ပြည်တွင်းစစ်မီး မကြာမီကာလမှာ ငြိမ်းစေရမယ်ဆိုတဲ့ မျှော်လင့်ချက်အကောင်အထည်ပေါ်လာဖို့ တိုင်းရင်းသား များအားလုံး အကြား အပြန်အလှန်နားလည်မှု၊ ယုံကြည်လေးစားမှုတွေ ပြုစုပျိုးထောင်
နေပြည်တော် ဒီဇင်ဘာ ၂၈
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ၂၀၁၆ ခုနှစ် ဒီဇင်ဘာ ၂၉ ရက်နေ့တွင် ကျရောက်သည့် ကရင်အမျိုးသားနှစ်သစ်ကူးနေ့အတွက် သဝဏ်လွှာတစ်စောင်ပေးပို့သည်။
အဆိုပါ သဝဏ်လွှာအပြည့်အစုံမှာ အောက်ပါအတိုင်းဖြစ်သည်
ကရင်အမျိုးသားနှစ်သစ်ကူးနေ့သဝဏ်လွှာ
၁။ ယနေ့ (၂၇၅၆) ခုနှစ်၊ သလေးထိုင်ခုတ်ဖို ပြာသိုလဆန်း (၁) ရက်နေ့မှာ ကျရောက်တဲ့ ကရင်နှစ် သစ်မင်္ဂလာနေ့ထူးနေ့မြတ် မှာ မြန်မာနိုင်ငံတစ်ဝန်းလုံးနဲ့ က္ဘာ့ဒေသအရပ်ရပ်မှာ ပျံ့နှံ့အခြေချ နေထိုင် လျက်ရှိကြတဲ့ ကရင်တိုင်းရင်းသားအပေါင်းတို့ ကောင်းမြတ်ခြင်း မင်္ဂလာအဖြာဖြာနဲ့ပြည့်စုံကြပါစေလို့ ဦးစွာ ဆုမွန်ကောင်းတောင်းလိုက်ပါတယ်။
၂။ တိုင်းရင်းသားပေါင်းများစွာနဲ့ ဆောက်တည်ထားတဲ့ ကျွန်မတို့ပြည်ထောင်စုရဲ့ ဂုဏ်ယူတန်ဖိုးအထားရဆုံး အရာတစ်ရပ် ကတော့ ချစ်ဖွယ်ကောင်းလှတဲ့ အမျိုးမျိုးအဖုံဖုံသော ရိုးရာယဉ်ကျေးမှု အစဉ်အလာ လေးတွေဖြစ်ပါတယ်။ အစဉ်အလာအလေ့ အကျင့်ကောင်းတွေကို လေ့လာ၊ သတိရခြင်းဟာ ကျွန်မတို့တွေရဲ့ ပြည်ထောင်စုစိတ်ဓာတ်ကို မြှင့်တင်ပေးပြီး ကျွန်မတို့နိုင်ငံရဲ့ အင်အားတွေ ကြီးထွားစေပါတယ်။
၃။ ရှေးယခင်ကစပြီး ကောက်သစ်ပေါ်ချိန်မှာ မိသားစုတွေအတူတကွ ကောက်သစ်စားပွဲများကျင်းပလာရာမှ ကရင်နှစ်သစ်ကူးပွဲတော် ဆင်းသက် လာတယ်လို့ ပြောလို့ရပါတယ်။ ဒါကြောင့် နှစ်သစ်ကူးချိန်ဟာ နှစ်ဟောင်းက အားစိုက်ကြိုးပမ်းမှုတွေရဲ့ အသီးအပွင့်တွေကို ရယူပွေ့ပိုက်နိုင်ခြင်းအတွက် ကျေနပ်ကြည်နူး ရတဲ့အချိန် အခါပါ။ ဇွဲ၊ လုံ့လ၊ ဝီရိယနဲ့ လုပ်ခဲ့ရသမျှရဲ့ အကျိုး ကျေးဇူးတွေကို တစ်နေ့တော့ ခံစား၊ စံစားရမှာပဲဆိုတဲ့ မျှော်လင့်ချက်ကို ရှင်သန် စေတဲ့ပွဲတော်ပါ။
၎။ နှစ်ပေါင်း (၆၀) ကျော် လွတ်လပ်ရေးရစဉ်ကစပြီးလောင်ခဲ့တဲ့ ပြည်တွင်း စစ်မီး မကြာမီကာလမှာ ငြိမ်းစေရမယ်ဆိုတဲ့ မျှော်လင့်ချက်ရှင်သန်ရုံသာမက အကောင်အထည်ပေါ်လာဖို့အတွက် ဇွဲ၊ လုံ့လ၊ ဝီရိယတို့နဲ့၊ ကျွန်မတို့တိုင်းရင်းသား များအားလုံးအကြား အပြန်အလှန်နားလည်မှု၊ ယုံကြည်လေးစားမှုတွေ ပြုစု ပျိုးထောင် ကြပါစို့။ ယခုနှစ် စိုက်လိုက်တဲ့ ငြိမ်းချမ်းရေးပျိုးပင်လေးတွေဟာ နောက် နှစ်မှာ ငြိမ်းချမ်း ရေးကောက် သစ်စားပွဲကြီးကို ပြည်ထောင်စုတစ်ဝန်း ဆင်နွှဲနိုင် ကြပါစေလို့ ကရင်အမျိုးသား နှစ်သစ် ကူးအထူး
မင်္ဂလာဆုတောင်း ပို့သလိုက် ပါတယ်။
No comments:
Post a Comment