ကိုဗစ်-၁၉ အတည်ပြုလူနာကုသရေး အဆောင်သစ် ဖွင့်လှစ်ရန် ပြင်ဆင်ဆောင်ရွက်ထားမှုအား ကြည့်ရှုစစ်ဆေး

 

ကျိုင်းတုံ ဩဂုတ် ၁၁

ရှမ်းပြည်နယ်(အရှေ့ပိုင်း)၊ ကျိုင်းတုံမြို့၌ ကိုဗစ်-၁၉ ရောဂါ အတည်ပြုလူနာကုသရေးဆောင်အသစ် ဖွင့်လှစ်ရန် ပြင်ဆင်ဆောင်ရွက်ထားမှုအား ယနေ့ နံနက် ၈ နာရီခွဲက တြိဂံဒေသတိုင်းစစ်ဌာနချုပ်တိုင်မှူး ဗိုလ်မှူးချုပ် မျိုးမင်းထွန်းနှင့် တာဝန်ရှိသူများက သွားရောက်ကြည့်ရှု စစ်ဆေးခဲ့သည်။

ကျိုင်းတုံတက္ကသိုလ်၊ နမ့်ဘော်ဆောင်ရှိ  ကိုဗစ်-၁၉ ရောဂါ အတည်ပြုလူနာများ ကုသရေးဆောင် အသစ်တွင် အတည်ပြုလူနာ ၁၂၆ ဦး ထားရှိကုသပေးနိုင်ရေး ဌာနဆိုင်ရာများ၊ တပ်မတော်သားများ၊  မီးသတ်တပ်ဖွဲ့ဝင် များက ကုတင်၊ ထိုင်ခုံ၊ စားပွဲများ၊ အိပ်ယာခင်း၊ စောင်များ Social Distancing ရှိစေရေး စနစ်တကျ ကြိုတင်ပြင်ဆင်ဆောင်ရွက်ထားရှိမှု၊ စုပေါင်းသန့်ရှင်းရေးဆောင်ရွက်နေမှုတို့အား တြိဂံဒေသတိုင်းစစ်ဌာနချုပ် တိုင်မှူး ဗိုလ်မှူးချုပ် မျိုးမင်းထွန်း၊ ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးဝင်းမင်းသိန်း၊ မြို့နယ်အုပ်ချုပ်ရေးမှူး ဦးလှိုင်းမောင်မောင်နှင့် တာဝန်ရှိသူများက ကြည့်ရှုအားပေးပြီး လိုအပ်သည့် ကိုဗစ်-၁၉ ကာကွယ်ရေးသုံး ပစ္စည်းများ ထောက်ပံ့ဖြည့်ဆည့်ဆောင်ရွက်ပေးခဲ့သည်။

ကျိုင်းတုံတက္ကသိုလ်ဝင်းအတွင်း ပညာရတနာဆောင်ရှိ Community Based Facility Quarantine Centre နှင့် သဇင်ဆောင်တွင် အတည်ပြုလူနာကုသဆောင် ထားရှိဆောင်ရွက်လျက်ရှိပြီး အတည်ပြုလူနာများ ထပ်တိုး ရောက်ရှိလာပါက ထားရှိကုသနိုင်ရေး နမ့်ဘော်ဆောင်အား ကုသရေးဆောင် အဖြစ် ကြိုတင်စီစဉ် ဆောင်ရွက်ထားခြင်းဖြစ်ကြောင်း သိရသည်။

ကျိုင်းတုံမြို့နယ်တွင် ကိုဗစ်-၁၉ တတိယလှိုင်းကာလ ၂၀၂၁ ခုနှစ် မေလ တတိယပိုင်းမှ ဩဂုတ် ၁၁ ရက်ထိ အတွင်း အတည်ပြုလူနာ ၄၄၅ ဦး၊ ဆေးရုံဆင်း ၁၈၃ ဦး၊ သေဆုံးသူ ၂ ဦး၊ ကုသဆဲ ၂၆၀ ဦးရှိပြီး ကိုဗစ်-၁၉ ရောဂါကာကွယ်ထိန်းချုပ်ကုသရေးလုပ်ငန်းများကို တာဝန်ရှိသူများက အရှိန်အဟုန်မြှင့် ဆောင်ရွက် လျက်ရှိကြောင်း သိရသည်။

အောင်ဇင်မြင့်(ပြန်/ဆက်)