နေပြည်တော်
နိုဝင်ဘာ ၉
ချင်းပြည်နယ်
ဟားခါးမြို့၌ ရောက်ရှိနေသော ဒုတိယသမ္မတ ဦးမြင့်ဆွေသည် ယနေ့နံနက်ပိုင်းတွင် ချင်းပြည်နယ်
ဟားခါးမြို့ စုပေါင်းရုံး ဖွင့်ပွဲနှင့် ဟားခါးကောလိပ် ဖွင့်ပွဲ အခမ်းအနားများသို့
တက်ရောက်သည်။
ချင်းပြည်နယ်
ဟားခါးမြို့စုပေါင်းရုံးဖွင့်ပွဲ အခမ်းအနားကို နံနက်(၇)နာရီတွင် အဆိုပါရုံးရှေ့၌ ကျင်းပရာ
ပြည်နယ်ဝန်ကြီးချုပ် ဆလိုင်းလျန်လွယ်၊ ပြည်နယ် လွှတ်တော်ဥက္ကဋ္ဌ ဦးဇိုဘွဲ၊ ဒုတိယ၀န်ကြီး
ဗိုလ်ချုပ် အောင်စိုး၊ ပြည်နယ်ဝန်ကြီး ဦးရွှေထီးယိုးနှင့် ပြည်နယ်အုပ်ချုပ်ရေးမှူး
ဦးပြုံးချိုတို့က စုပေါင်းရုံးကို ဖဲကြိုးဖြတ် ဖွင့်လှစ်ပေးကြသည်။
ထို့နောက်
ဒုတိယသမ္မတက စုပေါင်းရုံး ဆိုင်းဘုတ်ကို စက်ခလုတ်နှိပ် ဖွင့်လှစ်ပေးပြီး ရုံးအတွင်း
လှည့်လည် ကြည့်ရှုကြသည်။
ဆက်လက်၍
ဒုတိယ သမ္မတနှင့် အဖွဲ့သည် ဟားခါးကောလိပ်ဖွင့်ပွဲ အခမ်းအနားသို့ တက်ရောက်ကြသည်။
အခမ်းအနားတွင်
ပြည်ထောင်စုဝန်ကြီး ဒေါက်တာ မျိုးသိမ်းကြီး၊
ပြည်နယ်ဝန်ကြီးချုပ် ဆလိုင်း လျန်လွယ်နှင့် ဟားခါးကောလိပ် ကျောင်းအုပ်ကြီး ဒေါက်တာဒေါ်အေးအေး
မွန်တို့က ကောလိပ် မုဒ်ဦးကို ဖဲကြိုးဖြတ် ဖွင့်လှစ်ပေးကြသည်။
ဒုတိယသမ္မတက
ဟားခါးကောလိပ်ဆိုင်းဘုတ်ကို စက်ခလုတ်နှိပ် ဖွင့်လှစ်ပေးပြီး အမှာစကား ပြောကြားရာတွင် ပညာရေးကဏ္ဍသည် မိမိတို့ တစ်ဦးချင်းအတွက်သာ မဟုတ်ဘဲ
နိုင်ငံ၏ အနာဂတ်အတွက်ပါ အရေးကြီးသည်ဟု ခံယူထားရန်လိုအပ် ကြောင်း၊ ကျောင်းသားတစ်ဦးချင်းစီကပါ
နိုင်ငံတော်၏ ပြုပြင်ပြောင်းလဲရေး လုပ်ငန်းစဉ်များတွင် ပါဝင်ကြရန် တိုက်တွန်းလိုကြောင်း၊
ယနေ့အချိန်တွင် နိုင်ငံရေး၌ လူတိုင်း ပါဝင်ဆောင်ရွက်ခွင့် ရရှိနေပြီဖြစ်သည့်အတွက် ပြုပြင်
ပြောင်းလဲရေး လုပ်ငန်းများ ရပ်တန့် မသွားအောင် အသိတရားဖြင့် ဆရာ၊ ဆရာမ၊ ကျောင်းသား၊
ကျောင်းသူများ၊ လူအဖွဲ့ အစည်းများ အားလုံး ပူးပေါင်းဆောင်ရွက်သွားကြရမည်ဖြစ်ကြောင်း။
တိုင်းပြည်တည်ဆောက်ရေးတွင်
ပညာရည်မြင့်မားရေး လုပ်ငန်းသည် အဓိက ကျသည့် အခန်း ကဏ္ဍတွင် ပါဝင်နေသဖြင့် ပညာရေးကဏ္ဍ ဖွံ့ဖြိုးတိုးတက်ရေးအတွက်
အကြံပြု ဆွေးနွေးပွဲများ၊ ပညာရေးကဏ္ဍ မြှင့်တင်ရေး ဆွေးနွေးပွဲများကို အကောင် အထည်ဖော်
ဆောင်ရွက်လျက်ရှိကြောင်း၊ ယခုအခါ အမျိုးသားပညာရေး လှုပ်ရှားမှု တစ်ရပ်အနေဖြင့် အမျိုးသားပညာရေး
မူဝါဒကော်မရှင်ကို ပြည်ထောင်စုလွှတ်တော်၏ အတည်ပြုချက်ဖြင့် ဖွဲ့စည်းပြီးဖြစ်ကြောင်း။
ယခင်ကဆိုလျှင်
ချင်းပြည်နယ်မှ ကျောင်းသား၊ ကျောင်းသူများအနေဖြင့် တက္ကသိုလ်ပညာရပ် ဆက်လက် ဆည်းပူးလိုပါက
ကလေး၊ ပခုက္ကူ၊ စစ်ကိုင်းတို့သို့ သွားရောက် ပညာသင်ယူကြရသဖြင့် အချိန်နှင့် ငွေကြေးကုန်ကျမှု
များပြားပါကြောင်း၊ ဟားခါးကောလိပ် ဖွင့်လှစ်နိုင်ခဲ့သည့်အတွက် အချိန်ကုန် ငွေကုန် သက်သာစွာဖြင့် ပညာသင်ယူနိုင်တော့မည်
ဖြစ်ပါကြောင်း။
ဟားခါးကောလိပ်
ဖွင့်လှစ်နိုင်ခြင်းဖြင့် ချင်းပြည်နယ်၏ လူမှုစီးပွားဘ၀ တိုးတက်လာစေရေးအတွက် အရေးပါသည့်
အထောက့်အပံ့ တစ်ရပ်လည်းဖြစ်ကြောင်း၊ သို့ဖြစ်၍ အားလုံးက ဒေသဖွံ့ဖြိုး တိုးတက်ရေးမှသည်
ခေတ်မီဖွံ့ဖြိုး တိုးတက်သော နိုင်ငံတော် တည်ဆောက်နိုင်ရေးအတွက် ပညာဥာဏ်ဖြင့် ညီညီညွတ်ညွတ်
ပါဝင်ဆောင်ရွက်သွား ကြစေလိုကြောင်း ပြောကြားသည်။
ပြည်ထောင်စုဝန်ကြီး
ဒေါက်တာမျိုးသိမ်းကြီးက နိုင်ငံတော်အနေဖြင့် ဟားခါ ကောလိပ်ကို မျက်မှောက် ကာလဖြစ်သော
ပညာခေတ်၏ စိန်ခေါ်မှုကိုရင်ဆိုင်မည့် အစဉ်လေ့လာသင်ယူသော လူ့ဘောင် အဖွဲ့အစည်းကို ဖန်တီးပေးနိုင်သည့်
ပညာရေးစနစ်တစ်ခု ပေါ်ထွန်းလာစေရန်ဆိုသည် ပညာရေး မျော်မှန်းချက်နှင့်အညီ ဖွင့်လှစ်ခဲ့ခြင်းဖြစ်ကြောင်း၊
ယခုကောလိပ်တွင် တာဝန်ထမ်းဆောင်ကြသည့် သင်ကြား၊ စီမံအရာထမ်း အမှုထမ်းများနှင့် ပညာသင်ယူကြမည့် ကျောင်းသားကျောင်းသူများ အားလုံးသည်
အရည်အချင်း မြင့်မားသည့် လူစွမ်းအား အရင်းအမြစ်ဖွံ့ဖြိုးမှုများ တည်တံ့ ခိုင်မြဲ တိုးတက်နေစေရေး၊
နည်းပညာများကို အချိန်နှင့်တပြေးညီ အသုံးချနိုင်ပြီး အမြဲရှင် သန်နေသော အသိဥာဏ် အမြော်အမြင်တို့ဖြင့်
ပြည့်စုံနေသည့် ပညာရေးပတ်ဝန်း ကျင်ကိုဖန်တီးရေး၊ မြန်မာ့ လူ့အဖွဲ့အစည်းကို ပညာလွှမ်းမိုးသော
လူ့အဖွဲ့အစည်းအဖြစ် ဖြစ်ထွန်းလာရေးအတွက် ဆောင်ရွက် သွားရမည်ဖြစ်ကြောင်း ပြောကြားသည်။
ပြည်နယ်ဝန်ကြီးချုပ်က
ဟားခါးကောလိပ် ဖွင့်လှစ်နိုင်ခြင်းအားဖြင့် ချင်းပြည်နယ်၏ ပညာရေးကဏ္ဍ တစ်ဆင့် တက်လှမ်းနိုင်ခဲ့မှုအတွက်
မိမိတို့အနေဖြင့် အလွန်ပင် ၀မ်းမြောက်ပါကြောင်း၊ ချင်းပြည်နယ်သည် ၁၉၇၄ခုနှစ် ဇန်န၀ါရီလ
၎ ရက်တွင် သီးခြားပြည်နယ်တစ်ခုဖြစ်ခဲ့ပြီး ဟားခါးမြို့ကို မြို့တော်အဖြစ်သတ်မှတ်ခဲ့ပါကြောင်း၊
ဟားခါးကောလိပ်သည် ဟားခါး၊ ဖလမ်း၊ ထန်တလန် မြို့များမှ တက္ကသိုလ်ဝင်တန်း အောင်မြင်ကြသည့်
ကျောင်းသား/သူများသည် ၀ိဇ္ဇာ၊ သိပ္ပံ တက္ကသိုလ် ဘာသာရပ်များကို လွယ်ကူအဆင်ပြေစွာ ဆက်လက်
ဆည်းပူးနိုင်တော့မည်ဖြစ်ပါကြောင်း၊ ချင်း ပြည်နယ်၌ ကောလိပ်တစ်ခု ဖွင့်လှစ်နိုင်ခြင်းအတွက်
ပညာရေးအရ သာမက ပြည်နယ်၏ ဖွံ့ဖြိုးမှု လက္ခဏာ တစ်ရပ်အဖြစ် ရှု့မြင်ပြီး ဂုဏ်ယူ ၀မ်းမြောက်ကြမည်ဟု
ယုံကြည်ပါကြောင်းဖြင့် ပြောကြားသည်။
ထို့နောက်
မြို့မိမြို့ဖတစ်ဦးနှင့် ကောလိပ်ကျောင်းအုပ်ကြီးက
ဟားခါးကောလိပ် ဖွင့်လှစ်ခြင်းအတွက် ကျေးဇူးတင်စကား ပြောကြားကြသည်။
ယင်းနောက်
ဒုတိယသမ္မတနှင့် အဖွဲ့သည် ကောလိပ်အတွင်း လှည့်လည် ကြည့်ရူကြသည်။
ဆက်လက်၍
ဒုတိယသမ္မတနှင့် အဖွဲ့သည် ၂၀၁၅ ခုနှစ် ဇူလိုင်လ အတွင်းက မိုးသည်းထန်းစွာ ရွာသွန်းခဲ့မှုကြောင့်
မြေပြိုမှုဖြစ်ပွားခဲ့သည့် ဟားခါးမြို့ ရုန်းတောင် မြေပြိုသည့် နေရာအားသွားရောက် ကြည့်ရှုကြောင်း သတင်းရရှိသည်။
(သတင်းစဉ်)
No comments:
Post a Comment