ပြည်သူ့လွှတ်တော် ဥက္ကဋ္ဌ သူရဦးရွှေမန်း ပဲခူးတိုင်းဒေသကြီး တောင်ငူနှင့် ရေနီမြို့တို့၌ ဒေသခံ ပြည်သူများအား တွေ့ဆုံ အမှာစကားပြောကြား

နေပြည်တော် ဇူလိုင် ၃၀

ပြည်သူ့လွှတ်တော်ဥက္ကဋ္ဌ သူရဦးရွှေမန်းသည် ယနေ့ မွန်းလွဲပိုင်းတွင် ပဲခူးတိုင်းဒေသကြီး တောင်ငူမြို့ ခပေါင်းခန်းမ၌ ဒေသခံပြည်သူများအားတွေ့ဆုံ၍ ဒေသ ဖွံ့ဖြိုးရေးဆိုင်ရာကိစ္စရပ်များကို ဆွေးနွေးမှာကြားသည်။

အဆိုပါတွေ့ဆုံပွဲသို့ ပဲခူးတိုင်းဒေသကြီး လွှတ်တော်ဥက္ကဋ္ဌ ဦးဝင်းတင်၊ ပြည်ထောင်စုလွှတ်တော် ကိုယ်စားလှယ်များ၊ ပြည်သူ့လွှတ်တော် ဥပဒေရေးရာနှင့် အထူး ကိစ္စရပ်များ လေ့လာဆန်းစစ်သုံးသပ်ရေး ကော်မရှင်အဖွဲ့ဝင်များ၊ တိုင်းဒေသကြီးအစိုးရ အဖွဲ့ဝင်များ၊ တိုင်းဒေသကြီး လွှတ်တော် ကိုယ်စားလှယ်များ၊ နိုင်ငံရေးပါတီများမှပုဂ္ဂိုလ်များ၊ မြို့နယ်ဌာနဆိုင်ရာများ၊ လူမှုရေးအသင်းအဖွဲ့ဝင်များ၊ မြို့မိမြို့ဖများနှင့် ဒေသခံပြည်သူများ တက်ရောက်ကြသည်။

တွေ့ဆုံပွဲတွင် ပြည်သူ့လွှတ်တော်ဥက္ကဋ္ဌ သူရဦးရွှေမန်းက လာမည့် နိုဝင်ဘာ (၈) ရက်တွင် ကျင်းပမည့် ပါတီစုံဒီမိုကရေစီရွေးကောက်ပွဲသည် နိုင်ငံအတွက် အလွန် အရေးကြီးသည့် လုပ်ငန်းစဉ်ဖြစ်ပါကြောင်း၊ တောင်ငူခရိုင်အတွင်းရှိ မြို့နယ်များသာမက တစ်တိုင်းပြည်လုံးအတိုင်းအတာဖြင့် ရွေးကောက်ပွဲအောင်မြင်အဆင်ပြေရန် အရေးကြီးပါ ကြောင်း၊ ရွေးကောက်ပွဲအောင်မြင်ရေးအတွက် ရွေးကောက်ပွဲကော်မရှင်ကိုသာ ပုံပြီး လွှဲထား၍မရပါကြောင်း၊ ယနေ့ တွေ့ဆုံပွဲသို့ တက်ရောက်လာကြသည့် စီမံခန့်ခွဲရေး ကော်မတီများ၊ ဖွံ့ဖြိုးတိုးတက်ရေးအထောက်အကူပြုကော်မတီများအပါအဝင် မြို့နယ် အတွင်းရှိ နိုင်ငံရေးပါတီကိုယ်စားပြု ကိုယ်စားလှယ်များ၊ ပြည်သူများအားလုံးပူးပေါင်း ပါဝင်ဆောင်ရွက်ရန်လိုအပ်ပါကြောင်း။

ရွေးကောက်ပွဲ၌ မိမိတို့ရွေးချယ်မှု မှန်ကန်ရန်လိုအပ်ပါကြောင်း၊ မိမိတို့ ရွေးချယ်လိုက်သူသည် မိမိနိုင်ငံနှင့်မိမိဒေသကို အကျိုးပြုနိုင်သူဖြစ်ရန်လိုကြောင်း၊ တောင်ငူ ခရိုင်အတွင်းရှိ မြို့နယ်များမှစီမံခန့်ခွဲရေး ကော်မတီဥက္ကဋ္ဌများသည် ရွေးကောက်ပွဲတွင် စီမံခန့်ခွဲရေး၊ အုပ်ချုပ်ရေးနှင့်လုံခြုံရေးအပိုင်းကို အဓိက တာဝန်ယူကြမည့်သူများဖြစ်၍ အရေးကြီးပါကြောင်း၊ ထို့အတူ ကော်မရှင်မှတာဝန်ရှိသူများ၊ မဲရုံမှူး၊ ဒုတိယမဲရုံမှူးများ သည်လည်း လွတ်လပ်ပြီး တရားမျှတသော ရွေးကောက်ပွဲ ဖြစ်ရေးအတွက် ဝိုင်းဝန်း ဆောင်ရွက်ရန်လိုကြောင်း၊ မိမိတို့ဒေသ ဖွံ့ဖြိုးတိုးတက်ရေးအတွက် သက်ဆိုင်ရာ ကော်မတီများအနေဖြင့် ရွေးကောက်ပွဲအောင်မြင်စွာ ကျင်းပရေးကိစ္စရပ်အပါအဝင် ဒေသ၏ လိုအပ်ချက်များကို တင်ပြကြရန် ဖိတ်ခေါ်ပါကြောင်းဖြင့် ပြောကြားသည်။

ထို့နောက် တောင်ငူခရိုင်မြို့နယ် စီမံခန့်ခွဲရေးကော်မတီဥက္ကဋ္ဌ၊ မြို့နယ်ဖွံ့ဖြိုး တိုးတက်ရေး အထောက်အကူပြုကော်မတီ၊ မြို့နယ်စည်ပင်သာယာရေးကော်မတီ၊ ခရိုင် မိခင်နှင့် ကလေးစောင့်ရှောက်ရေးအသင်း၊ မြို့နယ်ကျန်းမာရေးမှူး၊ ခရိုင်မီးသတ်တပ်ဖွဲ့၊ ခရိုင်ဌာနဆိုင်ရာများမှ တာဝန်ရှိသူများနှင့် အမျိုးသား လွှတ်တော်ကိုယ်စားလှယ် ဦးဝင်းနိုင်ရှိန် တို့က ဒေသဖွံ့ဖြိုးရေးဆိုင်ရာ ကိစ္စရပ်များကို ရှင်းလင်းတင်ပြကြသည်။

ထို့နောက် ပဲခူးတိုင်းဒေသကြီးလွှတ်တော်ဥက္ကဋ္ဌ ဦးဝင်းတင်က ဒေသဖွံ့ဖြိုးရေး ကိစ္စရပ်များနှင့်စပ်လျဉ်း၍ ဖြည့်စွက်ရှင်းလင်းတင်ပြသည်။

တင်ပြချက်များအပေါ် ပြည်သူ့လွှတ်တော်ဥက္ကဋ္ဌက ပြန်လည်သုံးသပ်ဆွေးနွေးပြီး နိဂုံးချုပ်အမှာစကားပြောကြားကာ တက်ရောက်လာကြသူများအား ရင်းရင်းနှီးနှီးနှုတ်ဆက် ခဲ့သည်။

ဆက်လက်၍ ပြည်သူ့လွှတ်တော်ဥက္ကဋ္ဌသည် အဖွဲ့ဝင်များနှင့်အတူ ပဲခူးတိုင်း ဒေသကြီး ရေနီမြို့သို့ရောက်ရှိပြီး ရွှေစေတီကျောင်းတိုက် ဓမ္မာဗိမာန်တော်၌ ဒေသခံ ပြည်သူများအား တွေ့ဆုံ၍ ဒေသဖွံ့ဖြိုးရေးဆိုင်ရာကိစ္စရပ်များကို ဆွေးနွေးမှာကြားသည်။

တွေ့ဆုံပွဲတွင် ပြည်သူ့လွှတ်တော်ဥက္ကဋ္ဌက မိမိနှင့်လွှတ်တော်ကိုယ်စားလှယ်များ ပါဝင်သည့်အဖွဲ့ကို သိုက်သိုက်ဝန်းဝန်း ကြိုဆိုကြသည့်အတွက် ဝမ်းမြောက်ပါကြောင်း၊ မိမိတို့ ရောက်ရှိခိုက် ရေနီဒေသမှ ပြည်သူများအနေဖြင့် လိုအပ်ချက်များရှိပါက ပွင့်ပွင့်လင်းလင်း တင်ပြကြရန် ဖိတ်ခေါ်ပါကြောင်းဖြင့် ပြောကြားသည်။

ထို့နောက် ရပ်ကွက်အုပ်ချုပ်ရေးမှူးများနှင့် ဒေသခံပြည်သူများက ဒေသ ဖွံ့ဖြိုးရေးဆိုင်ရာကိစ္စရပ်များကို ရှင်းလင်းတင်ပြကြပြီး ဌာနဆိုင်ရာတာဝန်ရှိသူများက ဖြည့်စွက်ရှင်းလင်းတင်ပြကြသည်။

တင်ပြချက်များအပေါ် ပြည်သူ့လွှတ်တော် ဥက္ကဋ္ဌက ပေါင်းစပ်ညှိနှိုင်း ဆောင်ရွက် ပေးပြီး နိဂုံးချုပ်အမှာစကားပြောကြားကာ တက်ရောက်လာကြသူများအား ရင်းရင်းနှီးနှီး နှုတ်ဆက်ခဲ့သည်။

တွေ့ဆုံပွဲမစတင်မီ ပြည်သူ့လွှတ်တော်ဥက္ကဋ္ဌသည် ရေနီမြို့ ရွှေစေတီ ကျောင်းတိုက် ပဓာနနာယကဆရာတော် အမှူးပြုသော ဆရာတော်၊ သံဃာတော် များအား သင်္ကန်းနှင့်လှူဖွယ်ပစ္စည်းများ ဆက်ကပ်လှူဒါန်းကာ ဒေသဖွံ့ဖြိုးရေးနှင့် သာသနာရေးဆိုင်ရာကိစ္စရပ်များကို လျှောက်ထားခဲ့သည်။