ဒုတိယအကြိမ် အမျိုးသားလွှတ်တော် စတုတ္ထပုံမှန်အစည်းအဝေးပထမနေ့ ကျင်းပ

နေပြည်တော်  ဇန်န၀ါရီ ၃၀

ဒုတိယအကြိမ် အမျိုးသားလွှတ်တော် စတုတ္တပုံမှန်အစည်းအဝေး ပထမနေ့ကို ယနေ့နံနက် ၁၀ နာရီတွင် နေပြည်တော်ရှိ လွှတ်တော်အဆောက်အအုံ အမျိုးသားလွှတ်တော် အစည်းအဝေးခန်းမ၌ ကျင်းပသည်။

ရှေးဦးစွာ အမျိုးသားလွှတ်တော်ဥက္ကဋ္ဌ မန်းဝင်းခိုင်သန်းက လွှတ်တော်သက်တမ်း မကြာမီ တစ်နှစ်ပြည့်တော့မည် ဖြစ်သည့်အတွက် လွှတ်တော်ကိုယ်စားလှယ်များ၏ ကိုယ်တိုင်ဆောင်ရွက်မှု၊ လေ့လာမှုနှင့်အတွေ့အကြုံများကြောင့် စွမ်းရည်မြင့်မားလာပြီ ဟု ယုံကြည်ပါကြောင်း။

လွှတ်တော်အားလပ်ရက် အတွင်းတွင်လည်း မိမိမဲဆန္ဒနယ်မှ ပြည်သူများနှင့် ထိတွေ့ပြီးဖြစ်သည့်အတွက် မိမိမဲဆန္ဒနယ်၏ လိုအပ်ချက်များကို  လေ့လာသိရှိလာပြီး ဖြစ်သည့်အတွက် ယခုအကြိမ်အစည်းအဝေးတွင် မိမိတို့၏ဒေသနှင့် မိမိတို့နိုင်ငံ အတွက် မိမိတို့စွမ်းဆောင်ရည်ကို ပိုမိုတိုးတက်အောင် ဆောင်ရွက်ကြရန် တိုက်တွန်း ကြောင်း နှုတ်ခွန်းဆက် စကားပြောကြားသည်။

ယင်းနောက် ရှမ်းပြည်နယ် မဲဆန္ဒနယ်အမှတ်(၁၂)မှ ဦးစိုင်းစံအောင်က “ချင်းရွှေ ဟော်မြို့ကို မြန်မာနိုင်ငံနှင့် တရုတ်နိုင်ငံနယ်စပ် အပြည်ပြည်ဆိုင်ရာ ၀င်၊ ထွက်ပေါက် အဖြစ် သတ်မှတ်ပြီး ကမ္ဘာလှည့်ခရီးသည်နှင့် ဘုရားဖူးများ ၀င်ထွက်ခွင့်ပြုရန် အစီအစဉ် ရှိ/မရှိ” မေးခွန်းကို မေးမြန်းရာ ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စု ၀န်ကြီး ဦးအုန်းမောင်က အပြည်ပြည်ဆိုင်ရာ ၀င်ပေါက်၊ ထွက်ပေါက်ဖွင့်လှစ်ရန်မှာ နိုင်ငံတော် အဆင့် ဆွေးနွေးညှိနှိုင်းဆုံးဖြတ်ရမည့်ကိစ္စများဖြစ်ခြင်း၊ နိုင်ငံတော်အစိုးရ၏ မူဝါဒချ မှတ်ပေးမှုအပေါ်မူတည်၍ အကောင်အထည်ဖော် ဆောင်ရွက်ရမည့်ကိစ္စဖြစ် ခြင်း၊ ကျင့်သုံးလျက်ရှိသော နိုင်ငံခြားရေးမူဝါဒများနှင့်အညီ နှစ်ဖက်ဒေသဆိုင်ရာ အာဏာပိုင်များ တွေ့ဆုံညှိနှိုင်းပြီး နှစ်နိုင်ငံသံတမန်လမ်းကြောင်းမှ အပြန်အလှန် ဆက် သွယ်၍ ဆောင်ရွက်သွားရန်လိုအပ်ခြင်းတို့ကြောင့် ချင်းရွှေဟော်စစ်ဆေးရေး ဂိတ်အား အပြည်ပြည်ဆိုင်ရာတရားဝင် ၀င်ပေါက်၊ ထွက်ပေါက်အဖြစ် သတ်မှတ်ထားခြင်းမရှိပါ ကြောင်း။

ထို့ကြောင့် အဆိုပါ စစ်ဆေးရေးဂိတ်အား မြန်မာနိုင်ငံနှင့် တရုတ်နိုင်ငံ နယ်စပ် အပြည်ပြည်ဆိုင်ရာ ၀င်ပေါက်၊ ထွက်ပေါက်အဖြစ် သတ်မှတ်၍ ကမ္ဘာလှည့်ခရီးသည်နှင့် ဘုရားဖူးများ ၀င်ထွက်ခွင့်ပြုရန် စီစဉ်ဆောင်ရွက်နိုင်ခြင်း မရှိသေးပါကြောင်း ရှင်းလင်း ဖြေကြားသည်။

ထို့ပြင် မကွေးတိုင်းဒေသကြီး မဲဆန္ဒနယ်အမှတ်(၄)မှ ဦးအောင်ကြည်ညွန့်၏ “၂၀၁၅-၂၀၁၆ ပညာသင်နှစ်တွင် စတင်ဖွင့်လှစ်ခဲ့သော ကျိုင်းတုံ ဆရာအတတ်သင် ဌာနခွဲအတွက် ၂၀၁၆-၂၀၁၇ ပညာသင်နှစ်တွင် ၎င်းဌာနခွဲသို့ သွားရောက်ပညာသင်ကြား ပေး မည့်ဝန်ထမ်းများ စေလွှတ်ပေးရန်အစီအစဉ်ရှိ/မရှိ” မေးခွန်းနှင့်စပ်လျဉ်း၍လည်း ပညာရေးဝန်ကြီးဌာန ဒုတိယ၀န်ကြီး ဦးဝင်းမော်ထွန်းက ၂၀၁၅-၂၀၁၆ ပညာသင် နှစ်တွင် လှည်းကူးပညာရေးကောလိပ်၏ ကျောင်းခွဲအဖြစ် ကျိုင်းတုံဆရာ အတတ် သင်ဌာနခွဲကို ကျိုင်းတုံတက္ကသိုလ်၌ စတင်ဖွင့်လှစ်ခဲ့ပြီး လှည်းကူးပညာရေး ကောလိပ်မှ ဆရာ၊ ဆရာမများအား သင်တန်းအမှတ်စဉ်အလိုက် အလှည့်ကျစနစ်ဖြင့် သွားရောက် ပညာသင်ကြားပေးစေခဲ့ပါကြောင်း။

လှည်းကူးပညာရေးကောလိပ်တွင် ဖွင့်လှစ်ရမည့် D.T.Ed အမှတ်စဉ်(၂၀/၂၀၁၅) ပထမနှစ်သင်တန်းသို့ ကျိုင်းတုံဒေသမှ တက္ကသိုလ်ဝင်တန်း အောင်မြင်သူများအား တက်ရောက်နိုင်စေရေးအတွက် စီစဉ်ဆောင်ရွက်ခဲ့ပါကြောင်း၊ လှည်းကူးပညာရေး ကောလိပ်တွင် တွဲဖက်တာဝန်ထမ်းဆောင်နေသော ကသာပညာရေးကောလိပ်မှ နည်းပြဆရာ၊ ဆရာမများအား အင်အားပြအဖြစ် ၀င်ရောက်စေခြင်းမျိုးမဟုတ်ဘဲ သင်ကြားပုံ၊ သင်ကြားနည်းများကို သက်ဆိုင်ရာဘာသာရပ်အလိုက် လေ့လာသင်ယူသူ များအဖြစ် တာဝန်ပေးထားခြင်းဖြစ်ပြီး လိုအပ်ပါက သက်ဆိုင်ရာ စာပေဘာသာရပ်၊ ဖွံ့ဖြိုးရေးဘာသာရပ်၊ သင်ပြနည်းဘာသာရပ်များအား လေ့လာသင်ယူစေပြီး သင်ကြား ရေးတာဝန်ကိုပါ ဆောင်ရွက်စေလျက်ရှိပါကြောင်း။

၂၀၁၆-၂၀၁၇ ပညာသင်နှစ်တွင် လှည်းကူးပညာရေးကောလိပ်မှ ဆရာ၊ ဆရာမ များအပါအ၀င် စုစုပေါင်းဝန်ထမ်း(၂၅)ဦးအား ကျိုင်းတုံတက္ကသိုလ်သို့ စေလွှတ်ခဲ့ရာ မီးဖွားခွင့်ယူထားသူများနှင့် ကျန်းမာရေးမကောင်းသူများ၏ နေရာတွင် ဘာသာရပ် အလိုက် သင်ကြားပြသနိုင်သူများကို အစားထိုးရွှေးချယ်စေလွှတ်ခဲ့ပါကြောင်း။

လှည်းကူပညာရေးကောလိပ်(ကျိုင်းတုံဆရာအတတ်သင်ဌာနခွဲ)အတွက် လက်ရှိ တာဝန်ထမ်းဆောင်နေသော ဆရာ၊ ဆရာမများအနက် အလှည့်ကျစနစ်ဖြင့် ဘာသာ ရပ် အလိုက် စေလွှတ်မှုများပြုလုပ်ခဲ့ရာ ယခုအခါတွင် စတုတ္ထအကြိမ် သွားရမည့် အလှည့်ဖြစ်ပါကြောင်း၊ အချို့မှာ အကြောင်းအမျိုးမျိုးကြောင့် မသွားရောက်နိုင်၍ လည်းကူးပညာရေးကောလိပ် ဒုတိယကျောင်းအုပ်ကြီးနှင့် ညှိနှိုင်း၍ တွဲဖက်တာဝန် ထမ်းဆောင်နေသူများအား သင်ကြားပုံ၊ သင်ကြားနည်းများ လေ့လာသင်ယူစေပြီး တာဝန်ပေးစေလွှတ်ရန် အစီအစဉ်များ ပြုလုပ်ထားပြီးဖြစ်ပါကြောင်း။

ကျိုင်းတုံဆရာအတတ်သင်ဌာနခွဲ၏ တာဝန်ခံကျောင်းအုပ်ကြီးက ဆရာ၊ ဆရာမ များနှင့် ၀န်ထမ်းများ၏ နေထိုင်စားသောက်ရေးအတွက် လိုအပ်ချက်များကို အဆင့်ဆင့် တင်ပြပြီး ဖြေရှင်းဆောင်ရွက်ပေးလျက်ရှိပါကြောင်း၊ အဆိုပါဌာနခွဲအား ပညာရေးကော လိပ်အဖြစ် ဖွဲ့စည်းပုံခွင့်ပြုချက်ရရှိလာသည့်အချိန်တွင် သက်ဆိုင်ရာဘဏ္ဍာနှစ်အလိုက် လိုအပ်သောဘာသာရပ်ဆိုင်ရာ သင်ထောက်ကူပစ္စည်းများကို ပြည့်စုံစွာ ဖြည့်ဆည်း ဆောင်ရွက်နိုင်ရေး လျာထားဆောင်ရွက်သွားမည်ဖြစ်ကြောင်း ရှင်းလင်းဖြေကြားသည်။

ထို့ပြင် မွန်ပြည်နယ်မဲဆန္ဒနယ်အမှတ်(၂)မှ ဒေါ်နွယ်နွယ်အောင်၊ ရှမ်းပြည်နယ် မဲဆန္ဒနယ်အမှတ်(၁၀)မှ ဦးမိုင်းအုဏ်းခိုင်၊ ရခိုင်ပြည်နယ်မဲဆန္ဒနယ်အမှတ်(၅)မှ ဦးမြင့်နိုင်၊ စစ်ကိုင်းတိုင်းဒေသကြီး မဲဆန္ဒနယ်အမှတ်(၉)မှ ဦးမောင်မောင်လတ်၊ ချင်း ပြည်နယ်မဲဆန္ဒနယ်အမှတ်(၁၁)မှ ဦးဝှေ့တင်းတို့၏ မေးခွန်းများနှင့်စပ်လျဉ်း၍လည်း ပြည်ထောင်စုတရားလွှတ်တော်ချုပ် တရားသူကြီးဦးစိုးညွန့်နှင့် ဒုတိယ၀န်ကြီး ဦးဝင်းမော်ထွန်း တို့ ပြန်လည်ဖြေကြားခဲ့ကြသည်။

ယင်းနောက် ဥပဒေကြမ်းကော်မတီဝင် ဒေါ်ကျိန်ငိုက်မန်က“မြန်မာ့ပိုင်နက်  ပင်လယ်နှင့် ပင်လယ်ဇုန်များ ဥပဒေကြမ်း”နှင့်စပ်လျဉ်း၍ လေ့လာတွေ့ရှိချက်နှင့် သဘောထားမှတ်ချက်များပါဝင်သော ကော်မတီ၏ အစီရင်ခံစာကို ဖတ်ကြားရှင်းလင်း သည်။

ထို့နောက် လွှတ်တော်ဥက္ကဋ္ဌက ပြည်သူ့လွှတ်တော်က ပြင်ဆင်ချက်ဖြင့် ပြန်လည်ပေးပို့လာသော “မြန်မာ့ပိုင်နက် ပင်လယ်နှင့် ပင်လယ်ဇုန်များ ဥပဒေကြမ်း” ကို လွှတ်တော်၏ သဘောထားရယူ၍ ပြင်ဆင်ချက်များအား တဒ်ပိုဒ်ချင်းစီအလိုက် အတည်ပြုပြီး ယင်းဥပဒေကြမ်းနှင့်စပ်လျဉ်း၍ လွှတ်တော်နှစ်ရပ် သဘောကွဲလွဲသည့် အချက်များကို ပြည်ထောင်စုလွှတ်တော်သို့ တင်ပြရန် ဆုံးဖြတ်ခဲ့သည်။

မော်စီ(သတင်းစဉ်)