နိုင်ငံအဆင့် ပင်လယ် ကမ်းရိုးတန်း သယံဇာတ စီမံအုပ်ချုပ် လုပ်ကိုင်မှု ဗဟိုကော်မတီ ပထမအကြိမ် အစည်းအဝေး ကျင်းပ

နေပြည်တော် မတ် ၃

နိုင်ငံအဆင့် ပင်လယ်ကမ်းရိုးတန်းသယံဇာတ စီမံအုပ်ချုပ်လုပ်ကိုင်မှုဗဟိုကော်မတီ ပထမအကြိမ် အစည်းအဝေးကို ယနေ့နံနက် ၉နာရီတွင် နေပြည်တော်ရှိ သစ်တောဦးစီးဌာန အင်ကြင်းခန်းမ၌ကျင်းပရာ နိုင်ငံအဆင့် ပင်လယ်ကမ်းရိုးတန်းသယံဇာတ စီမံအုပ်ချုပ်လုပ် ကိုင်မှုဗဟိုကော်မတီဥက္ကဋ္ဌ၊ ဒုတိယသမ္မတ ဦးမြင့်ဆွေ တက်ရောက် အဖွင့်အမှာစကားပြော ကြားသည်။

အစည်းအဝေးသို့ ပြည်ထောင်စု ၀န်ကြီး ဦးအုန်းဝင်း၊ တနင်္သာရီ တိုင်းဒေသကြီး ၀န်ကြီးချုပ် ဒေါက်တာ လဲ့လဲ့မော်၊ ပဲခူးတိုင်းဒေသကြီး ၀န်ကြီးချုပ် ဦးဝင်းသိန်း၊ ရန်ကုန် တိုင်းဒေသကြီး၊ မွန်ပြည်နယ်၊ ရခိုင်ပြည်နယ်နှင့် ဧရာဝတီ တိုင်းဒေသကြီး အစိုးရအဖွဲ့တို့မှ ၀န်ကြီးများ၊ ဗဟို ကော်မတီဝင်များ ဖြစ်ကြသည့် အမြဲတမ်း အတွင်းဝန်များနှင့် ဌာနဆိုင်ရာ အကြီးအကဲများ၊ ဖိတ်ကြား ထားသူများနှင့် တာဝန်ရှိသူများ တက်ရောက်ကြသည်။

ရှေးဦးစွာ ဗဟိုကော်မတီ ဥက္ကဋ္ဌ၊ ဒုတိယသမ္မတ ဦးမြင့်ဆွေက ယနေ့ အစည်းအဝေးသည် နိုင်ငံဖွံ့ဖြိုး တိုးတက်ရေးနှင့် စားနပ်ရိက္ခာ ဖူလုံရေးအတွက် အရေးပါသည့် ပင်လယ် ကမ်းရိုးတန်း ဒေသ သယံဇာတများကို ရေရှည် တည်တံ့ရန်နှင့် အကျိုးအရှိဆုံး အသုံးချနိုင်ရန် စီမံအုပ်ချုပ် လုပ်ကိုင်ရာတွင် ပြည်ထောင်စု ဝန်ကြီးဌာနများနှင့် တိုင်းဒေသကြီး၊ ပြည်နယ် အစိုးရများ အကြား ပေါင်းစပ် ညှိနှိုင်းနိုင်ရန်နှင့် မူဝါဒများ ချမှတ်ရန် ဖွဲ့စည်းထားသည့် ဗဟို ကော်မတီ၏ တာဝန်များကို မြေပြင်တွင် လက်တွေ့ အကောင် အထည်ဖော်နိုင်ရန် အတွက် ပထမဆုံး ခေါ်ယူ ကျင်းပသည့် ညှိနှိုင်း အစည်းအဝေး ဖြစ်ပါကြောင်း။

မြန်မာနိုင်ငံသည် သဘာဝ သယံဇာတများ ပေါကြွယ်ဝသည့် နိုင်ငံ ဖြစ်ပါကြောင်း၊ အဓိက အရေးပါသည့် သယံဇာတများက ရေနှင့်မြေ၊ သစ်တောများ၊ ပင်လယ် ကမ်းရိုးတန်း သယံဇာတများ ဖြစ်ပါကြောင်း၊ မြန်မာနိုင်ငံသား တစ်ဦးချင်းစီ၏ ရေအရင်းအမြစ် ပမာဏ (Renewable Fresh Water Resources Per Capita)သည် အမေရိကန် ပြည်ထောင်စုထက် ၂ဆ၊ တရုတ်ပြည်သူ့ သမ္မတနိုင်ငံထက် ၁၅ ဆနှင့် အိန္ဒိယနိုင်ငံထက် ၁၀ ဆ ရှိပါကြောင်း၊ မြေသယံဇာတ အနေနှင့်လည်း မြန်မာနိုင်ငံသည် ကမ္ဘာပေါ်တွင် ၂၅ နိုင်ငံမြောက် စိုက်ပျိုးမြေ ဧရိယာ အများဆုံး နိုင်ငံဖြစ်ပါကြောင်း၊ သစ်တော သယံဇာတ အနေနှင့် နိုင်ငံဧရိယာ စုစုပေါင်း၏ ၄၃ ရာခိုင်နှုန်း သည် ယခုအချိန်အထိ သစ်တောများ ဖုံးလွှမ်းနေပါကြောင်း။

ကမ္ဘာ့နိုင်ငံများနှင့် ရင်ဘောင်တန်းပြီး ဖွံ့ဖြိုး တိုးတက် လာစေရန် နိုင်ငံရေး၊ လူမှုရေးနှင့် စီးပွားရေး ဆိုင်ရာ ပြုပြင် ပြောင်းလဲမှုများကို ဆောင်ရွက်နေချိန်တွင် ပတ်ဝန်းကျင်နှင့် သဟဇာတ ဖြစ်သည့် စီးပွားရေး ဖွံ့ဖြိုး တိုးတက်မှု တစ်ရပ် ဖော်ဆောင်နိုင်မည့် အခြေခံများကို တည်ဆောက် နေပါကြောင်း၊ မြန်မာနိုင်ငံ၏ ကြွယ်ဝသည့် သဘာဝ သယံဇာတများကို အခြေခံပြီး ပြည်သူများ၏ စားနပ်ရိက္ခာ ဖူလုံရန်၊ လူမှုစီးပွား ဖွံ့ဖြိုးတိုးတက်ရန်၊ ဆင်းရဲနွမ်းပါးမှု လျှော့ချရန်၊ သဘာဝ ဘေးအန္တရာယ်များ ကျရောက်မှု ဒဏ်ကို ကြံ့ကြံ့ခံ ကျော်လွှားနိုင်ရန်နှင့် သဘာဝ ဂေဟစနစ်များ တည်တံ့ ခိုင်မြဲရန်တို့ကို ဆောင်ရွက်နိုင်ပါက နိုင်ငံ၏ ရေရှည် တည်တံ့သည့် ဖွံ့ဖြိုးတိုးတက်မှု (Sustainable Development)ကို အထောက် အကူပြုနိုင်မည် ဖြစ်ပါကြောင်း။

မြန်မာ့ ပင်လယ် ကမ်းရိုးတန်းဒေသသည် ကီလိုမီတာ (၂၈၃၂) ခန့် ရှည်လျားပြီး အိန္ဒိယ သမုဒ္ဒရာ အဝန်းအဝိုင်းတွင် အရေးပါသည့် သဘာဝ ဂေဟစနစ်များ တည်ရှိရာဒေသ ဖြစ်ပါကြောင်း၊ မြန်မာ့ပင်လယ် ကမ်းရိုးတန်းဒေသတွင် ဒီရေတောဂေဟစနစ်၊ သန္တာကျောက်တန်း ဂေဟစနစ်၊ ပင်လယ်မြက်ခင်း ဂေဟစနစ်များကို တွေ့ရှိရပြီး အဆိုပါ ဂေဟစနစ်များက ကမ်းရိုးတန်းဒေသနေ ပြည်သူများနှင့် နိုင်ငံအတွက် ရေထွက်ကုန် ပစ္စည်းနှင့် ပတ်ဝန်းကျင်ဆိုင်ရာ ၀န်ဆောင်မှု အမျိုးမျိုးကို ပေးအပ်နေပါကြောင်း၊ ကမ်းရိုးတန်း ဂေဟစနစ်များသည် ငါးပုဇွန်များ အပါအဝင် ရေနေသတ္တဝါ အမျိုးမျိုးရှင်သန် ကျက်စား နေထိုင်ရာ ဒေသများ ဖြစ်ရုံသာမက လေပြင်း မုန်တိုင်းများနှင့် ဆူနာမီ ရေလှိုင်းများ၏ အန္တရာယ်မှ လျော့နည်းစေရန် ကာကွယ် ပေးပါကြောင်း၊ မြေပေါ်နှင့် မြေအောက် ရေချို အရင်းအမြစ်များ အတွင်းသို့ ရေငန် ဝင်ရောက်ခြင်းနှင့် ကမ်းခြေဒေသနှင့် မြစ်ဝကျွန်းပေါ် ဒေသရှိ မြစ်ချောင်း ကမ်းပါးများ ရေတိုက်စားပြီး မြေပြိုခြင်း အန္တရာယ်ကလည်း ကာကွယ် ပေးပါကြောင်း။

ထို့ကြောင့် ပင်လယ်နှင့် ကမ်းရိုးတန်း ဒေသများကို စနစ်တကျ စီမံအုပ်ချုပ် လုပ်ကိုင်နိုင်ခြင်းသည် နိုင်ငံ၏ စားနပ်ရိက္ခာ ဖူလုံရေး၊ ပြည်သူများ၏ လူမှုစီးပွာရေးဘဝ ဖွံ့ဖြိုး တိုးတက်ရေးနှင့် သဘာဝဘေး အန္တရာယ်များမှ ကာကွယ်ရေး တို့ကို အထောက်အကူ ပြုနိုင်မည် ဖြစ်ပါကြောင်း။

ဒီရေတောဂေဟ စနစ်သည် ပင်လယ်ပြင်နေ သက်ရှိများနှင့် ပတ်ဝန်းကျင်အတွက် အလွန် အရေးပါသည့် အခန်းကဏ္ဍတွင် ရပ်တည် နေပါကြောင်း၊ ဒီရေတောများ ပျက်စီး ဆုံးရှုံးပါက ကမ်းနီး ကမ်းဝေးငါးဖမ်း လုပ်ငန်း ၂ မျိုးလုံးကို များစွာ ထိခိုက်ပြီး ဆက်စပ်နေသည့် ပတ်ဝန်းကျင်နှင့် ဂေဟစနစ်များကိုလည်း ပျက်စီးစေမည် ဖြစ်ပါကြောင်း။

လက်ရှိ အခြေအနေတွင် မြန်မာနိုင်ငံ၏ ကမ်းရိုးတန်းဒေသ သယံဇာတ အရင်းအမြစ်များသည် အကြောင်း အမျိုးမျိုးကြောင့် လျှင်မြန်စွာ ယိုယွင်း ပျက်စီးလာသည်ကို တွေ့ရမည် ဖြစ်ပါကြောင်း၊ လူဦးရေ တိုးပွားလာခြင်းနှင့် အတူ ရေတို အကျိုးစီးပွား အတွက် သယံဇာတများ မဆင်မခြင် ထုတ်ယူ အသုံးပြုခြင်း၊ ကမ်းရိုးတန်း ဂေဟစနစ်များမှ ရရှိသည့် လူမှုစီးပွားရေးနှင့် ပတ်ဝန်းကျင်ဆိုင်ရာ တန်ဖိုးများကို သိရှိနားလည်မှု အားနည်းခြင်း၊ ပင်လယ် ကမ်းရိုးတန်းဒေသ သယံဇာတများ စီမံအုပ်ချုပ် လုပ်ကိုင်မှုနှင့် ဆိုင်သည့် မူဝါဒများ ချမှတ်မှု အားနည်းခြင်း၊ စီမံကိန်း ရေးဆွဲခြင်းနှင့် အကောင် အထည်ဖော်ခြင်း လုပ်ငန်းများတွင် အစိုးရဌာနများ အချင်းချင်း ပေါင်းစပ် ညှိနှိုင်း ဆောင်ရွက်မှု အားနည်းခြင်း၊ ပြဌာန်းထားသည့် ဥပဒေလုပ်ထုံး လုပ်နည်းများ၏ အကျိုး သက်ရောက်မှု အားနည်းခြင်း၊ သဘာဝ ဘေးအန္တရာယ်များ မကြာခဏ ကျရောက်ခြင်းတို့သည် ကမ်းရိုးတန်းဒေသ သယံဇာတများ ပြုန်းတီး ပျက်စီးခြင်း၏ အကြောင်းရင်းများ ဖြစ်ပါကြောင်း၊ ထိုသို့သော ပြုန်းတီး ပျက်စီးမှုများသည် သက်ဆိုင်ရာ တိုင်းဒေသကြီးနှင့် ပြည်နယ်များ သာမက နိုင်ငံ၏ ရေရှည် ဖွံ့ဖြိုး တိုးတက်မှုကိုပါ ထိခိုက်စေပါကြောင်း။

ပင်လယ် ကမ်းရိုးတန်းဒေသရှိ သယံဇာတများ ပျက်စီး ပြုန်းတီးမှုနှင့် ဆိုင်သည့် လွန်ခဲ့ သော ဆယ်စုနှစ်များ အတွင်း ငါးပုဇွန်များ ပေါက်ပွား ရှင်သန် ကျက်စားရာ ဖြစ်သည့် ဒီရေတော များ၊ သန္တာ ကျောက်တန်းများနှင့် ပင်လယ် မြက်ခင်းများ များစွာ ပျက်စီးသွားခဲ့သည်ကို လေ့လာ ဆန်းစစ်ချက်များအရ သိရှိရပါကြောင်း၊ ဧရာဝတီ မြစ်ဝကျွန်းပေါ် ဒေသတွင် မူလရှိခဲ့သည့် ဒီရေတော ဧရိယာထက် များစွာ လျော့နည်း ကျဆင်းသွားခဲ့ပြီး မူလက အရှေ့တောင် အာရှဒေသတွင် အကောင်းဆုံး အနေအထားတွင် ရှိသည်ဟု ယူဆခဲ့ကြသည့် မြိတ်ကျွန်းစုဒေသရှိ သန္တာ ကျောက်တန်း များသည်လည်း သိသာထင်ရှားစွာ ပျက်စီး လာနေသည်ကို အစီရင်ခံစာများ အရ သိရှိရပါကြောင်း။

လက်ရှိ ကမ်းရိုးတန်းဒေသ သယံဇာတများ ယိုယွင်း ပျက်စီးမှုကို ပိုမိုဆိုးရွားလာ စေနိုင်သည့် ပြဿနာသည် ကမ္ဘာ့ရာသီဥတု ပြောင်းလဲလာခြင်းနှင့် အတူ ပင်လယ် ရေမျက်နှာပြင် မြင့်တက်လာခြင်းနှင့် သဘာဝ ဘေးအန္တရာယ်များ ပိုမို ဖြစ်ပွားလာခြင်းပင် ဖြစ်ပါကြောင်း၊ ပင်လယ်ရေ မျက်နှာပြင် မြင့်တက်လာသည့် အတွက် ကမ်းရိုးတန်း ဒေသများ အထူးသဖြင့် ဧရာဝတီ မြစ်ဝကျွန်းပေါ် ဒေသက မြေနိမ့် ဧရိယာများတွင် ရှိသည့် လူနေအိမ်ခြေနှင့် စိုက်ပျိုးမြေ ဧရိယာများကို ထိခိုက်လာမည် ဖြစ်ပြီး ရာသီဥတု ပြောင်းလဲမှုကြောင့် အပူပိုင်းဒေသ မုန်တိုင်းများ ပိုမို ဝင်ရောက်နိုင်ကာ ရှည်လျားသည့် မြန်မာ့ ကမ်းရိုးတန်း ဒေသများတွင် နေထိုင်သည့် ပြည်သူလူထု၏ အသက်အိုးအိမ်နှင့် အခြေခံ အဆောက်အဦများ ဆုံးရှုံးမှုပိုမို များပြား လာနိုင်ပါကြောင်း။

မြန်မာနိုင်ငံ၏ ကမ်းရိုးတန်း ဒေသတွင် တိုင်းဒေသကြီး ၄ ခုနှင့် ပြည်နယ် ၂ ခုတို့ တည်ရှိပြီး လူဦးရေ သန်းပေါင်း ၂၀ ကျော် မှီတင်း နေထိုင်ကြသည့် အတွက် ရာသီဥတု ပြောင်းလဲမှု ပြဿနာကို အလေးထား ကိုင်တွယ် ဖြေရှင်းရန် လိုအပ်မည် ဖြစ်ပါကြောင်း၊ ရာသီဥတု ပြောင်းလဲမှု ပြဿနာကို ကြိုတင် ကာကွယ်ရာတွင် ဒေသနှင့် လိုက်လျော ညီထွေ ရှိသည့် အခြေခံအ ဆောက်အဦများ တည်ဆောက်ရန် လိုအပ်လာမည် ဖြစ်သကဲ့သို့ သဘာဝ အခြေခံ အဆောက်အဦ (Natural Infrastructure) များ ဖြစ်သည့် ဒီရေတောများ၊ ကမ်းရိုးတန်းဒေသ သစ်တောများနှင့် သန္တာ ကျောက်တန်းများ ပျက်စီးမှု မရှိအောင် ထိန်းသိမ်း ကာကွယ်ရန်လည်း လိုအပ်မည် ဖြစ်ပါကြောင်း။

မြန်မာနိုင်ငံတွင် ကမ်းရိုးတန်း သယံဇာတများ ရေရှည် တည်တံ့စေရန် အတွက် ဘက်စုံ စီမံ အုပ်ချုပ် လုပ်ကိုင်မှု နည်းလမ်း အသုံးပြုရန် ကနဦး အစီအစဉ်များရှိပြီး ဖြစ်ပါကြောင်း၊ ကနဦး လုပ်ငန်းစဉ်များကို ပိုမိုဖွံ့ဖြိုး တိုးတက်အောင် ဆောင်ရွက်သွားရန် လိုအပ်ပါကြောင်း၊ (Myanmar Agenda 21)တွင် နိုင်ငံ၏ ပင်လယ် ကမ်းရိုးတန်း ဒေသနှင့် သယံဇာတများကို ဘက်စုံစီမံ အုပ်ချုပ် လုပ်ကိုင်ပြီး ရေရှည်ဖွံ့ဖြိုး တိုးတက်လာစေရန် အတွက် လိုအပ်နေသည့် ပေါင်းစပ် ညှိနှိုင်းမှု ယန္တရားတစ်ရပ် တစ်နည်းအားဖြင့် အဆင့်မြင့် မူဝါဒနှင့် လုပ်ငန်းစဉ် ချမှတ်ရေး အဖွဲ့တစ်ဖွဲ့ကို အမျိုးသား အဆင့်တွင် ဖွဲ့စည်းသွားရန် လိုအပ်ကြောင်း။

နိုင်ငံအဆင့် ပင်လယ် ကမ်းရိုးတန်း သယံဇာတ စီမံအုပ်ချုပ် လုပ်ကိုင်မှု ဗဟိုကော်မတီ၏ တာဝန်နှင့် ဝတ္တရားများတွင်လည်း ကမ်းရိုးတန်း သယံဇာတ ဘက်စုံစီမံ အုပ်ချုပ် လုပ်ကိုင်မှုဆိုင်ရာ မဟာဗျူဟာ၊ မူဝါဒ၊ ဥပဒေ၊ လုပ်ထုံး လုပ်နည်းများ ပြဌာန်းရန်နှင့် အကောင် အထည်ဖော်ရန် ဆိုသည့် အချက် ပါဝင်ပါကြောင်း၊ ဒီအဖွဲ့၏ တာဝန် ဝတ္တရားများကို ပီပြင်အောင် အကောင် အထည်ဖော်နိုင်ရန် မိမိတို့ နိုင်ငံအတွင် ရှိသည့် လူ့စွမ်းအားအရင်းအမြစ်နှင့် ရန်ပုံငွေ တို့အပြင် နိုင်ငံတကာ အဖွဲ့အစည်းများ၏ နည်းပညာနှင့် ရန်ပုံငွေ အကူအညီဖြင့် ဆောင်ရွက် သွားရန် လိုအပ်သည့် အတွက် သက်ဆိုင်ရာ ဝန်ကြီးဌာနများက ဆက်လက် ညှိနှိုင်း ဆောင်ရွက် သွားကြရမည် ဖြစ်ကြောင်း ပြောကြားသည်။

ထို့နောက် ဒီရေတောပညာပေး ဗီဒီယို မှတ်တမ်းအား ပြသသည်။

ဆက်လက်၍ ဗဟိုကော်မတီ အတွင်းရေးမှူး သစ်တောဦးစီးဌာန ညွှန်ကြားရေးမှူးချုပ် ဒေါက်တာ ညီညီကျော်က “ပင်လယ် ကမ်းရိုးတန်း သယံဇာတ စီမံအုပ်ချုပ် လုပ်ကိုင်မှုဗဟို ကော်မတီ ဖွဲ့စည်းရခြင်း၏ ရည်ရွယ်ချက်နှင့် လုပ်ငန်းတာဝန်များ”ကို လည်းကောင်း၊ သယံဇာတာနှင့် သဘာဝ ပတ်ဝန်းကျင် ထိန်းသိမ်းရေး ၀န်ကြီးဌာနမှ ညွှန်ကြားရေးမှူး ဦးဘိုနီက “ပင်လယ် ကမ်းရိုးတန်း ဒေသရှိ သစ်တောနှင့် ဒီရေတော ဂေဟစနစ်များ၏ လက်ရှိ အခြေအနေနှင့် ထိန်းသိမ်းရေး လုပ်ငန်းများ” ကိုလည်းကောင်း၊ စိုက်ပျိုးရေး၊ မွေးမြူရေးနှင့် ဆည်မြောင်း ၀န်ကြီးဌာန အမြဲတမ်း အတွင်းဝန် ဒေါက်တာ ခင်ဇော်က “ကမ်းနီး၊ ကမ်းဝေး ရေထွက်ပစ္စည်း သယံဇာတများ ထိန်းသိမ်းရေးနှင့် ထုတ်လုပ်မှု အခြေအနေ” ကို လည်းကောင်း၊ စိုက်ပျိုးရေး၊ မွေးမြူရေးနှင့် ဆည်မြောင်း ၀န်ကြီးဌာနမှ ညွှန်ကြားရေးမှူးချုပ် ဒေါက်တာ ရဲတင့်ထွန်းက “ပင်လယ် ကမ်းရိုးတန်းဒေသ စိုက်ပျိးမြေများ၏ လက်ရှိ စိုက်ပျိုး ထုတ်လုပ်မှု အခြေအနေ”ကို လည်းကောင်း၊ လျှပ်စစ်နှင့် စွမ်းအင် ၀န်ကြီးဌာနမှ အမြဲတမ်း အတွင်းဝန် ဦးထိန်လွင်က “ပင်လယ် ကမ်းရိုးတန်းဒေသ သဘာဝ ဓါတ်ငွေ့နှင့် ရေနံ ထုတ်လုပ်ခြင်း ဆိုင်ရာ လုပ်ငန်းများနှင့် ဘေးထွက်ပစ္စည်း စီမံခန့်ခွဲမှုဆိုင်ရာ လုပ်ငန်းများ”ကို လည်းကောင်း၊ ဟိုတယ်နှင့် ခရီးသွားလာရေး ၀န်ကြီးဌာန အမြဲတမ်း အတွင်းဝန် ဦးရည်မွန်က “ပင်လယ် ကမ်းရိုးတန်းဒေသ သဘာဝအခြေခံ ခရီးသွား လုပ်ငန်းအပါအ၀င် ခရီးသွားလာရေး လုပ်ငန်း၏ လက်ရှိ အခြေအနေနှင့် ဖွံ့ဖြိုးတိုးတက် ရန် အလားအလာများ”ကို လည်းကောင်း ရှင်းလင်း ဆွေးနွေး တင်ပြကြသည်။

ယင်းနောက် ဗဟို ကော်မတီဝင်များ ဖြစ်ကြသည့် တနင်္သာရီ တိုင်းဒေသကြီး ၀န်ကြီးချုပ်၊ ပဲခူး တိုင်းဒေသကြီး ၀န်ကြီးချုပ်၊ မွန်ပြည်နယ်၊ ရခိုင်ပြည်နယ်နှင့် ရန်ကုန် တိုင်းဒေသကြီး အစိုးရအဖွဲ့တို့မှ ၀န်ကြီးများနှင့် တက်ရောက် လာသူများက ရေသယံဇာတများ ထိန်းသိမ်း ကာကွယ်ရေး၊ မြစ်ကြောင်းများ ထိန်းသိမ်းရေး၊ ဒီရေတောများ ထိန်းသိမ်းရေး၊ သဘာဝ ပတ်ဝန်းကျင် ထိခိုက်မှု မရှိစေရေးဆိုင်ရာ ကိစ္စရပ်များနှင့် စပ်လျဉ်း၍ ၀ိုင်းဝန်း အကြံပြု ဆွေးနွေးကြပြီး ရှေ့လုပ်ငန်းစဉ်များကို ချမှတ်ကြသည်။

ထို့နောက် ပြည်ထောင်စုဝန်ကြီး ဦးအုန်းဝင်းက ပင်လယ် ကမ်းရိုးတန်း သယံဇာတ စီမံ အုပ်ချုပ် လုပ်ကိုင်မှုနှင့် စပ်လျဉ်း၍ ဖြည့်စွက် ရှင်းလင်း ပြောကြားပြီး အစည်းအဝေးကို ရုပ်သိမ်း လိုက်သည်။