သတိ၊ အသိတို့ဖြင့် ကာကွယ်ကြရမည့် အွန်လိုင်းပေါ်မှ လိမ်လည်မှုများ

 

ဘဏ်စာရင်းဖွင့် သိမ်းဆည်းထားသည့် မိမိတို့ပိုင်ငွေကြေးများကို ဆက်သွယ်ရေးကွန်ရက်အသုံးပြု၍ လိမ်လည်လွှဲပြောင်း ထုတ်ယူခံရမှုများ မကြာမီကဖြစ်ပေါ်ခဲ့သဖြင့် ပြည်သူများသတိထားနိုင်စေရန် သက်ဆိုင်ရာက အသိပေးထုတ်ပြန်ထားသည်။ နည်းပညာဖြင့် အွန်လိုင်းအသုံးပြု၍ ပြစ်မှုကျူးလွန်သူများက ဘဏ်ဝန်ထမ်းအယောင်ဆောင်ကာ ဘဏ်အကောင့်ပိုင်ရှင်ထံမှ အချက်အလက်များကို လှည့်ဖြားတောင်းခံပြီး ငွေကျပ်သိန်းပေါင်းရာနှင့် ထောင်နှင့်ချီကာ လိမ်လည် လွှဲပြောင်း ထုတ်ယူသွားကြခြင်းဖြစ်သည်။

မကြာသေးသည့် နှစ်ပိုင်းအတွင်း အွန်လိုင်းမှတစ်ဆင့် ပုံစံအမျိုးမျိုးဖြင့် ငွေကြေးလိမ်လည်မှုများ အများအပြားဖြစ်ပေါ်လျက်ရှိခြင်းနှင့်စပ်လျဉ်း၍ မီဒီယာအသီးသီးတို့က သတင်းဖော်ပြမှုများ၊ သတိပေးမှုများ ပြုလုပ်ခဲ့ကြသည်။ အွန်လိုင်းမှ ငွေကြေးလိမ်လည်မှုများတွင် ပုဂ္ဂလိကဘဏ်များမှ ဝန်ထမ်းများ၏ ဓာတ်ပုံများဖြင့် မိုဘိုင်းငွေပေးချေမှု အဆင့်မြှင့်ပေးမည်ဟုဆိုကာ လိမ်လည်၍ ဘဏ်စာရင်းဆိုင်ရာ ကိုယ်ရေးအချက်အလက်များ တောင်းယူပြီး ဘဏ်ထဲတွင်ရှိသည့် အကောင့်ပိုင်ရှင်၏ ငွေကြေးများကို အချီကြီးမကြခြင်းဖြစ်သည်။ ထို့အပြင် အသေးစားငွေချေးလုပ်ငန်းများ အမည်ခံကာ စိုက်ပျိုးစရိတ်၊ အသေးစား၊ အငယ်စား၊ အလတ်စား စီးပွားရေးလုပ်ငန်းများအတွက် ချေးငွေများပေးအပ်မည်ဆိုပြီး အာမခံငွေဦးစွာလွှဲပေးရန် တောင်းခံခြင်း၊ ကံစမ်းမဲပေါက်၍ ငွေကြေးအမြောက်အမြား၊ တန်ဖိုးကြီးပစ္စည်း စသည်တို့ရ မည်ဟု မက်လုံးပေးကာ ကုန်ကျစရိတ်ငွေ ကြိုတင်ပေးချေရန် လိမ်လည်တောင်းခံခြင်း၊ အွန်လိုင်းရင်းနှီးမြှုပ်နှံမှုပြုလုပ်ပါက ရင်းနှီးငွေပမာဏအလိုက် လစဉ်ဝင်ငွေရမည်ဟု မြှူဆွယ်၍ လိမ်လည်ခြင်း၊ အွန်လိုင်းမှပစ္စည်းရောင်းချရာတွင် ငွေကြိုလွှဲခိုင်းပြီးလိမ်လည်ခြင်း စသည်ဖြင့် လိမ်လည်နည်းမျိုးစုံစွာ ကျူးလွန်ခဲ့ကြခြင်းဖြစ်သည်။

အွန်လိုင်းမှ လိမ်လည်ကြရာတွင် ဘဏ်များ၊ အသေးစားငွေချေးလုပ်ငန်းများ အွန်လိုင်းပစ္စည်းရောင်းချသူများအဖြစ် ယုံကြည်မှုရရှိစေရန် အမှတ်တံဆိပ်များ၊ လိုဂိုများ၊ ဝန်ထမ်း များ၏ ဓာတ်ပုံများ၊ စာရွက်စာတမ်းများ စသည်တို့ကို တရားဝင်လုပ်ငန်းများမှ ပုံများကိုသုံးစွဲ၍ လှည့်ဖြားကြခြင်းဖြစ်သည်။ လိမ်လည်ခံရသူအများစုတို့မှာ နည်းပညာနှင့် အွန်လိုင်းအသုံး ပြုခြင်းဆိုင်ရာ အသိပညာအားနည်းသူများဖြစ်ကြောင်းနှင့် အွန်လိုင်းပေါ်တွင် အယုံမလွယ်သင့်ကြောင်း၊ ငွေကြေး၊ ကိုယ်ရေးအချက်အလက်တို့ မပေးသင့်ကြောင်း ကျွမ်းကျင်သူ များက အသိပေးအကြံပြုထားသည်။

သက်ဆိုင်ရာက ဖော်ထုတ်ဖမ်းဆီးခဲ့သည့် KBZ Bank Account နှစ်ခုမှငွေများကို အွန်လိုင်းအသုံးပြု၍ လိမ်လည်လွှဲပြောင်းထုတ်ယူသွားသူများမှာ နိုင်ငံခြားသားများဖြစ်ပြီး ၎င်းတို့ လိမ်လည်လွှဲပြောင်းရာတွင် အသုံးပြုသည့် Bank Account များကို တစ်ခုလျှင် ကျပ်တစ်သောင်းဖြင့် ရောင်းချ ခဲ့သူ အမျိုးသား၊ အမျိုးသမီး စုစုပေါင်းခြောက်ဦးတို့မှာလည်း အမှုတွဲတွင် ပါရှိနေရာ မသမာသူများ၏ အသုံးချခံခဲ့ရသည့်အဖြစ်ကို သင်ခန်းစာယူကြရန်နှင့် အွန်လိုင်းမှလိမ်လည်မှု များကို ကာကွယ်နိုင်ရန်အတွက် နည်းပညာနှင့် အွန်လိုင်းအသုံး ပြုမှုဆိုင်ရာဗဟုသုတများ ကြွယ်ဝရေး၊ ကိုယ်ရေးအချက်အလက်များ လုံခြုံရေး၊ သက်ဆိုင်ရာတို့မှ အခါအားလျော်စွာ ထုတ်ပြန်ပေးလျက်ရှိသည့် သတိပေးချက်များနှင့် သတင်းအချက်အလက်များကို ဂရုပြုနိုင်ရေးတို့အတွက် နှိုးဆော်တိုက်တွန်းအပ်ပါကြောင်း။ ။

မြန်မာ့အလင်း,အယ်ဒီတာ့အာဘော်