တမူးဖြစ်စဉ်နှင့်ပတ်သက်၍ နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်း၏ ဖြေကြားချက်

 

မြန်မာနိုင်ငံ တမူးမြို့၌ ဇူလိုင်လ ၅ ရက်နေ့က အိန္ဒိယနိုင်ငံသားနှစ်ဦးအား သေနတ်ဖြင့် ပစ်ခတ်ခံရသဖြင့် သေဆုံးခဲ့ကြောင်း သိရသည်။ အဆိုပါကိစ္စနှင့်ပတ်သက်၍ အိန္ဒိယနိုင်ငံဘက် ခြမ်းမှ လူ ၅၀ ဦးက ဆန္ဒပြခဲ့ကြပြီး တမူးမြို့ရှိ လက်ဖက်ရည်ဆိုင် တစ်ဆိုင်အားခဲများဖြင့် ပစ်ပေါက်ခဲ့ကြောင်း သိရသည်။ ယင်းကိစ္စနှင့်ပတ်သက်၍ ဖြစ်စဉ်အမှန်အား နိုင်ငံတော်စီမံ အုပ်ချုပ်ရေးကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ယခုကဲ့သို့ ဖြေကြားခဲ့ပါသည်-

“ဇူလိုင်လ ၅ ရက်နေ့ နေ့လယ် ၁၂ နာရီခွဲလောက်က တမူးမြို့စော်ဘွားကုန်းရပ်ကွက်မှာ အမျိုးသားနှစ်ယောက် သေနတ်နဲ့အပစ်ခံရပြီး သေဆုံးခဲ့ရတဲ့အကြောင်းကို တရားခံတွေထဲကပဲ ကျွန်တော်တို့ကို သတင်းပို့ပါတယ်။ ဒါကြောင့် တမူးမှာရှိတဲ့ ရဲစခန်းက မြို့နယ်မှူးအပါအဝင် လုံခြုံရေးတပ်ဖွဲ့ဝင်တွေက နေ့လယ် ၁၂ နာရီ ၄၅ လောက်မှာ သွားရောက်စစ်ဆေးခဲ့ပါတယ်။ စစ်ဆေးတဲ့အခါမှာ ဟိန္ဒူလူမျိုးလို့ယူဆရတဲ့ အသက် ၃၅ နှစ်ခန့်ရှိအရွယ် အမျိုးသားတစ် ယောက်၊ အသက် ၃၂ နှစ်ခန့်လို့ ခန့်မှန်းမိတဲ့ အမျိုးသားတစ်ယောက်၊ ဒဏ်ရာတွေကတော့ သေနတ်နဲ့ပစ်သွားတာချည်းပဲ၊ ဦးခေါင်းတွေပဲထိမှန်တဲ့ အနေအထားရှိပါတယ်။ သေဆုံးနေတာ တွေ့ရတယ်။ အဲ့ဒါနဲ့ ကျွန်တော်တို့ မြို့နယ်ရဲတပ်ဖွဲ့နဲ့ လုံခြုံရေးအဖွဲ့တွေဟာ အနီးနား ပတ်ဝန်းကျင်ကို စစ်ဆေးတယ်။ စစ်ဆေးတဲ့အခါမှာ ၁၂ နာရီခွဲလောက်မှာ အဲ့ဒီ နှစ်ယောက်ဟာ စော်ဘွားရပ်ကွက်အတွင်းကို ဆိုင်ကယ်တစ်စီးနဲ့ ဝင်လာတယ်။ နှစ်ယောက်လုံး အတူတူစီးကြတာပဲ၊ ဆိုင်ကယ်တစ်စီးနဲ့ဝင်လာတယ်။ ဝင်လာတဲ့အချိန်မှာပဲ အကြမ်းဖက်အဖွဲ့တစ်ဖွဲ့က သေနတ်နဲ့ပစ်ခတ်ပြီး ထွက်ပြေးသွားတယ်လို့ သိရတယ်။ အဲ့ဒါကြောင့် အလောင်းတွေကို ကျွန်တော်တို့က တမူးဆေးရုံကိုပို့တယ်။ တစ်နာရီခွဲလောက်မှာရောက်တယ်။ တမူးရဲစခန်းမှာ သေမှုသေခင်းဖွင့်တယ်။ ဖွင့်ပြီးတော့ အဲ့ဒီအလောင်းတွေအကုန်လုံးကို မြို့မိ၊ မြို့ဖတွေ ရပ်ကွက်ကျေးရွာအုပ်ချုပ်ရေးမှူးတွေနဲ့ သတင်းစုံစမ်းစစ်ဆေးခဲ့တယ်။ ဆောင်ရွက်ခဲ့တယ်။ အဲ့ဒီမှာလာရောက်ဆက်သွယ်တာတော့ မရှိခဲ့ဘူးဗျ။ မရှိခဲ့တဲ့အတွက်ကြောင့် ၆ ရက်နေ့ မနက် ၇ နာရီမှာ တမူးမြို့သုသာန်မှာ မီးသင်္ဂြိုဟ်ခဲ့တယ်လို့သိရတယ်။ ဒါနဲ့ပတ်သက်ပြီးတော့ ဇူလိုင်လ ၆ ရက်နေ့ဖြစ်စဉ်ဖြစ်ပြီး နောက်တစ်နေ့ နေ့လယ် ၁ နာရီခွဲလောက်မှာမှ အိန္ဒိယနိုင်ငံ မဏိပူရပြည် နယ် Moreh မြို့မှာရှိတဲ့ နယ်စပ်ကုန်သွယ်ရေးအသင်းက တာဝန်ရှိသူတစ်ယောက်က ကျွန်တော်တို့ဆီကို ဖုန်းနဲ့ဆက်သွယ်လာတယ်။ ဆက်သွယ်လာပြီးတော့ အဲ့ဒီသေဆုံးသူတွေက Moreh မြို့ဟိန္ဒူရပ်ကွက်က တီမိုဟန် ၂၈ နှစ်နဲ့ အာရ်ဂျန် ၃၅ နှစ်ဖြစ်တယ်ဆိုပြီးတော့ ကျွန်တော်တို့ကို ပြောလာတယ်။ ဇူလိုင်လ ၅ ရက်မှာ မြန်မာ-အိန္ဒိယနယ်စပ် ပန်းပဲတန်းပေါက် (ဒေသအခေါ်ပေါ့)ကနေမြန်မာနိုင်ငံထဲကို ရောက်လာတဲ့လူတွေဖြစ်တယ်လို့ ပြောပြချက်အရ သိရတယ်။ အဲ့ဒီအချိန်မှာ ကျွန်တော်တို့ပြန်ပြီးတော့ ဆက်သွယ်ပါတယ်။ သူတို့ တရားဝင် ဝင်လာလားဆိုပြီးမေးတဲ့အခါ တရားဝင် ဝင်ရောက်တာမျိုးတော့ မရှိပါဘူး။ အဲ့ဒီဘက်မှာလည်း အများစုအတွက်က တမူး-Moreh ဆိုတာ ဆက်စပ်နေတဲ့နယ်မြေ ဖြစ်တဲ့အတွက်ကြောင့်မလို့ သွားလာကူးသန်းမှုတွေရှိတယ်။ တရားဝင် ဝင်ရောက်တာ၊ မရောက်တာကတော့ အဓိကတော့ မဟုတ်ဘူး၊ သွားလာကူးသန်းမှုတွေရှိတယ်။ အဲ့ဒီမှာလည်း ၅ ရက်နေ့က တမူးမြို့နယ် ကုန်းလမ်းပို့ဆောင်မှုညွှန်ကြားရေးဦးစီးဌာနရုံးကို PDF အမည်ခံအကြမ်းဖက်အဖွဲ့တွေ ဝင်ရောက်ဖျက်ဆီးခဲ့တာတွေ၊ လုံခြုံရေးတပ်ဖွဲ့ဝင်တွေနဲ့ ပစ်ခတ်တိုက်ခိုက်မှုတွေ ရှိခဲ့တာတွေ ရှိပါတယ်ဗျ။ အဲ့ဒါကတော့ ကညနရုံးမှာဖြစ်ခဲ့တဲ့ ဖြစ်စဉ်ရှိခဲ့တယ်။ အဲ့ဒီမတိုင်ခင်မှာ တစ်ယောက်အသတ်ခံခဲ့ရတာမျိုးရှိခဲ့ပါတယ်။ ဒီဟာနဲ့ပတ်သက်ပြီး ၆ ရက်နေ့ ညနေ ၃ နာရီ လောက်မှာ အိန္ဒိယဘက်ခြမ်းက လူ ၅၀ ယောက်လောက် ဆန္ဒပြမှုဖြစ်ပွားခဲ့တယ်။ အဲ့ဒီနှစ်ဦး သေဆုံးတဲ့ကိစ္စနှင့်ပတ်သက်ပြီးတော့ တမူးဘက်က လက်ဖက်ရည်ဆိုင်တစ်ဆိုင်ကို ခဲနဲ့ ပစ်ပေါက်ခဲ့တာတော့ရှိပါတယ်။ သို့သော် Moreh နယ်စပ်ကုန်သွယ်ရေးအသင်းက တာဝန်ရှိသူတွေအနေနဲ့ နှစ်နိုင်ငံလုံခြုံရေးအဖွဲ့တွေနဲ့ ဖြေရှင်းပေးလိုက်တဲ့အတွက်ကြောင့်မလို့ သူတို့ အေးအေးချမ်းချမ်းပဲ လူစုခွဲထွက်ခွာသွားတာရှိပါတယ်။ အဲ့ဒီဖြစ်စဉ်နောက်ပိုင်းတွေမှာတော့ Moreh မြို့မှာရှိနေတဲ့ လုံခြုံရေးတပ်ဖွဲ့တွေက မြန်မာနိုင်ငံဘက်ကို အကြောင်းကြားလာတာ ရှိတယ်။ မြန်မာနိုင်ငံဘက်က လုံခြုံရေးတပ်ဖွဲ့တွေကလည်း Moreh ဘက်ကို အကြောင်းကြား တာရှိတယ်။ အကြောင်းကြားပြီးတော့ နှစ်ဖက်ထိန်းသိမ်း‌ဆောင်ရွက်ခဲ့ရတယ်။ ပြဿနာကတော့ ပြေလည်သွားတာရှိပါတယ်။ အဲ့ဒီမှာ စွပ်စွဲချက်တွေတော့လာတာပေါ့။ ထုံးစံအတိုင်းပဲ။ ထိုကိစ္စမှာ တပ်ကပဲပစ်သယောင်နဲ့ နှစ်နိုင်ငံချစ်ကြည်ရေး ပျက်ပြားစေဖို့အတွက် တပ်ကပဲ ပစ်ခတ်သယောင်လုပ်ခဲ့တာ။ သို့သော် နှစ်နိုင်ငံတပ်များအနေနဲ့ ဆက်သွယ်မှု၊ ဆက်ဆံမှု အမြဲတမ်းရှိတယ်။ အားလုံးလည်းသိပြီးဖြစ်ပါတယ်။ အားလုံးလည်းသိပြီးဖြစ်တဲ့အတွက် ပြဿနာတွေတော့ ပြေလည်သွားပါပြီ။ အိန္ဒိယနိုင်ငံအနေနဲ့တော့ ဒီဟာနဲ့ပတ်သက်ပြီးရင် နိုင်ငံခြားရေးဝန်ကြီးဌာနအချင်းချင်း ဆက်သွယ်ပြီး မေးမြန်းနေတာလည်းရှိတယ်။ လုံခြုံရေး တပ်ဖွဲ့အချင်းချင်းဆက်သွယ်ပြီး မေးမြန်းနေတာလည်းရှိတယ်။ အားလုံးထိန်းသိမ်းဆောင်ရွက် လျက်ရှိပါတယ်။ ကျွန်တော်တို့အနေနဲ့ သတ်သွားသည့်လူတွေနဲ့ပတ်သက်ပြီးရင် တရားဝင်စုံစမ်းစစ်ဆေးမှုတွေ လုပ်ဆောင်နေပါတယ်။ အသေးစိတ်စုံစမ်းစစ်ဆေးမှုတွေလည်း လုပ်ဆောင်နေပါတယ်။ နှစ်နိုင်ငံနယ်စပ်ဒေသတည်ငြိမ်ရေး၊ အရင်ကတည်းကတိုင် ကျွန်တော်တို့က အိန္ဒိယနဲ့ မြန်မာကြားထဲမှာ အချင်းချင်းသဘောတူညီချက်ရှိပြီးဖြစ်တယ်။ အိန္ဒိယကို ဆန့်ကျင် နေတဲ့ အဖွဲ့အစည်းတွေအနေနဲ့လည်း မြန်မာနိုင်ငံထဲမှာ ဝင်ရောက်အခြေပြုတာ၊ အခြေချတာ၊ လှုပ်ရှားတာမျိုးမလုပ်အောင် မြန်မာနိုင်ငံကို ဆန့်ကျင်နေတဲ့ အဖွဲ့အစည်းတွေအနေနဲ့လည်း အိန္ဒိယနိုင်ငံထဲမှာ ဝင်ရောက်အခြေပြု၊ အခြေချ၊ လှုပ်ရှားတာမျိုးမရှိအောင် ကျွန်တော်တို့ လုံခြုံရေးတပ်ဖွဲ့ဝင်တွေနဲ့ ဆောင်ရွက်လျက်ရှိတယ်။ ဒီကိစ္စကိုလည်း ကျွန်တော်တို့ အသေးစိတ် စုံစမ်းဆောင်ရွက်လျက်ရှိပြီး အိန္ဒိယနိုင်ငံချစ်ကြည်‌ရေးနှင့် ပတ်သက်ပြီးတော့ မထိခိုက်အောင် ကျွန်တော်တို့ ဆောင်ရွက်လျက်ရှိပါတယ်”

အမြန်ဆုံးဖမ်းဆီးရမိရေး ဆောင်ရွက်လျက်ရှိ

“အဲ့ဒီမှာတော့ နယ်စပ်ဒေသမြို့ဖြစ်တာနဲ့အညီ ယခင်ကတည်းကတိုင် ဒီလိုမျိုးအသတ်ခံရတဲ့ ပြဿနာမျိုးလေးတွေရှိခဲ့တယ်။ အဲ့ဒီဘက်မှာလည်း အဖွဲ့အစည်းတွေက တချို့သော တရားမဝင်လက်နက်ကိုင်အဖွဲ့အစည်းတွေစုံတယ်။ ကူကီးအဖွဲ့တွေတို့၊ ကသည်းအဖွဲ့တွေတို့ ရှိခဲ့တာမျိုးတွေရှိတယ်။ အခုနောက်ပိုင်းမှာ PDF အမည်ခံအကြမ်းဖက်အဖွဲ့တွေ ပေါ်တဲ့အခါမှာ သူတို့ကိုယ်တိုင်ကြေညာချက်ထုတ်ထားတာပဲ။ တမူးမြို့ပြပြောက်ကျားအဖွဲ့လိုမျိုး အကြမ်းဖက် အဖွဲ့မျိုးတွေ၊ တမူး PDF အဖွဲ့လို အကြမ်းဖက်အဖွဲ့မျိုးတွေ သူတို့ရဲ့ထုတ်ပြန်ချက်အရ တမူးဘက်မှာကိုပဲ PDF တပ်ရင်းသုံးရင်းလောက် ရှိတယ်ဆိုပြီး ထုတ်ပြန်ခဲ့တာရှိတယ်။ ယခင်ကလည်း ကျွန်တော်တို့မိခဲ့တဲ့ဟာတွေရှိပါတယ်။ တမူးမှာရှိနေတဲ့ တချို့သောစီးပွားရေး လုပ်ငန်းရှင်တွေက ဒီအကြမ်းဖက် PDF တွေကိုထောက်ပံ့နေလို့ ကျွန်တော်တို့ သတင်းထုတ် ပြန်ခဲ့ရတာတွေလည်းရှိတယ်။ ဖမ်းဆီးမေးမြန်းခဲ့ရတဲ့တာတွေလည်းရှိတယ်။ ဒါ့အပြင် လွန်ခဲ့တဲ့ တစ်လပိုင်းက တမူးအကျဉ်းစခန်း အုတ်ဖိုကန်ပေါင်အကျဉ်းစခန်း တမူးက PDF တပ်ရင်း အမည်ခံအကြမ်းဖက်အဖွဲ့က ဝင်ရောက်စီးနင်းတိုက်ခိုက်ခဲ့လို့ လက်နက်တွေပါသွားတဲ့ ဖြစ်စဉ်တွေလည်း ဖြစ်ခဲ့ဖူးတယ်။ ဒါ့အပြင် တချို့ရှိနေတာစီးပွားရေးအရ ဆောင်ရွက်ကြတဲ့အခါ မကျေလည်မှုတွေရှိလို့ သတ်ဖြတ်ခဲ့တဲ့ ဖြစ်စဉ်ကြီးတွေလည်းရှိတယ်။ ဒီဟာတွေ ဖြစ်စဉ်မျိုးတွေ လည်းရှိတယ်။ ယခုဟာကတော့ ကျွန်တော်တို့အနေနဲ့ ဒီ PDF အဖွဲ့တွေ၊ တမူးမှာရှိတဲ့ PDF အဖွဲ့တွေအနေနဲ့ အလစ်မှာလုပ်ကြံသတ်ဖြတ်သွားတယ်လို့ပဲ ကျွန်တော်တို့ယူဆတယ်။ ဒါနဲ့ပတ် သက်ပြီးလည်း ဆောင်ရွက်လျက်ရှိပါတယ်။ အဲ့ဒီမှာ ကျွန်တော်ထပ်မံပြီး ဖြည့်စွက်ပြောလို တာကတော့ ကျွန်တော်တို့နဲ့ အိန္ဒိယနိုင်ငံနဲ့က ကြာရှည်ရင်းနှီးတဲ့ ချစ်ကြည်ရင်းနှီးမှုတွေရှိပြီး ဖြစ်ပါတယ်။ အိန္ဒိယနိုင်ငံဘက်ရဲ့ စိုးရိမ်ပူပန်မှုကိုလည်း ကျွန်တော်တို့ သိရှိနားလည်ပါတယ်။ ဒါကြောင့်မလို့ ကျွန်တော်တို့အနေနဲ့ သတ်ဖြတ်သွားတဲ့ တရားခံများကို အမြန်ဆုံးဖမ်းဆီးရမိရေး ကျွန်တော်တို့ ဆောင်ရွက်လျက်ရှိပါတယ်။ အိန္ဒိယ-မြန်မာ နှစ်နိုင်ငံနယ်စပ်ဒေသတည်ငြိမ်ရေး ကို အလေးထားဆောင်ရွက်လျက်ရှိတယ်။ တချို့သော အိန္ဒိယနဲ့ မြန်မာနယ်စပ်မတည်မငြိမ်ရေး ဖြစ်လာစေရေး၊ အိန္ဒိယနှင့်မြန်မာ အစိုးရနှစ်ရပ်အကြား အထင်အမြင်လွဲမှားမှုဖြစ်ပေါ်စေရေး အတွက် အချို့သော မီဒီယာတွေ၊ အချို့သောလှုံ့ဆော်သူတွေ လုပ်ဆောင်နေတာ တွေ့ရပါတယ်။ ဒါတွေကို တမူးမှာရှိတဲ့ ဒေသခံတွေကော ဟိုဘက်အိန္ဒိယ ဘက်ခြမ်းမှာရှိတဲ့ Moreh မှာရှိတဲ့ ဒေသခံတွေအားလုံးက နားလည်ပြီး နှစ်နိုင်ငံချစ်ကြည်ရေးကို ခိုင်မြဲစွာ ဆောင်ရွက်နိုင်ဖို့အတွက် ကျွန်တော်တို့ လုံခြုံရေးတပ်ဖွဲ့များနဲ့ လက်တွဲပူးပေါင်းဆောင်ရွက်သွားကြဖို့ မေတ္တာရပ်ခံလိုပါ တယ်”