ငြိမ်းချမ်းရေး ကော်မရှင်နှင့် နိုင်ငံရေး ဆိုင်ရာညှိနှိုင်း ဆွေးနွေးရေး ကိုယ်စားလှယ် အဖွဲ့ (DPN) နည်းပညာ အထောက်အကူပြု အဖွဲ့များ အစည်းအဝေး ကျင်းပ

ရန်ကုန် နိုဝင်ဘာ ၉

           

ငြိမ်းချမ်းရေးကော်မရှင် နှင့် နိုင်ငံရေး ဆိုင်ရာညှိနှိုင်း ဆွေးနွေးရေး ကိုယ်စားလှယ် အဖွဲ့ (DPN) နည်းပညာ အထောက်အကူပြု အဖွဲ့များ အစည်းအဝေးကို ယနေ့နံနက်ပိုင်း က ရန်ကုန်မြို့၊ ကမာရွက် မြို့နယ်ရှိ အမျိုးသား ပြန်လည်သင့်မြတ်ရေးနှင့် ငြိမ်းချမ်းရေး ဗဟို ဌာန(ရန်ကုန်)၌ ကျင်းပသည်။

           

အစည်းအဝေးတွင် ပစ်ခတ်တိုက်ခိုက်မှု ရပ်စဲရေး ဆိုင်ရာ ပူးတွဲစောင့်ကြည့်ရေး ကော်မတီ (JMC) ၏ လက်ရှိအခြေအနေနှင့် ဆောင်ရွက်ထားမှုများအား JMC နည်းပညာ အထောက်အကူပြု အဖွဲ့မှ ရှင်းလင်း တင်ပြခြင်း၊ နိုင်ငံရေးဆိုင်ရာ ညှိနှိုင်း ဆွေးနွေးရေး ကိုယ်စားလှယ် အဖွဲ့ (DPN)၏ နည်းပညာ အထောက်အကူပြု အဖွဲ့မှ မရှင်းလင်းသည်များကို မေးမြန်းခြင်းနှင့် ပြန်လည် ဆွေးနွေးခြင်းများကို ပြုလုပ်ကြ သည်။

“လက်ရှိ် JMC ရဲ့လုပ်ဆောင်နေတဲ့ လုပ်ငန်းပိုင်းအပေါ်မှာ သူတို့အနေနဲ့ မရှင်းလင်းတာတွေကို မေးမြန်းကြတယ်။ အဓိကအနေနဲ့ ကျွန်တော်တို့ ပြန်ရှင်းပြရတာကတော့ JMC လုပ်ငန်းတွေ အားလုံးဟာ အစိုးရ အနေနဲ့ တစ်ဖက်သတ်ရေးလို့ မရသလို အားလုံး စုပေါင်းပြီး သဘောတူညီမှုနဲ့ ရေးသားပြီးတော့ အကောင်အထည်ဖော်ရတာ ဖြစ်တယ်ဆိုတာကို ရှင်းပြရတာပါ။ ကျွန်တော်တို့ JMC ရဲ့ လုပ်ထုံးလုပ်နည်းတွေက များတော့ ဒါတွေကို နားလည်အောင် ရှင်းပြရတာပါ”ဟု ယနေ့ ဆွေးနွေးမှု နှင့် ပတ်သက်၍ JMC ၏ နည်းပညာ အထောက်အကူပြု ကော်မတီ အမှုဆောင် ဒါရိုက်တာဒေါက်တာ မင်းဇော်ဦး က ပြောကြားသည်။

ဆက်လက်၍ ၄င်းက “အဓိကအနေနဲ့ အားလုံးကြားမှာ စိုးရိမ်နေတာ က NCA လက်မှတ်ထိုးပြီးရင်ရော တိုက်ပွဲတွေဖြစ်နေမှာလား၊ ဒါကိုမဖြစ်အောင် ဘယ်လိုလုပ်မလဲ ဆိုတာကို စိုးရိမ်နေကြတယ်။ ဒီစိုးရိမ်စိတ်ကတော့ တပ်မတော်နဲ့ အစိုးရဘက်မှာလည်း ဒီအတိုင်းပါပဲ။ JMC အနေနဲ့လည်း လက်မှတ်ထိုးပြီးတဲ့ အဖွဲ့တွေနဲ့ တိုက်ပွဲဖြစ်ရင် မကောင်းပါဘူး။ JMC ခိုင်မာဖို့အတွက် အားလုံးက ရည်မှန်းချက်တူတော့  ဆွေးနွေးရ တာ အများကြီး အပြုသဘောဆောင်ပါတယ်” ဟု ပြောသည်။

အလားတူ နိုဝင်ဘာ ၁၀ ရက် နံနက်ပိုင်းတွင် ငြိမ်းချမ်းရေး ကော်မရှင် နှင့် နိုင်ငံရေးဆိုင်ရာ ညှိနှိုင်း ဆွေးနွေးရေး ကိုယ်စားလှယ် အဖွဲ့ (DPN) တတိယ အကြိမ် အစည်းအဝေးကို ကျင်းပသွားမည်ဖြစ်ပြီး အဆိုပါ အစည်းအဝေးတွင် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) အဖွဲ့ဝင်များ၏ အဆိုပြုချက်မှ ကျန်ရှိသည့် အချက်များအား ဆွေးနွေးသွားမည်ဖြစ်ကြောင်း သိရသည်။

ညီညွတ်သော တိုင်းရင်းသား လူမျိုးများ ဖက်ဒရယ်ကောင်စီ (UNFC) အနေဖြင့် NCA လက်မှတ် ရေးထိုးနိုင်ရေး အတွက် အစိုးရထံသို့ အဆိုပြုချက် ရှစ်ခု တင်သွင်းထားပြီး ယင်းတို့အနက် လေးချက်ကို နှစ်ဖက်သဘောတူညီမှု ရရှိထားပြီး ဖြစ်ကြောင်း သိရသည်။

သတင်း-ဇော်ကြီး (ပဏီတ)

ဓာတ်ပုံ-ဖေဇော်