နေပြည်တော်
ဖေဖော်ဝါရီ ၁၈
အာဟာရပြည့်ဝသော
ဟင်းသီးဟင်းရွက် သစ်သီးဝလံများကို ပြည်တွင်းစားသုံးမှု ဖူလုံရေး သာမက ပြည်ပဈေးကွက်များအထိ
မျက်နှာပန်းလှလှ တင်ပို့ရောင်းချနိုင်ရေး အတွက် စိုက်ပျိုး ထုတ်လုပ်မှု နည်းပညာ၊ ရိတ်သိမ်းချိန်လွန်
နည်းပညာများကို နိုင်ငံတကာစံချိန်စံညွှန်းမီ လိုက်နာဆောင်ရွက်ရန် လိုအပ်ချက်များကို
အဓိကစိုက်ပျိုးထုတ်လုပ်သူ တောင်သူများ ကျယ်ကျယ် ပြန့်ပြန့် သိရှိလိုက်နာ ကျင့်သုံးလာစေရေးအတွက်
နည်းပညာပြန့်ပွားရေး လုပ်ငန်းကို သက်ဆိုင်ရာ ပညာရှင်ဝန်ထမ်းများ က အားထုတ်ဆောင်ရွက်ကြရန်
ဖေဖေါ်ဝါရီလ ၁၆ ရက် ညနေပိုင်းက သာစည်မြို့နယ်
အထက် မြန်မာပြည် သြဂဲနစ် သီးနှံစိုက်ပျိုးထုတ်လုပ်ရေး နည်းပညာဗဟိုဌာန VFDC သို့ရောက်ရှိပြီး
တာဝန် ရှိသူများနှင့်တွေ့ဆုံစဉ် ပြည်ထောင်စုဝန်ကြီး ဒေါက်တာအောင်သူ က ဆွေးနွေး ပြောကြားသည်။
တွေ့ဆုံပွဲတွင်
စိုက်ပျိုးရေးဦးစီးဌာန ညွှန်ကြားရေးမှူးချုပ် ဒေါက်တာရဲတင့်ထွန်း က အထက်မြန်မာ ပြည် သြဂဲနစ်သီးနှံစိုက်ပျိုးထုတ်လုပ်ရေး
နည်းပညာဗဟိုဌာန VFDC အကြောင်းအား ရှင်းလင်း တင်ပြရာ ပြည်ထောင်စုဝန်ကြီး က ပညာရှင်များ
စဉ်ဆက်မပြတ် မွေးထုတ်ပေးနိုင်ရေးနှင့် တိုးတက် လာသော နည်းပညာ များကို မျက်ခြေမပြတ်ဆည်းပူးပြီး
တောင်သူများ အမှန်တကယ် အားကိုး အားထားပြုနိုင်သည့် ဌာနအဖြစ် ရပ်တည်ဆောင်ရွက်နိုင်ရေး
ကြိုးပမ်းအားထုတ်ရန် လိုအပ်ချက်များ မှာကြားဆွေးနွေးသည်။
အထက်မြန်မာပြည်
သြဂဲနစ် သီးနှံစိုက်ပျိုး ထုတ်လုပ်ရေး နည်းပညာဗဟိုဌာန VFDC သည် မန္တလေး တိုင်းဒေသကြီး၊
သာစည်မြို့နယ်တွင် လှိုင်းတက်ကျေးရွာ အနီးတွင်တည်ရှိကာ ယခင်က ချည်မျှင် ရှည်ဝါ သုတေသနလုပ်ငန်း၊
ဝါမျိုးသန့် လုပ်ငန်းများ ဆောင်ရွက်ခဲ့သည့် လှိုင်းတက်ခြံ ၁ နှင့် လှိုင်းတက်ခြံ ၂ တို့ကို
ပေါင်းစပ်ပြီး VFDC အဖြစ် ပြောင်းလဲဆောင်ရွက်ခြင်း ဖြစ်သည်။ ယခုအခါ သြဂဲနစ် ဟင်းသီးဟင်းရွက်
သစ်သီးဝလံများ စိုက်ပျိုး ထုတ်လုပ်မှုစနစ် ဖွံ့ဖြိုးလာစေရန် နှင့် တောင်သူများသို့ နည်းပညာ
ဖြန့်ဖြူးပေးရန်၊ သီးနှံထွက်ကုန်များ၏ အရည်အသွေးကောင်းမွန် လာပြီး တောင်သူများဝင်ငွေတိုး၍
စားသုံးသူများ ကျန်းမာရေးနှင့်ညီညွတ်စေရန်၊ ပြည်တွင်းပြည်ပ အဖွဲ့ အစည်းများနှင့်ပူးပေါင်း၍
မြန်မာနိုင်ငံနှင့် သင့်လျော်မည့် သီးနှံအမယ်သစ်များကို စမ်းသပ် လေ့လာ ဖော်ထုတ်ရန်
ရည်ရွယ်ဆောင်ရွက်ခြင်းဖြစ်ကြောင်း သတင်းရရှိသည်။
(သတင်းစဉ်)
No comments:
Post a Comment