Monday, June 26, 2017

ဒုတိယအကြိမ်ပြည်သူ့လွှတ်တော် ပဉ္စမပုံမှန်အစည်းအဝေး(၂၁)ရက်မြောက်နေ့ကျင်းပ


နေပြည်တော် ဇွန်  ၂၆
ပြည်ထောင်စုဘဏ္ဍာရန်ပုံငွေအစီအစဉ်ဖြင့် ဆောင်ရွက်နေသည့် သဘာဝဓာတ်ငွေ့ ရောင်းရငွေ၏ အမြတ် ၅ ရာခိုင်နှုန်းကို ရှမ်းပြည်နယ် ဘဏ္ဍာရန်ပုံငွေသို့ ထည့်သွင်းပေးရန် အစီအစဉ်မရှိသေးကြောင်း လျှပ်စစ်နှင့် စွမ်းအင် ၀န်ကြီးဌာန ဒုတိယ၀န်ကြီး ဒေါက်တာထွန်းနိုင် က ပြောသည်။

ယနေ့ကျင်းပသည့် ပြည်သူ့လွှတ်တော်အစည်းအဝေး၌ နမ္မတူမဲဆန္ဒနယ်မှ ဒေါ်နန်းခမ်း အေး၏ ရခိုင်ကမ်းလွန်မှ Gas ၁၂ ဘီလီယံကုဗပေကို တရုတ်နိုင်ငံသို့နှစ်စဉ်ရောင်းချရန် စီမံ ကိန်းကာလနှစ်(၃၀) အတွက် ကတိက၀တ်ပြုထားသော ၇၉၃ ကီလိုမီတာရှည်သည့် မြန်မာ နှင့်တရုတ် သဘာဝဓာတ်ငွေ့ သွယ်တန်း မှုနှင့်ပတ်သက်၍ တစ်နှစ်တွင် Gas ရောင်းရငွေမည်မျှ ရှိပြီးအမြတ်မည်မျှရှိကြောင်းနှင့် ရှမ်းပြည်နယ် လွှတ်တော်တွင် အတည်ပြုပြီးသော Gas ရောင်း ရငွေအမြတ် ၅ ရာခိုင်နှုန်းကို ရှမ်းပြည်နယ် ဘဏ္ဍာ ရန်ပုံငွေသို့ မည်သည့်အချိန်တွင် ထည့်သွင်း ရေးဆွဲချမှတ်ပေးမည်ကိုသိရှိလိုကြောင်း မေးခွန်းအား ဒုတိယ ၀န်ကြီးက  ပြန်လည်ဖြေကြားရာ တွင် ထိုသို့ ပြောကြားခဲ့ ခြင်းဖြစ်သည်။
ဒုတိယ၀န်ကြီး ဒေါက်တာထွန်းနိုင်က ပြည်ထောင်စုကပြဋ္ဌာန်းသည့်ဥပဒေနှင့်အညီ တိုင်း ဒေသကြီး သို့မဟုတ် ပြည်နယ်အတွင်း ဆောင်ရွက်ခွင့်ရှိသည့် ရေနံနှင့်သဘာဝဓာတ်ငွေ့ ဆိုင်ရာအခွန်အခများကိုသာ တိုင်းဒေသကြီး သို့မဟုတ် ပြည်နယ်ဘဏ္ဍာရန်ပုံငွေသို့ ပေးသွင်း ရမည်ဖြစ်ပါကြောင်း၊ နှစ်စဉ်ပြည်ထောင်စု ဘဏ္ဍာရန်ပုံငွေမှ တိုင်းဒေသကြီးနှင့် ပြည်နယ်များ၏ လိုငွေများကိုဖြည့်ဆည်းပေးနေရပါကြောင်း၊ ၂၀၁၃-၂၀၁၄ ဘဏ္ဍာနှစ်မှ ၂၀၁၆-၂၀၁၇ ဘဏ္ဍာ နှစ်အထိ သဘာဝဓာတ်ငွေ့ရောင်းရငွေမှရရှိသော ၀င်ငွေ စုစုပေါင်း အမေရိကန်ဒေါ်လာ ၁၂၁ သန်းကျော်ကို ပြည်ထောင်စုဘဏ္ဍာရန်ပုံငွေသို့ ပေးသွင်းခဲ့ပါကြောင်း ရှင်းလင်း ခဲ့သည်။
ရခိုင်ကမ်းလွန် ရွှေသဘာဝဓာတ်ငွေ့စီမံကိန်းကို ၂၀၁၀ ခုနှစ်တွင် စတင်အကောင် အထည်ဖော်ခဲ့ပြီး တည်ဆောက်ရေး ကာလ ၃ နှစ်ခန့်ကြာမြင့်ခဲ့ကြောင်း၊ အဆိုပါစီမံကိန်းတွင် တရုတ်နိုင်ငံ CNPC ကုမ္ပဏီမှ ရင်းနှီးမြှုပ်နှံမှု ၅၀ ဒသမ ၉ ရာခိုင်နှုန်း၊ တောင်ကိုရီးယားနိုင်ငံ Daewoo ကုမ္ပဏီမှ ၂၅ ဒသမ ၀၄၁ ရာခိုင်နှုန်း၊ တရုတ်နိုင်ငံ ONGC ကုမ္ပဏီမှ ၈ ဒသမ ၃၄၇ ရာခိုင်နှုန်း၊ အိန္ဒိယနိုင်ငံ GAIL ကုမ္ပဏီမှ ၄ ဒသမ ၁၇၃၅ ရာခိုင်နှုန်း၊ တောင်ကိုရီးယားနိုင်ငံ KOGAS ကုမ္ပဏီမှ ၄ ဒသမ ၁၇၃၅ ရာခိုင်နှုန်းနှင့် မြန်မာ့ ရေနံနှင့်သဘာဝဓာတ်ငွေ့လုပ်ငန်းမှ ၇ ဒသမ ၃၆၅ ရာခိုင်နှုန်း ပါဝင် ရင်းနှီးမြှုပ်နှံခဲ့ကြောင်း။
မြန်မာ့ရေနံနှင့်သဘာဝဓာတ်ငွေ့လုပ်ငန်းက China Development Bank ထံမှ ချေးငွေ ယူရို ၈၆ ဒသမ ၁၆ သန်း ချေးယူခဲ့၍ အဆိုပါစီမံကိန်းတွင် ပါဝင်ရင်းနှီးမြှုပ်နှံခဲ့ကြောင်း၊ ချေးယူ ငွေအနက် အတိုးအရင်းပေါင်း ယူရိုငွေ ၁၀၃ ဒသမ ၆၄ သန်း ပေးဆပ်ရန် ကျန်ရှိနေကြောင်း၊ အဆိုပါချေးငွေအား ပြန်လည်ပေးဆပ်နေဆဲ ကာလ ဖြစ်သဖြင့် အကျိုးအမြတ် မရရှိသေးကြောင်း ဒုတိယ၀န်ကြီးက ထည့်သွင်း ရှင်းလင်း ပြောကြား ခဲ့သည်။
အစည်းအဝေးတွင် သထုံမဲဆန္ဒနယ်မှ ဒေါ်မာမာခိုင်၏ ပြည်သူ့ရဲတပ်ဖွဲ့များအား လုံ လောက်သော လက်နက်ကိရိယာများ၊ ဆက်သွယ်ရေးစက်များ၊ နည်းပညာများ၊ မော်တော်ယာဉ် စက်သုံးဆီများ၊ ယူနီဖောင်းများ၊ ရိက္ခာများဖြည့်တင်းဆောင်ရွက်ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ ပြည်ထဲရေး ၀န်ကြီးဌာန ဒုတိယ၀န်ကြီး ဗိုလ်ချုပ်အောင်စိုးက ရဲတပ်ဖွဲ့ တွင်အသုံးပြုသော ခေတ်မမီသည့်လက်နက်များ အစား လက်ရှိအခြေအနေနှင့်ကိုက်ညီသော ခေတ်မီမောင်းပြန်လက်နက်များ ပြောင်းလဲတပ်ဆင်ခြင်းနှင့် အဓိက ရုဏ်းနှိမ်နင်းရေး လက်နက် များအား ခေတ်ကာလနှင့်အညီ ပြောင်းလဲတပ်ဆင်ပေးခြင်းတို့ကို အဆင့် ၃ ဆင့်ဖြင့် ဆောင် ရွက်ခဲ့ပါကြောင်း၊ ကျန်ရှိသော တိုင်းဒေသကြီးနှင့်ပြည်နယ် ရဲတပ်ဖွဲ့များ ကိုလည်း ပြောင်းလဲ တပ်ဆင်ပေးရန် ဆက်လက်ဆောင်ရွက်လျက်ရှိပါကြောင်း။
၂၀၁၂-၂၀၁၃ ခုနှစ်တွင် ခရီးဝေးဆက်သွယ်ရေးစက် ၁၀၂ လုံးသာ တပ်ဆင်ပေးထား ရာမှ ၂၀၁၅-၂၀၁၆ ခုနှစ်တွင် ခရီးဝေးဆက်သွယ်ရေးစက် ၈၆၉ လုံးအထိ ဖြည့်တင်းပေး နိုင်ခဲ့ပါကြောင်း၊ ထို့ပြင် ခရီးတိုဆက်သွယ်ရေးစက် (အထိုင်စက်၊ လက်ကိုင်စက်) ၂၈၃၈ လုံး ကိုလည်း ဖြည့်တင်းပေးနိုင်ခဲ့ကြောင်း၊ လိုအပ်သည့် ဆက်သွယ်ရေးစက်များ ဆက်လက်ဖြည့် တင်းနိုင်ရေးအတွက် ဖွဲ့စည်းပုံလိုအပ်ချက်၏ ၁၀ ရာခိုင်နှုန်းအား နှစ်စဉ်ဘဏ္ဍာငွေ တင်ပြ တောင်းခံလျက်ရှိရာ ၂၀၁၇-၂၀၁၈ ဘဏ္ဍာရေးနှစ်အတွက် ခွင့်ပြုချက်ရရှိပြီးဖြစ်၍ ဆက်သွယ် ရေးပစ္စည်း အမျိုးအစားပေါင်း ၇ မျိုး စုစုပေါင်း ၈၁၆ စုံ ကို ၀ယ်ယူ ဖြည့်တင်းရန် ဆောင် ရွက်လျက်ရှိပါကြောင်း။
၂၀၁၆-၂၀၁၇ ဘဏ္ဍာရေးနှစ်တွင် လက်နက်နှင့်ဆက်စပ်ပစ္စည်းများ၊ ပေါက်ကွဲ ယမ်း ပစ္စည်းများ၊ သေးငယ်သော ပစ္စည်းများ၊ ငွေတု စသည်တို့ကို စစ်ဆေးသော စက်များအပါအ၀င် Computer Forensic၊ Network Forensic ၊ Video Forensic အမျိုးအစား ၇ မျိုး စုစုပေါင်း ၁၀ လုံးကို ၀ယ်ယူဖြည့် တင်းခဲ့ပါကြောင်း၊ ၂၀၁၇-၂၀၁၈ ဘဏ္ဍာရေးနှစ်တွင် လက်ဗွေရာစနစ်၊ Social Forensic (မှုခင်းဆိုင်ရာ လူမှုရေး ၀က်ဆိုက်များစစ်ဆေးသည့်ပစ္စည်း)၊ ပုံရိပ်အား လျင် မြန်စွာဖော်ထုတ်စစ်ဆေးပေးနိုင်သည့် Protable X-Ray စက်၊ လက်ကိုင်သုံးပေါက်ကွဲ ပစ္စည်း အနံ့ခံစက် ၊ Drone ပျံသန်းမှုကို ရပ်တန့်ဖြုတ်ချနိုင်သည့်စက်၊ Video Pole Camera၊ Bullet Catcher Collection Chamber စသည့် စက်ပစ္စည်းများကို ထပ်မံဝယ်ယူရန် စီစဉ်ထား ပါကြောင်း။
မြန်မာနိုင်ငံရဲတပ်ဖွဲ့ဝင်များ၏ အိမ်ငှားစရိတ်နှုန်းထားအသစ်များ ပြင်ဆင်သတ်မှတ်နိုင် ရေးဆောင်ရွက် လျက်ရှိပါကြောင်း၊ မြန်မာနိုင်ငံရဲတပ်ဖွဲ့တွင် ၂၀၁၀ ခုနှစ်ထိ မော်တော်ယာဉ် ၁၈၄၄ စီးရှိခဲ့ပြီး ၂၀၁၁ ခုနှစ်မှ ၂၀၁၇ ခုနှစ်အထိ မော်တော်ယာဉ် ၂၆၄၈ စီး ထပ်မံ ဖြည့်တင်းနိုင်ခဲ့ပါကြောင်း၊ မော်တော်ယာဉ်များအတွက် စက်သုံးဆီကို ၂၀၁၀ ခုနှစ်တွင် တစ်လ လျှင် ဂါလန် ၅၀၀၀၀ ခန့်သာရရှိခဲ့ပြီး ယခုလက်ရှိတွင် တစ်လလျှင် ဂါလန် ၁၇၃၆၀၉ အထိ တိုးမြှင့်သုံးစွဲလျက်ရှိပါကြောင်း။
မြန်မာနိုင်ငံရဲတပ်ဖွဲ့ရှိ အရာရှိ၊ အခြားအဆင့်တပ်ဖွဲ့ဝင်များအတွက် ၂၀၁၄ ခုနှစ်မှစ၍ ၂၀၁၆ ခုနှစ်အထိ ရဲတပ်ဖွဲ့ဝင်တစ်ဦးလျှင် ယူနီဖောင်းပိတ်စတစ်စုံ(ချုပ်ခအပါ)နှင့် အခြား ရဲဝတ်တန်ဆာများကို ဖြည့်ဆည်း ပေးခဲ့သော်လည်း ၂၀၁၇ ခုနှစ်မှစ၍ ရဲတပ်ဖွဲ့ဝင်တစ်ဦးလျှင် ယူနီဖောင်းပိတ်စ နှစ်စုံ (ချုပ်ခ အပါ)နှင့် အခြား ရဲဝတ်တန်ဆာများကို တိုးမြှင့်ဖြည့်တင်းပေးနိုင်ခဲ့ ပါကြောင်း၊ မြန်မာနိုင်ငံရဲတပ်ဖွဲ့ရှိ တပ်ဖွဲ့ဝင်များ၏ ရိက္ခာ ထောက်ပံ့ငွေကို ၂၀၁၇ ခုနှစ် ဇန်န၀ါရီ ၁ ရက်မှစ၍             တစ်ဦးလျှင် ၁ ရက် ၁၈၀၀ ကျပ်နှုန်းအထိ တိုးမြှင့် ခံစားခွင့်ရရှိရေး ဆောင်ရွက်ပေး ခဲ့ပါကြောင်း၊ အမှုစုံစမ်းခြင်းဆိုင်ရာခရီးစရိတ်အဖြစ် ၂၀၁၆-၂၀၁၇ ဘဏ္ဍာရေး နှစ်မှစ၍ အမှု ၁ မှုလျှင် ကျပ် ၁၀၀၀၀ နှုန်းအထိ တိုးမြှင့်ခွင့်ပြုခဲ့ပါကြောင်း၊ တရားခံ သယ်ယူ ပို့ဆောင်ခအဖြစ် ၂၀၁၃-၂၀၁၄ ဘဏ္ဍာရေးနှစ်မှစ၍ အမှုကြီး ၁ မှုလျှင် ကျပ် ၅၀၀၀၀ နှုန်း၊ အခြားအမှု ၁ မှုလျှင် ကျပ် ၃၀၀၀၀ နှုန်း၊ ကြိုတင်ကာကွယ်မှု ၁ မှုလျှင် ကျပ် ၁၀၀၀၀ ကျပ်နှုန်းဖြင့် ခွင့်ပြုခဲ့ပါ ကြောင်း။
အမှုဖြစ်ပွားသည့်အခြေအနေအပေါ်မူတည်၍ မြို့မရဲစခန်းတစ်ခုလျှင် အများဆုံး ကျပ် ၁၈ သိန်းမှ အနည်းဆုံး ကျပ် ၁ သိန်းအထိ လည်းကောင်း၊ နယ်မြေရဲစခန်းတစ်ခုလျှင် အများ ဆုံး ၁၂ သိန်းကျပ်မှ အနည်းဆုံး ကျပ် ၃ သောင်းအထိလည်းကောင်း ကြိုတင်ဆောင်ငွေများ ခွဲဝေပေးထားသဖြင့် စိုက်ထုတ် သုံးစွဲရန် မလိုအပ်ပါကြောင်း ဖြေကြားသည်။
ထို့ပြင် မာန်အောင်မဲဆန္ဒနယ်မှ ဦးတင်နု၊ ကျွန်းစုမဲဆန္ဒနယ်မှ ဒေါ်တင်တင်ရီ၊ သာစည် မဲဆန္ဒနယ်မှ ဦးသန်းစိုး၊ နတ်တလင်းမဲဆန္ဒနယ်မှ ဦးခင်အေး၊ ပုလောမဲဆန္ဒနယ်မှ ဦးအုန်းခင်နှင့် ရန်ကင်းမဲဆန္ဒနယ်မှ ဒေါ်ဇင်မာအောင်တို့၏ ပြည်သူများလုံခြုံမှုအတွက် ရဲစခန်း သို့မဟုတ် ရဲကင်းများချထားပေးရေး၊ ကျေးရွာများလျှပ်စစ်ဓာတ်အားရရှိရေး၊ အငယ်တန်းအင်ဂျင်နီယာ(၂) ရာထူးတိုးမြှင့်ပေးရေး၊ လျှပ်စစ် မီတာခကို ပြောင်းလဲသတ်မှတ်ရေး၊ လျှပ်စစ်ဓာတ်အားဖြန့်ဖြူး ရေးနှင့်ပတ်သက်သည့် ကန်ထရိုက်စာချုပ်ပါ အချက်အလက်များ ပွင့်လင်း မြင်သာစွာချပြရေး ဆိုင်ရာ မေးခွန်းများကိုလည်း ပြည်ထဲရေးဝန်ကြီးဌာန ဒုတိယ၀န်ကြီး ဗိုလ်ချုပ်အောင်စိုးက နှင့် လျှပ်စစ်နှင့်စွမ်းအင်ဝန်ကြီးဌာန ဒုတိယ၀န်ကြီး ဒေါက်တာ ထွန်းနိုင်တို့က ဖြေကြားခဲ့ကြသည်။
ထို့နောက် ဦးဝင်းမြင့်ဦး(ခ)ဦးနေမျိုး၊ ညောင်ရွှေမဲဆန္ဒနယ်မှ တင်သွင်းထားသည့် ရှမ်း ပြည်နယ် ညောင်ရွှေမြို့ နယ်ရှိ အင်းလေးကန်ကြီး ရေရှည်တည်တံ့ရေးအတွက် အစိုးရ၊ ပြည်သူ အားလုံးပါဝင်သော စဉ်ဆက် မပြတ်ပြုပြင်ထိန်းသိမ်းရေးလုပ်ငန်းများချမှတ်ရန် ပြည်ထောင်စု အစိုးရအားတိုက်တွန်းကြောင်း အဆိုနှင့်စပ်လျဉ်း၍ တောင်ကြီးမဲဆန္ဒနယ်မှ ဒေါက်တာဒေါ် သန်းငွေ၊ ရွာငံမဲဆန္ဒနယ်မှ ဦးအောင်စိုးမင်း၊ မိုးကုတ်မဲဆန္ဒနယ်မှ ဦးအောင်နိုင်(ခ) ဦးနိုင်ငံကျော်၊ လှိုင်းဘွဲ့မဲဆန္ဒနယ်မှ ဦးခင်ချို၊ ဆိပ်ဖြူမဲဆန္ဒနယ်မှ ဦးအောင်သိုက်၊ ကွန်ဟိန်းမဲဆန္ဒနယ်မှ ဒေါ်နန်းခင်စော၊ ပျော်ဘွယ်မဲဆန္ဒနယ်မှ ဦးသောင်းအေးနှင့် ကလော မဲဆန္ဒနယ်မှ ဒေါ်ပြုံးကေသီ နိုင်တို့က ဆွေးနွေးကြသည်။           
အဆိုနှင့်စပ်လျဉ်း၍ သယံဇာတနှင့်သဘာဝပတ်ဝန်းကျင် ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဦးအုန်းဝင်းက အင်းလေးကန်ရေရည်တည်တံ့ရေး ထိန်းသိမ်းခြင်း လုပ် ငန်းများဆောင်ရွက်ရန် ဆက်စပ် ဌာနဆိုင်ရာများ၊ လူမှုရေးအဖွဲ့အစည်းများ၊ ဒေသခံပြည်သူများ ၏သဘောထားရယူပြီး စီမံကိန်း အဆိုပြု လွှာများခေါ်ယူ၍ ဝိုင်ဝန်းအကောင်အထည်ဖော် ဆောင်ရွက်လျက်ရှိပါကြောင်း၊ အင်းလေးကန် ရေရှည် တည်တံ့ရေးအတွက် ဥပဒေနှင့်နည်း ဥပဒေ(မူကြမ်း)များ ပြဋ္ဌာန်းနိုင်ရန်အတွက် ရှမ်းပြည်နယ်အစိုးရအဖွဲ့၊ သက်ဆိုင်သည့်ဌာနဆိုင် ရာများ၊ လူမှုရေးအဖွဲ့အစည်းများနှင့်  ဒေသခံပြည်သူများ၏ သဘောထားရယူပြီး  ပူးပေါင်း ဆောင်ရွက်လျက်ရှိပါကြောင်း ဖြေကြားသည်။
ယင်းအဆိုကို လွှတ်တော်က မှတ်တမ်းတင်စောင့်ကြည့်မည်ဖြစ်ကြောင်း ဆုံးဖြတ်သည်။
ထို့ပြင် ယနေ့အစည်းအဝေးတွင် ပြည်သူ့လွှတ်တော် တောင်သူလယ်သမားနှင့် အလုပ် သမားရေးရာ ကော်မတီနှင့် ပြည်သူ့လွှတ်တော် သယံဇာတနှင့်သဘာဝပတ်ဝန်းကျင်ထိန်းသိမ်း ရေးဆိုင်ရာကော်မတီ၏ နှစ်ပတ်လည် အစီရင်ခံစာများဖတ်ကြားတင်ပြခြင်းနှင့် “တရားခံလွှဲပြောင်း ရေးဥပဒေကြမ်းအား လွှတ်တော်၏ အဆုံးအဖြတ်ရယူ အတည်ပြုခြင်းတို့ကိုလည်း ဆောင်ရွက် ခဲ့ကြသည်။
ကျော်သူထက်၊ အေးအေးသန့်(သတင်းစဉ်)


No comments:

Post a Comment