Sunday, October 2, 2016

(၃၇) ကြိမ်မြောက် အာဆီယံပါလီမန်များညီလာခံ အောင်မြင်စွာကျင်းပပြီးစီး

နေပြည်တော် အောက်တိုဘာ၂
(၃၇) ကြိမ်မြောက် အာဆီယံပါလီမန်များညီလာခံ၏ ပိတ်ပွဲအခမ်းအနားကို ယနေ့ နံနက် (၁၁) နာရီတွင် နေပြည်တော်ရှိ ဟိုတယ်အေစီအီး၌ ကျင်းပရာ (၃၇) ကြိမ်မြောက် အာဆီယံပါလီမန်များ ညီလာခံဥက္ကဋ္ဌ၊ ပြည်ထောင်စုလွှတ်တော် နာယက မန်းဝင်းခိုင်သန်း တက်ရောက်၍ မိန့်ခွန်းပြောကြားသည်။

ပိတ်ပွဲအခမ်းအနားတွင် (၃၇) ကြိမ်မြောက် အာဆီယံပါလီမန်များ ညီလာခံဥက္ကဋ္ဌ မန်းဝင်းခိုင်သန်းက အာဆီယံ အသိုက်အ၀န်းအတွက် အထူးအရေးပါသော ကိစ္စရပ်များနှင့် မိမိတို့၏ အကျိုးစီးပွားများနှင့် ပတ်သက်ပြီးဆုံးဖြတ်ချက် (၃၀) ခန့် ချမှတ်နိုင်ခဲ့ပါကြောင်း၊ အာဆီယံဒေသတွင် ဆိုက်ဘာလုံခြုံရေး၊ ဇီကာဗိုင်းရပ်စ် ရောဂါပိုးအန္တရာယ် ကြိုတင် ကာကွယ်ကုသရေး၊ စီးပွားရေးဖွံ့ဖြိုး တိုးတက်မှုအတွက် အလုပ်အကိုင် အခွင့်အလမ်းများနှင့် ကောင်းမွန်သည့် လုပ်ငန်းခွင် အခြေအနေများဖန်တီးပေးခြင်း၊ အသေးစားနှင့် အလတ်စား စီးပွားရေးလုပ်ငန်းများ ခိုင်မာလာစေရေးနှင့် လူမှုရေးကာကွယ် စောင့်ရှောက်မှု မြင့်မားလာ စေရေးအတွက် အာဆီယံလူမှုကာကွယ်ရေး ကြေညာစာတမ်းပါ လုပ်ငန်းအစီအစဉ်များ အကောင်အထည်ဖော် ဆောင်ရွက်ခြင်းစသည့် အကြောင်းအရာများကိုလည်း ဆွေးနွေးခဲ့ပါကြောင်း။
အမျိုးသမီးပါလီမန် အမတ်များအဖွဲ့၏ လုပ်ထုံးလုပ်နည်းစည်းမျဉ်းများ ပြင်ဆင်ချက်အပေါ် ဆုံးဖြတ်ချက် မူကြမ်းကိုစဉ်းစား ဆွေးနွေးပြီး တညီတညွတ်တည်းချမှတ်နိုင်ခဲ့ ပါကြောင်း၊ ထိုလုပ်ထုံးလုပ်နည်းများ စည်းမျဉ်းများသည် လွန်ခဲ့သည့် ၁၈ နှစ်ကချမှတ်ခဲ့ခြင်းဖြစ်ပြီး အမျိုးသမီးကိုယ်စားလှယ်များ၊ ၎င်းတို့၏ လုပ်ငန်းဆောင်တာများကို စွမ်းရည်မြှင့် ထိရောက်စွာ ဆောင်ရွက်နိုင်ရန်အတွက် ပြင်ဆင်ရေးဆွဲရန်လည်း လိုအပ်လျက်ရှိပါကြောင်း။
ညီလာခံတွင် ပူးတွဲကြေညာချက် ကော်မတီ၊ အမျိုးသမီးလွှတ်တော် ကိုယ်စားလှယ် များကော်မတီ၊ နိုင်ငံရေး၊ စီးပွားရေး၊ လူမှုရေးနှင့် လုပ်ငန်းဆိုင်ရာကိစ္စရပ်များ ကော်မတီတို့၏ ဥက္ကဋ္ဌများအဖြစ် စွမ်းစွမ်းတမံ ဆောင်ရွက်ခဲ့ကြသူများကိုလည်း မှတ်တမ်းတင်ပါကြောင်း၊ လာအိုနိုင်ငံလွမ်ပရာဘွမ် ပြည်နယ်တွင် ကျင်းပခဲ့သည့် (၈) ကြိမ်မြောက် အာဆီယံပါလီမန်များ ညီလာခံအဖွဲ့ အစည်းအဝေး အစီရင်ခံစာကို ဤအထွေထွေ ညီလာခံက မှတ်တမ်းတင်ပါကြောင်း၊ ၂၀၁၇ ခုနှစ်တွင် (၉) ကြိမ်မြောက် အစည်းအဝေးကို အင်ဒိုနီးရှားနိုင်ငံ လွှတ်တော်ကအိမ်ရှင်အဖြစ် လက်ခံကျင်းပမည်ကို ကြိုဆိုပါကြောင်း။
တိုးတက်သောအာဆီယံ အသိုက်အ၀န်းဖြစ်ရန် အာဆီယံပါလီမန်များညီလာခံ၏ ဆုံးဖြတ်ချက်များ အကောင်အထည် ဖော်မှုကို ပိုမိုအလေးထား ဆောင်ရွက်သင့်ပါကြောင်း၊ အာဆီယံမျှော်မှန်းချက် ၂၀၂၅ သို့ ဦးတည်ချီတက်ရာတွင် ရင်ဆိုင် ကြုံတွေ့ရမည့် စိန်ခေါ်မှုအသစ်များကို ကျော်လွှားနိုင်ရန်အတွက် အာဆီယံပါလီမန်များ ညီလာခံအနေဖြင့် အာဆီယံ အဖွဲ့ကြီးနှင့် နီးကပ်စွာလုပ်ကိုင်ဆောင်ရွက်သွားရန် လိုအပ်ပါကြောင်း၊ နိုင်ငံတကာ ပါလီမန်များသမဂ္ဂနှင့် အခြားသော ဖွံ့ဖြိုးမှုမိတ်ဖက် အဖွဲ့အစည်းများ၏ နီးကပ်စွာ ပူးပေါင်းဆောင်ရွက်ခြင်းသည် အာဆီယံပါလီမန်များ ညီလာခံ၏ ရည်မှန်း ချက်ပန်းတိုင် ရောက်ရှိရေးအတွက် များစွာအရေးကြီးပါကြောင်း။
မိမိအနေဖြင့် အာဆီယံနိုင်ငံများထဲတွင် ဒီမိုကရေစီသက်တမ်း အရှည်ကြာဆုံးဖြစ်သည့် ဖိလစ်ပိုင်လွှတ်တော်သို့ အာဆီယံ ပါလီမန်များဥက္ကဋ္ဌတာဝန် လွှဲပြောင်းပေးအပ်ခွင့် ရရှိသည့်အတွက် ၀မ်းမြောက်ဂုဏ်ယူပါကြောင်း၊ အာဆီယံပါလီမန်များ ဥက္ကဋ္ဌအဖြစ် တာဝန်ယူဆောင်ရွက်မည့် ဖိလစ်ပိုင် အောက်လွှတ်တော် ဥက္ကဋ္ဌ၏ ဦးဆောင်မှုအောက်၌ အာဆီယံ ပါလီမန်များ ညီလာခံသည် ဒေသတွင်းနှင့် နိုင်ငံတကာ ငြိမ်းချမ်းရေး၊ တည်ငြိမ်အေးချမ်းရေးနှင့် ရေရှည်ဖွံ့ဖြိုး တိုးတက်ရေး တို့ကို မြှင့်တင်နိုင်ပြီးအောင်မြင်မှုများဆက်လက် ရရှိမည်ဟုယုံကြည်ပါကြောင်း ပြောကြားသည်။
ထို့နောက် အာဆီယံပါလီမန်များ ညီလာခံဥက္ကဋ္ဌ မန်းဝင်းခိုင်သန်းက (၃၈) ကြိမ်မြောက် အာဆီယံပါလီမန်များ အထွေထွေ ညီလာခံကိုအိမ်ရှင်နိုင်ငံအဖြစ် လက်ခံကျင်းပမည့် ဖိလစ်ပိုင်နိုင်ငံအောက်လွှတ်တော် ဒုတိယဥက္ကဋ္ဌ မစ္စတာအဲရစ်ဆင်းဆန်း ထံအာဆီယံပါလီမန်များ ညီလာခံဥက္ကဋ္ဌရာထူး၊ အဆောင်အယောင် ဖြစ်သည့်တူနှင့် AIPA အလံတို့ကို လွှဲပြောင်းပေးအပ် သည်။
ယင်းနောက်   ဖိလစ်ပိုင်နိုင်ငံအောက်လွှတ်တော် ဒုတိယဥက္ကဋ္ဌ မစ္စတာအဲရစ်ဆင်းဆန်းက အမှာစကားပြောကြားသည်။
(၃၈) ကြိမ်မြောက် အာဆီယံပါလီမန်များ အထွေထွေညီလာခံကို ၂၀၁၇ ခုနှစ် စက်တင်ဘာလတွင် ဖိလစ်ပိုင်နိုင်ငံ မနီလာမြို့၌ ဆက်လက်ကျင်းပ သွားမည်ဖြစ်သည်။ အဆိုပါ အစည်းအဝေးတွင် ဂျော်ဂျီယာနှင့် ယူကရိန်းနိုင်ငံ လွှတ်တော် များ၏ လေ့လာသူအနေဖြင့် တက်ရာက်ရန် အဆိုပြုချက်ကိုဆွေးနွေး ဆုံးဖြတ်သွားမည် ဖြစ်ကြောင်းသိရသည်။

အလားတူ (၃၇) ကြိမ်မြောက် အာဆီယံပါလီမန်များညီလာခံ၏ ဒုတိယအကြိမ်မြောက် မျက်နှာစုံညီ အစည်းအဝေးကို ယနေ့နံနက် (၉) နာရီတွင် ဆက်လက်ကျင်းပရာ နိုင်ငံရေးရာကော်မတီ၊ စီးပွားရေးရာကော်မတီ၊ လူမှုရေးရာကော်မတီ၊ အမျိုးသမီး လွှတ်တော်ကိုယ်စားလှယ်များ အစည်းအဝေး (WAIPA)၊ အာဆီယံပါလီမန်များ ညီလာခံဆိုင်ရာ ပူးပေါင်း ကော်မတီနှင့် ဆက်စပ်အစည်းအဝေးများ၏ ဆုံးဖြတ်ချက်များကို ကော်မတီ အဖွဲ့ခေါင်းဆောင်များက ဖတ်ကြားအတည်ပြု ဆောင်ရွက်ကြသည်။

No comments:

Post a Comment