မီဒီယာများ ဖွံ့ဖြိုးလာသည်နှင့်အမျှ အများပြည်သူ အသိပညာ ဖွံ့ဖြိုးမှု၊ အပန်းဖြေပျော်ရွှင်မှုတို့ တိုးတက်ရရှိနိုင်မှာဖြစ်

ရန်ကုန် ဖေဖော်ဝါရီ ၁၇

ပြည်တွင်းမီဒီယာကဏ္ဍ ဖွံ့ဖြိုးတိုးတက်စေရေးအတွက် မြန်မာ့အသံနှင့် ရုပ်မြင်သံကြား၌ လက်ရှိထုတ်လွှင့်နေသည့် Multi- Channel Playout System တွင် DVB – T 2 စနစ်ဖြင့် Digital Free to Air ရုပ်သံလိုင်းများ ထပ်မံဆောင်ရွက်နိုင်ရန် မြန်မာ့အသံနှင့် ရုပ်မြင်သံကြားနှင့် Content Provider ငါးဖွဲ့တို့ ပူးပေါင်းဆောင်ရွက်မှု သဘောတူစာချုပ်လက်မှတ်ရေးထိုးပွဲ အခမ်းအနားကို ယနေ့ ညနေ ၃ နာရီ က ရန်ကုန်မြို့ ပြည်လမ်းရှိ မြန်မာ့အသံနှင့် ရုပ်မြင်သံကြား စတူဒီယိုအေ၌ ကျင်းပသည်။

အခမ်းအနားတွင် ပြန်ကြားရေး ဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်က အဖွင့်အမှာစကား ပြောကြားရာတွင် ''ကျွန်တော်တို့ ပြန်ကြားရေးဝန်ကြီးဌာနအနေနဲ့ အဓိက တာဝန်တစ်ရပ်သည် အများပြည်သူကို သတင်းအချက်အလက်ပေးဖို့၊ အသိ ပညာဖြည့်ဆည်းပေးဖို့နဲ့ အပန်းဖြေ ပျော်ရွှင်မှုအတွက် ဖျော်ဖြေတင်ဆက်ပေး ဖို့ ဖြစ်ပါတယ်။ ဒါကို Information ၊ Education ၊ Entertainment ဆိုပြီး သုံးနေကြတာ အသိဖြစ်ပါတယ်။

ဒါသည် ကျွန်တော်တို့ MRTV ပြန်ကြားရေးဝန်ကြီးဌာနသာမဟုတ်ဘဲ နိုင်ငံတကာမှာရှိတဲ့ မီဒီယာများ ထမ်းဆောင်နေရတဲ့ လုပ်ငန်းတာဝန် တွေပဲ ဖြစ်ပါတယ်။ ဒီတာဝန်ကို ပြန်ကြား ရေးဝန်ကြီးဌာနအနေနဲ့ မြန်မာ့အသံ နှင့် ရုပ်မြင်သံကြား ၊ သတင်းနှင့် စာနယ် ဇင်းလုပ်ငန်းဆိုတဲ့ ဌာနခွဲ နှစ်ခုကနေ ထမ်းဆောင်နေတာ ဖြစ်ပါတယ်။ ပြန်ကြားရေးဝန်ကြီးဌာန အနေနဲ့ စောစောက ဖော်ပြခဲ့တဲ့ ဌာနနှစ်ခုနဲ့ ထမ်းဆောင်နေသကဲ့သို့ တစ်ချိန်တည်း မှာပဲ တစ်ဖက်ကလည်း အလားတူ တာဝန်တွေကို ထမ်းဆောင်နေတဲ့ ပုဂ္ဂလိက မီဒီယာများ ဖွံ့ဖြိုးတိုးတက်ရေး ကိုလည်း ဆောင်ရွက်ပေးဖို့ တာဝန်ရှိ တယ်လို့ ခံယူပါတယ်။

ပုဂ္ဂလိက မီဒီယာများသည်လည်း သူတို့လုပ်ကိုင်နေတဲ့ အလုပ်တွေသည် Information ပေးတယ်၊ Educate နဲ့ Entertainment လုပ်တာပဲဖြစ် တယ်လို့ သိနိုင်ပါတယ်။ ကျွန်တော်တို့ လည်း မိမိဘာသာ ဆောင်ရွက်တယ်၊ သို့သော် ပုဂ္ဂလိကမီဒီယာတွေ အသစ် ပေါ်ပေါက်လာတဲ့ Content Provider ငါးခု အပါအဝင် ပုဂ္ဂလိကမီဒီယာ များသည်လည်း ဒီအလုပ်တွေကိုပဲ ဆောင်ရွက်ပါတယ်။ သို့သော် ကိုယ့်နည်း ကိုယ့်ဟန်နဲ့ တီထွင်ဆန်းသစ်ပြီး ဆောင်ရွက်ကြမှာ ဖြစ်တဲ့အတွက် အများ ပြည်သူအနေနဲ့ ပိုမိုပြည့်စုံ ကြွယ်ဝတဲ့ သတင်းအချက်အလက်၊ အသိအမြင် တွေရရှိနိုင်မှာ ဖြစ်ပါတယ်။

တစ်ချိန်တည်းမှာ ဖျော်ဖြေမှုအပိုင်း မှာဆိုရင်လည်း ပိုပြီး စိတ်ဝင်စားဖွယ်၊ စိုစိုပြည်ပြည်၊ မြိုင်မြိုင်ဆိုင်ဆိုင် ဖြစ်လာ လိမ့်မယ်လို့ ယုံကြည်ပါတယ်။ အဲဒီလို မီဒီယာတွေ ဖွံ့ဖြိုးလာတာနဲ့အမျှ အများ ပြည်သူ အသိပညာဖွံ့ဖြိုးတာ၊ အပန်းဖြေ ပျော်ရွှင်မှုတို့ တိုးတက်ရရှိနိုင်မှာဖြစ်ပါ တယ်။ ‘ဒါနဲ့ တစ်ဆက်တည်း တိုင်းပြည် ဖွံ့ဖြိုးတိုးတက်စေနိုင်တဲ့ အကျိုးကျေးဇူး တွေ ရရှိနိုင်မယ်လို့ မြင်ပါတယ်။ ဒီလို မြင်တဲ့အတွက်ကြောင့် ကျွန်တော်တို့ ဒီနေ့မှာ ရုပ်သံလိုင်း ငါးလိုင်း(သို့မဟုတ်) Content Provider ငါးခုနဲ့ အသစ်လုပ်ကိုင်ဖို့ကိစ္စကို စီစဉ်ခဲ့ခြင်း ဖြစ်ပါတယ်။ ဒီနေ့ကစပြီး တိတိကျကျ အကောင်အထည်ဖော်တော့မှာ ဖြစ်ပါ တယ်။

ဒီအစီအစဉ်ဟာ ရုပ်သံဥပဒေ ပြင်ဆင်ပြီး ရုပ်သံဥပဒေနဲ့ ဆက်စပ်တဲ့ နည်းဥပဒေ ပေါ်ပေါက်ပြီးတဲ့နောက် အဲဒါနဲ့ ဆက်စပ်ပြီး ရုပ်သံကောင်စီ ဖွဲ့စည်းပေါ်ပေါက်ပြီးတဲ့နောက် ဥပဒေ တွေ ၊ နည်းဥပဒေတွေအရ ကောင်စီ ကနေ ရုပ်သံလုပ်ငန်းများကို စီမံခန့်ခွဲ ခြင်း၊ ကြီးကြပ်စောင့်ကြပ်တာတို့ ဒီအလုပ်တွေကို ဆက်လက်ဆောင်ရွက် တဲ့အခါကျမှ ကျွန်တော်တို့ရဲ့ ရုပ်သံ လုပ်ငန်းအသစ်တွေပေါ်လာဖို့ အစီအစဉ် ရှိခဲ့ပါတယ်။

သို့သော် စောင့်ဆိုင်းနေရတဲ့ အဲဒီ စပ်ကြားကာလအတွင်း ရုပ်သံလုပ်ငန်း လုပ်ကိုင်နေသူပုဂ္ဂိုလ်တို့အတွက် စတင် ဆောင်ရွက်နိုင်ဖို့ အခုလို နည်းလမ်း ရှာဖွေ ဆောင်ရွက်ပေးခဲ့တာ ဖြစ်ပါ တယ်။ ကောင်စီပေါ်ပေါက်လာပြီး ရင်တော့ ပြောင်းလဲလာတဲ့ အနေအထား တွေနဲ့ လျော်ညီစွာ ဆက်လက် ဆောင်ရွက်ရမှာဖြစ်ပါတယ်။ ပြန်ကြား ရေးဝန်ကြီးဌာနအနေနဲ့ ဆက်လက်ပြီး ပေါ်ပေါက်လာမယ့် အမျိုးသားရုပ်မြင် သံကြားနှင့် အသံလွှင့်လုပ်ငန်းများ ဖွံ့ဖြိုးတိုးတက်ရေးအဖွဲ့မှာ ပါဝင်ပြီး ရုပ်သံကောင်စီ ၊ ရုပ်သံလုပ်ငန်းရှင်များ စတဲ့ သက်ဆိုင်တဲ့ အဖွဲ့များနဲ့အတူ ပူးပေါင်းပြီး ရုပ်သံလုပ်ငန်း ဖွံ့ဖြိုး တိုးတက်ရေးအတွက် ဆက်လက် ဆောင်ရွက်သွားရမှာ ဖြစ်ပါတယ်။

ဒီနေ့အစီအစဉ်သည် တည်ရှိဆဲ စည်းမျဉ်း စည်ကမ်း ဥပဒေဘောင်ထဲမှာ အတတ်နိုင်ဆုံး ဆောင်ရွက်ပေးခဲ့တာ ဖြစ်တဲ့အတွက် တစ်ကြောင်း၊ ဒီနေ့ အစီအစဉ်က ထွက်ပေါ်လာမယ့် ဆောင်ရွက်ချက်များသည် နောင် ဆက်လက်ဖြစ်ပေါ်လာမယ့် ပုဂ္ဂလိက ရုပ်သံလုပ်ငန်းများ ဖွံ့ဖြိုးတိုးတက် ရေးအတွက် ကနဦး စမ်းသပ်ချက် သဘောမျိုး သက်ရောက်မှာဖြစ်တဲ့ အတွက် တစ်ကြောင်း၊ ကျွန်တော်တို့ ဒီအစီအစဉ်ကို အောင်မြင်အောင် အတူတကွ အားလုံး ဝိုင်းဝန်းထိန်းသိမ်း ညှိညှိနှိုင်းနှိုင်းနဲ့ ပူးပေါင်းဆောင်ရွက်ကြ ပါလို့ ကြိုတင်ပြီး မေတ္တာရပ်ခံပါတယ်။

ဒီနေ့ ကြွရောက်လာကြတဲ့ Con-tent Provider အသစ်များအနေနဲ့ မီဒီယာလွတ်လပ်ခွင့်ကို စနစ်တကျ ကျင့်သုံးပြီး ပြည်သူများအတွက် သတင်း အချက်အလက်ပေးခြင်း၊ အသိပညာ ပေးခြင်း၊ ဖျော်ဖြေခြင်း လုပ်ငန်းများကို ထူးခြားပြောင်မြောက်စွာ ဆောင်ရွက် နိုင်ကြပါစေ ။

အများပြည်သူရဲ့နှစ်သက်မှုနဲ့အတူ မိမိတို့ အောင်မြင်မှုလုပ်ငန်းများကို လည်း ခံစားရရှိကြပါစေ။

တစ်ဖက်မှာ မြန်မာ့မီဒီယာလောက နဲ့အတူ မြန်မာနိုင်ငံ ဖွံ့ဖြိုးတိုးတက်ရေး အတွက်လည်း အထောက်အကူပြုနိုင် ကြပါစေလို့ ဆုမွန်ကောင်းတောင်း လိုက်ပါတယ် ''ဟု ပြောကြားသည်။

ထို့နောက် မြန်မာ့အသံနှင့် ရုပ်မြင်သံကြား ညွှန်ကြားရေးမှူးချုပ် ဦးမြင့်ထွေးက စာချုပ်များ လက်မှတ် ရေးထိုးရခြင်းနှင့် စပ်လျဉ်း၍ ရှင်းလင်း ပြောကြားသည်။

ယင်းနောက် မြန်မာ့အသံနှင့် ရုပ်မြင်သံကြားနှင့် ပူးပေါင်းဆောင်ရွက် မည့် Content Provider အသစ် ငါးဖွဲ့ဖြစ်သည့် Mizzima Media Company Limited အုပ်ချုပ်မှု ဒါရိုက်တာနှင့် အယ်ဒီတာချုပ် ဦးစိုးမြင့်၊ DVB Multimedia Group Company Limited အုပ်ချုပ်မှု ဒါရိုက်တာ ဦးခင်မောင်စိုး၊ Fortune Broadcasting Company Limited ဥက္ကဋ္ဌ ဦးမြဟန်၊ KMA TeleMedia Holdings Company Limitedအုပ်ချုပ်မှု ‘ဒါရိုက်တာ ဦးသတိုးကျော် နှင့် My Multi Media Group Company Limited Executive Project Director ဦးထွန်းထွန်း စိုးတို့နှင့် မြန်မာ့အသံနှင့် ရုပ်မြင်သံကြား ညွှန်ကြားရေးမှူးချုပ် ဦးမြင့်ထွေး တို့က ထုတ်လွှင့်သည့် လုပ်ငန်းများ ပူးပေါင်း ဆောင်ရွက်ခြင်း သဘောတူ စာချုပ်များကို အပြန်အလှန် လက်မှတ် ရေးထိုးကြသည်။

ထို့နောက် ပြည်ထောင်စုဝန်ကြီး ဒေါက်တာဖေမြင့်၊ ပြန်ကြားရေးဝန်ကြီး ဌာနမှ တာဝန်ရှိသူများ၊ ရုပ်သံလွှင့် လုပ်ငန်း Digital Free to Air လုပ်ကိုင်ခွင့်ရရှိသည့် Content Provider ငါးဖွဲ့မှ ကိုယ်စားလှယ် များ စုပေါင်း၍ မှတ်တမ်းတင်ဓာတ်ပုံ ရိုက်ကြသည်။

ယင်းနောက် Content Provider ငါးဖွဲ့မှ ခင်းကျင်းပြသထားသည့် လုပ်ငန်း ဆောင်ရွက်မည့် အခြေအနေများကို ပြည်ထောင်စုဝန်ကြီးနှင့် တာဝန်ရှိသူ များက ကြည့်ရှုလေ့လာကြသည်။

မြန်မာ့အသံနှင့် ရုပ်မြင်သံကြား၏ Multi Channel Playout System တွင် Content Provider များအဖြစ် ရုပ်သံလွှင့်လုပ်ငန်း Digital Free to Air လုပ်ကိုင်ခွင့်ရရှိသူ ကုမ္ပဏီ ငါးဖွဲ့ ကို ၂ဝ၁၇ ခုနှစ် ဧပြီ ၁၁ ရက်က ရွေးချယ် ထုတ်ပြန်ကြေညာခဲ့ခြင်း ဖြစ်သည်။

သတင်းစဉ်