ဒုတိယအကြိမ် ပြည်ထောင်စုလွှတ်တော် တတိယပုံမှန်အစည်းအဝေး ပထမနေ့ ကျင်းပ

နေပြည်တော် နိုဝင်ဘာ ၁၆

ဒုတိယအကြိမ် ပြည်ထောင်စုလွှတ်တော် တတိယပုံမှန်အစည်းအဝေး ပထမနေ့ကို ယနေ့ မွန်းလွဲ ၁နာရီခွဲတွင် ကျင်းပသည်။

အစည်းအဝေးတွင် ပြည်ထောင်စုလွှတ်တော်နာယက က ယခုအစည်းအဝေး၌ အဓိက ဦးစားပေးဆောင်ရွက်ရ

မည့် ပြည်ထောင်စု၏ နောက်ထပ်ဘဏ္ဍာငွေခွဲဝေ သုံးစွဲ ရေး ဥပဒေကြမ်းတင်သွင်းခြင်း၊ ရငွေသုံးငွေများကို ဆွေးနွေးခြင်း၊ လွှတ်တော်၏ အတည်ပြုချက်ရယူခြင်းတို့ကို ဆောင်ရွက်သွားမည်ဖြစ်ကြောင်း၊ ထို့ပြင် လွှတ်တော် အသီးသီးက ကျန်ရှိနေသည့် ဆောင်ရွက်ဆဲ ဥပဒေကြမ်းများထဲမှ ပြည်သူ များအတွက် အရေးကြီးသည့် ဥပဒေကြမ်းများကိုလည်း ဦးစားပေး အတည်ပြုပြဌာန်း နိုင်ရေးကို ဆက်လက်ဆောင်ရွက်ကြရန် လိုအပ်ကြောင်း၊ ပြည်သူများကိုယ်စား ရွေးချယ်ခံ ထားရသည့် လွှတ်တော်ကိုယ်စားလှယ်များအနေဖြင့် ပိုမိုများပြားသည့် လုပ်ငန်းတာဝန် များကို အောင်မြင်စွာ ဆောင်ရွက်နိုင်ရန် အချိန်ကိုလေးစားတန်ဖိုးထားပြီး စနစ်တကျ ဖြင့် ဆွေးနွေးညှိနှိုင်းတိုင်ပင်ခြင်း၊ ဆုံးဖြတ်အတည်ပြုခြင်းများကို လွှတ်တော်ဆိုင်ရာ လုပ်ထုံးလုပ်နည်းများနှင့်အညီ ပူးပေါင်းပါဝင် ပေးကြရန်လိုအပ်ကြောင်း။

ဒီမိုကရေစီ ဖော်ဆောင်ရာတွင် လက်ရှိအခြေအနေထက် ပိုကောင်းသည့် တည်ငြိမ်မှုနှင့် လုံခြုံမှုရရှိရန် မိမိတို့အချင်းချင်း ပူးပေါင်းဆောင်ရွက်ခြင်းဖြင့် လုပ်ဆောင်ပေးနိုင်မည် ဖြစ်ကြောင်း၊ နိုင်ငံသား ပြည်သူများကို ကိုယ်စားပြုသည့် လွှတ်တော်ကိုယ်စားလှယ်များ အနေဖြင့် ပြည်သူ့ဘဏ္ဍာငွေဖြစ်သည့်ရငွေများ တိကျမှန်ကန်စွာရရှိရေးနှင့် ပြည်သူ့ ဘဏ္ဍာငွေများ အကျိုးရှိစွာ ခွဲဝေသုံးစွဲရေးတို့သည် ပြည်သူ့ဆန္ဒနှင့်ညီညွတ် ရန်လိုအပ်သည့် အပြင်ဥပဒေနှင့်အညီ စီမံခန့်ခွဲပြီး အကောင်းဆုံးဖြစ်နိုင်ခြေကို ဘက်စုံက ချင့်ချိန်တွက်ချက်ပြီး ရိုးသားဖြောင့်မတ်စွာ တာဝန်ခံဆောင်ရွက်နိုင်ကြပါ စေကြောင်း ပြောကြားသည်။

ထို့နောက် လွှတ်တော်နှစ်ရပ် သဘောထားကွဲလွဲသည့် ရပ်ကွက် (သို့မဟုတ်) ကျေးရွာ အုပ်ချုပ်ရေးဥပဒေကို တတိယအကြိမ်ပြင်ဆင်သည့် ဥပဒေကြမ်နှင့် စပ်လျဉ်း၍ ဥပဒေကြမ်းပူးပေါင်းကော်မတီ၏ လေ့လာတွေ့ရှိချက် အစီရင်ခံစာကို ပူးပေါင်း ကော်မတီဝင် ဦးအောင်ကြည်ညွှန့်က ဖတ်ကြားရှင်းလင်းတင်ပြသည်။

ယင်းဥပဒေကြမ်းနှင့် စပ်လျဉ်း၍ ဆွေးနွေးလိုသည့် လွှတ်တော်ကိုယ်စားလှယ်ရှိ ပါက အမည်စာရင်းပေးသွင်းနိုင်ကြောင်း ကြေညာသည်။

ထို့ပြင် ၂၀၁၆-၂၀၁၇ ဘဏ္ဍာရေးနှစ်အတွက် ဖြည့်စွက်ခွင့်ပြုငွေစာရင်း၊ ပြုပြင်ပြီး ရသုံးခန့်မှန်းခြေ ငွေစာရင်းနှင့် ပြည်ထောင်စု၏ နောက်ထပ်ဘဏ္ဍာငွေ ခွဲဝေသုံးစွဲရေး ဥပဒေကြမ်းနှင် စပ်လျဉ်း၍ ဒုတိယ၀န်ကြီး ဦးမောင်မောင်ဝင်းက ပြည်ထောင်စုသမ္မတ မြန်မာနိုင်ငံတော်အစိုးရ ဘဏ္ဍာရေးကော်မရှင်၏ ထောက်ခံချက်ဖြင့် တင်ပြသွင်းခဲ့သည့် အဆိုပါဥပဒေကြမ်းများပြည်ထောင်စုလွှတ်တော်က အတည်ပြုပေးနိုင်ပါရန် တင်သွင်း သည်။

အဆိုပါ ဥပဒေကြမ်းနှင့် စပ်လျဉ်း၍ ပြည်ထောင်စုအဆင့် အဖွဲ့အစည်းဝင်များက ပြန်လည်ရှင်းလင်း တင်ပြကြသည်။

ပြည်ထောင်စုဝန်ကြီး ဒေါက်တာအောင်သူက စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ ၂၀၁၆-၂၀၁၇ ဘဏ္ဍာရေးနှစ် ဖြည့်စွက်ခွင့်ပြုငွေ တောင်းခံမှု အနေဖြင့် ငွေကျပ် (၁၀၈၀၂၈ ဒသမ ၄၅၆)သန်းဖြစ်ပြီး ပြည်ပအကူအညီ၊ ပြည်ပ ချေးငွေ၊ နိုင်ငံတော်ထောက်ပံ့ငွေ (IRM) ငွေကျပ် (၆၅၃၅၀ ဒသမ ၄၂၉) သန်းဖြစ်ပါ သဖြင့် နိုင်ငံတော်မှ ကျခံရမည့် ဖြည့်စွက်ခွင့်ပြုရမည့်ငွေမှာ ကျပ် (၄၂၆၇၈ ဒသမ ၀၂၇) သန်း ဖြစ်ပါကြောင်း၊ ကုန်သွယ်လုပ်ငန်းခွန် ကျပ် (၁၈၁၃၆ ဒသမ ၆၄၄)သန်း၊ မြန်မာ့လယ် ယာဖွံ့ဖြိုးရေးဘဏ်မှ အတိုး+ဘဏ်စရိတ်+ငွေလွှဲခ+နိုင်ငံတော်ထည့် ၀င်ငွေကျပ် (၂၃၅၄၆ ဒသမ ၀၁၂)သန်းဖြစ်သဖြင့် ဦးစီးဌာနများမှ မဖြစ်မနေဆောင် ရွက်ရမည့် လုပ်ငန်းများအတွက် တောင်းခံသည့်ငွေကျပ် (၉၉၅ ဒသမ ၃၇၁)သန်း ဖြစ်၍ ၂၀၁၆-၂၀၁၇ ဘဏ္ဍာရေးနှစ် ဖြည့်စွက်ခွင့်ပြုငွေကျပ် (၁၀၈၀၂၈ ဒသမ ၄၅၆)သန်းအား ခွင့်ပြု ပေးနိုင်ပါရန် ရှင်းလင်းတင်ပြသည်။

ပြည်ထောင်စုဝန်ကြီး နိုင်သက်လွင်က ပြန်ကြားရေးဝန်ကြီးဌာန၏ ၂၀၁၆-၂၀၁၇ ခုနှစ် ဘဏ္ဍာရေးနှစ် ဖြည့်စွက်ရန်ပုံငွေ ကျပ်သန်းပေါင်း(၁၃၄၁ ဒသမ ၁၀၁)သည် ပြည်ထောင်စုဘဏ္ဍာရန်ပုံငွေမှ တောင်းခံခြင်းမဟုတ်ဘဲ သတင်းနှင့်စာနယ်ဇင်းလုပ်ငန်း ၏ လုပ်ငန်းသုံးရင်းနှီးငွေက ကျခံသုံးစွဲမည့် အသုံးစရိတ်များဖြစ်ပါကြောင်း၊ အဆိုပါငွေမှာ သတင်းစာစောင်ရေ ၁၃၄၀၀ တိုးမြှင့်ထုတ်ဝေမည်ဖြစ်သည့်အတွက် ကုန်ကြမ်း ၀ယ်ယူရန်နှင့် ပေးသွင်းရန်ဖြစ်ပါကြောင်း၊ ငွေလုံးငွေရင်းအသုံးစရိတ်က ကျပ်သန်း(၈ ဒသမ ၀၃၆)မှာ ၀န်ကြီးရုံးမြေငှားစာချုပ် တန်ဖိုးကျသင့်ငွေတောင်းခံရခြင်း ဖြစ်ပါ ကြောင်းဖြင့် ရှင်းလင်းတင်ပြသည်။

ဒုတိယ၀န်ကြီးဦးကျော်တင်က ၂၀၁၆-၂၀၁၇ ဘဏ္ဍာ ရေးနှစ်အတွက် ဖြည့်စွက်ခွင့်ပြု ငွေစာရင်းတွင် သာမန်အသုံးစရိတ်၌ ၀န်ကြီးရုံးနှင့် ဦးစီး ဌာနများ အတွက် ထပ်မံတောင်းခံခြင်းမရှိပါကြောင်းနှင့် မူလခွဲဝေချထားငွေအတွင်း လုံလောက် စွာ သုံးစွဲသွားမည် ဖြစ်ပါကြောင်း၊ မြန်မာသံရုံး (၄၄) ရုံးအတွက် ဖြည့်စွက် ခွင့်ပြုငွေ အဖြစ် ကျပ်သန်းပေါင်း ၂၀၂၀ဒဿမ၄၈၅ ကို ထပ်မံတင်ပြတောင်းခံထားပါကြောင်း၊ ယင်းသို့ ဖြည့်စွက်တောင်းခံခြင်းမှာ ၂၀၁၅-၂၀၁၆ ခုနှစ်တွင် အမှန်အသုံး စရိတ်ထက် လျော့နည်းနေသည့်အတွက် ဖြည်စွက်တောင်းခံရခြင်းဖြစ်ပြီး သံအမတ်၏ နေအိမ်ငှား ရမ်းခ၊ မြန်မာနိုင်ငံသား အလုပ်သမားများအရေး ပိုမိုထိရောက်စွာ အကူအညီ ပေးနိုင်ရေး၊ ၀န်ထမ်းအင်အား ထပ်မံဖြည့်တင်းနိုင်ရေး၊ နေအိမ်ငှားရမ်းခ၊ ပြည်တွင်း ခရီးစရိတ်၊ မြန်မာသံအမတ်ကြီးများအား ခေါ်ယူတွေ့ဆုံရေးစရိတ်၊ ကျန်းမာရေး အခြေအနေကြောင့် ၀န်ထမ်းအချို့ မလွဲမရှောင်သာဘဲ အခြားသံရုံးများသို့ ပြောင်းရွှေ့ တာဝန်ထမ်းဆောင်ခြင်းစရိတ်၊ မိသားစုများ၏ နေ့တွက်၊ တည်းခိုစရိတ်၊ လေယာဉ် လက်မှတ်ခနှင့် လေလံပစ္စည်းသယ်ယူပို့ဆောင်ခများနှင့် ကျန်းမာရေးအာမခံထားရှိ နိုင်ရေးအတွက် တောင်းခံရခြင်းဖြစ်ပါကြောင်း ရှင်းလင်းတင်ပြသည်။

ဒုတိယ၀န်ကြီး ဗိုလ်ချုပ်မြင့်နွယ်က အဆင့်တိုးမြင့်လာသော အရာရှိများနှင့် အရပ် သားများ၏ ကွာခြားလစာနှင့်စရိတ်၊ လေထီးလစာ၊ ရေငုပ်လစာ၊ လေယာဉ်ပျံသန်းမှု လစာ၊ ပါရဂူလစာ/စရိတ်၊ ၀တ်စုံစရိတ်၊ တက္ကသိုလ်လေ့ကျင့်ရေးတပ်များတွင် စခန်းချ လေ့ကျင့်ရေးအတွက် တပ်ဖွဲ့ဝင်ကျောင်းဆရာ ဆရာမ၊ ကျောင်းသားကျောင်းသူ စရိတ် ချီးမြှင့်ငွေများ၊ မီရထားဝရမ်းဖြင့်  ပေးချေရသည့် ရထားလက်မှတ်ခ နှုန်းထားအား လက်မှတ်ခ (၇၅)ရာခိုင်နှုန်း ပြောင်းလဲကောက်ခံခြင်း၊ ဝေးလံ၍ ၀ရမ်းမသုံးစွဲနိုင်သော ဒေသများရှိ တပ်ရင်းတပ်ဖွဲ့များမှ အရာရှိစစ်သည်များ တာဝန်ဖြင့်သွားလာရာတွင် ပုဂ္ဂလိကယာဉ်များစီးနင်းရာ၌ ပေးချေရခြင်းများအတွက် ထပ်မံလိုအပ်ငွေ၊ စစ်လက်နက် ပစ္စည်းဝယ်ယူရေးအတွက် သက်ဆိုင်ရာထပ်မံလိုအပ်ငွေ၊ တပ်မတော်(လေ)၏ အရေး ကြီးပစ္စည်းများအတွက် Down Payment ပေးချေရန်အတွက် ထပ်မံလိုအပ်ငွေတို့ အတွက် ငွေကျပ် ဘီလီယံ (၁၀၀)အား ခွင့်ပြုနိုင်ပါရန် ရှင်းလင်းတင်ပြသည်။

ဒုတိယ၀န်ကြီး ဦးခင်မောင်တင်က ၂၀၁၆-၂၀၁၇ ဘဏ္ဍာရေးနှစ် ဖြည့်စွက်ခွင့်ပြု ငွေစာရင်း၊ ပြုပြင်ပြီးရသုံးငွေ ခန့်မှန်းခြေငွေစာရင်းနှင့် ပြည်ထောင်စု၏ နောက်ထပ် ဘဏ္ဍာငွေ ခွဲဝေသုံးစွဲရေး ဥပဒေကြမ်းတွင် ပါဝင်သည့် နိုင်ငံတော်အတိုင်ပင်ခံရုံးဝန်ကြီး ဌာန၏ ဖြည့်စွက်ခွင့်ပြုငွေကျပ် (၁၄၈ ဒသမ ၁၆၁)သန်းမှာ အမြဲတမ်းအတွင်းဝန် (၁)ဦး ၏ ဘဏ္ဍာရေးနှစ်တစ်နှစ်အတွက် ချီးမြှင့်ငွေ၊ ငြိမ်းချမ်းရေးကော်မရှင်ဥက္ကဋ္ဌ၊ ဒုတိယ  ဥက္ကဋ္ဌ၊ အတွင်းရေးမှူးနှင့်အဖွဲ့ဝင်များ၊ အကြံပေးအဖွဲ့ခေါင်းဆောင်နှင့် အဖွဲ့ဝင်များ၊ အထောက်အကူပြု အဖွဲ့ခေါင်းဆောင်နှင့် အဖွဲ့ဝင်များအား လစာနှင့်စရိတ်များအတွက် တောင်းခံခြင်းဖြစ်ကြောင်း ရှင်းလင်းတင်ပြသည်။

အလားတူ နယ်စပ်ရေးရာဝန်ကြီးဌာန၊ သာသနာရေးနှင့်ယဉ်ကျေးမှုဝန်ကြီးဌာန၊ သယံဇတနှင့်သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ ကျန်းမာရေးနှင့်အားကစားဝန်ကြီးဌာန၊ အလုပ်သမား၊ လူဝင်မှုကြီးကြပ်ရေးနှင့်ပြည်သူ အင်အားဝန်ကြီးဌာန၊ စက်မှုဝန်ကြီးဌာန၊ ပြည်ထဲရေးဝန်ကြီးဌာန၊ ပို့ဆောင်ဆက်သွယ်ရေးဝန်ကြီးဌာန၊ လျှပ်စစ်နှင့် စွမ်းအင်ဝန်ကြီးဌာနတို့မှ ပြည်ထောင်စုအဆင့်အဖွဲ့အစည်းဝင်များကလည်း ၂၀၁၆-၂၀၁၇ ဘဏ္ဍာရေးနှစ်အတွက် ဖြည့်စွက်ခွင့်ပြုငွေစာရင်း၊ ပြုပြင်ပြီး ရသုံး ခန့်မှန်းခြေ ငွေစာရင်းနှင့် ပြည်ထောင်စု၏ နောက်ထပ်ဘဏ္ဍာငွေ ခွဲဝေသုံးစွဲရေး ဥပဒေကြမ်းနှင့်စပ်လျဉ်း၍ ၀န်ကြီးဌာနအလိုက် ရှင်းလင်းတင်ပြကြသည်။

(သတင်းစဉ်)