လွိုင်ကော် နိုဝင်ဘာ ၆
ကယားပြည်နယ်အစိုးရအဖွဲ့မှ ကြီးမှူးကျင်းပသည့် ကယားပြည်နယ်(၃၃)ကြိမ်မြောက် စုပေါင်းမဟာဘုံကထိန်အလှူတော်မင်္ဂလာအခမ်းအနားကို ယမန်နေ့နံနက်ပိုင်းက လွိုင်ကော်မြို့၊ ပြည်နယ်ခန်းမ၌ ကျင်းပပြုလုပ်ခဲ့သည်။
ရှေးဦးစွာ အခမ်းအနားသို့ ကြွရောက်လာကြသော
ဆရာတော် သံဃာတော် အရှင်သူမြတ်များ၊ ကယားပြည်နယ်ဝန်ကြီးချုပ် ဦးဇော်မျိုးတင်နှင့် ပြည်နယ်အစိုးရအဖွဲ့ဝင်များ၊
ဒေသကွပ်ကဲမှု စစ်ဌာနချုပ်(လွိုင်ကော်)၊ ဒေသကွပ်ကဲရေးမှူး၊ ဌာနဆိုင်ရာများနှင့် ဖိတ်ကြားထားသည့်
ဧည့်သည်တော်များက “နမောတဿ” သုံးကြိမ်ရွတ်ဆို ဘုရားကန်တော့၍ အခမ်းအနားကို ဖွင့်လှစ်ခဲ့ကြပြီး
ကယားပြည်နယ်သံဃနာယကအဖွဲ့ဥက္ကဋ္ဌ၊ လွိုင်ကော်မြို့၊ ကျောင်းထိုင်ဘုန်းကြီးသင်တန်းကျောင်း
ဆရာတော်ဘဒ္ဒန္တပညာစက္က(မဟာဂန္တဝါစကပဏ္ဍိတ ၊ အဂ္ဂမဟာသဒ္ဓမ္မဇောတိကဓဇ) ဆရာတော်ဘုရားထံမှ
ငါးပါးသီလခံယူဆောက်တည်ခဲ့ကြသည်။
ထို့နောက် ဆရာတော် သံဃာတော်အရှင်သူမြတ်များ
ရွတ်ပွားသရဇ္စျာယ်တော်မူသည့် မေတ္တာသုတ်ပရိတ်တရားတော်များကို နာယူကြည်ညိုကြပြီး ပြည်နယ်ဝန်ကြီးချုပ်
ဦးဇော်မျိုးတင်နှင့် တာဝန်ရှိသူများက ဆရာတော် သံဃာတော် အရှင်သူမြတ်များအား ကထိန်လျာသင်္ကန်းနှင့်
လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့ကြကာ လွိုင်ကော်မြို့နယ် သံဃနာယကအဖွဲ့၊ တွဲဖက်အကျိုးတော်ဆောင်
မစိုးရိမ်ကျောင်းဆရာတော် ဘဒ္ဒန္တသုမနနှင့် လွိုင်ကော်မြို့နယ် သံဃနာယကအဖွဲ့ အကျိုးတော်ဆောင်၊
လောဓမ္မကျောင်းဆရာတော် ဘဒ္ဒန္တဝဏ္ဏိတာနန္ဒ အရှင်သူမြတ်နှစ်ပါးတို့က ကထိန်အမေးအဖြေ ဆောင်ရွက်တော်မူခဲ့ကြသည်။
ယင်းနောက် ကယားပြည်နယ်သံဃနာယကအဖွဲ့ဥက္ကဋ္ဌ၊
လွိုင်ကော်မြို့၊ ကျောင်းထိုင်ဘုန်းကြီး သင်တန်းကျောင်းဆရာတော် ဘဒ္ဒန္တပညာစက္က(မဟာဂန္တဝါစကပဏ္ဍိတ
၊ အဂ္ဂမဟာသဒ္ဓမ္မဇောတိကဓဇ) ဆရာတော်ဘုရားထံမှ အနုမောဒနတရားနာကြား၍ ရေစက်သွန်းချအမျှပေးဝေခဲ့ပြီး
“ဗုဒ္ဓသာသနံ စိရံတိဋ္ဌတု” သုံးကြိမ်ရွတ်ဆို၍ အခမ်းအနားကို ရုပ်သိမ်းခဲ့ကြပြီး ပြည်နယ်ဝန်ကြီးချုပ်နှင့်
တာဝန်ရှိသူများက ဆရာတော် သံဃာတော် အရှင်သူမြတ်များအား နေ့ဆွမ်းဆက်ကပ်လှူဒါန်းခဲ့ကြသည်။
ယနေ့အလှူတော်မင်္ဂလာအခမ်းအနားတွင် ကယားပြည်နယ်အစိုးရအဖွဲ့၊
ဌာနဆိုင်ရာများနှင့် စေတနာရှင်အလှူရှင်များက ပြည်နယ်အတွင်းရှိ ဘုန်းတော်ကြီးကျောင်းများသို့
ပဒေသာပင်(၁၀၄)ပင်ကို စုပေါင်းလှူဒါန်းခဲ့ကြပြီး လှူဒါန်းမှုအစုစုတို့အတွက် စုပေါင်းလှူဒါန်းငွေမှာ
ကျပ်သိန်း ၅၄၁,၇၀၇၅၀ ဖြစ်ကြောင်း သိရသည်။
စိုးလှိုင်ဌေး
No comments:
Post a Comment