ဒီကနေ့ဟာ ၁၃၈၄ ခုနှစ် ကုန်ဆုံးလို့ ၁၃၈၅ ခုနှစ် မြန်မာနှစ်သစ် အခါသမယပဲဖြစ်ပါတယ်။ အခုလို မင်္ဂလာရှိလှတဲ့ မြန်မာတို့ရဲ့ နှစ်သစ်မင်္ဂလာ အခါသမယမှာ ဆရာတော်အနေနဲ့ နှစ်သစ်မင်္ဂလာနှစ်ဦး ဆုမွန်ပတ္ထနာပြုပေးပါမယ်။
ယာဒိသံ ဝပတေဗီဇံ- တာဒိသံ ဟရတေဖလံ ကလျာဏီ ကာရီ ကလျာဏံ- ပါပကာရီစ ပါပကံ။ သဂါထာဝဂ္ဂသံယုတ်။ ကလျာဏီ ကာရီ ကလျာဏံ- ကောင်းသောစေတနာဖြင့် ကောင်းသော ကုသိုလ်မျိုးစေ့တို့ကိုစိုက်ပျိုးနိုင်သော မြန်မာနိုင်ငံသူ မြန်မာနိုင်ငံသား၊ ကမ္ဘာသူ ကမ္ဘာသားများ ဖြစ်နိုင်ကြပါစေ။
ပါပကာရီစ ပါပကံ- မကောင်းသော စေတနာဖြင့် မကောင်းသော အကုသိုလ်မျိုးစေ့တို့ကို စိုက်ပျိုးမိသော မြန်မာနိုင်ငံသူ မြန်မာနိုင်ငံသား၊ ကမ္ဘာသူကမ္ဘာသားများ မဖြစ်ကြပါစေနှင့်။
ကောင်းပင်ပျိုး၍ ကောင်းကျိုးကိုယ်၌ တည်စေသူများ ဖြစ်ကြပါစေ။
ဆိုးပင်ပျိုး၍ ဆိုးကျိုးများ ကင်းဝေးသောသူများဖြစ်ကြပါစေ။
နံနက်မိုးလင်းမှမိုးချုပ် ရှာဖွေစုဆောင်းထားသော ပစ္စည်းဥစ္စာတို့သည် မိမိနောက်သို့လိုက်ပါခြင်းမပြု။ ကုသိုလ် - အကုသိုလ်နှစ်ပါးသာလျှင်လိုက်ပါခြင်းဖြစ်သည်။
သို့အတွက်ကြောင့် မိုးလင်းသည့်အချိန်မှ မိုးချုပ်သည့်အချိန်ထိ ကုသိုလ်တရားပွားများပြီး သကာလ ကောင်းကျိုးတွေရရှိပြီး ချမ်းသာသုခပြည့်ဝနိုင်ကြပါစေ။
မကောင်းတာတွေ ဖယ်ရှား၊ ကောင်းတာတွေ ပွား၊ ကောင်းကျိုး ချမ်းသာရကြပါစေ။ နှစ်သစ် အခါသမယမှာ စိတ်၏ချမ်းသာခြင်း၊ ကိုယ်၏ ကျန်းမာခြင်းပြည့်စုံပြီး ဒုက္ခခပ်သိမ်း၊ ဆင်းရဲခပ်သိမ်း ငြိမ်းကြပါစေလို့ နှစ်သစ်ကာလ အခါသမယ၌ ဆုတောင်း “ပတ္ထနာ” ပြုလိုက်ပါသည်။
No comments:
Post a Comment