အမှတ်(၃၆) အကြီးစားစက်ရုံ (ကျောက်ဆည်) နှစ်ရှည်ငှားရမ်းရေး စာချုပ်လက်မှတ်ရေးထိုး

နေပြည်တော်၊ မတ် ၃၁

စက်မှုဝန်ကြီးဌာန၊ ပြည်ထောင်စုဝန်ကြီး ဦးခင်မောင်ချိုသည် POSCO DAEWOO Myanmar Corporation Ltd. မှ Managing Director ဖြစ်သူ Mr. WonYooJoon ဦးဆောင်သောကိုယ်စားလှယ်အဖွဲ့အား ယနေ့နံနက် ၈ နာရီတွင် ပြည်ထောင်စုဝန်ကြီး၏ ဧည့်ခန်းမဆောင်၌ တွေ့ဆုံခဲ့သည်။ယင်းနောက် နံနက် ၁၁ နာရီတွင် အမှတ် (၃၆) အကြီးစား စက်ရုံ (ကျောက်ဆည်)အား နှစ်ရှည်ငှားရမ်းရေးစာချုပ် လက်မှတ် ရေးထိုးပွဲ အခမ်းအနားကျင်းပသည်။

POSCO DAEWOO Myanmar Corporation Ltd. မှ Managing Director ဖြစ်သူ Mr. WonYooJoon ဦးဆောင်သော ကိုယ်စားလှယ်အဖွဲ့နှင့် တွေ့ဆုံရာတွင် စက်မှုဝန်ကြီးဌာနနှင့် ပူးပေါင်း၍ Truckများ၊ Bus များ၊ Model မြင့် မော်တော်ယာဉ် များနှင့် မော်တော်ဆိုင်ကယ်များကို SKD, CKD စနစ်ဖြင့် တင်သွင်းထုတ်လုပ် နိုင်ရေးအတွက် အဆိုပြုလွှာတင်သွင်း နိုင်ရေးဆိုင်ရာ ကိစ္စရပ်များ၊ Phase အလိုက် အကောင်အထည်ဖော် ဆောင်ရွက်သွားမည့် လုပ်ငန်းစဉ်များ၊ လုပ်ငန်းစဉ်များ အလိုက် လုပ်သားများ ခန့်အပ်သွားမည်ဖြစ်သဖြင့် အလုပ်အကိုင်အခွင့်အလမ်းများ ပေါများလာမည့် အခြေအနေများနှင့် ရှေ့ဆက်လုပ်ဆောင်ရမည့် လုပ်ငန်းစဉ်များနှင့် ပတ်သက်၍ AoD ရေးထိုးဆောင်ရွက်နိုင်ရေး ဆိုင်ရာကိစ္စရပ်များအား ဆွေးနွေးခဲ့ကြသည်။

ထို့နောက် အမှတ်(၃၆)အကြီးစား စက်ရုံ(ကျောက်ဆည်) အား နှစ်ရှည်ငှားရမ်းရေး လက်မှတ်ရေး ထိုးပွဲအခမ်းအနား ကျင်းပရာ အမှတ်(၂) အကြီးစားစက်မှုလုပ်ငန်း ဦးဆောင်ညွှန်ကြားရေးမှူး၊ ဒေါ်ခင်မာရီနှင့် International Glass Co., Ltd. ၏ Managing Director ဖြစ်သူဦးဇော်ဝင်းတို့မှ အမှတ်(၃၆) အကြီးစားစက်ရုံ (ကျောက်ဆည်) အား နှစ်ရှည် ငှားရမ်းခြင်း စာချုပ်ကို လက်မှတ်ရေးထိုးခဲ့ကြသည်။

အဆိုပါ အခမ်းအနားသို့ စက်မှုဝန်ကြီးဌာနမှ တာဝန်ရှိသူများနှင့် သက်ဆိုင်ရာ ကုမ္ပဏီများမှ တာဝန်ရှိသူများ တက်ရောက် ခဲ့ကြကြောင်း သတင်းရရှိသည်။

(သတင်းစဉ်)