မော်လမြိုင် ဧပြီ ၁၁
မွန်ပြည်နယ်အနေဖြင့် တိုင်းရင်းသားအချင်းချင်း ချစ်ကြည်လေးစားမှုရှိစေရေး၊ စကား၊ စာပေ၊ အနုပညာ၊ ယဉ်ကျေးမှု၊ ရိုးရာဓလေ့ ထုံးတမ်းများ၊ မပျောက်မပျက် ထိန်းသိမ်းစောင့်ရှောက်နိုင်စေရေး နှစ် (၅၀)ပြည့် မွန်အမျိုးသားဝတ်စုံ ရွှေရတုအထိမ်းအမှတ် အခမ်းအနားကို ယမန်နေ့ နံနက်ပိုင်းက မော်လမြိုင်မြို့ ဆန်းရှိုင်းဟိုတယ်တွင် ကျင်းပခဲ့သည်။
အခမ်းအနားသို့ မွန်ပြည်နယ်ဝန်ကြီးချုပ် ဦးဇော်လင်းထွန်း၊ ပြည်နယ်အစိုးရအဖွဲ့ဝင်ဝန်ကြီးများ၊ ကျင်းပရေးကော်မတီဝင်များ၊ ဖိတ်ကြားထားသော ဧည့်သည်တော်များက နှစ်(၅၀)ပြည့် မွန်အမျိုးသားဝတ်စုံ ရွှေရတုအထိမ်းအမှတ် အခမ်းအနား တက်ရောက်ခဲ့ကြသည်။
အခမ်းအနားတွင် မွန်တိုင်းရင်းသားရိုးရာ တပင်တိုင်အက၊ ရွှေဟင်္သာမောင်နှံအက မွန်ဘာသာ ဖြင့် လျးဟံမန် (ရာမညသီချင်း) ဧည့်ခံဖျော်ဖြေ တင်ဆက်ခဲ့ပြီး နှစ် (၅၀) ပြည့် မွန်အမျိုးသား ဝတ်စုံ ရွှေရတုအထိမ်းအမှတ် အခမ်းအနားတွင် မွန်အမျိုးသားဝတ်စုံ ဖော်ထုတ်ပြသနိုင်ရေး၊ မွန်တိုင်းရင်းသား လူမျိုးများ၏ ရိုးရာဓလေ့ ထုံးတမ်းများ၊ မပျောက်မပျက် ထိန်းသိမ်းစောင့်ရှောက်ရေးတို့ကို တင်ပြခဲ့ကြသည်။
ထို့နောက် ပြည်နယ်တိုင်းရင်းသားရေးရာဝန်ကြီး ဦးခင်မောင်ဦးက ပြည်ထောင်စု သမ္မတ မြန်မာနိုင်ငံတော်အတွင်း မီတင်းနေထိုင်ကြသည့် တိုင်းရင်းသားတိုင်းသည် စာပေယဉ်ကျေးမှု ဓလေ့ထုံးတမ်း အစဉ်အလာများကို အစဉ်တစိုက် ထိန်းသိမ်းလာခဲ့ပါကြောင်း၊ သမိုင်းအစဉ် အလာ ကြီးမားသည့် မွန်တိုင်းရင်းသားများသည် မြန်မာမာနိုင်ငံအတွင်းသို့ အစောဆုံးဝင်ရောက် နေထိုင်ကြသည့် တိုင်းရင်းသားလူမျိုးများ ဖြစ်ပါကြောင်း၊နိုင်ငံတော်အနေဖြင့် တိုင်းရင်းသား များအားလုံး ဟန်ချက်ညီညီ ဖွံ့ဖြိုးတိုးတက်မှုများ ဖော်ဆောင်နိုင်ရေးအတွက် အမျိုးသား ပြန်လည်သင့်မြတ်ရေးနှင့် ပြည်ထောင်စုငြိမ်းချမ်းရေးကို ကြိုပမ်းဆောင်ရွက်လျက်ရှိကြောင်း၊ အခါသမယမှသည် မိမိတို့ပြည်နယ်အကျိုး၊ ပြည်ထောင်စုအကျိုးတို့ကို အခြားသော တိုင်းရင်း သား ညီအကိုမောင်နှများနှင့် အညီ အတူလက်တွဲ ဆက်လက်ပါဝင်ကြပါစေလိုကြောင်း ပြောကြားခဲ့သည်။
ဆက်လက်၍ နှစ် (၅၀)ပြည့် မွန်အမျိုးသားဝတ်စုံ ရွှေရတုအထိမ်းအမှတ် အခမ်းအနား ကျင်းပရေး ကော်မတီဝင်များက ၁၉၇၁ ခုနှစ်တွင် မွန်အမျိုးသားဝတ်စုံ ဖြစ်မြောက်ရေးအတွက် ကြိုးပမ်းဆောင်ရွက်ချက်များ၊ နှစ် (၅၀)ပြည့် မွန်ပြက္ခဒိန် ထုတ်ဝေဖြန့်ဖြူးမှု အကြောင်းအရာ များကို ရှင်းလင်းတင်ပြသည်။
မွန်ပြည်နယ် အနေဖြင့် တိုင်းရင်းသား အချင်းချင်း ချစ်ကြည်လေးစားမှုရှိစေရေး၊ စကား၊ စာပေ၊ အနုပညာ၊ ယဉ်ကျေးမှု၊ ရိုးရာဓလေ့ ထုံးတမ်းများ၊ တိုင်းရင်းသားလူမျိုးများ၏ ပညာရေး၊ ကျန်းမာရေး၊ စီးပွားရေးနှင့် လမ်းပန်းဆက်သွယ်ရေး ကဏ္ဍများကိုလည်း အထူးအလေးပေး ဆောင်ရွက်လျက်ရှိပါကြောင်း သိရှိရသည်။
ခင်စန်းမြင့် ပြန်/ဆက်
No comments:
Post a Comment