ့အထိ ရိုက်ချက်ပြင်းတယ်လို့ စီးပွားရေး လုပ်ငန်းရှင်များကလည်း ပြောကြားပါတယ်။

▲ အိုင်ဗရီကို့စ်ရောက် မြန်မာ့ဆန်များ၏ခရီးအစ ▲

“ဒီဆန်တွေက ၂၀၁၈ အောက်တိုဘာလကတည်းက သင်္ဘောတင်သွားခဲ့တာ။ စင်ကာပူ ကနေတစ်ဆင့် အာဖရိကနိုင်ငံ တွေဆီကို တင်ပို့တာ ဖြစ်ပါတယ်။ တင်ပို့တဲ့ပမာဏက တန်ချိန် ၂၂၀၀၀ ခန့်ဖြစ်ပါတယ်။ ဒါပေမယ့် တန်ချိန် ၄၀၀၀ လောက်အရောက်မှာ အပယ်ခံရတယ်။ ဂါနာ၊ ဂီနီနဲ့ တိုဂိုနိုင်ငံတွေကို ဆက်ပြီးပို့တယ်။ အဲဒီနိုင်ငံတွေ မှာလည်း အပယ်ခံရ တယ်။ ဒါကြောင့် ကုမ္ပဏီက မြန်မာနိုင်ငံက တင်ပို့သူတွေနဲ့လည်း ချိတ်ဆက်ပြီး တန်ချိန် ၁၈၀၀၀ ကို ပြန်သယ်ချင်တယ်လို့ ပြောခဲ့တယ်။

ကျွန်တော်တို့ စီးပွားရေးနှင့် ကူးသန်း ရောင်းဝယ်ရေး ဝန်ကြီးဌာန ဘက်ကလည်း ပြန်သယ်ယူဖို့ကို အခုနှစ် မတ်လမှာ ခွင့်ပြုခဲ့ပါတယ်” လို့ စီးပွားရေးနှင့် ကူးသန်းရောင်းဝယ် ရေးဝန်ကြီးဌာနမှ ဒုတိယ အမြဲတမ်းအတွင်းဝန် ဦးခင်မောင်လွင်က မြန်မာ့အလင်း ရဲ့မေးမြန်းချက်ကို ပြန်လည်ဖြေကြားပါတယ်။

မြန်မာ့ဆန် အရည်အသွေးနဲ့ စံချိန်စံညွှန်း ကိစ္စရပ်များကို နိုင်ငံတကာအဆင့်အတန်းပြည့်မီ စေဖို့အတွက် သက်ဆိုင်ရာ ဝန်ကြီးဌာနတွေ၊ ဆန်စပါးအသင်းအဖွဲ့တွေအားလုံး စုစည်းဆောင်ရွက်လျက်ရှိတာကို တွေ့ရှိရပါတယ်။ နိုင်ငံခြားကို တင်ပို့တဲ့ ဆန်တွေက ပြည်တွင်း စားသုံးတဲ့ ဆန်နဲ့တော့ သိပ်မတူညီဘဲ အများစုကတော့ ၂၅ မှတ်လို့ခေါ်တဲ့ ဆန် အကျိုးအကြေ ၂၅ ရာခိုင်နှုန်းပါတဲ့ ဆန်တွေဖြစ်ပါတယ်။ အောက်တိုဘာလအတွင်းက သင်္ဘောတင်တဲ့ ဆန်ဟာ ခြောက်လကြာပြီးတဲ့ အချိန်အထိ သင်္ဘောပေါ်မှာရှိနေခဲ့ရတဲ့အတွက် ဆန်ရဲ့ အရည်အသွေးဟာ အနည်းနဲ့အများဆိုသလို ပျက်စီး နိုင်တယ်လို့လည်း ဆန်လုပ်ငန်းရှင်တွေက သုံးသပ်ပါတယ်။ သို့သော် ဝန်ကြီးဌာနရဲ့ တာဝန်ရှိသူ ပြောကြားချက် အရ ဆန်တွေကို စပို့ပြီးတဲ့ အချိန်ကတည်းက ငြင်းပယ်ခံရတယ်ဆိုတဲ့ အချက်က ဖျက်ဆီးခြင်းခံရတဲ့အချက်ထက် ပိုပြီး အရေးတကြီး ဖြေရှင်းရမယ့် ကိစ္စဖြစ်တယ်လို့လည်း ကျွမ်းကျင်သူတွေက အကြံပြုပါတယ်။

▲ ဆန်အရည်အသွေးမပြည့်မီလို့ ငြင်းခံရရင် ▲

ပြည်ပကိုတင်ပို့တဲ့ ဆန်တွေ အရည်အသွေး မပြည့်မီလို့ ငြင်းပယ်ခံရရင်တင်ပို့တဲ့ ကုမ္ပဏီနဲ့ အရည်အသွေးစစ်ဆေးတဲ့ အဖွဲ့ကို ဝန်ကြီးဌာနကနေ ပြင်းထန်စွာအရေးယူပေးဖို့ လိုအပ်တယ်ဆိုပြီး မြန်မာနိုင်ငံ ဆန်စပါးလုပ်ငန်းရှင်များ အသင်းချုပ် နာယက ဦးချစ်ခိုင်က သူ့ရဲ့ လူမှုကွန်ရက်မှာ ရေးသားထားပါတယ်။

ဆန်စပါးလုပ်ငန်းရှင်များအသင်းချုပ်ဥက္ကဋ္ဌ ဦးရဲမင်းအောင်ကတော့ အသင်းချုပ်အနေနဲ့ မြန်မာ့ဆန်အရည်အသွေး စံချိန်စံညွှန်းကိစ္စကို နိုင်ငံတကာအဆင့်မီစေဖို့ ကြိုးပမ်းဆောင်ရွက်နေကြောင်း၊ ပြည်ပတင်ပို့သူတွေနဲ့ သင်္ဘောမတင်မီနဲ့ သင်္ဘောတင်စဉ်မှာ စစ်ဆေးရတဲ့ Third Party Inspection Agency ကလည်း ထိရောက်စွာနဲ့ တိကျစွာ အရည်အသွေး ပိုင်းကို စီမံသွားဖို့အတွက် နည်းလမ်းတွေ ရှာဖွေလုပ်ကိုင်သွားမှာဖြစ်ပြီး ကြားခံကုန်သည် Trader တွေကို ရောင်းချရတဲ့ အခါ အခုလိုပြဿနာတွေ ပေါ်ပေါက်ရတဲ့အတွက် တိုက်ရိုက် end buyer တွေအထိ ချိတ်ဆက်ရောင်းချနိုင်တဲ့ အစီအစဉ် တွေနဲ့ G to G ရောင်းချမှု အစီအစဉ်တွေ စီစဉ်ရန် လိုအပ်နေတဲ့အကြောင်းကို သူ့ရဲ့လူမှုကွန်ရက်ကနေ တစ်ဆင့် ရေးသားထားပါတယ်။

“စစ်ဆေးတာကလည်း သူ့အဖွဲ့နဲ့သူ စစ်တာပါ။ သင်္ဘောတင်တဲ့ အချိန်မှာ မိုးမိတယ်လို့ လည်းကြားတယ်။ ပုံတွေမှာ မြင်ရတဲ့အတိုင်းဆိုရင် ခဲနေတာတွေ အများကြီးတွေ့ရတယ်။ ပြောရရင် ဝယ်တဲ့အချိန်မှာ ဈေးကမြင့်ပြီး ဝယ်ပြီး တဲ့အချိန်မှာ ဆန်ဈေးက ကျသွားတာလည်း ပါမယ်ထင်တယ်။ အဓိကကတော့ ကုန်သည်နဲ့ သက်ဆိုင်မယ်လို့ ထင်ပါတယ်။ ကျွန်တော်တို့ နိုင်ငံအတွက်ကတော့ တိုက်ရိုက်တင်ပို့လို့မရဘဲ အခုလို တစ်ဆင့်ခံပွဲစားကုန်သည်နဲ့ခံပြီး တင်ပို့ နေရသရွေ့ ဒီလိုပြဿနာတွေ ကြုံနေရဦးမှာပဲ။ ပွဲစားတွေက သူတို့အတွက် ကြိုက်ဈေးမရမချင်း သင်္ဘောပေါ်တင်ပြီး လည်ရောင်းသလို ဖြစ်နေတယ်။ အရည်အသွေးမကောင်းတာကျမှ ကိုယ့်နိုင်ငံက နာမည်ထွက်လာရတယ်” လို့ ဆန်လုပ်ငန်းရှင်တစ်ဦး ကလည်း ထောက်ပြပါတယ်။

▲ ပြိုင်ဆိုင်မှုပြင်းထန်ခြင်းနဲ့ ဈေးကွက်တိုက်ရိုက်ရရှိမှု အားနည်းခြင်း ▲

အာဖရိကဈေးကွက်က ယှဉ်ပြိုင်မှု ပြင်းထန်ပြီး အာရှမှ ဆန်တင် သွင်းသူများကလည်း အကြီးအကျယ်ပြိုင်ဆိုင်လေ့ ရှိကြောင်း သိရပါတယ်။ မြန်မာနိုင်ငံအပြင် ဗီယက်နမ်၊ အိန္ဒိယ၊ ပါကစ္စတန်စတဲ့ ဆန်အပြိုင်အဆိုင် ဈေးကွက်တွေကနေ တင်သွင်းကြတာ ဖြစ်တယ်လို့ သိရပါတယ်။

“ပထမအစီအစဉ်က သူတို့ကနေ ပြန်သယ်မယ်ဆိုတော့ ကျွန်တော်တို့ဘက်က လက်ခံတယ်။ ဆန်တွေ ပြန်ရောက်လာခဲ့ရင် ဒါတွေကို စိစစ်မယ်။ ဘာကြောင့် အခုလို ငြင်းပယ်ခံရတယ် ဆိုတာကို အဖြေရှာမယ်။ ကျွန်တော်တို့ ဝန်ကြီး ဌာနကနေ အသင်းချုပ်နဲ့ရော၊ စစ်ဆေးတင်ပို့တဲ့ အဖွဲ့တွေနဲ့ရော အားလုံးတွေ့ဆုံပြီး အဖြေမှန်ကို ဖော်ထုတ်သွားမယ်ဆိုပြီး ရည်ရွယ်ထားတာပါ။ ဒါပေမယ့် ကုမ္ပဏီဘက်က အကြောင်းကြားလာတယ်။ မြန်မာနိုင်ငံကို ပြန်မသယ်တော့ဘူး။ အိုင်ဗရီကို့စ်မှာ ချမယ်ဆိုပြီး ဖြစ်လာတယ်။ ဒီနေ့ မနက်ပဲ အဲဒီနိုင်ငံမှာလည်း ဆန်တွေကို ဖျက်ဆီးတယ်ဆိုတဲ့ သတင်းကို သိရှိရတော့တာပဲ” လို့ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနရဲ့ ဒုတိယအမြဲတမ်းအတွင်းဝန်က ဖြစ်စဉ်နဲ့ ပတ်သက်ပြီး ရှင်းပြပါတယ်။

မြန်မာနိုင်ငံကနေ ဆန်တင်ပို့ရောင်းချတဲ့ အခါ FOB စနစ်နဲ့ အဓိကရောင်းချပြီး ရန်ကုန်ဆိပ်ကမ်းကနေ ပင်လယ်ကူး သင်္ဘောကြီးတွေပေါ် အရောက်တင်ပို့တဲ့စနစ်နဲ့ အရောင်းအဝယ် ပြုလုပ်ကြတာဖြစ်ပါတယ်။ ဆန်မှမဟုတ်ပါဘူး။ အခြား ဒေသထွက်ကုန်တွေကိုလည်း ဒီလိုစနစ်နဲ့ အရောင်းအဝယ်ပြုလုပ်ကြ ပါတယ်။ ဒါကြောင့် မြန်မာ့ဆန်ဖြစ်ပေမယ့် မြန်မာတွေ ပိုင်ဆိုင်ပြီး မြန်မာတွေက ကိုယ်တိုင်အာမခံ ရောင်းချရတဲ့ စနစ်မျိုးတော့ မဟုတ်ပါဘူး။ တစ်ဆင့်ခံဝယ်ယူ သွားကြတဲ့ အဝယ်တော် သို့မဟုတ် ကုန်သည် ပွဲစားတွေဟာ သင်္ဘောပေါ်တင်သွားကြပြီး သက်ဆိုင်တဲ့ အချိတ်အဆက်ရှိတဲ့ နိုင်ငံတွေဆီမှာ တစ်ဆင့်ပြန်လည်ရောင်း ချကြခြင်းဖြစ်ပါတယ်။ ဒါကြောင့် သင်္ဘောပေါ်မှာ ကုန်ချက်ချင်းမချ နိုင်တဲ့အခါ ကြာမြင့်စွာ သိုလှောင်မှု ဖြစ်တာ၊ အစိုဓာတ်တွေ ဖြစ်တာနဲ့ အရည်အသွေးတွေ ပျက်စီးတာ၊ ကျဆင်းတာတွေလည်း ဖြစ်နိုင်တယ် လို့ သိရပါတယ်။

▲ ဘာကြောင့်ငြင်းပယ်ခံရတာလဲဆိုတာ စစ်ဆေးမယ် ▲

“ကျွန်တော်တို့ အခုလုပ်ရမယ့်အလုပ်က ဘာကြောင့် အာဖရိကနိုင်ငံတွေကနေ မြန်မာ့ဆန်ကို ငြင်းပယ်ခံရသလဲဆိုတာကို အရင်ဆုံး စိစစ်ပြီး အဖြေရှာမယ်။ ပြီးရင် နောက်ထပ် ဒါမျိုးလုံးဝထပ်မဖြစ်အောင် ဘယ်လိုဆောင်ရွက်မလဲဆိုတာကို လုပ်ဆောင်သွားမှာဖြစ်ပါတယ်” လို့ ဒုတိယအမြဲတမ်းအတွင်းဝန်က ဆိုပါတယ်။

၁၉၄၀ ပြည့်နှစ်များက မြန်မာ့ဆန်တွေ ကမ္ဘာအနှံ့ တင်ပို့နိုင်ခဲ့တဲ့အထိ အောင်မြင်ခဲ့တဲ့ အတိတ်ရှိခဲ့သလို ၁၉၉၄ ခုနှစ်က ယခုလိုပဲ မြန်မာ့ဆန်တွေ အရည်အသွေးမမီဘူးလို့ စွပ်စွဲခံရတာလည်း ရှိခဲ့ဖူးပါတယ်။ ဆန်အရည်အသွေး အားနည်းချက်၊ သင်္ဘောတင်စဉ် အမှားအယွင်း၊ တိုက်ရိုက်ရောင်းချနိုင်တဲ့စနစ် အသုံးပြုပြီး တစ်နိုင်ငံချင်းနဲ့ ကုန်သွယ်မှုတိုက်ရိုက်ပြုလုပ်နိုင် မှုမရှိတဲ့ အားနည်းချက် စသည်ဖြင့် အချက်အလက် များစွာရှိနိုင်ပြီး ရင်ဆိုင်ဖြေရှင်းကာ မြန်မာ့ ပို့ကုန်ရဲ့အခန်းကဏ္ဍကို ပြန်လည်မြှင့်တင်ရန်လည်း အမြန်ဆုံးလိုအပ်နေချိန်လည်း ဖြစ်ပါတယ်။

“အစိုးရပိုင်းနဲ့ ဝန်ကြီးဌာနပိုင်းက ပိုပြီးအားစိုက်ပြီးတော့ ဆောင်ရွက်ရမှာကတော့ ကုန်သွယ်ဖက်နိုင်ငံတွေနဲ့ ကုန်သွယ်မှုကို ပိုမိုပြီးတော့ ထိုးဖောက်ပေးဖို့ လိုအပ်နေတယ်လို့ မြင်ပါတယ်။ လက်ရှိအခြေအနေမှာ နည်းနည်းလေး အားထပ်ဖြည့်ဖို့ လိုနေတယ်လို့မြင်ပါတယ်။ နောက်ပြီးတော့ နိုင်ငံတကာကို လွှတ်ထားတဲ့ စီးပွားရေးသံမှူးတွေရဲ့ စွမ်းဆောင်မှုတွေကို ပိုပြီးတော့ ထက်မြက်လာဖို့လိုတယ်လို့ မြင်မိပါတယ်။ နောက်ပြီးတော့ bilateral trade agreement တွေ များများရဖို့ လိုတယ်။ နောက်ပြီးတော့ သေချာတဲ့ Quota တွေ များများရဖို့ ပိုပြီးတော့ အားထုတ်ဖို့လိုတယ်” လို့ စီးပွားရေးပညာရှင် ဦးတင်ထွဋ်ဦးကလည်း လက်ရှိစီးပွားရေးကဏ္ဍအပေါ် သူ့အမြင်ကို ပြောကြားပါတယ်။

မြန်မာနိုင်ငံ ဆန်စပါးအသင်းချုပ်ရဲ့ မှတ်တမ်းတွေအရ ဆန်တင်ပို့မှုမှာ ၂၀၁၈ ခုနှစ် ဧပြီ ၁ ရက်ကနေ ၂၀၁၉ ခုနှစ် မတ် ၁ ရက်အထိ နိုင်ငံပေါင်း ၅၀ ကိုတင်ပို့ထားခဲ့ပြီး ဆန်မက်ထရစ် တန် ၁၈၂၂၈၂၂ ဒသမ ၁၄၂တန် တင်ပို့ထား ခဲ့ပြီး ဆန်ကွဲတင်ပို့မှုမှာ နိုင်ငံပေါင်း ၂၅ နိုင်ငံကို တန်ချိန်ပေါင်း ၃၉၃၇၉၅ ဒသမ ၀၁၀ တန် တင်ပို့ထားခဲ့ပါတယ်။ နှစ်ခုပေါင်း ပို့ကုန် ဝင်ငွေကတော့ အမေရိကန်ဒေါ်လာ သန်းပေါင်း ၇၃၀ ဒသမ ၄၄၀ ဖြစ်ပါတယ်။ ပင်လယ်ရေကြောင်း ကုန်သွယ်မှု အနေနဲ့ မက်ထရစ်တန် ၁၁၁၀၉၇၂ ဒသမ ၅၇၂ တန်ရှိပြီး ပို့ကုန်ဝင်ငွေ အမေရိကန် ဒေါ်လာ သန်းပေါင်း ၃၆၁ ဒသမ ၄၂၃ ရရှိထားပါတယ်။

မကြာမီမှာတော့ အစိုးရတာဝန်ရှိသူတွေ၊ အသင်းချုပ်နဲ့ ဆန်စပါးလောက က တာဝန်ရှိသူတွေကနေ လက်ရှိကြုံတွေ့ နေရတဲ့ မြန်မာ့ဆန်တွေ ကျန်းမာရေးအတွက် အန္တရာယ်ရှိတဲ့ စားသုံး ရန်မသင့်တဲ့ ကုန်စည်အဖြစ် ဖျက်ဆီးခံရတဲ့ကိစ္စ ရပ်ကို ဖြေရှင်းပြီး မြန်မာ့ပို့ကုန်ဈေးကွက်မှာ ကြုံရတဲ့ အခက်အခဲတွေကို ကျော်လွှားနိုင်မယ်လို့ ယုံကြည်ပါတယ်။

“အစွမ်းကုန် ကြိုးစားသွားရမှာပေါ့။ ကျွန်တော်တို့က တိုက်ရိုက်တစ်နိုင်ငံချင်း ရောင်းချနိုင်တဲ့ ‘အား’ နည်းနေတယ်။ ကျွန်တော်တို့ရဲ့ ပို့ကုန်တွေအပေါ်မှာ တိကျတဲ့ အာမခံချက်တွေ၊ မှတ်ကျောက်တင်နိုင်မှုတွေ အခုထက်ပိုပြီးလုပ် နိုင်မယ် ဆိုရင်၊ ခိုင်မာတဲ့ ဈေးကွက်ကိုလည်း ဖော်ဆောင်နိုင်မယ်ဆိုရင် ဒီလိုအဖြစ်မျိုးတွေ ထပ်မဖြစ်ဘူး” လို့ ပြည်တွင်းဆန် လုပ်ငန်းရှင် တစ်ဦးဖြစ်တဲ့ ဦးဝင်းနိုင်က ပြောပါတယ်။ “မြန်မာ့ ဆန်တွေရဲ့ ပြည်ပတင်ပို့မှု အနာဂတ် ဖြောင့်ဖြူးပါစေလို့ ဆုတောင်းတယ်။ မကြာခင်မှာ နွေစပါးတွေ ရိတ်သိမ်းရတော့မယ်” လို့ ဆက်ပြောရင်း သူ့ရဲ့ သက်ပြင်းရှိုက်သံကို ကြားလိုက်ရပါတယ်။ ။

ခင်ရတနာ