ဒုတိယသမ္မတ ဦးမြင့်ဆွေ ခပေါင်းရေလွဲဆည်၊ ရေလှောင်တမံ၊ ရေအား လျှပ်စစ်စက်ရုံနှင့် ပဲခူးရိုးမ စိမ်းလန်းစိုပြေရေး ဆောင်ရွက်ထားရှိမှု အခြေအနေများအား လှည့်လည် ကြည့်ရှုစစ်ဆေး

နေပြည်တော်  ဖေဖော်ဝါရီ ၁၇

ဒုတိယသမ္မတ ဦးမြင့်ဆွေသည် ယနေ့နံနက်ပိုင်းတွင် ခပေါင်းရေလွဲဆည်၊ ခပေါင်းရေ လှောင်တမံ၊  ခပေါင်းရေအား လျှပ်စစ်ဓာတ်အားပေး စက်ရုံနှင့် ပဲခူးရိုးမစိမ်းလန်းစိုပြေရေးဆောင် ရွက်ထားရှိမှု အခြေအနေများအား လှည့်လည်ကြည့်ရှု စစ်ဆေးသည်။

ဒုတိယသမ္မတဦးမြင့်ဆွေသည် ပဲခူး တိုင်းဒေသကြီး အစိုးရအဖွဲ့ သယံဇာတ၊သစ်တောနှင့် သဘာဝ ပတ်ဝန်းကျင် ထိန်းသိမ်းရေးဝန်ကြီး ဒေါက်တာ စောညိုဝင်းနှင့် တာဝန်ရှိသူများနှင့်အတူ နံနက် ၇ နာရီခွဲတွင် ပဲခူးတိုင်းဒေသကြီး၊ အုတ်တွင်း မြို့နယ်ရှိ ခပေါင်းရေလွဲ ဆည်သို့ ရောက်ရှိပြီး ရေလွဲဆည်မှ မြောင်းမကြီးများ အတွင်းသို့ စိုက်ပျိုး ရေပို့လွှတ်နေမှုများကို ကြည့်ရှုသည်။

ထို့နောက် ဒုတိယသမ္မတသည် ခပေါင်းရေလှောင်တမံသို့ ရောက်ရှိရာ ရှင်းလင်း ဆောင်ရှုရပ်မှ ရေလှောင်တမံအတွင်း ရေသိုလှောင်မှု အခြေအနေများကို ကြည့်ရှုသည်။

ယင်းနောက် ဒုတိယသမ္မတအား ရှင်းလင်းဆောင်၌ ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာန ညွှန်ကြားရေးမှူးချုပ် ဦးကျော်မြင့်လှိုင်က ခပေါင်းရေလှောင်တမံ၏ ရေသိုလှောင်မှု၊ မိုးရေချိန်နှင့် ရေ၀င်ရောက်မှု၊ စိုက်ပျိုးရေပေးဝေနိုင်မှု၊ တမံတည်နေရာ၊ တမံအမျိုးအစား၊ ရေပိုလွဲနှင့် ရေလွှဲဆည် တည်ဆောက်ထားရှိမှု၊ ရေအားလျှပ်စစ် ထုတ်လုပ်နိုင်မှု၊ အကျိုးပြုစိုက်ဧကနှင့် နှစ်အလိုက် စိုက်ပျိုးရေ ပေးဝေနိုင်မှုတို့နှင့် စပ်လျဉ်း၍ လည်းကောင်း၊ လျှပ်စစ်ဓာတ်အား ထုတ်လုပ်ရေး လုပ်ငန်း အင်ဂျင်နီယာချုပ် ဒေါက်တာ မောင်မောင်ကျော်က စက်ရုံတည်နေရာ၊ ဓာတ်အား ထုတ်လုပ်နိုင်မှု၊ နှစ်အလိုက် ဓာတ်အား ထုတ်လုပ်နိုင်မှု၊ စက်များ ပြုပြင်ထိန်းသိမ်းမှု အခြေအနေတို့နှင့် စပ်လျဉ်း၍ လည်းကောင်း ရှင်းလင်း တင်ပြကြသည်။

ထို့နောက် ဒုတိယသမ္မတက ဆည်မှ ရေပေးဝေမှုနှင့် စပ်လျဉ်း၍ စိုက်ပျိုးရေ လုံလောက်စွာ ရရှိသည့်အတွက် ဒေသခံတောင်သူများ ရေကိုအကျိုးရှိစွာ အသုံးချ၍ စီးပွားရေးတွက်ချေ ကိုက်သည့် သီးနှံများ ပိုမိုစိုက်ပျိုးအောင် စည်းရုံးသွားကြစေလိုကြောင်း၊ စီမံကိန်း လုပ်ငန်းများ အကောင် အထည်ဖော် ဆောင်ရွက်ရာတွင် ဖြစ်ပေါ်လာနိုင်သည့် သဘာဝ ဘေးအန္တရာယ်များကို ကြိုတင်တွက်ချက် စီမံဆောင်ရွက် သွားကြရန်နှင့် လျှပ်စစ်ဓာတ်အားများ ဆုံးရှုံးမှုမရှိအောင် အလေးထား ဆောင်ရွက်ရန် မှာကြားသည်။

ခပေါင်းရေလှောင်တမံသည် ရေပေးမြောင်းများ ရာနှုန်းပြည့် ပြီးစီးပြီဖြစ်၍ ဆည်ရေ ပေးဝေမှုဖြင့် နွေစပါး၊ ပဲမျိုးစုံနှင့် အခြားသီးနှံ (၅၃၂၈၆) ဧက စိုက်ပျိုးနိုင်ကြောင်း သိရသည်။

ထို့နောက် ဒုတိယသမ္မတသည် ခပေါင်းရေအားလျှပ်စစ် ဓာတ်အားပေး စက်ရုံအတွင်း စက်များတပ်ဆင် ထားရှိမှုအခြေအနေနှင့် လျှပ်စစ်ဓာတ်အား ထုတ်လွှတ်မှု အခြေအနေတို့ကို လိုက်လံကြည့်ရှုသည်။

ယင်းနောက်  အုတ်တွင်း - ပေါက်ခေါင်းလမ်း မိုင်တိုင်အမှတ် ၉၇ ရှိ သစ်တောဦးစီးဌာန စီးပွားရေးကျွန်း စိုက်ခင်း ဧက(၁၀၀၀) သို့ရောက်ရှိရာ ပဲခူးတိုင်းဒေသကြီး  ညွှန်ကြားရေးမှူး ဦးဇော်ဝင်းမြင့်က ကျွန်းပင်များ စိုက်ပျိုး ထားရှိမှု၊ စိုက်ခင်းများအတွင်း ပေါင်းရှင်းခြင်း၊ တောမီး ကာကွယ်ခြင်း၊ ပင်ကျပ်နှုတ်ခြင်း၊ ပင်ကျပ်ခွာခြင်း လုပ်ငန်းများ ဆောင်ရွက် ထားရှိမှုများကို ရှင်းလင်း တင်ပြသည်။

တင်ပြချက်များအပေါ် ဒုတိယသမ္မတက ယခုလမ်းကို လက်ရှိအခြေအနေထက် အရည်အသွေး မကျအောင် ထိန်းသိမ်းထားရန်၊ ပဲခူးရိုးမ သစ်ထုတ်လုပ်မှု ရပ်နားထားချိန်တွင် သဘာဝ အခြေခံ ခရီးသွား လုပ်ငန်းများကို ဖော်ဆောင်သွားရန်နှင့် ပဲခူးရိုးမသည် သစ်တောလွှမ်းခြုံမှု ၂၇ ဒသမ ၆၈ ရာခိုင်နှုန်းကျော်သာ ရှိသည့်အတွက် တစ်ပြည်လုံး သစ်တောလွှမ်းခြုံမှု ပျမ်းမျှ ၄၃ ရာခိုင်နှုန်းခန့်အထိ ရောက်ရှိအောင် ကြိုးပမ်း ဆောင်ရွက်ရန် မှာကြားသည်။

ဆက်လက်၍ ဒုတိယသမ္မတနှင့် အဖွဲ့သည် မိုင်တိုင်အမှတ် ၅၇/၆ ရှိ ရှုခင်းသာ (View Point)သို့ ရောက်ရှိပြီး သဘာဝ သစ်တောများ ပေါက်ရောက်နေမှုနှင့် ပတ်ဝန်းကျင် စိမ်းလန်းစိုပြေရေး ဆောင်ရွက်ထားမှုကို လည်းကောင်း၊ မိုင်တိုင်အမှတ် (၄၃/၂) ရှိ ဖြိုးစည်သူထရေးဒင်း ကုမ္ပဏီလီမီတက် စီးပွားရေး ကျွန်းစိုက်ခင်းအား လည်းကောင်း ကြည့်ရှုသည်။

ထို့နောက် ဒုတိယသမ္မတသည် မိုင်တိုင်အမှတ် (၄၂/၆)ရှိ ဖြိုးစည်သူထရေးဒင်း ကုမ္ပဏီလီမီတက်၏ ပဲခူးရိုးမ Eco Resort သို့ ရောက်ရှိပြီး ခရီးသွားဧည့်သည်များ အပန်းဖြေအနားယူနိုင် ရန် ဆောင်ရွက် ထားမှုများအား လိုက်လံကြည့်ရှုသည်။

ပဲခူးရိုးမ Eco Resort သည် ပဲခူးရိုးမတွင် ပထမဆုံး ဖွင့်လှစ်သည့် သဘာဝအခြေခံ ခရီးသွားလုပ်ငန်း ဖြစ်ကြောင်းသိရသည်။

ယင်းနောက် သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနမှ လှူဒါန်းသည့် ဆိုလာ မီးအိမ်(၅)စုံကို ပဲခူးရိုးမကျေးရွာများ ဖြစ်သည့် ရွှေတောင် ငွေတောင်ကျေးရွာ၊ ခပေါင်းကျေးရွာ၊ ဘော်ဒါကျေးရွာ (၃)ရွာတို့အတွက် ဒုတိယသမ္မတနှင့် ပဲခူးတိုင်းဒေသကြီး အစိုးရအဖွဲ့ သယံဇာတ ၊ သစ်တောနှင့် သဘာဝ ပတ်ဝန်းကျင်ထိန်းသိမ်းရေး ၀န်ကြီး ဒေါက်တာ စောညိုဝင်းတို့က ဒေသခံများထံ ပေးအပ်ခဲ့ကြောင်း သတင်းရရှိသည်။

(သတင်းစဉ်)