အရည်အသွေးကို အခြေခံသောပညာရေးစနစ်၊ နိုင်ငံတကာအသိအမှတ်ပြုမှုနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေး အပိုင်း (၂)

ဒေါက်တာဇော်ထွန်းအောင် (ပညာ​ရေး)

ပုဂ္ဂလိကပညာရေး ဥပဒေ၊ ညွှန်ကြားချက်နှင့် တာဝန်ဝတ္တရားများ မြန်မာနိုင်ငံတွင် ပညာရေးကဏ္ဍ ဖွံ့ဖြိုးတိုးတက်ရေး၊ ကျောင်းသား ကျောင်းသူများ၏ ပညာသင်ယူခွင့်များကို ကာကွယ်စောင့်ရှောက်ရေးနှင့် ပညာရေးအရည်အသွေး အာမခံနိုင်ရေးတို့အတွက် ပညာရေးဆိုင်ရာ ဥပဒေများ၊ နည်းဥပဒေများ၊ စည်းမျဉ်းစည်းကမ်းများနှင့် ညွှန်ကြားချက်များကို ပြဋ္ဌာန်းထားရှိပြီးဖြစ်သည်။

တည်ဆဲဥပဒေများနှင့် ပညာရေးဝန်ကြီးဌာန၏ စည်းမျဉ်းစည်းကမ်းများအရ မြန်မာနိုင်ငံအတွင်း ပုဂ္ဂလိကအခြေခံပညာကျောင်းများ၊ ကိုယ်ပိုင်ကျောင်းများ၊ ဘာသာရပ်အထူးပြု သင်တန်းကျောင်းများ၊ နည်းပညာနှင့် အသက်မွေးဝမ်းကျောင်းပညာသင်တန်းများ၊ ကောလိပ်များနှင့် အဆင့်မြင့်ပညာရေးဆိုင်ရာ သင်တန်းအဖွဲ့အစည်းများကို ဖွင့်လှစ်လိုပါက သက်ဆိုင်ရာပညာရေးအဖွဲ့အစည်းများထံ တရားဝင်လျှောက်ထား မှတ်ပုံတင်ရမည်ဖြစ်ပြီး ပြဋ္ဌာန်းသတ်မှတ်ချက်များနှင့် ကိုက်ညီကြောင်း စိစစ်အတည်ပြုခံယူပြီးမှသာ လုပ်ငန်းဆောင်ရွက်ခွင့် ရရှိမည်ဖြစ်သည်။

ထို့ပြင် ပုဂ္ဂလိကပညာရေးအဖွဲ့အစည်းများသည် ပညာရေးဝန်ကြီးဌာနက သတ်မှတ်ထားသော သင်ရိုးညွှန်းတမ်းများ၊ သင်ကြားရေးစံနှုန်းများ၊ ဆရာအရည်အချင်း သတ်မှတ်ချက်များ၊ ကျောင်းသားရေးရာစီမံခန့်ခွဲမှုဆိုင်ရာ စည်းမျဉ်းများနှင့် အရည်အသွေးအာမခံမှုစနစ်များကိုလိုက်နာရန် တာဝန်ရှိသည်။ ထို့အတူ ကျောင်းသားများနှင့် မိဘပြည်သူများအား ပညာရေးဆိုင်ရာ သတင်းအချက်အလက်များကို မှန်ကန်စွာ ထုတ်ပြန်ပေးရန်၊ လုပ်ငန်းလိုင်စင်နှင့် မှတ်ပုံတင်အခြေအနေများကို ပွင့်လင်းမြင်သာစွာဖော်ပြရန်နှင့် မမှန်ကန်သော ကြော်ငြာမှုများမပြုလုပ်ရန်လည်းတာဝန်ရှိသည်။

ထို့အပြင် ပုဂ္ဂလိကပညာရေးအဖွဲ့အစည်းများအနေဖြင့် မိမိတို့ထုတ်ပေးသော ဘွဲ့၊ ဒီပလိုမာ၊ အောင်လက်မှတ်၊ ပညာရေးမှတ်တမ်း၊ အရည်အချင်းလက်မှတ်များနှင့် အခြားအထောက်အထား စာရွက်စာတမ်းများ၏ တရားဝင်မှု၊ စိစစ်နိုင်မှုနှင့် မှန်ကန်မှုကို အပြည့်အဝတာဝန်ယူရမည်ဖြစ်သည်။ မြန်မာနိုင်ငံ၏ လက်တွေ့အခြေအနေအရ အချို့သော ပညာရေးအဖွဲ့အစည်းများသည် နိုင်ငံတကာတက္ကသိုလ်အမည်များ၊ နိုင်ငံတကာအသိအမှတ်ပြုမှုများ သို့မဟုတ် အလုပ်အကိုင်အာမခံချက်များကို ကြော်ငြာရာတွင် ကျောင်းသားများနှင့် မိဘများ နားလည်မှုလွဲမှားစေနိုင်သည့် အခြေအနေများရှိနိုင်သဖြင့် သက်ဆိုင်ရာအဖွဲ့အစည်းများ၏ စိစစ်ကြပ်မတ်မှုနှင့်အတူ ပညာရေးအဖွဲ့အစည်းများကိုယ်တိုင်လည်း ဥပဒေနှင့် စည်းမျဉ်းစည်းကမ်းများကို တာဝန်သိစွာ လိုက်နာရန်လိုအပ်ပါသည်။

မည်သည့် ပညာရေးအဖွဲ့အစည်းမဆို တရားဝင်မှတ်ပုံတင်ထားခြင်းမရှိဘဲ ဖွင့်လှစ်ခြင်း၊ ခွင့်ပြုချက်မရှိသော ဘွဲ့နှင့်အောင်လက်မှတ်များ ထုတ်ပေးခြင်း၊ ပညာရေးဝန်ကြီးဌာန၏ ညွှန်ကြားချက်များကို လိုက်နာရန် ပျက်ကွက်ခြင်း၊ မမှန်ကန်သော ပညာရေးအချက်အလက်များဖြင့် လူအများအား လှည့်ဖြားဆွဲဆောင်ခြင်းများသည် တည်ဆဲဥပဒေများ၊ စည်းမျဉ်းစည်းကမ်းများနှင့် ညွှန်ကြားချက်များကို ချိုးဖောက်ရာရောက်နိုင်ပြီး ဥပဒေနှင့်အညီ စိစစ်အရေးယူခြင်း၊ မှတ်ပုံတင်ခွင့်ရုပ်သိမ်းခြင်း၊ လုပ်ငန်းရပ်ဆိုင်းခြင်း သို့မဟုတ် အခြားသက်ဆိုင်ရာ အရေးယူဆောင်ရွက်မှုများ ခံရနိုင်ပါသည်။

ထို့ကြောင့် ပညာရေးကဏ္ဍ၏ ဂုဏ်သိက္ခာကို ထိန်းသိမ်းရန်၊ ကျောင်းသားလူငယ်များ၏ အနာဂတ်ကို ကာကွယ်ရန်နှင့် နိုင်ငံတော်၏ ပညာရေးစနစ်အပေါ် ပြည်သူလူထု၏ယုံကြည်မှုကို မြှင့်တင်ရန်အတွက် ပုဂ္ဂလိကပညာရေးအဖွဲ့အစည်းများအားလုံးက ပညာရေးဝန်ကြီးဌာန၏ မူဝါဒများ၊ ဥပဒေများ၊ နည်းဥပဒေများနှင့် ညွှန်ကြားချက်များကို အပြည့်အဝလိုက်နာဆောင်ရွက်ရန်မှာ အရေးကြီးသောတာဝန်တစ်ရပ်ဖြစ်ကြောင်း အလေးအနက်ထား ဖော်ပြလိုပါသည်။

ပညာ​ရေးဝန်​ဆောင်မှုနှင့် သတိပြုဆန်းစစ်ရမည့် လမ်းညွှန်ချက်များ

ပညာရေးသည် လူတစ်ဦး၏ အနာဂတ်ဘဝ၊ အလုပ်အကိုင်အခွင့်အလမ်းနှင့် လူမှုဘဝဖွံ့ဖြိုးတိုးတက်မှုကို ဆုံးဖြတ်ပေးနိုင်သည့် အရေးပါသော ရင်းနှီးမြှုပ်နှံမှုတစ်ခုဖြစ်သည်။ ထို့ကြောင့် ကျောင်းသားများနှင့် မိဘပြည်သူများအနေဖြင့် ကျောင်း၊ ကောလိပ်၊ တက္ကသိုလ် သို့မဟုတ် သင်တန်းကျောင်း တစ်ခုကို ရွေးချယ်ရာတွင် ပညာရေးဝန်ဆောင်မှုကို သုံးစွဲသူများအဖြစ် အသိပညာပြည့်ဝစွာ ဆုံးဖြတ်တတ်ရန်အရေးကြီးပါသည်။

လက်တွေ့တွင် မြန်မာနိုင်ငံ၌ “နိုင်ငံတကာကျောင်း”၊ “နိုင်ငံခြားဘွဲ့ရရှိနိုင်သော သင်တန်း”၊ “နိုင်ငံတကာတက္ကသိုလ်နှင့် ပူးပေါင်းသင်ကြားမှု”၊ “အချိန်တိုအတွင်း ဒီပလိုမာနှင့် ဘွဲ့ရရှိနိုင်ခြင်း” စသည့်ကြော်ငြာများကို တွေ့မြင်ရလေ့ရှိပါသည်။ သို့ရာတွင် ကြော်ငြာပါအချက်အလက်များအားလုံးသည် တရားဝင်အသိအမှတ်ပြုထားသော အရည်အချင်းများဖြစ်သည်ဟု ယူဆ၍မရပါ။ အချို့သောအဖွဲ့အစည်းများသည် နိုင်ငံတကာတက္ကသိုလ် အမည်၊ နိုင်ငံခြားအလံ သို့မဟုတ် နိုင်ငံတကာအသုံးအနှုန်းများကို အသုံးပြုထားသော်လည်း သက်ဆိုင်ရာတက္ကသိုလ်၏ တရားဝင်ခွင့်ပြုချက် သို့မဟုတ် အသိအမှတ်ပြုမှုမရှိနိုင်သည့် အခြေအနေများလည်း ရှိနိုင်ပါသည်။ ထိုသို့​သော ​ကျောင်းများသည် ပုဂ္ဂလိကပညာ​ရေးဥပ​ဒေနှင့် မကိုက်ညီသည့်အတွက် အရေးယူခံရနိုင်ပါသည်။

ထို့ကြောင့် ကျောင်းသားများနှင့် မိဘများအနေဖြင့် ပညာရေးဝန်ဆောင်မှုတစ်ခုအတွက် ကျောင်းလခ၊ သင်တန်းကြေး သို့မဟုတ် အခြားကုန်ကျစရိတ်များမပေးသွင်းမီ အောက်ပါအချက်များကို သေချာစွာစစ်ဆေးသင့်ပါသည်။

(က) ကျောင်း၏ တရားဝင် မှတ်ပုံတင်မှုကို စစ်ဆေးခြင်း

ကျောင်း၊ သင်တန်း၊ စင်တာ သို့မဟုတ်ကောလိပ်တစ်ခုသည် သက်ဆိုင်ရာ ပညာရေးအဖွဲ့အစည်းများထံတွင် တရားဝင်မှတ်ပုံတင်ထားခြင်း ရှိ၊ မရှိကို မေးမြန်းစစ်ဆေးသင့်ပါသည်။ မှတ်ပုံတင်လက်မှတ်၊ ခွင့်ပြုမိန့်နှင့် သက်တမ်းတိုးစာရွက်စာတမ်းများကို ပွင့်လင်းမြင်သာစွာ ပြသထားခြင်း ရှိ၊ မရှိကိုလည်း ကြည့်ရှုသင့်ပါသည်။

(ခ) နိုင်ငံတကာတက္ကသိုလ် သို့မဟုတ် မိတ်ဖက်အဖွဲ့အစည်း၏ စစ်မှန်မှုကို စစ်ဆေးခြင်း

ကျောင်းတစ်ကျောင်းက နိုင်ငံတကာတက္ကသိုလ်တစ်ခုနှင့် ပူးပေါင်းဆောင်ရွက်ကြောင်း ကြေညာပါက အဆိုပါတက္ကသိုလ်သည် ယင်း၏ မိခင်နိုင်ငံတွင် တရားဝင်အသိအမှတ်ပြုခံထားရသော တက္ကသိုလ် ဟုတ်၊ မဟုတ်ကို လေ့လာသင့်ပါသည်။ ထို့ပြင် အဆိုပါတက္ကသိုလ်၏ တရားဝင်ဝက်ဘ်ဆိုက်တွင် မြန်မာနိုင်ငံရှိ မိတ်ဖက်ကျောင်း သို့မဟုတ် သင်ကြားရေးစင်တာ၏ အမည်ပါဝင်ခြင်း ရှိ၊ မရှိကိုလည်း စစ်ဆေးသင့်ပါသည်။

(ဂ) ဘွဲ့၊ ဒီပလိုမာနှင့် အောင်လက်မှတ်များ၏ အသိအမှတ်ပြုမှုကို စုံစမ်းခြင်း

သင်တန်းပြီးဆုံးပါက ရရှိမည့် ဘွဲ့၊ ဒီပလိုမာ၊ အောင်လက်မှတ်၊ ပညာရေးမှတ်တမ်းနှင့် အရည်အချင်းလက်မှတ်များသည် အလုပ်ခန့်အပ်မှု၊ ပညာဆက်လက်သင်ယူမှုများတွင် အသုံးပြုနိုင်မည့်၊ အသိအမှတ်ပြုနိုင်သည့် တရားဝင်အရည်အချင်း ဟုတ်၊ မဟုတ်ကို ကြိုတင်မေးမြန်းသင့်ပါသည်။ “နိုင်ငံတကာအသိအမှတ်ပြု”ဟု ကြော်ငြာထားရုံဖြင့် မလုံလောက်ဘဲ မည်သည့်အဖွဲ့အစည်းက အသိအမှတ်ပြုထားသည်ကို တိကျစွာသိရှိရန်လိုအပ်ပါသည်။

(ဃ) သင်ရိုးညွှန်းတမ်းနှင့် သင်ကြားရေးအရည်အသွေးကို လေ့လာခြင်း

ကျောင်းသားများသည် ကျောင်း၏ သင်ရိုးညွှန်းတမ်း၊ ဆရာ၊ ဆရာမများ၏ အရည်အချင်း၊ သင်ကြားရေးနည်းလမ်းများ၊ စာမေးပွဲစနစ်နှင့် ကျောင်းပြီးဆုံးပြီးနောက် ရရှိနိုင်မည့်အခွင့်အလမ်းများကို ကြိုတင်လေ့လာသင့်ပါသည်။

(င) အလွန်အကျွံ ကတိပေးသော ကြော်ငြာများကို သတိထားခြင်း

“စာမေးပွဲမဖြေဘဲ ဘွဲ့ရမည်”၊ “လအနည်းငယ်အတွင်း မဟာဘွဲ့ရနိုင်သည်”၊ “အလုပ်အကိုင် ၁၀၀ ရာခိုင်နှုန်း အာမခံသည်”၊ “နိုင်ငံတိုင်းတွင် အသုံးပြုနိုင်သောဘွဲ့” စသည့်အလွန်အကျွံကတိပေးသော ကြော်ငြာများကို အထူးသတိထားရန်လိုပါသည်။ နိုင်ငံတကာအတွေ့အကြုံများအရ ယင်းကဲ့သို့သော ကြော်ငြာများသည် ဆွဲဆောင်ရန်အသုံးပြုသော စျေးကွက်ရှာဖွေရေးနည်းလမ်းများဖြစ်နိုင်ပါသည်။

ပညာရေးဝန်ဆောင်မှုတစ်ခုကို ရွေးချယ်ရာတွင် ကြော်ငြာစာသားများ၊ လူမှုကွန်ရက်ပေါ်ရှိ ဖော်ပြချက်များ သို့မဟုတ် နှုတ်ဖြင့်ကတိပြုချက်များကိုသာ အခြေခံဆုံးဖြတ်ခြင်းမပြုဘဲ တရားဝင်စာရွက်စာတမ်းများ၊ အသိအမှတ်ပြုမှုအထောက်အထားများနှင့် သက်ဆိုင်ရာအဖွဲ့အစည်းများ၏ အချက်အလက်များကို စနစ်တကျစစ်ဆေးအတည်ပြုရန် လိုအပ်ပါသည်။

ပညာရေးသည် လူငယ်များ၏ အနာဂတ်အတွက် အရေးကြီးဆုံးရင်းနှီးမြှုပ်နှံမှုဖြစ်သကဲ့သို့ မှန်ကန်သောကျောင်းနှင့် သင်တန်းကို ရွေးချယ်နိုင်ရေးအတွက် အသိပညာရှိခြင်းသည်လည်း အလွန်အရေးကြီးပါသည်။

လူ့စွမ်းအားအရင်းအမြစ် ဖွံ့ဖြိုးတိုးတက်ရေးနှင့် အရည်အသွေးပြည့်ဝသော ပညာရေးစနစ် တည်ဆောက်ခြင်း

နိုင်ငံတစ်နိုင်ငံ၏ စီးပွားရေးဖွံ့ဖြိုးတိုးတက်မှု၊ နည်းပညာတိုးတက်မှု၊ အုပ်ချုပ်ရေးစွမ်းဆောင်ရည်နှင့် နိုင်ငံတော်လုံခြုံရေးအင်အားတို့၏ အခြေခံအုတ်မြစ်မှာ အရည်အသွေးမြင့် လူ့စွမ်းအားအရင်းအမြစ်ပင်ဖြစ်သည်။ သဘာဝသယံဇာတများ ကြွယ်ဝနေသော်လည်း ပညာတတ်ကျွမ်းကျင်သော လူသားအရင်းအမြစ်မလုံလောက်ပါက နိုင်ငံတစ်နိုင်ငံ၏ ရေရှည်ဖွံ့ဖြိုးတိုးတက်မှုကို အာမခံနိုင်မည်မဟုတ်ပေ။

လူ့စွမ်းအားအရင်းအမြစ်ဆိုသည်မှာ ဘွဲ့ လက်မှတ် သို့မဟုတ် အောင်လက်မှတ်များကိုသာ ဆိုလိုခြင်းမဟုတ်ဘဲ အသိပညာ၊ ကျွမ်းကျင်မှု၊ အတွေးအခေါ်စွမ်းရည်၊ စာရိတ္တနှင့် တာဝန်ယူမှု၊ တီထွင်ဖန်တီးနိုင်စွမ်းနှင့် ပြဿနာဖြေရှင်းနိုင်စွမ်းတို့ကို စုစည်းထားသော လူသားအရည်အသွေးတစ်ရပ်ဖြစ်သည်။ ထို့ကြောင့် အရည်အသွေးမရှိသော လက်မှတ်များ၊ အတည်ပြုနိုင်ခြင်းမရှိသော ဘွဲ့များနှင့် အမှန်တကယ်ကျွမ်းကျင်မှုမရှိသော အရည်အချင်းများသည် လူ့စွမ်းအားအရင်းအမြစ်ဖွံ့ဖြိုးရေးကို အားနည်းစေနိုင်သည်။

လက်တွေ့တွင် နိုင်ငံအချို့၌ စာရွက်စာတမ်းအရ ပညာအရည်အချင်း (Paper Qualification) ဟု ခေါ်သော လက်မှတ်ရှိသော်လည်း လုပ်ငန်းခွင် စွမ်းရည်မရှိသည့်အခြေအနေများကို ကြုံတွေ့ရလေ့ရှိသည်။ ယင်းအခြေအနေများ ပိုမိုများပြားလာပါက အလုပ်ရှင်များ၏ ယုံကြည်မှုကျဆင်းလာနိုင်ပြီး ပညာရေးစနစ်တစ်ခုလုံး၏ ဂုဏ်သိက္ခာကို ထိခိုက်စေနိုင်သည်။ ထို့ကြောင့် ပညာရေး၏ အဓိကရည်ရွယ်ချက်မှာ လက်မှတ်ထုတ်ပေးခြင်းထက် အမှန်တကယ်အသုံးချနိုင်သော အသိပညာနှင့် ကျွမ်းကျင်မှုများကို မွေးထုတ်ပေးခြင်းဖြစ်ရပါမည်။

မြန်မာနိုင်ငံ၏ လက်တွေ့အခြေအနေကို သုံးသပ်ကြည့်ပါက အခြေခံပညာမှ အဆင့်မြင့်ပညာအထိ ကျောင်းသားလူငယ်များစွာသည် ပညာရေးအခွင့်အလမ်းများရရှိရေးအတွက် ကြိုးစားလျက်ရှိကြသည်။ တစ်ဖက်တွင်လည်း နိုင်ငံတကာပညာရေး၊ နည်းပညာအခြေပြုသင်ကြားရေးစနစ်များ၊ အွန်လိုင်းသင်ယူမှုများနှင့် အလုပ်အကိုင်ဈေးကွက်၏ လိုအပ်ချက်များသည် လျင်မြန်စွာပြောင်းလဲလျက်ရှိသည်။ ထို့ကြောင့် ကျောင်းများနှင့် ပညာရေးအဖွဲ့အစည်းများသည် စာမေးပွဲအောင်မြင်ရေးတစ်ခုတည်းကိုသာ အာရုံစိုက်ခြင်း မဟုတ်ဘဲ ၂၁ ရာစု ကျွမ်းကျင်မှုများ၊ ဒီဂျစ်တယ်နည်းပညာအသုံးချနိုင်မှု၊ ဘာသာစကားစွမ်းရည်၊ ဆက်သွယ်ပြောဆိုနိုင်စွမ်းနှင့် အလုပ်အကိုင်ဆိုင်ရာ ကျွမ်းကျင်မှုများကိုပါ ဖွံ့ဖြိုးစေရန် အလေးထားဆောင်ရွက်ရန် လိုအပ်ပါသည်။

ထို့ကြောင့် ပညာရေးစနစ်တစ်ခု၏ အောင်မြင်မှုကို ဘွဲ့ရအရေအတွက်၊ အောင်ချက်ရာခိုင်နှုန်း သို့မဟုတ် လက်မှတ်အရေအတွက်များဖြင့်သာ တိုင်းတာ၍မရဘဲ အမှန်တကယ်အလုပ်အကိုင်ရရှိမှု၊ ကျွမ်းကျင်မှုဖွံ့ဖြိုးမှု၊ ဆန်းသစ်တီထွင်နိုင်စွမ်းနှင့် လူမှုအသိုင်းအဝိုင်းအပေါ် အကျိုးပြုနိုင်မှုများဖြင့် တိုင်းတာသင့်ပါသည်။

အနာဂတ်တွင် မြန်မာနိုင်ငံ၏ ပညာရေးစနစ် အားကောင်းလာစေရန်အတွက် ပညာရေးဝန်ကြီးဌာန၊ တက္ကသိုလ်များ၊ ပုဂ္ဂလိကပညာရေးအဖွဲ့အစည်းများ၊ ဆရာ ဆရာမများ၊ မိဘများနှင့် လူမှုအသိုင်းအဝိုင်းတစ်ရပ်လုံးတို့က ပူးပေါင်းဆောင်ရွက်ရန်လိုအပ်ပါသည်။ တရားဝင်အသိအမှတ်ပြုမှု၊ အရည်အသွေးအာမခံမှု၊ ခေတ်မီသင်ရိုးညွှန်းတမ်းများ၊ ဆရာအရည်အချင်းမြှင့်တင်ရေးနှင့် ကျောင်းသားဗဟိုပြုသင်ကြားရေးစနစ်များကို တိုးမြှင့်ဆောင်ရွက်ခြင်းအားဖြင့်သာ နိုင်ငံတော်အတွက် အမှန်တကယ်အားကိုးရမည့် လူ့စွမ်းအားအရင်းအမြစ်များကို မွေးထုတ်ပေးနိုင်မည်ဖြစ်ပါသည်။

ပညာရေး၏ အန္တိမရည်မှန်းချက်မှာ လက်မှတ်ရရှိရေးမဟုတ်ဘဲ အရည်အသွေးရှိသော လူသားအရင်းအမြစ်များ မွေးထုတ်ပေးရေးဖြစ်သည်။ စနစ်ကျသော ပညာရေးဂေဟစနစ်၊ တာဝန်ယူမှုရှိသော ပညာရေးအဖွဲ့အစည်းများနှင့် သင်ယူလိုစိတ်ပြင်းပြသောလူငယ်များ ပေါင်းစပ်နိုင်မှသာ မြန်မာနိုင်ငံ၏ အနာဂတ်ဖွံ့ဖြိုးတိုးတက်ရေးအတွက် အားထားရမည့် ပညာတတ်နိုင်ငံအကျိုးပြု လူ့စွမ်းအားအရင်းအမြစ်များကို ရေရှည်တည်တံ့စွာ ထိန်းသိမ်းဖွံ့ဖြိုးစေနိုင်မည်ဖြစ်ပါသည်။

စည်းမျဉ်းဥပဒေများကို လေးစားလိုက်နာ၍ အရည်အသွေးမြင့် ပညာရေးအသိုက်အဝန်းကို အတူတကွ တည်ဆောက်ကြပါစို့

ယနေ့မြန်မာနိုင်ငံ၏ ပညာရေးကဏ္ဍသည် ကမ္ဘာ့ပညာရေးစနစ်များ၏ လျင်မြန်သောပြောင်းလဲတိုးတက်မှု၊ ဒီဂျစ်တယ်နည်းပညာဖွံ့ဖြိုးတိုးတက်မှု၊ အလုပ်အကိုင်ဈေးကွက်၏ လိုအပ်ချက်အသစ်များနှင့် ၂၁ ရာစုကျွမ်းကျင်မှုများ၏ စိန်ခေါ်မှုများကို ရင်ဆိုင်လျက်ရှိပါသည်။ ထိုအခြေအနေတွင် ပညာရေးအဖွဲ့အစည်းများသည် လက်မှတ်ပေးအပ်ခြင်းထက် အသုံးချနိုင်သော အသိပညာ၊ ကျွမ်းကျင်မှု၊ စာရိတ္တကောင်းမွန်မှုနှင့် တီထွင်ဖန်တီးနိုင်စွမ်းတို့ကို ပြုစုပျိုးထောင်ပေးနိုင်သည့် အရည်အသွေးမြင့်ပညာရေးကို ဦးတည်ဆောင်ရွက်ရမည်ဖြစ်ပါသည်။

တစ်ဖက်တွင်လည်း ပညာရေးစနစ်၏ ယုံကြည်စိတ်ချရမှုနှင့် ဂုဏ်သိက္ခာသည် ဥပဒေ၊ စည်းမျဉ်းစည်းကမ်း၊ အရည်အသွေးအာမခံမှုနှင့် ပွင့်လင်းမြင်သာ၍ တာဝန်ယူမှုရှိသော စီမံခန့်ခွဲမှုတို့အပေါ်တွင် မူတည်လျက်ရှိပါသည်။ ထို့ကြောင့် ပုဂ္ဂလိကပညာရေးကျောင်းများ၊ နိုင်ငံတကာကျောင်းများ၊ ကောလိပ်များနှင့် သင်တန်းအဖွဲ့အစည်းများက ပညာရေးဝန်ကြီးဌာန၏ မူဝါဒများ၊ ဥပဒေများ၊ စည်းမျဉ်းစည်းကမ်းများနှင့် ညွှန်ကြားချက်များကို လိုက်နာ၍ တရားဝင်အသိအမှတ်ပြုမှု၊ အရည်အသွေးအာမခံမှုနှင့် ပွင့်လင်းမြင်သာသော စီမံခန့်ခွဲမှုစနစ်များကို ထိရောက်စွာ အကောင်အထည်ဖော်ဆောင်ရွက်ရန် အရေးကြီးပါသည်။

ပညာရေးသည် လူတစ်ဦးချင်းစီ၏ အနာဂတ်ကို ပုံဖော်ပေးရုံသာမက နိုင်ငံတော်၏ လူ့စွမ်းအားအရင်းအမြစ် ဖွံ့ဖြိုးတိုးတက်ရေးနှင့် ရေရှည်ယှဉ်ပြိုင်နိုင်စွမ်းကို မြှင့်တင်ပေးသည့် အခြေခံမဏ္ဍိုင်တစ်ရပ်ဖြစ်ပါသည်။ ထို့ကြောင့် တရားဝင်မှု၊ အရည်အသွေး၊ ပွင့်လင်းမြင်သာမှုနှင့် တာဝန်ယူမှုတို့ကို အခြေခံသော ပညာရေးစနစ်တစ်ရပ် တည်ဆောက်နိုင်ခြင်းသည် မြန်မာ့ပညာရေး၏ ရေရှည်ဖွံ့ဖြိုးတိုးတက်မှုအတွက် အရေးပါသောလမ်းကြောင်းဖြစ်ပါသည်။

ယင်းရည်မှန်းချက်ကို အကောင်အထည်ဖော်ရာတွင် ပညာရေးဝန်ကြီးဌာန၏ ဦးဆောင်မှု၊ ပုဂ္ဂလိက ပညာရေးအဖွဲ့အစည်းများနှင့် နိုင်ငံတကာကျောင်းများ၏ တာဝန်ယူမှုရှိသော စီမံခန့်ခွဲမှု၊ ဆရာ၊ ဆရာမများ၏ ပညာရပ်နှင့် သင်ကြားရေးစွမ်းရည်၊ မိဘများ၏ ပူးပေါင်းပါဝင်မှုနှင့် ကျောင်းသား၊ ကျောင်းသူများ၏ ကြိုးပမ်းသင်ယူလိုစိတ်တို့သည် တစ်ခုနှင့် တစ်ခု အပြန်အလှန်အားဖြည့်ပေးသည့် အရေးပါသော အင်အားစုများဖြစ်ပါသည်။

အထူးသဖြင့် ကျောင်းသား၊ ကျောင်းသူများအနေဖြင့် လက်မှတ် သို့မဟုတ် ဘွဲ့တစ်ခုရရှိရေးထက် အသိပညာ၊ ကျွမ်းကျင်မှု၊ ဆန်းသစ်တီထွင်နိုင်စွမ်း၊ လိုက်လျောညီထွေဖြစ်နိုင်စွမ်းနှင့် တာဝန်ယူမှုရှိသော စိတ်ဓာတ်တို့ကို ဖွံ့ဖြိုးတိုးတက်စေရန် အစဉ်တစိုက် ကြိုးပမ်းအားထုတ်ခြင်းသည် အနာဂတ်လူ့အဖွဲ့အစည်းအတွက် ပိုမိုတန်ဖိုးရှိသော ရင်းနှီးမြှုပ်နှံမှုဖြစ်ပါသည်။

ပုဂ္ဂလိကပညာရေးအဖွဲ့အစည်းများ၏ ပူးပေါင်းဆောင်ရွက်မှုကို အားကောင်းစွာမြှင့်တင်သွားရန် လိုအပ်ပါသည်။ ထို့အပြင် တာဝန်သိစိတ်နှင့် တာဝန်ယူမှု ယဉ်ကျေးမှုကိုအဖွဲ့အစည်းအဆင့်တိုင်းတွင် ပိုမိုခိုင်မာစွာ တည်ဆောက်ရန်လိုအပ်ပါသည်။ ယင်းနှင့်အတူ ဥပဒေများ၊ မူဝါဒများနှင့် စည်းမျဉ်းစည်းကမ်းများကို လေးစားလိုက်နာသော အဖွဲ့အစည်းယဉ်ကျေးမှုကိုလည်း ပိုမိုခိုင်မာစေရန် ဆောင်ရွက်ရပါမည်။ ထိုသို့သော ပူးပေါင်းဆောင်ရွက်မှုများနှင့် မူဝါဒအခြေပြု အကောင်အထည်ဖော်မှုများမှတစ်ဆင့် အရည်အသွေးမြင့်၊ တာဝန်ယူမှုရှိပြီး ရေရှည်တည်တံ့သော ပညာရေးဝန်းကျင်တစ်ရပ် ပိုမိုခိုင်မာစွာ ပေါ်ထွန်းလာမည်ဖြစ်ပါကြောင်း ရေးသားတင်ပြလိုက်ရပါသည်။ ။