ရန်ကုန်
မေ ၁၆
အမျိုးသား သဘာဝဘေး အန္တရာယ်ဆိုင်ရာ စီမံခန့်ခွဲမှု ကော်မတီ
ဥက္ကဋ္ဌ ဒုတိယ သမ္မတ ဦးဟင်နရီဗန်ထီးယူသည် ယနေ့ နံနက်ပိုင်းက ဧရာဝတီ တိုင်းဒေသကြီး မအူပင်မြို့
ခရိုင် အထွေထွေ အုပ်ချုပ်ရေးဦးစီးဌာနရုံး အစည်းအဝေး ခန်းမ၌ ကျင်းပသည့် ဧရာဝတီ တိုင်းဒေသကြီး
သဘာဝဘေးနှင့် ပတ်သက်ပြီး ကြိုတင် ကာကွယ်ရေး လုပ်ငန်းများ ဆောင်ရွက် ထားရှိမှု ရှင်းလင်းပွဲ
အခမ်းအနားသို့ တက်ရောက်သည်။
အခမ်းအနားတွင် ဒုတိယသမ္မတအား မအူပင်ခရိုင်၊ ပုသိမ်ခရိုင်၊
ဟင်္သာတခရိုင် တို့မှ ခရိုင် အုပ်ချုပ်ရေးမှူးများက ဒေသတွင်း လုပ်ငန်းများ ဆောင်ရွက်ထားရှိမှု
အခြေ အနေ၊ သဘာဝ ဘေးအန္တရာယ် ကျရောက်လာပါက ကြိုတင် ဆောင်ရွက်ထားရှိမှု အခြေအနေများနှင့်
သက်ဆိုင်ရာ ဌာနများမှ တာဝန်ရှိသူများက ဌာနအလိုက် လုပ်ငန်းများ ဆောင်ရွက်နေမှု အခြေအနေများကို
ရှင်းလင်း တင်ပြကြသည်။
ထို့နောက် ဒုတိယ သမ္မတက မြန်မာနိုင်ငံသည် ယခင်က သဘာဝ ဘေးဒဏ်
ဖြစ်ပွားမှု နည်းပါး ခဲ့သော်လည်း ယခုနောက်ပိုင်း မကြာခဏ ကြုံတွေ့ နေရသောကြောင့် ပြည်သူအားလုံး
သတိပြုရန် လိုအပ်ပါကြောင်း၊ သဘာဝဘေးနှင့် ပတ်သက်ပြီး ကြိုတင် ကာကွယ်ခြင်းများ ထိထိ
ရောက်ရောက် လုပ်မှသာလျင် သဘာဝဘေး ကျရောက်လာပါက ထိခိုက်ဆုံးရှုံးမှု နည်းပါး သက်သာမည်
ဖြစ်ပါကြောင်း လုပ်ငန်းများ ဆောင်ရွက်ရာတွင် စေတနာထားပြီး ပြည်သူနှင့် အတူ လက်တွဲကာ
ဆောင်ရွက်ကြရန် လိုအပ်ပါကြောင်း၊ နိုင်ငံတော် ဖွံ့ဖြိုးရေး လုပ်ငန်းများ စီမံကိန်းချမှတ်
ဆောင်ရွက်ရာတွင် စာရင်းအင်း အချက် အလက်များ မှန်ကန် တိကျရန် အရေးကြီး ပါကြောင်း၊ ယင်းအပေါ်
အခြေခံပြီး လုပ်ဆောင်မှသာ လုပ်ငန်းများ အောင်မြင်နိုင်မည် ဖြစ်ကြောင်း။
ဧရာဝတီ တိုင်းဒေသကြီးသည် မိမိတို့နိုင်ငံ၏ စိုက်ပျိုးရေး
ကဏ္ဍအတွက် သာမက ခရီးသွား လုပ်ငန်း ဖွံ့ဖြိုးရေး အတွက်ပါ ကောင်းမွန်သည့် အခြေခံ အရင်းအမြစ်များ
ရှိသဖြင့် နိုင်ငံစီးပွား တိုးတက် စည်ပင်ရေးတွင် အဓိက စွမ်းဆောင် ပေးနိုင်မည့် ဒေသ
ဖြစ်လာမည်ဟု မျှော်လင့်ပါကြောင်း ပြောကြားသည်။
ထို့နောက် ဒုတိယသမ္မတနှင့် တာဝန် ရှိသူများသည် မအူပင်မြို့မှ
ညောင်တုန်းမြို့သို့ မော်တော်ယာဉ်များဖြင့် ထွက်ခွာပြီး ညောင်တုန်းမြို့ (၂၁) လမ်းထိပ်မှ
(၂၇)လမ်းထိပ်ထိ မြစ်ရေ တိုက်စားပြီး ကမ်းပါးပြိုမှုအား ရေအရင်းအမြစ်နှင့် မြစ်ချောင်းများ
ဖွံ့ဖြိုး တိုးတက်ရေး ဦးစီးဌာနက ကမ်းထိန်း လုပ်ငန်းများ ဆောင်ရွက်နေမှုကို သွားရောက်
ကြည့်ရှု စစ်ဆေးသည်။
ညောင်တုန်းမြို့သည် ဧရာဝတီမြစ်နှင့် ပန်းလှိုင် မြစ်ဆုံရာ
အနီးတွင် တည်ရှိပြီး မြစ်ကမ်းပါးနှင့် မြေသားတာတို့မှာ ကပ်လျက် တည်ရှိနေခြင်း၊ ပန်းလှိုင်မြစ်နှင့်
ဧရာဝတီမြစ် ဆုံရာတွင်ရှိ၍ မိုးရာသီရေများချိန် ရေစီးဆင်းနှုန်း များပြားခြင်း၊ ရေနည်းရာသီ
မြစ်ရေကျဆင်းချိန်တွင် မြေတွင်းအောင်းရေ စိမ့်ထွက်မှု များပြားခြင်း စသည့်တို့ကြောင့်
ကမ်းပါး မြေသားများ နှစ်စဉ်နီးပါး အိကျမှုများ ဖြစ်ပေါ်လျက် ရှိရာ ယခုနှစ်တွင် ညောင်တုန်းမြို
(၂၁)လမ်းထိပ် မြစ်ကမ်း ကမ်းထိန်း လုပ်ငန်းကို ဘိုးပိုင်အခြေပြု ကျောက်စီ မြေထိန်းနံရံ
အလျား (၂၅ဝ)ပေ၊ မျောတိုင်တန်း အခြေထိန်း ရေကာ အလျား(၂၅ဝ)ပေ၊ (၂၄)လမ်းတွင် ဘိုးပိုင်အခြေပြု
ကျောက်စီ မြေထိန်းနံရံ အလျား (၁၁၅)ပေနှင့် (၂၅)လမ်းမှ (၂၇)လမ်းအထိ ဘိုးပိုင်အခြေပြု
ကျောက်စီ မြေထိန်းနံရံ အလျား (၂၁၅)ပေ တည်ဆောက်ခြင်း လုပ်ငန်းများ ဆောင်ရွက်လျက် ရှိသည်။
ဆက်လက်၍ ဗိုလ်မြတ်ထွန်း
တံတား ကမ်းထိန်းခြင်း လုပ်ငန်းများ ဆောင်ရွက်နေမှုနှင့် ရေလမ်းကြောင်း ကောင်းမွန်ရေး
အတွက် လုပ်ငန်းများ ဆောင်ရွက်နေမှုကို သွားရောက် ကြည့်ရှု စစ်ဆေးရာ ရေအရင်းအမြစ်နှင့်
မြစ်ချောင်းများ ဖွံ့ဖြိုး တိုးတက်ရေး ဦးစီးဌာန တာဝန်ရှိသူက သောင်တူးခြင်း လုပ်ငန်း၊
ရေကာတာများ တည်ဆောက် ခြင်းလုပ်ငန်း၊ ကျောက်စီ ကမ်းထိန်း တမံတည်ဆောက်ခြင်း၊ ကျောက်စီနံရံ
တည်ဆောက်ခြင်းနှင့် သဲအိတ်ခံ ကျောက်စီ ရေကာတာ တည်ဆောက်ခြင်း လုပ်ငန်းများ ဆောင်ရွက်နေမှုနှင့်
စပ်လျဉ်းပြီး ရှင်းလင်း တင်ပြပြီး ဒုတိယသမ္မတသည် လုပ်ငန်း ဆောင်ရွက် ထားရှိမှု အခြေအနေများကို
လှည့်လည် ကြည့်ရှုသည်။
ဗိုလ်မြတ်ထွန်း တံတား၏ ကြိမ်ပင်ဆယ်ရွာဘက် ကမ်းပါးများမှာ
ရေနက်စီးကြောင်းကြောင့် လည်းကောင်း၊ ဝဲပြန် ရေစီးကြောင်းကြောင့် လည်းကောင်း ကမ်းပါးအိကျမှုများ
ရှိ၍ ရေလမ်းကြောင်း ကောင်းမွန်းရေး လုပ်ငန်းများကို ၂ဝ၁၆- ၂ဝ၁၇ ဘဏ္ဍာနှစ် တွင် ပြည်ထောင်စု
သီးသန့် ရန်ပုံငွေမှ ငွေကျပ် (၃ဝ၃၆)သန်း ကျခံဆောင်ရွက် လျက်ရှိရာ ၉၈ ရာခိုင်နှုန်း ပြီးစီးပြီး
ဖြစ်သည်။
ယင်းနောက် ဗိုလ်မြတ်ထွန်း တံတားမှ ဓနုဖြူမြို့ မရမ်းချောင်း
ကျေးရွာရှိ မရမ်းချောင်းတာ တည်ဆောက်နေမှု အခြေအနေများကို သွားရောက် ကြည့်ရှု စစ်ဆေး သည်။
မရမ်းချောင်းတာကို ၂ဝ၁၆- ၂ဝ၁၇ ဘဏ္ဍာနှစ်တွင် ပြည်ထောင်စု
သီးသန့် ရန်ပုံငွေမှ ငွေကျပ် (၉၈၆)သန်းဖြင့် ကျခံ ဆောင်ရွက်လျက် ရှိပြီး လက်ရှိတွင်
ဘိုးပိုင် အခြေပြု ကျောက်စီနံရံ၊ အခြေထိန်း မျောကျောက်ဖြည့် ရေကာ တည်ဆောက်ခြင်း၊ ရေထဲပိုင်း
ကျောက်ချခြင်း လုပ်ငန်းများ ဆောင်ရွက်လျက်ရှိရာ ၈၅ရာခိုင်နှုန်း ပြီးစီးပြီ ဖြစ်သည်။
ထို့နောက် ဓနုဖြူမြို့မှ ဇလွန်မြို့သို့ သွားရောက်ပြီး ဒေါင့်ကြီးကျေးရွာ ဆိပ်ကမ်းမှ ကူးတို့်ဆိပ် ကျေးရွာသို့
စက်လှေများဖြင့် သွားရောက်ကာ မြစ်ရေ တိုက်စားမှုကြောင့် ကမ်းပါးပြိုမှုကို သွားရောက်
ကြည့်ရှုသည်။
ဒုတိယသမ္မတသည် ကူးတို့်ဆိပ် ကျေးရွာတွင် ဒေသခံ ပြည်သူများနှင့်
တွေ့ဆုံ၍ ဒေသခံ ပြည်သူများက တင်ပြလာသည့် အခက်ခဲများကို တိုင်းဒေသကြီး အစိုးရနှင့် ဌာနဆိုင်ရာများက
ပူးပေါင်း ကူညီ ဖြေရှင်းပေးရန် မှာကြားပြီး မြစ်ရေ တိုက်စားပြီး ကမ်းပါးပြိုမှုကြောင့်
နေအိမ်များ ပြောင်းရွှေ့ခဲ့ရသည့် အိမ်ထောင်စု ၅ဝ အား တစ်အိမ်ထောင်လျင် ငွေကျပ် တစ်သိန်းနှုန်းဖြင့်
ငွေကျပ်သိန်း ၅ဝ ကို အမျိုးသား သဘာဝဘေး အန္တရာယ်ဆိုင်ရာ စီမံခန့်ခွဲမှု ရန်ပုံငွေမှ ထောက်ပံ့သည်။
ဧရာဝတီ တိုင်းဒေသကြီး အတွင်း Cyclone Shelterများ၊
School Cum Shelter များ တည်ဆောက်ရန်၊ သောက်သုံးရေ ရှိရေးနှင့် ရေတွင်းရေကန်များ တူးဖော်ရန်တို့
အတွက် ၂ဝ၁၆-၂ဝ၁၇ဘဏ္ဍာရေးနှစ်နှင့် ယခုနှစ် မေလအထိ အမျိုးသား သဘာဝဘေး အန္တရာယ်ဆိုင်ရာ စီမံခန့်ခွဲမှု
ရန်ပုံငွေမှ ငွေကျပ် (၉၃၅၁)သိန်းအား ထောက်ပံ့ ပေးအပ်ခဲ့ပြီး ဖြစ်ကြောင်းသိရသည်။
(သတင်းစဉ်)
No comments:
Post a Comment