သံတွဲ သြဂုတ် ၁၆
ရခိုင်ပြည်နယ်၌ ရောက်ရှိနေသော နယ်စပ်ရေးဝန်ကြီးဌာန
ပြည်ထောင်စုဝန်ကြီး ဒုတိယဗိုလ်ချုပ်ကြီးရဲအောင်၊ အလုပ်သမား၊ လူဝင်မှုကြီးကြပ်ရေးနှင့်
ပြည်သူ့အင်အား ဝန်ကြီးဌာန ပြည်ထောင်စုဝန်ကြီး ဦးသိန်းဆွေ၊ ပညာရေး ဝန်ကြီးဌာန ပြည်ထောင်စုဝန်ကြီး
ဒေါက်တာမျိုးသိမ်းကြီး၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန
ပြည်ထောင်စုဝန်ကြီး ဒေါက်တာဝင်းမြတ်အေး၊ ရခိုင်ပြည်နယ်ဝန်ကြီးချုပ် ဦးညီပုနှင့် ဌာနဆိုင်ရာတာဝန်ရှိသူများသည် ယနေ့နံနက်ပိုင်းတွင်
ရခိုင်ပြည်နယ် သံတွဲမြို့ ဖွံ့ဖြိုးတိုးတက်ရေးလုပ်ငန်းများကို လှည့်လည်ကြည့်ရှု စစ်ဆေးကြသည်။
ရှေးဦးစွာ ပြည်ထောင်စုဝန်ကြီးများနှင့်အဖွဲ့သည် လေကြောင်းခရီးဖြင့် စစ်တွေမြို့မှ
သံတွဲမြို့သို့သွားရောက်ပြီး နယ်စပ်ရေးရာဝန်ကြီးဌာနက အကောင်အထည်ဖော် တည်ဆောက်လျက်ရှိသည့် ခရမ်းမော်လျိုပိတ်ဆည်ကို သွားရောက်ကြည့်ရှုစစ်ဆေးကြသည်။
ဆက်လက်၍ သံတွဲခရိုင်ပြည်သူ့ဆေးရုံသို့ ရောက်ရှိကြပြီး
ဆေးကုသမှုခံယူနေသည့် လူနာများကို ကြည့်ရှုအားပေးကာ ဆေးရုံတိုးချဲ့ တည်ဆောက်ရေး အစီအမံ များကို ဆေးရုံတာဝန်ရှိသူများနှင့် ဆွေးနွေးညှိနှိုင်းကြသည်။
မွန်းလွဲပိုင်းတွင် သံတွဲခရိုင် အဏ္ဏ၀ါဧည့်ရိပ်သာ၌ မြို့မိမြို့ဖများနှင့်တွေ့ဆုံသည်။ တွေ့ဆုံပွဲတွင် ပြည်ထောင်စုဝန်ကြီးများက ပြည်ထောင်စုအစိုးရသည် ရခိုင်ပြည်နယ်အရေးကို အထူးအလေးထား ဆောင်ရွက်လျက်ရှိကြောင်း၊ တည်ငြိမ်အေးချမ်းရေးသည် အရေးပါကြောင်းနှင့် တည်ငြိမ်အေးချမ်းမှသာလျှင် ဒေသဖွံ့ဖြိုးရေးလုပ်ငန်းများ ဆောင်ရွက်နိုင်မည်ဖြစ်ကြောင်း ပြောကြားကြသည်။
သံတွဲမြို့ မြို့မိမြို့ဖများက
စာသင်ကျောင်းဆောင်များ ပြုပြင်တည်ဆောက်ရေး၊ ငပလီ၌ ဆေးရုံတည်ဆောက်ပေးရေး နှင့် လမ်းပန်းဆက်သွယ်ရေး၊
လုံခြုံရေးဆိုင်ရာ ကိစ္စရပ်များကို ဆွေးနွေးတင်ပြကြပြီး တင်ပြချက်များနှင့် ပတ်သက်၍
ပြည်ထောင်စု ၀န်ကြီးများ ပြန်လည်ညှိနှိုင်းပေါင်းစပ် ဆောင်ရွက်ပေးခဲ့ကြသည်။
သတင်းနှင့် ဓာတ်ပုံ
အေ၀မ်းစိုး၊ မျိုးသူဟိန်း
No comments:
Post a Comment