၁။ အင်ဒိုနီးရှားနိုင်ငံတွင် ဇန်န၀ါရီလ ၂၂ ရက်နေ့မှ
၂၉ ရက်နေ့အထိ ကျင်းပခဲ့သော အကြီးတန်း ခေါင်းဆောင်မှု အစီအစဉ်ကို တက်ရောက်ခဲ့သည့် ဦးကိုနီ
(အမျိုးသားဒီမိုကရေစီအဖွဲ့ချုပ် ဥပဒေ အကြံပေး) သည် ၂၉ - ၁ - ၂၀၁၇ ရက်နေ့
စင်္ကာပူလေဆိပ်မှတစ်ဆင့်
မြန်မာနိုင်ငံသို့ အပြန် ရန်ကုန် အပြည်ပြည်ဆိုင်ရာလေဆိပ်၌ ယင်းနေ့ ညနေ ၅ နာရီ အချိန်ခန့်တွင်
ဦးခေါင်းအား ပစ္စတိုသေနတ်ဖြင့် အနီးကပ်ပစ်ခတ် လုပ်ကြံသတ်ဖြတ် ခံရမှုကြောင့် နေရာတွင်ပင်
သေဆုံးခဲ့ရပါသည်။ ယင်းဖြစ်စဉ်တွင် သေနတ်ဖြင့်ပစ်ခတ်သူအား ဖမ်းဆီးရမိရေး ကြိုးပမ်းဆောင်ရွက်ခဲ့သူ
တက္ကစီယာဉ်မောင်း ဦးနေ၀င်း မှာလည်း တရားခံက သေနတ်ဖြင့်ပစ်ခတ်မှုကြောင့် သေဆုံးခဲ့ရပါသည်။
တာဝန်သိပြည်သူများနှင့် လုံခြုံရေးတပ်ဖွဲ့ဝင်များ၏ ၀ိုင်းဝန်းဖမ်းဆီးမှုဖြင့် တရားခံဖြစ်သူ
ဦးကြည်လင်း (၅၃) နှစ်ကို ဖမ်းဆီးရမိ ခဲ့ပါသည်။
၂။ လုပ်ကြံခံရမှုကြောင့် သေဆုံးခဲ့ရသည့် ဦးကိုနီနှင့်
တရားခံ ဖမ်းဆီးရမိရေးအတွက် ကြိုးပမ်း ဆောင်ရွက်ရင်း သေဆုံးခဲ့သည့် ဦးနေ၀င်းတို့အတွက်
များစွာစိတ်မကောင်းဖြစ်ရပါသည်။ တရားခံအား ၀ိုင်းဝန်းကူညီဖမ်းဆီး ပေးခဲ့ကြသည့် တာဝန်သိပြည်သူများအားလုံးကိုလည်း
ကျေးဇူးဥပကာရ အထူးပင် တင်ရှိပါသည်။
၃။ ကနဦးစစ်ဆေးချက်များအရ ဤဖြစ်ရပ်သည် နိုင်ငံတော်အတွင်း
တည်ငြိမ်အေးချမ်းမှု ပျက်ပြား စေရန် ရည်ရွယ်ဆောင်ရွက်ခြင်း ဖြစ်နိုင်ကြောင်း သုံးသပ်တွေ့ရှိရပါသည်။
နိုင်ငံတော်အစိုးရအနေဖြင့် ဖြစ်စဉ်အမှန် ပေါ်ပေါက်ရေးအတွက် စုံစမ်းစစ်ဆေးမှုများ ဆက်လက်ဆောင်ရွက်လျက်ရှိပြီး
ယင်းဖြစ်စဉ် ဖြစ်ပွားခဲ့မှု အခြေအနေ များပေါ် မူတည်၍ လုံခြုံရေး အစီအမံများကိုလည်း အထူးအလေးထား၍
ဆောင်ရွက်လျက်ရှိပါသည်။
၎။ သို့ပါ၍ ပြည်သူများအနေဖြင့် ဤဖြစ်စဉ်ကြောင့်
အထိတ်တလန့်မဖြစ်ဘဲ တည်ငြိမ်အေးချမ်းစွာ နေထိုင်ကြရန်၊ ဘာသာရေးနှင့် လူမျိုးရေး သွေးထိုးမှုများကို
အထူးဂရုပြုကြရန်၊ ယခု လုပ်ကြံသတ်ဖြတ်မှု ဖြစ်စဉ်နှင့် စပ်လျဉ်း၍ဖြစ်စေ၊ တည်ငြိမ်အေးချမ်းမှု
ပျက်ပြားအောင် လုပ်ဆောင်မှုများနှင့် စပ်လျဉ်း၍ ဖြစ်စေ ထူးခြားမှုများတွေ့ ရှိပါက တာဝန်ရှိသူများထံ
အမြန်ဆုံး ဆက်သွယ်အသိပေးကြပါရန် မေတ္တာရပ်ခံလျက် သတင်းထုတ်ပြန်အပ်ပါသည်။
No comments:
Post a Comment