တိုင်းရင်းသားလက်နက်ကိုင် ခုနစ်ဖွဲ့အား NCA လက်မှတ်ရေးထိုးနိုင်ရေးအတွက် ပုံစံနှစ်မျိုးဖြင့် ချဉ်းကပ်တွေ့ဆုံမည်

နေပြည်တော် ဇူလိုင် ၁၂

ပြည်ထောင်စုငြိမ်းချမ်းရေးညီလာခံ- (၂၁)ရာစုပင်လုံ တတိယ အစည်းအဝေးနှင့် ပတ်သက်သည့် အကြောင်းအရာများ၊ မြောက်ပိုင်း မဟာမိတ် ခုနစ်ဖွဲ့ နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် နှစ်ဖွဲ့ခွဲ၍ တွေ့ဆုံခဲ့သည့်အကြောင်းအရာများ၊ လက်မှတ်ရေးထိုးခြင်း မပြုသေးသည့် တိုင်းရင်းသားလက်နက်ကိုင်များ  NCA လက်မှတ်ရေးထိုးနိုင်ရေး၊ တပ်မတော်နှင့် RCSS တို့ ဖြစ်ပွားလျက်ရှိသည့် ထိတွေ့မှုများနှင့်ပတ်သက်သည့် ကိစ္စရပ်များနှင့် စပ်လျဉ်း၍ ယနေ့ညနေ၅ နာရီတွင် မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန (၂) ၌ UPDJC အတွင်းရေးမှူးများက သတင်းမီဒီယာများနှင့် တွေ့ဆုံရှင်းလင်းသည်။

ညီလာခံ ဒုတိယနေ့တွင် အစိုးရအစုအဖွဲ့၊ တပ်မတော်အစုအဖွဲ့၊ တိုင်းရင်းသားလက်နက်ကိုင်အစုအဖွဲ့၊ နိုင်ငံရေး ပါတီအစုအဖွဲ့နှင့် လွှတ်တော်အစုအဖွဲ့တို့က နိုင်ငံရေး၊ စီးပွားရေး၊ လူမှုရေး၊ လုံခြုံရေး၊ မြေယာနှင့် သဘာဝပတ်ဝန်းကျင် ကဏ္ဍများအတွက် သီးခြားစီဆွေးနွေးခဲ့ကြပြီး NCA စာချုပ်လက်မှတ်ရေးထိုးနိုင်ရေးအတွက် ငြိမ်းချမ်းရေးကော်မရှင် ဒုတိယဥက္ကဋ္ဌက ကရင်နီအမျိုးသားတိုးတက်ရေးပါတီ (KNPP) ဒုတိယဥက္ကဋ္ဌ ခူဦးရယ်နှင့် အလွတ်သဘော ဆွေးနွေးခဲ့ကြောင်း သိရသည်။

ထို့ပြင် ယနေ့မွန်းလွဲ ၃ နာရီခွဲနှင့် ၄ နာရီတို့တွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် မြောက်ပိုင်း တိုင်းရင်းသားလက်နက်ကိုင် အဖွဲ့အစည်း ခုနစ်ဖွဲ့တို့အားနှစ်ဖွဲ့ခွဲ၍ နေပြည်တော်ရှိ အမျိုးသားပြန်လည်သင့်မြတ်ရေး နှင့်ငြိမ်းချမ်းရေးဗဟိုဌာန  (NRPC) တွင် လက်ခံတွေ့ဆုံခဲ့ကြောင်း သိရသည်။

ဦးဇော်ဌေးက ''၃ နာရီခွဲမှာ UWSA  ဒုတိယဥက္ကဋ္ဌ ဦးကျောက်ကော်အန်း၊ SSPP က နာယက ဦးဆေးထင်၊ မိုင်းလားအထူး(၄) NDAA က ဒုတိယဥက္ကဋ္ဌ ဦးစံပေ့၊  KIO ဒုတိယဥက္ကဋ္ဌ (၂) အက်စ်ဂွမ်မော်တို့နဲ့ တွေ့တယ်။ လေးနာရီ ခွဲမှာတော့ TNLA က တာခူးလန်း၊ MNDAA  က ဦးရန်ငွေကျုံးနဲ့ AA က ဦးညိုထွန်းအောင်တို့နဲ့ တွေ့ပါတယ်။ အဓိကအားဖြင့် ဆွေးနွေးတာက NCA ရေးထိုးပြီး ပြည်ထောင်စုငြိမ်းချမ်းရေး ညီလာခံ-(၂၁)ရာစု ပင်လုံမှာပါဝင်လာရေးကို ဆွေးနွေးပါတယ်''ဟု ပြောသည်။

AA ၊ MNDAA ၊ TNLA သုံးဖွဲ့သည် တစ်နိုင်ငံလုံးအပစ်အခတ်ရပ်စဲရေးညှိနှိုင်းဆောင်ရွက်ရေးအဖွဲ့ (NCCT) နှင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ဆွေးနွေးစဉ်က မြောက်ပိုင်း လောက်ကိုင်တိုက်ပွဲများကြောင့် ငြိမ်းချမ်းရေးဖြစ်စဉ်တွင် ကျန်ရှိနေခဲ့သူများဖြစ်သည်။

''သူတို့က NCCT နဲ့ NCA ဆွေးနွေးစဉ်က မြောက်ပိုင်းလောက်ကိုင်မှာ တိုက်ပွဲတွေ ဖြစ်လာပြီး ကျန်ခဲ့တဲ့သူတွေဖြစ်တယ်။  NLD အစိုးရတက်လာချိန်မှာ AA ၊ MNDAA နဲ့ TNLA ကိုဆွေးနွေးတယ်။ အချက်နှစ်ချက်ကြောင့် ကျန်ခဲ့တယ်။ တစ် အချက်က ကြေညာချက်ထုတ်ရမယ်။ နှစ်အချက်က Under Ground  ကနေ ထွက်ရမယ်ဆိုတဲ့အရာပေါ့။ အဲ့ဒါနှစ်ခုသာရရင် NCA ထိုးဖို့ ဆက်ဆွေးနွေးမယ်ဆိုပြီး ပြောခဲ့တယ်။ အခုတော့ ဒီအတိုင်းမဟုတ်တော့ဘူး။ ချဉ်းကပ်မှုအသစ်နဲ့သွားမယ်။ အခုလည်း သူတို့က NCA ထိုးချင်တယ်'' ဟု ဦးဇော်ဌေးက ပြောသည်။

AA ၊ MNDAA နှင့် TNLA သုံးဖွဲ့ NCA သိပါဝင်လာနိုင်ရေးအတွက် ညီလာခံ တတိယ အစည်းအဝေးအပြီးတွင် ညှိနှိုင်းသွားမည်ဖြစ်သော်လည်း KIA ၊ UWSA ၊ NDAA ၊ SSPP တို့နှင့် တန်းတူဆွေးနွေးမည်မဟုတ်ဘဲ ပုံစံတစ်မျိုးဖြင့် ဆွေးနွေးမည်ဖြစ်ကြောင်း သိရသည်။

အဆိုပါ မြောက်ပိုင်း ခုနစ်ဖွဲ့အား တပ်မတော်ကာကွယ်ရေးဦးစီးချုပ်နှင့် ဒုတိယတပ်မတော်ကာကွယ်ရေးဦးစီးချုပ်တို့က ဇူလိုင် ၁၁ ရက်က နှစ်ဖွဲ့ခွဲ၍ တွေ့ဆုံခဲ့သည်။

''AA ၊ MNDAA နှင့် TLA သုံးဖွဲ့ကို ဒုတိယတပ်မတော်ကာကွယ်ရေးဦးစီးချုပ်က တွေ့တယ်။ ဘာကြောင့်လဲဆိုတော့ အဲ့ဒီသုံးဖွဲ့က တိုက်ပွဲတွေ ဖြစ်နေလို့၊ နောက်သူတို့က နှစ်ဖက်သဘောတူစာချုပ် ချုပ်တာမျိုးရှိမထားဘူး။ KIA ၊ SSPP ၊ UWSA ၊ NDAA က နှစ်ဖက်သဘောတူစာချုပ်ချုပ်တာမျိုးရှိထားတယ်။ အဲ့ဒီလို အနေအထားကွာခြားတော့ပဋိပက္ခလျှော့ချရေး NCA ကို ဘယ်လိုသွားမလဲ ဆွေးနွေးခဲ့တယ်လို့ သိရပါတယ်။ အဓိကက NCA ထိုးဖို့ပဲ ဆွေးနွေးသွားတယ်''ဟု ဦးဇော်ဌေးထံက သိရသည်။

အစိုးရအနေဖြင့် မြောက်ပိုင်း ခုနစ်ဖွဲ့အား ပုံစံနှစ်မျိုးဖြင့်ချဉ်းကပ်မည်ဖြစ်ပြီး ညီလာခံတက်ရောက်ရန် ဖိတ်ခေါ်ခြင်းသည် တပ်မတော်နှင့် တိုက်ပွဲများလျော့ကျရေး၊ အစိုးရနှင့် NCA လက်မှတ်ရေးထိုးနိုင်ရေးအတွက် ရည်ရွယ်ကြောင်းသိရသည်။

ဦးဇော်ဌေးက ''ညီလာခံပြီးရင် တိုက်ပွဲလျော့ကျအောင်နဲ့ နှစ်ဖက်ယုံကြည်ရအောင်။ တတိယနဲ့ စတုတ္ထညီလာခံမတိုင်မီ ကြားထဲမှာ NCA လက်မှတ်ရေးထိုးတဲ့အဖွဲ့တွေတိုးလာမယ်လို့ မျှော်လင့်ထားတယ်''ဟု ပြောသည်။

RCSS နှင့် တပ်မတော် ထိတွေ့မှုများ ဖြစ်ပွားနေခြင်းသည် နှစ်ဖက်သဘောတူ စာချုပ်များ ချုပ်ဆိုထားသော်လည်း နယ်မြေသတ်မှတ်မှုများ ကျော်လွန်လာ၍ ထိတွေ့မှုဖြစ်ပွားနေခြင်းဖြစ်ကြောင်း၊ ပစ်ခတ်တိုက်ခိုက်မှုရပ်စဲရေး ဆိုင်ရာပူးတွဲစောင့်ကြည့်ရေးကော်မတီ (JMC) ၏ အပစ်ရပ်နယ်မြေသတ်မှတ်မှုများကို တိတိကျကျ ဆောင်ရွက်ပြီးပါက ထိတွေ့မှုများ ရပ်ဆိုင်းသွားမည်ဖြစ်ကြောင်း အဆိုပါသတင်းစာရှင်းလင်းပွဲမှ သိရသည်။

နိုင်ငံတော်၏ အတိုင်ပင်ခံပုဂ္ဂိုလ်နှင့် တပ်မတော်ကာကွယ်ရေးဦးစီးချုပ်တို့၏ ၂၀၁၉ ၊ ၂၀၂၀ အချိန်သတ်မှတ်၍ ငြိမ်းချမ်း ရေးရည်မှန်းချက်ထားခြင်းသည် နှစ်ရှည်လများ အချိန်မဆွဲရန်၊ အခြားအကျိုးစီးပွားအမျိုးမျိုးနှင့် ငြိမ်းချမ်းရေးအပေါ် စိတ်အားထက်သန်မှု လျော့ကျခြင်းမျိုး ဖြစ်မလာနိုင်စေရန်ရည်ရွယ်ကြောင်း သိရသည်။

''အတိုင်ပင်ခံပုဂ္ဂိုလ်ရဲ့ ၂၀၁၉ သတ်မှတ်ချက်ကို မီချင်တယ်ဆိုရင် အစိုးရတစ်ဖက်တည်းက ဆောင်ရွက်လို့မရဘူး။ တိုင်းရင်းသားလက်နက်ကိုင်အဖွဲ့အစည်းဘက်က မလုပ်ချင်ဘူးဆိုရင် အကြောင်းအမျိုးမျိုးပြပြီး အဆင်မပြေတာတွေ ဖြစ်လာနိုင်တယ်။ နိုင်ငံရေးပါတီလည်း ဒါကိုမဖြစ်ချင်ရင်အကြောင်း အမျိုးမျိုးပြလို့ရတယ်။ "ဒါကြောင့် ရည်မှန်းချက်တွေအပေါ် သန္နိဋ္ဌာန်နဲ့လုပ်ဖို့၊ စိုးရိမ်မှုမရှိဖို့ ပြောတာပါ'' ဟုဦးဇော်ဌေးက ဆိုသည်။

ယနေ့ပြုလုပ်သည့် ရှင်းလင်းပွဲတွင် UPDJC အတွင်းရေးမှူးများဖြစ်ကြသည့် ဦးဇော်ဌေး၊ ဦးလှမောင်ရွှေ၊ ရဲဘော်မျိုးဝင်းနှင့် စိုင်းကျော်ညွန့်တို့က သတင်းမီဒီယာများအားတွေ့ဆုံဖြေကြားခဲ့ခြင်းဖြစ်သည်။

သတင်း - ရဲခေါင်ညွန့်

ဓာတ်ပုံ - ဖိုးထောင်