ဒုတိယသမ္မတ ဦးမြင့်ဆွေ မြန်မာ့စီးပွားရေး လုပ်ငန်းရှင်များနှင့် (၁၇) ကြိမ်မြောက် တွေ့ဆုံဆွေးနွေးပွဲသို့ တက်ရောက် အမှာစကားပြောကြား

ရန်ကုန် မေ ၁၁

ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီနှင့် မြန်မာ့စီးပွားရေး လုပ်ငန်းရှင်များ၏ (၁၇) ကြိမ်မြောက် ပုံမှန်တွေ့ဆုံ ဆွေးနွေးပွဲကို ယနေ့နံနက် ၉ နာရီတွင် ရန်ကုန်မြို့ရှိ ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ် (UMFCCI) အစည်းအဝေးခန်းမ၌ ကျင်းပရာ ပုဂ္ဂလိကကဏ္ဍ ဖွံ့ဖြိုးတိုးတက်ရေး ကော်မတီ ဥက္ကဋ္ဌ ဒုတိယသမ္မတ ဦးမြင့်ဆွေ တက်ရောက်အမှာစကား ပြောကြားသည်။

တွေ့ဆုံဆွေးနွေးပွဲသို့ ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီ ဒုတိယဥက္ကဋ္ဌ စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီး ဒေါက်တာသန်းမြင့်၊ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်း၊ ဒုတိယဝန်ကြီး များဖြစ်ကြသည့် ဦးအောင်ထူးနှင့် ဦးဝင်းမော်ထွန်း၊ ရန်ကုန်တိုင်းဒေသကြီး ဝန်ကြီးများ၊ လုပ်ငန်းကော်မတီ (၅)ရပ်မှ တာဝန်ရှိသူများ၊ ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များအသင်းချုပ် ဥက္ကဋ္ဌနှင့် အဖွဲ့ဝင်များ၊ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ ကလေး-တမူး နယ်စပ်ကုန်သွယ်ရေး ကုန်သည်များ အသင်း၊ စစ်ကိုင်းတိုင်းဒေသကြီး ကုန်သည်များနှင့် စက်မှုလက်မှု လုပ်ငန်းရှင်များအသင်း၊ မြန်မာနိုင်ငံ ဂျုံလုပ်ငန်းအသင်း၊ မြန်မာနိုင်ငံ ကျောက်မျက်ရတနာ လုပ်ငန်းရှင်များ အသင်းတို့မှ ကိုယ်စားလှယ်များနှင့် တာဝန်ရှိသူများ တက်ရောက် ကြသည်။

ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီအနေဖြင့် လုပ်ငန်းကော်မတီ ၅ ခု၏ ဆောင်ရွက်မှုများကို နှစ်လတစ်ကြိမ် ကျင်းပသည့် ပုဂ္ဂလိကကဏ္ဍ ဖွံ့ဖြိုးတိုးတက်ရေး ကော်မတီအစည်းအဝေးတွင် ညှိနှိုင်းဆွေးနွေးလျက်ရှိရာ ပြီးခဲ့သည့် ဧပြီ ၂၇ ရက်က ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီ၏ သတ္တမအကြိမ်မြောက် လုပ်ငန်းညှိနှိုင်း ဆွေးနွေးပွဲကိုလည်း ကျင်းပခဲ့ပါကြောင်း။

ပုဂ္ဂလိကကဏ္ဍ ဖွံ့ဖြိုးတိုးတက်ရေးလုပ်ငန်းများ ဆောင်ရွက်ရာတွင် အထောက်အကူ ပြုနိုင်ရေးအတွက် စီးပွားရေး လုပ်ငန်းရှင်များနှင့် တွေ့ဆုံပြီး အစုအဖွဲ့အလိုက်၊ လုပ်ငန်းကဏ္ဍများအလိုက် အခက်အခဲများကို ၂၀၁၆ ခုနှစ် ဒီဇင်ဘာမှ စတင်ပြီး ဖြေရှင်းပေးလျက်ရှိရာ ပြီးခဲ့သည့် ဧပြီလအထိ တွေ့ဆုံဆွေးနွေးမှုအကြိမ်ပေါင်း (၁၆)ကြိမ် ဆောင်ရွက်ခဲ့ပြီး အကြံပြုတင်ပြချက် စုစုပေါင်း (၂၄၅) ချက် ရှိခဲ့ပါကြောင်း၊ အဆိုပါ အချက်များအားလုံးကို သက်ဆိုင်ရာ စီးပွားရေး လုပ်ငန်းရှင်များထံသို့ ပြန်ကြားပေးပြီး ဖြစ်ပါကြောင်း။

အချို့ကိစ္စရပ်များသည် မပြီးပြတ်သေးဘဲ ဆက်လက်ဖြေရှင်းဆောင်ရွက်ပေးရမည့် လုပ်ငန်းများဖြစ်နေသည့်အတွက် လုပ်ငန်းကော်မတီ ၅ ရပ်အနေဖြင့် သက်ဆိုင်ရာ ဝန်ကြီးဌာနများနှင့် တင်ပြသူ ပုဂ္ဂလိကလုပ်ငန်းရှင်များ တွေ့ဆုံ၍ ဆွေးနွေးပွဲ (Public - Private Dialogue) များကို စဉ်ဆက် မပြတ်ပြုလုပ်၍ ပြီးပြတ်သည်အထိ ဖြေရှင်းဆောင် ရွက်ပေးလျက်ရှိပါကြောင်း။

ရင်းနှီးမြှပ်နှံမှုများ တိုးမြှင့်ဝင်ရောက်လာစေရေးအတွက် နိုင်ငံတော်က ခေတ်စနစ်နှင့်လျော်ညီသည့် ဥပဒေမူဘောင်များ၊ လုပ်ထုံးလုပ်နည်းများနှင့် အမိန့်များကို ဖြေလျှော့ဆောင်ရွက်ပေးခဲ့ပါကြောင်း။

အသေးစားနှင့် အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ပြီး ရေရှည်ရပ်တည်နိုင်ရန် နယ်စပ်ဒေသမှ တရားမ၀င် ကုန်ပစ္စည်းများ ၀င်ရောက်မှုမရှိစေရေးအတွက် ပြည်ထဲရေးဝန်ကြီးဌာန၊ သက်ဆိုင်ရာ ၀န်ကြီးဌာနများနှင့် တိုင်းဒေသကြီး၊ ပြည်နယ်အစိုးရတို့ ပေါင်းစပ်ညှိနှိုင်း၍ တရားမဝင်ကုန်သွယ်မှုများ ၀င်ရောက်လာနိုင်သည့် ရှောင်ကွင်း လမ်းကြောင်းများကို တားဆီးထိန်းချုပ်နိုင်ရန် အထူးအဖွဲ့များဖွဲ့စည်းကာ စီစဉ်ဆောင်ရွက်နေပြီ ဖြစ်ပါကြောင်း။

၂၀၁၈ ခုနှစ် Doing Business နှင့်ပတ်သက်၍ ကမ္ဘာ့ဘဏ်မှ ထုတ်ပြန်သည့် အစီရင်ခံစာတွင် မြန်မာနိုင်ငံသည် အဆင့် (၁၇၁) ၌ ရောက်ရှိနေသည်ကို တွေ့မြင်ကြရမည်ဖြစ်ပါကြောင်း၊ သုံးနှစ်အတွင်း အဆင့် (၁၀ဝ) အောက်ရောက်ရှိရန် အထူးအလေးထား ဆောင်ရွက်လျက် ရှိပါကြောင်း၊ အဆိုပါ ရည်မှန်းချက် အောင်မြင်စေရန် အတွက် Ease of Doing Business Ranking တိုးတက်ရေး လုပ်ငန်းအဖွဲ့ကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးဆောင်သည့် အဖွဲ့ဝင် (၁၄) ဦးနှင့် ဖွဲ့စည်းဆောင်ရွက်ခဲ့ပါကြောင်း။

Ease of Doing Business Indicator များအလိုက် ညွှန်းကိန်း (၁၀) ခုကို လုပ်ငန်းအဖွဲ့ (၁၀) ဖွဲ့ ဖွဲ့စည်း၍ ဆောင်ရွက်နေပြီ ဖြစ်ပါကြောင်း၊ Ease of Doing Business ကဏ္ဍ (၁၀) ခုမှ Getting Credit နှင့်စပ်လျဉ်း၍ ချေးငွေနှင့် သက်ဆိုင်သည့် သတင်းအချက်အလက်များ စုဆောင်းသည့် အဖွဲ့အစည်း (Credit Bureau) ကို ခွင့်ပြုပေး ပြီးဖြစ်ပါကြောင်းနှင့် မကြာမီ ထုတ်ပြန်ကြေညာသွားမည် ဖြစ်ပါကြောင်း။

Ease of Doing Business Ranking တိုးတက်ရေးအတွက် မေးခွန်းများ ဖြေကြားရာတွင် ဖြေကြားသူများ (Respondents) ဘက်မှ ဖြေလျှော့ဆောင်ရွက်ပေးမှုများအပေါ် မှန်ကန်စွာဖြေဆိုနိုင်ရေး သက်ဆိုင်ရာလုပ်ငန်းရှင်များ၊ အဖွဲ့များအား တွေ့ဆုံ ရှင်းလင်းဆောင်ရွက်သွားရန် လိုအပ်ပါကြောင်း၊ အထူးသဖြင့် လုပ်ငန်းရှင်များဘက်က စနစ်တကျ ပြန်လည်ဖြေကြားနိုင် ရေးကိုလည်း UMFCCI မှ ပူးပေါင်းဆောင်ရွက်မှုနှင့် တကယ်လက်တွေ့နယ်ပယ်တွင် ပြုပြင် ပြောင်းလဲမှု တိုးတက်မှု အခြေအနေများကို ပေါ်လွင်အောင် ဖြေကြားနိုင်ရေးကိုလည်း အလေးထား ကူညီဆောင်ရွက် ပေးစေလိုကြောင်း။

ယနေ့ဆွေးနွေးပွဲတွင် ပါဝင်ဆွေးနွေးမည့် အသင်းအဖွဲ့ လေးဖွဲ့အနေဖြင့် မိမိတို့ အသင်းအဖွဲ့များ၏ တွေ့ဆုံနေရသော အခက်အခဲများကို ပွင့်ပွင့်လင်းလင်း ဆွေးနွေးတင်ပြကြရန် တိုက်တွန်းပါကြောင်း ပြောကြားသည်။

ထို့နောက် ပုဂ္ဂလိကကဏ္ဍ ဖွံ့ဖြိုးတိုးတက်ရေးကော်မတီ ဒုတိယဥက္ကဋ္ဌ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ၀န်ကြီးဌာနအနေဖြင့် ပို့ကုန်သွင်းကုန်လုပ်ငန်းများနှင့် ရင်းနှီးမြှုပ်နှံမှု ကဏ္ဍများတွင် အကောင်အထည်ဖော်ဆောင်ရွက်နေမှု အခြေအနေများနှင့်စပ်လျဉ်း၍ ရှင်းလင်းပြောကြားသည်။

ယင်းနောက် ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက ရန်ကုန်တိုင်းဒေသကြီးအတွင်း စီးပွားရေးကဏ္ဍ ဖွံ့ဖြိုးတိုးတက်ရေးနှင့် ခရီးသွားလုပ်ငန်းများ တိုးတက်စေရေးအတွက် စီစဉ်ဆောင်ရွက်ထားရှိမှု အခြေအနေများနှင့် စပ်လျဉ်း၍ ရှင်းလင်းပြောကြားသည်။

ထို့နောက် Ease of Doing Business Ranking တိုးတက်ရေး လုပ်ငန်းအဖွဲ့ အဖွဲ့ခေါင်းဆောင် စီးပွားရေးနှင့် ကူးသန်း ရောင်းဝယ်ရေး ၀န်ကြီးဌာန ဒုတိယ၀န်ကြီး ဦးအောင်ထူးက Ease of Doing Business Ranking တိုးတက်ရေးအတွက် ဆောင်ရွက်နေမှု အခြေအနေများနှင့် စပ်လျဉ်း၍ ရှင်းလင်းပြောကြားသည်။

ယင်းနောက် ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင်များအသင်းချုပ်ဥက္ကဋ္ဌ ဦးဇော်မင်းဝင်းက ပုဂ္ဂလိကကဏ္ဍ ဖွံ့ဖြိုးတိုးတက်ရေးအတွက် ကဏ္ဍအလိုက် လုပ်ငန်းဆောင်ရွက်နေမှု အခြေအနေများကို ရှင်းလင်းပြောကြားသည်။

ဆက်လက်၍ ပြည်ထောင်စုသမ္မတ မြန်မာနိုင်ငံ ကလေး-တမူး နယ်စပ် ကုန်သွယ်ရေး ကုန်သည်များအသင်း၊ စစ်ကိုင်း တိုင်းဒေသကြီး ကုန်သည် များနှင့် စက်မှုလက်မှု လုပ်ငန်းရှင်များအသင်း၊ မြန်မာနိုင်ငံဂျုံလုပ်ငန်း အသင်းနှင့် မြန်မာနိုင်ငံ ကျောက်မျက်ရတနာ လုပ်ငန်းရှင်များအသင်းတို့မှ တာဝန်ရှိသူများက သက်ဆိုင်ရာ လုပ်ငန်းကဏ္ဍများအလိုက် ရှင်းလင်း ဆွေးနွေးတင်ပြကြရာ ဒုတိယသမ္မတ၊ ပြည်ထောင်စုဝန်ကြီး၊ တိုင်းဒေသကြီး ဝန်ကြီးချုပ်နှင့် တာဝန်ရှိသူများက ပေါင်းစပ် ညှိနှိုင်းဖြေရှင်းပေးကြသည်။

ယင်းနောက် ဒုတိယသမ္မတ ဦးမြင့်ဆွေက နိဂုံးချုပ်အမှာစကားပြောကြားပြီး တွေ့ဆုံဆွေးနွေးပွဲကို ရုပ်သိမ်းလိုက်သည်။

Ref; Myanmar President Office