နေပြည်တော် နိုဝင်ဘာ ၅
ပြန်ကြားရေးဝန်ကြီးဌာန ပုံနှိပ်ရေးနှင့်ထုတ်ဝေရေးဦးစီးဌာန စာပေဗိမာန်က ဆရာမကြီးစောမုံညင်း၏ “မြန်မာအမျိုးသမီးဆင်ယင်ထုံးဖွဲ့မှု” စာအုပ်ကို ဖြန့်ချိရောင်းချလျက်ရှိသည်။
မြန်မာနိုင်ငံသည် ရှေးဟောင်းယဉ်ကျေးမှုအခြေခိုင်ခံ့ခဲ့သော
တိုင်းပြည်တစ်ပြည်ပင်ဖြစ်သည်။ ထိုရှေးဟောင်းရိုးရာယဉ်ကျေးမှုများအနက် အမျိုးသမီးများ၏
ဆင်ယင်ထုံးဖွဲ့မှုသည်လည်း အရေးကြီးသောကဏ္ဍမှ ပါဝင်လျက်ရှိခဲ့ပေသည်။ တိမ်မြုပ်လုနီးပါးဖြစ်နေသော
ယဉ်ကျေးမှုအထောက်အထားများနှင့် မြန်မာ့ယဉ်ကျေးမှုအဆင့်အတန်းမြင့်မားခဲ့ပုံများကို ရှာဖွေဖော်ထုတ်ရုံသာမကဘဲ
မြန်မာအမျိုးသမီးများသည် စာတစ်စောင် ပေတစ်စောင်ဖွဲ့အပ်သောသူများဖြစ်ပုံ၊ အခြားနိုင်ငံသူ
အမျိုးသမီးများထက် ထူးခြား သောအခွင့်အရေးရရှိပုံ၊ မည်သည့်ကိစ္စ၌မဆို ရှေ့ဆောင်ရှေ့ရွက်ပြုလုပ်သူများဖြစ်ပုံကို
နိုင်ငံခြား သားမှတ်တမ်းများက ဖော်ပြထားသည်များပါမကျန် တကောင်းခေတ်မှစ၍ ပျူ၊ ပုဂံ၊
အင်းဝ၊ တောင်ငူ၊ ကုန်းဘောင်၊ အမရပူရ၊ ရတနာပုံခေတ်အသီးသီး၏ ဝတ်စားဆင်ယင်မှုများကို ခေတ်လူငယ်အမျိုးသမီးများ
စိတ်ပါဝင်စားစေရန်နှင့် ဂုဏ်ယူသဘောပေါက်လာစေရန် စသည့် ရည်ရွယ်ချက်ကောင်းများဖြင့် ဆရာမကြီးစောမုံညင်းက
ရေးသားပြုစုထားပါသည်။
နိုင်ငံတစ်နိုင်ငံ၏ နှလုံးသည်းပွတ်မှာ
ယဉ်ကျေးမှုပင်ဖြစ်သည်။ ထိုနှလုံးသည်းပွတ်နှင့်တူသော
ယဉ်ကျေးမှုအမွေအနှစ်များကို ဆရာမကြီးက မှတ်တမ်းများကျန်ရစ်ရလေအောင် ပြည့်ပြည့်စုံစုံ
ကြိုးပမ်းအားထုတ်ရေးသားထားသောကြောင့် ရိုးရာယဉ်ကျေးမှုအမွေအနှစ်များကို လက်ဆင့်ကမ်းထိန်းသိမ်းစောင့်ရှောက်ကာကွယ်ရမည့်
နိုင်ငံသားတိုင်းအတွက် “မြန်မာ အမျိုးသမီးဆင်ယင်ထုံးဖွဲ့မှု” စာအုပ်သည် လက်မလွတ်တမ်းဖတ်ရှုသင့်သည့်
အိမ်တွင်ဆောင်ထားသင့်သော စာအုပ်ကောင်းတစ်အုပ်ဖြစ်ပါသည်။
အဆိုပါစာအုပ်ကို ရောင်းဈေး ကျပ် ၄၅၀၀
ဖြင့် အမှတ်(၅၂၉ - ၅၃၁) ကုန်သည်လမ်းရှိ စာပေဗိမာန်စာအုပ်ဆိုင် ဖုန်း ၀၁-၈၂၄၉၀၃၁၊ ၀၁-၈၃၈၁၄၄၈၊
အမှတ် (တ- ၅၅) သပြေကုန်းဈေး နေပြည်တော်ရှိ စာပေဗိမာန်စာအုပ်ဆိုင် ဖုန်း ၀၆၇-၃၄၁၄၆၈၁၊
၈၆ လမ်း ၂၁ လမ်းနှင့် ၂၂ လမ်းကြား မန္တလေးမြို့ရှိ စာပေဗိမာန်စာအုပ်ဆိုင် ဖုန်း ၀၂-၄၀၃၀၁၈၆
နှင့် အမြို့မြို့ရှိ စာပေဗိမာန်ကိုယ်စားလှယ်များထံတွင် ဆက်သွယ်ဝယ်ယူနိုင်ကြောင်းနှင့်
လက်ကားမှာယူလိုပါက အမှတ် (၅၂၉-၅၃၁)ကုန်သည်လမ်းရှိ စာပေဗိမာန်အရောင်းဌာနဖုန်း ၀၁-၈၂၄၉၀၃၁၊
၀၁-၈၃၈၁၄၄၈ သို့ ဆက်သွယ်နိုင်ကြောင်း သတင်းရရှိသည်။
သတင်းစဉ်
No comments:
Post a Comment