Tuesday, June 27, 2017

အမျိုးသားလွှတ်တော် ပဉ္စမပုံမှန် အစည်းအဝေး ၂၁ ရက်မြောက်နေ့ ကျင်းပ


နေပြည်တော် ဇွန် ၂၇
 
ဒုတိယအကြိမ် အမျိုးသားလွှတ်တော် ပဉ္စမပုံမှန် အစည်းအဝေး ၂၁ ရက်မြောက်နေ့ကို ယနေ့နံနက် ၁၀ နာရီတွင် နေပြည်တော်ရှိ အမျိုးသားလွှတ်တော် အစည်းအဝေးခန်းမ၌ ကျင်းပသည်။


မွန်ပြည်နယ် မဲဆန္ဒနယ်အမှတ်(၉)မှ ဒေါက်တာဇော်လင်းထွဋ်၏ ကျန်းမာရေးနှင့် အားကစား ၀န်ကြီးဌာနအနေဖြင့် ပြည်သူများအတွက် အခမဲ့ (FOC) စနစ်ဖြင့် မည်သို့သော ၀န်ဆောင်မှုများ ပြုလုပ်ပေးနေသည်၊ ပြည်နယ်/ တိုင်းဒေသကြီး၊ ခရိုင်၊ မြို့နယ် ဆေးရုံများသို့ ထောက်ပံ့နေသော ဆေးဝါးများအတွက် နှစ်စဉ်ဘတ်ဂျက် မည်မျှသုံးစွဲ၍ မည်သို့ ဖြန့်ဝေပေးနေသည်ကို သိရှိလိုကြောင်း မေးခွန်းနှင့်စပ်လျဉ်း၍ ပြည်ထောင်စုဝန်ကြီး ဒေါက်တာမြင့်ထွေးက ပြည်သူလူထု စိုက်ထုတ်ကုန်ကျနေသည့် စရိတ်များ ကျဆင်းရေးအတွက် National Health Insurance System အကောင်အထည်ဖော်နိုင်ခြင်း မရှိမီ Short Term Solution အနေဖြင့် စရိတ်မျှပေး ကျန်းမာရေးစနစ်ဖြင့် ဆေးဝါးများ ၀ယ်ယူရောင်းချ ထောက်ပံ့ခြင်းအား အခမဲ့ထောက် ပံ့ပေးခြင်းဖြင့် ပြောင်းလဲ ကျင့်သုံး ဆောင်ရွက်ခဲ့ပါကြောင်း၊ အချို့သော ဘဏ္ဍာနှစ်များတွင် တိုးမြှင့် ရရှိသည့် ရန်ပုံငွေအရ ကင်ဆာ ဆေးဝါးများ အခမဲ့ထောက်ပံ့ခြင်းတို့ကို ဆောင်ရွက်ပေးပါကြောင်း။

မြွေဆိပ်ဖြေဆေးအား စက်မှုဝန်ကြီးဌာနမှ ၀ယ်ယူထောက်ပံ့ပြီး အခြား ကာကွယ်ဆေးများကို သက်ဆိုင်ရာ ပြည်သူ့ကျန်းမာရေး ဌာနမှ တိုးချဲ့ ကာကွယ်ဆေးထိုး စီမံချက်ဖြင့် ချိတ်ဆက်ပြီး ပြည်သူ့ဆေးရုံများတွင် ကာကွယ်ဆေး အခမဲ့ရရှိရန် ဆောင်ရွက်လျက်ရှိပါကြောင်း၊ ဓာတ်ခွဲ စမ်းသပ်ချက်များသည်လည်း ပြည်သူ့ဆေးရုံ များမှ ရရှိသော ရန်ပုံငွေပမာဏနှင့် ဆေးရုံရှိ ဓာတ်ခွဲခန်း အမျိုးအစား အပေါ်မူတည်၍ ပြည်သူလူထုအား အချို့သော ဓာတ်ခွဲစမ်းသပ်မှုများအား အခမဲ့ပြု လုပ်ပေးခြင်းနှင့်အဆင့်မြင့် ဓာတ်ခွဲစမ်းသပ်မှုများအား စရိတ်မျှပေး ကျန်းမာရေး စနစ်အသွင်ဖြင့် ဆက်လက်ဆောင်ရွက်ခဲ့ပါကြောင်း၊ အမျိုးသားကျန်းမာရေး စီမံကိန်း (၂၀၁၇ - ၂၀၂၁) ရေးဆွဲခဲ့ပြီး ၂၀၂၀ - ၂၀၂၁ ဘဏ္ဍာရေးနှစ်တွင် နိုင်ငံသားများအတွက် အခြေခံကျသည့် မရှိမဖြစ် ကျန်းမာရေး စောင့်ရှောက်မှု လုပ်ငန်းများကို ငွေကြေးကုန်ကျမှု နည်းပါးစွာဖြင့် နေရာမရွေး၊ ဒေသမရွေး ၀န်ဆောင်မှုပေးနိုင်ရန် ရေးဆွဲခဲ့ပါကြောင်း၊ အဆိုပါ စီမံကိန်းလုပ်ငန်းများကို တစ်ဆင့်ပြီး တစ်ဆင့် အကောင် အထည်ဖော် ဆောင်ရွက်သွားမည်ဖြစ်ပါကြောင်း ဖြေကြားသည်။

ရှမ်းပြည်နယ် မဲဆန္ဒနယ်အမှတ်(၁၂)မှ ဦးစိုင်းစံအောင်၏ "၀" ကိုယ်ပိုင်အုပ်ချုပ်ခွင့်ရတိုင်း ဟိုပန်ခရိုင် ဟိုပန်မြို့ရှိ လက်ရှိအားကစားကွင်းကို အဆင့်မြှင့်တင် ပြုပြင်ပေးပြီး မိုးလုံလေလုံ အားကစားကွင်းအဖြစ် ဆောက်လုပ်ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ ပြည်ထောင်စု ၀န်ကြီး ဒေါက်တာမြင့်ထွေးက ဟိုပန်မြို့ အားကစားကွင်း တည်ဆောက်ခြင်း လုပ်ငန်းအား ၂၀၁၄ - ၂၀၁၅ ဘဏ္ဍာရေးနှစ်တွင် ပြည်နယ် အစိုးရအဖွဲ့ ငွေလုံးငွေရင်း အသုံးစရိတ်မှ ငွေကျပ် ၂၁ ဒသမ ၅၇၄ သန်းဖြင့် လည်းကောင်း၊ အားကစားကွင်း အုတ်တံတိုင်း ကာရံခြင်း လုပ်ငန်းအား ၂၀၁၅ - ၂၀၁၆ ဘဏ္ဍာရေးနှစ်တွင် ပြည်နယ်အစိုးရအဖွဲ့ ငွေလုံးငွေရင်း အသုံးစရိတ်မှ ငွေကျပ် ၁၆ ဒသမ ၈၉၀ သန်းဖြင့် လည်းကောင်း၊ အားကစားကွင်း မြေထိုးမြေညှိ ပြုပြင်ခြင်းလုပ်ငန်းအား ၂၀၁၆ - ၂၀၁၇ ဘဏ္ဍာရေးနှစ်တွင် ပြည်နယ်အစိုးရအဖွဲ့ ငွေလုံးငွေရင်း အသုံးစရိတ်မှ ငွေကျပ် ၅၄ သန်း တို့ဖြင့် လည်းကောင်း ဆောင်ရွက်ပေးခဲ့ပါကြောင်း၊ မိုးလုံလေလုံ အားကစားကွင်းအဖြစ် ၂၀၁၇ - ၂၀၁၈ ဘဏ္ဍာရေးနှစ် ပြည်နယ်အစိုးရ အဖွဲ့ ငွေလုံးငွေရင်း အသုံးစရိတ် ဖြည့်စွက်ရန်ပုံ ငွေ သို့မဟုတ် ၂၀၁၈ - ၂၀၁၉ ဘဏ္ဍာရေးနှစ် ပြည်နယ်အစိုးရ အဖွဲ့ ငွေလုံးငွေရင်း အသုံးစရိတ် ခွင့်ပြုရန်ပုံငွေ စာရင်းတွင် ဦးစားပေးအဆင့်အလိုက် ထည့်သွင်းလျာထား ဆောင်ရွက်သွားမည် ဖြစ်ပါကြောင်း ဖြေကြားသည်။

မန္တလေးတိုင်းဒေသကြီး မဲဆန္ဒနယ်အမှတ်(၃)မှ ဒေါက်တာ ကျော်သန်းထွန်း (ကန်တုန်) ၏ မြန်မာနိုင်ငံ ဒေသ အနှံ့အပြား တောင်ပေါ်မြေပြန့်ရှိ အသုံးချ သဘာဝ သယံဇာတ အပင်နှင့် ဆေး ပစ္စည်း တို့အား စနစ်တကျ စိုက်ပျိုးထုတ်လုပ်၍ ဒေသဖွံ့ဖြိုးရေးအတွက် ပြည်ပပို့ကုန်များအဖြစ် ဆောင်ရွက်ပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ ပြည်ထောင်စုဝန်ကြီး ဒေါက်တာ မြင့်ထွေးက နိုင်ငံအတွင်း စိုက်ပျိုးထွက်ရှိသော နနွင်းတက်၊ ကွမ်းစားဂမုန်း၊ စကားပန်းပွင့်ခြောက်၊ ဖန်ခါးသီးခြောက်၊ ကြောင်လျှာစေ့၊ ကြောင်ပန်းစေ့၊ နေလဲစေ့၊ ခပေါင်းစေ့၊ စမုန်နက်၊ တောဂျင်း၊ ရွေးရွက်၊ နနွင်းခေါင်း၊ မာလာဥ၊ တောဂျူးမြစ်၊ ဆေးမြင်းခွာ၊ ချဉ်ပေါင်ဖာလာ အစရှိသော ပရဆေး များကို ပြည်ပပို့ကုန်အဖြစ် ကုန်သွယ်ဖက်နိုင်ငံများသို့ တင်ပို့ရန် ပို့ကုန်လိုင်စင်များ ခွင့်ပြုထုတ်ပေး လျက်ရှိပါကြောင်း။

ပရဆေးပြည်ပတင်ပို့မှု အနေဖြင့် ၂၀၁၄ - ၂၀၁၅ ဘဏ္ဍာနှစ်တွင် တန်ချိန် ၂၂၆၁၁ ဒသမ ၃၅၄ တန် အမေရိကန်ဒေါ်လာ ၁၂ ဒသမ ၆၆၀ သန်း၊ ၂၀၁၅ - ၂၀၁၆ ဘဏ္ဍာနှစ်တွင် တန်ချိန် ၁၄၉၁၈ ဒသမ ၈၈၁ တန် အမေရိကန်ဒေါ်လာ ၉ ဒသမ ၀၀၉ သန်း၊ ၂၀၁၆ - ၂၀၁၇ ဘဏ္ဍာနှစ် တွင် တန်ချိန် ၂၁၁၅၉ ဒသမ ၇၀၃ တန် အမေရိကန်ဒေါ်လာ ၁၁ ဒသမ ၈၉၅ သန်း တင်ပို့နိုင်ခဲ့ပါ ကြောင်း ဖြေကြားသည်။

ထို့နောက် ပဲခူးတိုင်းဒေသကြီး မဲဆန္ဒနယ်အမှတ်(၁)မှ ဒေါက်တာစန်းမောင်မောင်၏ မြန်မာ နိုင်ငံတွင် ဆေးလိပ်နှင့် ဆေးရွက်ကြီးထွက်ပစ္စည်း သောက်သုံးမှု ထိန်းချုပ်ရေး ဥပဒေကို ရေးဆွဲ ပြဋ္ဌာန်းပြီးသော်လည်း ပြည်သူများ လိုက်နာကျင့်သုံးမှုနှင့် အာဏာပိုင်များဘက်မှ ကြီးကြပ်အရေး ယူမှု မရှိသလောက် အားနည်းနေခြင်းအပေါ် ပြည်ထောင်စုအစိုးရမှ ကိုင်တွယ် ဖြေရှင်းပေးပါရန် တိုက်တွန်းကြောင်း အဆိုနှင့်စပ်လျဉ်း၍ တနင်္သာရီ တိုင်းဒေသကြီး မဲဆန္ဒနယ်အမှတ်(၁၂)မှ ဦးခင်မျိုးဝင်း၊ စစ်ကိုင်းတိုင်းဒေသကြီး မဲဆန္ဒနယ်အမှတ်(၇)မှ ဦးခင်မောင်ဝင်း၊ မွန်ပြည်နယ် မဲဆန္ဒနယ်အမှတ်(၈)မှ ဦးမျိုးဝင်း၊ မကွေးတိုင်းဒေသကြီး မဲဆန္ဒနယ်အမှတ်(၁)မှ ဦးလှဆန်း၊ စစ်ကိုင်းတိုင်းဒေသကြီး မဲဆန္ဒနယ်အမှတ်(၄)မှ ဦးလှဦး၊ ပဲခူးတိုင်းဒေသကြီး မဲဆန္ဒနယ်အမှတ် (၁၁)မှ ဒေါက်တာဝင်းမြင့်၊ မွန်ပြည်နယ် မဲဆန္ဒနယ်အမှတ်(၇)မှ ဦးနိုင်သီဟနှင့် ပဲခူးတိုင်းဒေသ ကြီး မဲဆန္ဒနယ် အမှတ်(၃)မှ ဒေါ်ရွှေရွှေစိန်လတ် တို့က ထောက်ခံဆွေးနွေးကြပြီး ပြည်ထောင်စု ၀န်ကြီး ဒေါက်တာ မြင့်ထွေးက ပြန်လည်ရှင်းလင်းဆွေးနွေးသည်။

အဆိုနှင့် စပ်လျဉ်း၍ လွှတ်တော်၏ အဆုံးအဖြတ်ရယူရာ ထောက်ခံမဲများသည့်အတွက် အဆို အတည် ဖြစ်ကြောင်း အမျိုးသား လွှတ်တော် ဥက္ကဋ္ဌ မန်းဝင်းခိုင်သန်းက ကြေညာသည်။

ဒုတိယအကြိမ် အမျိုးသားလွှတ်တော် ပဉ္စမပုံမှန် အစည်းအဝေး ၂၂ ရက်မြောက်နေ့ကို ဇွန် ၂၉ ရက်တွင် ဆက်လက်ကျင်းပသွားရန် လျာထားကြောင်း သိရသည်။ 

သူရဇော်၊ မွှေးကြူဇင် (သတင်းစဉ်)

No comments:

Post a Comment