တိုင်းရင်းသားတွေ တစ်နေရာတည်းမှာ ဆုံစည်းပြီး စီးပွားရေး၊ ယဉ်ကျေးမှု၊ ချစ်ခင်ရင်းနှီးမှုတွေ ဖော်ဆောင်ဖို့အတွက် လုပ်တဲ့ပွဲဖြစ်ပါတယ်

ဦးလဖိုင်ခွန်ဆာ

မြန်မာနိုင်ငံအတွင်းရှိ တိုင်းရင်းသား သွေးချင်းညီအစ်ကို ၊ မောင်နှမများ၏ ရိုးရာယဉ်ကျေးမှုနှင့် စည်းလုံးညီညွတ်မှုကို ထုတ်ဖော်ပြသ နိုင်ရန် ရည်ရွယ်ပြီး မြန်မာနိုင်ငံ တိုင်းရင်းသား လုပ်ငန်းရှင်အသင်းက ကြီးမှူးကျင်းပသည့် "သွေးချင်းတို့ရဲ့ ပွဲတော်ဆီ"တိုင်းရင်းသား များ၏ ရိုးရာယဉ်ကျေးမှုပြပွဲနှင့် ခရီးသွားလုပ်ငန်းမြှင့်တင်ရေးပွဲတော်ကို ရန်ကုန်တိုင်းဒေသကြီး တာမွေမြို့နယ် ကျိုက္ကဆံအားကစားကွင်းတွင် ဇန်နဝါရီ ၂၅ ရက်မှ ၃၀ ရက်အထိ ခြောက်ရက်တိုင် စည်ကားသိုက်မြိုက်စွာ ကျင်းပသွားမည်ဖြစ်သည်။

ပွဲတော်တွင် ကချင်၊ ကယား၊ ကရင်၊ ချင်း၊ ဗမာ၊ မွန်၊ ရခိုင်၊ ရှမ်း အစရှိသည့် တိုင်းရင်းသားများ၏ အကအလှများ၊ တိုင်းရင်းသား လူမျိုးစု တစ်စုချင်းစီ၏ ရိုးရာ ယဉ်ကျေးမှုဓလေ့နေထိုင်မှု ပုံစံများနှင့် ရိုးရာအသုံးအဆောင်ပစ္စည်းများ၊ ရိုးရာအစားအစာ များကို တစ်စုတစ်စည်းတည်း ဖော်ပြထားသည့်ပြခန်းများနှင့် စီးပွားရေး လုပ်ငန်းရှင်များအတွက် မိမိတို့ကုန်ပစ္စည်းများကို တစ်စုတစ်ဝေး တည်း၊ တစ်နေရာတည်းတွင် ပြသရောင်းချနိုင် သည့် ပြခန်းများကို တစ်နေရာတည်းတွင် ပြသထားမည်ဖြစ်ပြီး ပွဲတော်သို့ လာရောက်လေ့လာသူများအနေဖြင့်လည်း တစ်နေရာ တည်းတွင် တွေ့မြင်ခံစားနိုင်မည်ဖြစ်သည်။

ပွဲတော်ကြီးအောင်မြင်စွာ ကျင်းပနိုင်ရေးအတွက် ဆောင်ရွက်လျက် ရှိသည့် မြန်မာနိုင်ငံတိုင်းရင်းသား လုပ်ငန်းရှင်အသင်းမှ တာဝန်ရှိသူများ၊ တိုင်းရင်းသားပြခန်းများမှ တာဝန်ရှိသူများနှင့် တွေ့ဆုံမေးမြန်း တင်ပြလိုက်ရပါသည် -

ပါမောက္ခ ဒေါက်တာအောင်ထွန်းသက် (နာယက၊ မြန်မာနိုင်ငံ တိုင်းရင်းသားလုပ်ငန်းရှင်များအသင်း)

ဒီအသင်းဖွဲ့စည်းရတဲ့ ရည်ရွယ်ချက်က ကျွန်တော်တို့နိုင်ငံမှာ အစိုးရသစ်က ငြိမ်းချမ်းရေးကို ဦးစားပေးတယ်။ ငြိမ်းချမ်းရေး ကို ဦးစားပေးတဲ့အခါမှာ ငြိမ်းချမ်းရေးရဲ့ အခြေခံက စီးပွားရေးပဲ။ နိုင်ငံမှာ စီးပွားရေးနဲ့ ငြိမ်းချမ်းရေးက ဆက်စပ်နေတာ။ နိုင်ငံမှာ ဘောဂဗေဒ ရှုထောင့်အရ မငြိမ်းချမ်းလို့ မတိုးတက်၊ မတိုးတက်လို့ မငြိမ်းချမ်း၊ အဲဒီသံသရာကြီးက လည်နေတယ်။ အဲဒါနဲ့ နိုင်ငံတော် ၏ အတိုင်ပင်ခံပုဂ္ဂိုလ်ကို ခွင့်တောင်းတာပေါ့၊ ခွင့်တောင်းတာက ဘာလဲဆိုရင် Business for Peace ငြိမ်းချမ်းရေးအတွက် စီးပွားရေးလုပ်ခွင့်ပေးပါ။ ငြိမ်းချမ်းရေးရဖို့ (၂၁)ရာစုပင်လုံကို ဆွေးနွေးတာကတစ်ပိုင်း၊ တစ်ဖက်ကလည်း စီးပွားရေးတွေ တိုးတက်အောင် ဘယ်လိုလုပ်မလဲ၊ လာမယ့် ၂၅ ရက်ကနေ ခြောက်ရက်တိတိလုပ်မယ့်ပွဲဟာ တိုင်းရင်းသားလုပ်ငန်းရှင်တွေ စုစည်းတဲ့ပွဲ။ ကျွန်တော်တို့နိုင်ငံမှာ တိုင်းရင်းသားဒေသတွေ တိုင်းရင်းသားလို့ပြောရင် ၁၃၅ မျိုးရှိတယ်။ ကျွန်တော်တို့အနေနဲ့ ဖြစ်စေချင်တာက တိုင်းရင်းသားလုပ်ငန်းရှင်တွေကို တစ်စု တစ်စည်းတည်း တကယ့်ကို စီးပွားရေးကို ထဲထဲဝင်ဝင် လုပ်စေ ချင်တယ်။

ကျွန်တော်တို့ဆီမှာ တိုင်းရင်းသားလုပ်ငန်းရှင်များအနေနဲ့ မွန်ဆိုလည်း မွန်၊ ပအိုဝ်းဆိုလည်း ပအိုဝ်း၊ "၀"ဆိုလည်း "၀"၊ သူတို့ဆီမှာ ထူးခြားတဲ့ဝိသေသရှိတယ်။ ဝန်ဆောင်မှုတွေ ပေးနိုင် တယ်။ ဒါတွေကို ထူးထူးခြားခြားထုတ်နိုင်ရင်၊ ဒါတွေအားလုံး သာ ကမ္ဘာ့ဈေးကွက်ထဲ ဖောက်နိုင်ရင် စီးပွားရေးဖွံ့ဖြိုးလာမယ်။ ကျေးဇူးတင်ဖို့ကောင်းတာက အစိုးရသစ်မှာ တိုင်းရင်းသားလူမျိုး များရေးရာဝန်ကြီးဌာနရှိတယ်။ တိုင်းရင်းသားလူမျိုးများရေးရာ ဝန်ကြီးဌာနရဲ့ ဦးစီးမှုအောက်ကနေ ဒီအသင်းကြီးက လှုပ်ရှားနေ တာ၊ ဖြစ်စေချင်တာကတော့ ဒီတိုင်းရင်းသားလုပ်ငန်းရှင်များ၊ ဒီနေ့လုပ်ရတဲ့ပွဲသည် တိုင်းရင်းသားလုပ်ငန်းရှင်တွေ အားလုံး စုစည်းတယ်။ သူတို့ကို အားပေးတာပေါ့။ နိုင်ငံမှာ စီးပွားရေး ဖွံ့ဖြိုးတိုးတက်ဖို့လည်း လိုတယ်။ ပြီးတော့မှ အခုလုပ်မယ့် ပွဲကလည်း ဟောဒီကျိုက္ကဆံကွင်းကြီးဟာ ဟိုးယခင်က ပြည်ထောင်စုနေ့ ပွဲလုပ်ရင် ဒီမှာပဲလုပ်တာ။ ဒါ့ကြောင့် ဒီလို ပြန်လုပ်တာ ဝမ်းသာတယ်။

ဒီပွဲတော်ကြီးမှာ မနောပွဲလည်း လုပ်မယ်။ မနောအကလည်း ပါမယ်။ လက်ဝှေ့ပွဲလည်းရှိမယ်။ မယ်ရွေးပွဲတွေပါမယ်။ နောက် တစ်ခုက အစားအသောက်တွေ၊ အစားအသောက်ကလည်း အလွန် အရေးကြီးတယ်၊ တိုင်းရင်းသား လူမျိုးပေါင်းစုံရဲ့ အစား အသောက်တွေက တစ်ခုနဲ့တစ်ခု မတူဘူး။ ဖြစ်စေချင်တာက မြန်မာနိုင်ငံက တိုင်းရင်းသားတွေရဲ့ အစားအသောက်တွေ ကမ္ဘာ့ ဈေးကွက်ထဲ ရောက်စေချင်တာ။ တိုင်းရင်းသားတွေဆီက အစား အသောက်တွေဟာ ထူးခြားတဲ့ အစားအသောက်တွေ ရှိတယ်၊ အဝတ်အထည်တွေရှိတယ်၊ လက်မှုပညာတွေရှိတယ်။ ဒါတွေ အားလုံးကို ကမ္ဘာ့ဈေးကွက်ထဲ ဖောက်ဖို့ဆို ဒီပွဲနဲ့ စရမှာဖြစ်ပါတယ်။ ဒီပွဲဟာ နိုင်ငံတော်အစိုးရရဲ့ အားပေးမှု၊ လုပ်ငန်းရှင်တွေက တစ်ယောက်အကြောင်းတစ်ယောက် တစ်ဦးချင်းလုပ်ရရင် ပင်ပန်းတယ်။ အခုလိုဝိုင်းဆွေးနွေးပြီး တိုင်းရင်းသားလုပ်ငန်းရှင်များ အားလုံးအတွက် အဖွဲ့အစည်းရှိတာဟာ ကျွန်တော်တို့ အတွက် အင်မတန်မှ ဂုဏ်ယူစရာလည်းဖြစ်တယ်။

ကိုယ့်နိုင်ငံ တိုးတက်စေချင်တယ်၊ အောင်မြင်စေချင်တယ်၊ ငြိမ်းချမ်းစေချင်တယ်၊ ဒီအောင်မြင်မှုတွေကို ဒီပွဲကနေတစ်ဆင့် ငြိမ်းချမ်းရေးပွဲလို့လည်းပြောလို့ရတယ်။ ယဉ်ကျေးမှုပွဲလို့လည်း ပြောလို့ရတယ်။ စီးပွားရေးပွဲလို့လည်း ပြောလို့ရတယ်။ လူမှုရေး ပွဲလို့လည်း ပြောလို့ရတယ်။ အခု ပြခန်းတွေ လိုက်ကြည့်တဲ့အခါ မှာ သမိုင်းအမွေအနှစ်တွေကို ဖော်ထုတ်ထားတာရှိတယ်။ သမိုင်း အမွေအနှစ်တွေများတဲ့ တိုင်းရင်းသားတွေ စုစည်းထားတဲ့ ပြည်ထောင်စုကြီးတိုးတက်အောင် ဒီပွဲကနေတစ်ဆင့်ပေါ့။ ကျွန်တော်တစ်ခုပဲ သတိပေးချင်တာက ပွဲပြီးမီးသေဆိုတဲ့ စကားလို ပွဲလုပ်တုန်းကတော့ အကုန်လုံးအားထည့်တာပဲ၊ ပွဲလည်း ပြီးသွားရော ပြီးသွားရော အဲဒီလိုမျိုးမဖြစ်အောင် အားထုတ်ကြဖို့ လိုတယ်။

ဒီနေ့ ဖြစ်စေချင်တာတော့ နိုင်ငံခြားဧည့်သည်တွေလည်း ဖိတ်ဖို့ အစီအစဉ်တွေရှိတယ်။ သံရုံးတွေ သိဖို့လိုတယ်၊ မြန်မာပြည်နဲ့ ပတ်သက်လာရင် ပြဿနာဖြစ်တာကိုပဲ သိတယ်။ အေးချမ်းတာကို မသိဘူး၊ တိုးတက်တာကို မသိဘူး၊ အဲဒီတော့ ဒီပွဲကနေတစ်ဆင့် ကမ္ဘာကိုကြေညာချင်တာ၊ မင်းတို့ပြောသလို မဟုတ်ဘူး၊ ရခိုင်တစ်ခုတည်းမှာတင် အနောက်ဘက်မှာပဲ ပြဿနာဖြစ်တာ၊ ရခိုင်မှာ အေးချမ်းတဲ့နေရာတွေ အများကြီး။ ကချင်မှာလည်း ပဋိပက္ခရှိတယ်ဆိုပေမယ့် အေးချမ်းတဲ့နေရာ အများကြီး၊ ရှမ်းလည်း ဒီအတိုင်းပဲ၊ မွန်လည်း ဒီအတိုင်းပဲအေးချမ်းတဲ့နိုင်ငံ၊ တိုးတက်တဲ့နိုင်ငံဖြစ်ဖို့ စီးပွားရေး အခွင့်အရေးတစ်ခုပါ။

ဒီပွဲတွေ လုပ်ထားတာကြည့်ပြီး ကျွန်တော်မျှော်လင့်တာ ကတော့ ယုံကြည်မှုတည်ဆောက်တာ၊ တိုင်းရင်းသားတွေအားလုံး တစ်ယောက်နဲ့ တစ်ယောက်က ဥမကွဲသိုက်မပျက် အပေးအယူ ရှိဖို့လိုတယ်။ တစ်ယောက်နဲ့ တစ်ယောက် ချစ်ခင်ဖို့လိုတယ်။ ဒီပွဲကနေတစ်ဆင့် ကျွန်တော်တို့ရလာလိမ့်မယ်လို့ မျှော်လင့် ပါတယ်။

ဦးလဖိုင်ခွန်ဆာ (ဒုတိယဥက္ကဋ္ဌ - ၁ ၊ မြန်မာနိုင်ငံတိုင်းရင်းသား လုပ်ငန်းရှင်အသင်း)

ဒီပွဲကို မြန်မာနိုင်ငံ တိုင်းရင်းသားလုပ်ငန်းရှင် အသင်းက ဦးဆောင်ပြီးတော့ လုပ်တဲ့ပွဲဖြစ်ပါတယ်။ ပွဲလုပ်ရခြင်း ရည်ရွယ် ချက်ကတော့ တိုင်းရင်းသားတွေ တစ်နေရာတည်းမှာ စုစည်းပြီး စီးပွားရေး၊ ယဉ်ကျေးမှု၊ ချစ်ခင်ရင်းနှီးမှုတွေ ဖော်ဆောင်ဖို့ အတွက် လုပ်တဲ့ပွဲဖြစ်ပါတယ်။ ဒီနိုင်ငံမှာ တိုင်းရင်းသားလုပ်ငန်းရှင်တွေ အနေနဲ့ ပထမဆုံးလုပ်တဲ့ပွဲ ဖြစ်ပါတယ်။

တိုင်းရင်းသားလုပ်ငန်းရှင်များအသင်းဖွဲ့ဖြစ်တာက တိုင်းရင်းသားတွေရဲ့ စီးပွားရေးအခွင့်အလမ်း တိုင်းရင်းသား လုပ်ငန်းရှင်များ များများ ပေါ်ပေါက်ရေးအတွက် ရည်ရွယ်ပြီး ဖွဲ့စည်းထားတဲ့ အသင်း ဖြစ်ပါတယ်။

တိုင်းရင်းသား လုပ်ငန်းရှင် များများပေါ်ထွန်းရေးဆိုတဲ့ ရည်ရွယ်ချက်ကတော့ စီးပွားရေးနဲ့ ငြိမ်းချမ်းရေး၊ စီးပွားရေးကို အရင်လုပ်မလား၊ ငြိမ်းချမ်းရေးကို အရင်လုပ်မလားဆိုတဲ့အပေါ် စီးပွားရေးနဲ့ ငြိမ်းချမ်းရေး ဒွန်တွဲလုပ်ရမယ်ဆိုတာလည်း ရည်ရွယ် ချက်ထဲမှာ ပါပါတယ်။ စီးပွားရေးနဲ့ ပညာရေးဆိုတာကလည်း ဒွန်တွဲပြီးတော့ စီးပွားရေးကောင်းမှ ပညာရေးလည်း ကောင်းလာ မယ်။ ပညာရေးကောင်းလာမှ နိုင်ငံရဲ့ လူ့စွမ်းအားအရင်းအမြစ် ကလည်း မြင့်မားလာမယ်။ နိုင်ငံရဲ့ အရင်းအမြစ် အသိဉာဏ်တွေ ဖွံ့ဖြိုးလာလေလေ စီးပွားရေး၊ ပညာရေး၊ ကျန်းမာရေး စသည့် အားဖြင့် ပိုပြီးမြင့်တက်လာမယ်။ ဖွံ့ဖြိုးလာမယ်။ ပွဲတော်မှာ တစ်ယောက်နဲ့တစ်ယောက် ဆုံစည်းကြမယ်။ မိတ်ဆက်ကြမယ်၊ ကူးလူးဆက်ဆံကြမယ်ဆိုတဲ့ ရည်ရွယ်ချက်နဲ့ ဒီပွဲလုပ်ရခြင်း ဖြစ်ပါတယ်။

ဒီနှစ်ကတော့ တိုင်းရင်းသားတွေ အက္ခရာစဉ်အလိုက် ကချင်ကစပြီး လုပ်တဲ့ပွဲ။ နောင်နှစ်တွေမှာလည်း အက္ခရာစဉ် အလိုက် တခြားတိုင်းရင်းသားတွေဦးစီးပြီးတော့ ဒီလိုပွဲမျိုးတွေ ကျင်းပဖို့ ရည်ရွယ်ထားတယ်။ နှစ်စဉ်နှစ်တိုင်း ဘယ်လမှာရယ်လို့ တော့ သတ်မှတ်ထားတာမရှိဘူး။ အဆင်ပြေတဲ့ ရာသီမှာ၊ အဆင်ပြေတဲ့ အချိန်မှာ ကျင်းပဖို့ ရည်ရွယ်ထားပါတယ်။ ကျွန်တော်တို့ များများပေါင်းသင်း ကူးလူးဆက်ဆံမယ်ဆိုရင် ပိုပြီးတော့ တစ်ဦးနဲ့တစ်ဦး ရင်းနှီးချစ်ခင်ကြမယ်။ စီးပွားရေး အခွင့်အလမ်းပိုပြီး မြင်လာကြမယ်။ စီးပွားရေးသတင်းအချက် အလက်တွေ များများ ဖလှယ်နိုင်မယ်ဆိုတဲ့ ရည်ရွယ်ချက်နဲ့ ဒီပွဲ လုပ်ရတာဖြစ်ပါတယ်။

ဒေါ်စောခင်တင့် (ရခိုင်စာပေနှင့် ယဉ်ကျေးမှုအဖွဲ့ ဥက္ကဋ္ဌ)

ဒီပွဲမှာ ရခိုင်တိုင်းရင်းသား လုပ်ငန်းရှင်များအသင်း အနေနဲ့ ပါဝင်တာဖြစ်ပါတယ်။ ဆင်ယင်ထုံးဖွဲ့မှုအပိုင်းမှာ ယဉ်ကျေးမှု အပိုင်းမှာလည်း ပါတယ်၊ ခရီးသွားလုပ်ငန်းအပိုင်းမှာလည်း ပါတယ်။ ခရီးသွားအနေနဲ့ ရခိုင်ဆိုရင် SEZ လိုမျိုး၊ နေပူတောင် လို သိပ်ထင်ရှားတဲ့ နိုင်ငံတကာခရီးသွားတွေ စိတ်ဝင်စားအောင် တင်ပြထားတဲ့ နေရာတွေပါမယ်။ တကယ်ထင်ရှားတဲ့ ရခိုင် သင်္ကြန်ရဲ့ သရုပ်ဖော်ပုံလေးတွေ ထည့်ထားတယ်။ ဘုရား ရေသပ္ပာယ်ပွဲ၊ အထူးသဖြင့် တစ်ခါမှမပြရသေးတဲ့ ရခိုင်ဆံထုံး ထုံးဖွဲ့မှု၊ ရခိုင်တွေရဲ့ ဆံထုံးထုံးဖွဲ့မှုဟာ ရခိုင်တွေရဲ့ သမိုင်းအစဉ် အဆက်ရေးထားတဲ့အထဲမှာ ရခိုင်ဆံထုံး ၆၄ မျိုးရှိတဲ့အထဲက ၃၃ မျိုးလောက်ကို ဆရာမကြီး ဒေါ်စောမုံညှင်းတို့ မှတ်တမ်း တင်ထားတယ်။ ရခိုင်မှတ်တမ်းတင်ဆရာတွေလည်း မှတ်တမ်း တင်ထားတယ်။ ဒါကို နှစ်ပေါင်း ၂၀ လောက်ရှာဖွေထားတာကို ဒီနေ့ ၆၄ မျိုးစလုံး အကုန်ထုတ်ပြီး ပြသသွားမှာ။ ဓည၀တီခေတ် ကနေ မြောက်ဦးထိ ဗောင်းတော် ၄၀ ကိုလည်း စုံအောင်ပြထားတယ်။

ရခိုင်ကျင်ကိုင်ပွဲတွေ ပါမယ်။ ရိုးရာအဝတ်အစား ဒီဇိုင်း၊ ရခိုင်မျိုးနွယ်စုတွေရဲ့ အခန်းကဏ္ဍတွေ ဒါတွေကိုပြမယ်။ နောက် တစ်ခုက ရခိုင်မင်္ဂလာဆောင်ပေါ့ ။ အဲဒါကိုတော့ ရခိုင်အိမ်ထဲမှာပဲ ခင်းကျင်းပြသထားမယ်။ ယနေ့အထိ သာမန်အရပ်သားပြည်သူ တွေ သုံးစွဲတဲ့ အသုံးအဆောင် ခမောက်လေးတွေ တန်ဖိုးလည်း သိပ်မများဘူး။ တစ်ခုကို ၂၀၀၀ - ၂၅၀၀ ပဲပေးရတယ်။ ရခိုင် တိုင်းရင်းသားတွေ ဒီနေ့အထိ ဒါကိုသုံးစွဲနေတယ်။ ဒါလေးတွေကို အပေါ်မှာအလှချိတ်ပြီး သရုပ်ဖော်ပုံလေးနဲ့ သရုပ်ဖော်ထားတာပါ။

ဦးအောင်ကြီး (စစ်ကိုင်းတိုင်း ကျောက်မျက်ရတနာ လုပ်ငန်းရှင်များအသင်း-ဥက္ကဋ္ဌ)

ကျွန်တော် အသက် ၆၀ တန်းမှာ ပထမဆုံးမြင်ကွင်း ပေါ့။ တိုင်းရင်းသားတွေ တစ်နေရာတည်းမှာ စုစည်းပြီး တော့ ရင်းနှီးချစ်ခင်မှုကိုလည်း ပေါ်လွင်စေတယ်။ တစ်ဦး နဲ့ တစ်ဦး ကူးသန်းရောင်းဝယ်မှု ဖလှယ်မှုတွေ စိတ်ပိုင်းဆိုင်ရာရော၊ ရုပ်ပိုင်းဆိုင်ရာရော တစ်ဦးနဲ့တစ်ဦး ဖလှယ်တဲ့ပွဲလို့ မြင်မိပါတယ်။ ဒီပွဲကို လာခြင်းအားဖြင့် တိုင်းရင်းသားတွေရဲ့ စည်းလုံးညီညွတ်မှုကို သွားတွေ့တယ်။ တွေ့ ခြင်းအားဖြင့် အခုသွားနေတဲ့ ငြိမ်းချမ်းရေးနဲ့ စီးပွားရေး ဟာလည်း ဒွန်တွဲနေတယ်။ စီးပွားရေးကောင်းမှလည်း ငြိမ်းချမ်းရေးကောင်းမယ်။ ငြိမ်းချမ်းရေးကောင်းမှ စီးပွား ရေးကောင်းမယ်ဆိုတဲ့အတွက် မြန်မာနိုင်ငံအတွင်းမှာ ရှိတဲ့ မိတ်ဆွေသင်္ဂဟအားလုံး လာကြဖို့ ဖိတ်ခေါ်ပါတယ်။

ဒေါ်ကေဂျာနူး (ဖျော်ဖြေရေးဆပ်ကော်မတီ)

တိုင်းရင်းသား ယဉ်ကျေးမှုပွဲတော်လည်း ဖြစ်တယ်။ မြန်မာနိုင်ငံရဲ့ ခရီးသွားလုပ်ငန်းမြှင့်တင်ရေးအတွက် လုပ်တဲ့ပွဲကြီးမှာ ကျွန်မတို့က ဖျော်ဖြေရေးအနေနဲ့ပါတယ်။ အနုပညာဖျော်ဖြေမှု စင်တင်တေး ဂီတတွေ၊ တိုင်းရင်းသား ရိုးရာအကတွေ၊ ရိုးရာအဆိုတွေ အကုန်လုံးပါပါတယ်။ ညစဉ်တင်ဆက်မှာ ဖြစ်ပါတယ်။ ထူးထူးခြားခြားအနေနဲ့ Miss Ethnic Myanmar 2019 ဆိုပြီးတော့ တိုင်းရင်းသူလေးတွေ၊ မျိုးနွယ်စုတွေအကုန်လုံး ၄၁ ဦးကို ရွေးထားပါတယ်။ မျိုးနွယ်စုတစ်ခုမှာ အနည်းဆုံး သုံးယောက်ကို ရွေးမယ်။ ၂၉ ရက်နေ့မှာ နောက်ဆုံး ရွေးချယ်မှာဖြစ်ပါတယ်။ ၂၈ ရက်နေ့မှာတော့ ကရင် ဒုံးယိမ်းအကပါမယ်။ မနောအကလည်း ရှိပါတယ်။ မနော အက ဘာ့ကြောင့်လုပ်သလဲဆိုတော့ တိုင်းရင်းသား အားလုံး လူအများကြီး တစ်ခါတည်း ဝင်ကလို့ရတယ်။

တိုင်းရင်းသားလူမျိုးတွေအားလုံးရဲ့ ဝတ်စား ဆင်ယင်မှုအားလုံး လည်း တစ်နေရာတည်းမှာ တစ်စုတစ်စည်းတည်း တစ်ဝကြီး အကုန်လုံးကြည့်ရမယ်။ လူအများကြီး တိုင်းရင်းသားတစ်မျိုးကို လူ ၁၀၀၊ ၂၀၀ ကလို့ရတယ်၊ မနောအကဖြစ်တဲ့အတွက် ကချင်မျိုးနွယ်စု တွေက ဦးဆောင်ပါမယ်။ မြစ်ကြီးနားကနေပြီး မနော တိုင်တွေ သယ်လာရပါတယ်။ မနောတိုင်လည်း ထူထား ပြီးပါပြီ။ ၂၃ ရက်နေ့မှာ အစမ်းလေ့ကျင့်မှာ ဖြစ်ပါတယ်။ မနောအကမှာ အားလုံးပါဝင်ကပြနိုင်အောင် အစီအစဉ် တွေလည်း ရှိပါတယ်။ ဖျော်ဖြေရေးအစီအစဉ်တွေက ကွင်းဖွင့်ပွဲကလွဲလို့ ပုံမှန် ညနေ ၆ နာရီက စပါမယ်။ ည ၁၁ နာရီအထိ ကျင်းပဖို့ ကြိုးစားထားပါတယ်။ တိုင်းရင်းသား ပြည်သူတွေအားလုံးကို လာစေချင်ပါတယ်။

ပိုက်ဆံပွဲလည်းမဟုတ်ပါဘူး၊ လူတိုင်း မိသားစုလိုက် လာလည်စေ ချင်ပါတယ်။ တိုင်းရင်းသားအားလုံး တစ်စု တစ်စည်းတည်း ကြုံတောင့်ကြုံခဲပွဲ၊ အသံလေးတွေ၊ အက လေးတွေ တကူးတက နယ်တွေထိ သွားစရာမလိုဘဲနဲ့ ဒီကျိုက္ကဆံကွင်းလာလိုက်တာနဲ့ အကအလှပေါင်းစုံ၊ ဝတ်စားဆင်ယင်မှုပေါင်းစုံကို မြင်ရမှာပါ အားလုံးကို လာဖို့ ဖိတ်ခေါ် ပါတယ်။

မိုင်ထွန်းကျော် (ရန်ကုန်တအာင်းလူငယ်အဖွဲ့) တအာင်း

(ပလောင်) ကိုယ်ပိုင်အုပ်ချုပ်ခွင့်ရဒေသ ယဉ်ကျေးမှုပြခန်း

ဒီပြခန်းမှာ ကျွန်တော်တို့ ရိုးရာယဉ်ကျေးမှု၊ ပစ္စည်း အသုံးအဆောင်တွေပြမယ်။ နောက်ပြီး ခေတ်သစ်မှာ ကျွန်တော်တို့ ဒေသထွက်ကုန်တွေရှိတယ်။ ရိုးရာအဆင် လေးတွေ ပြသမယ်။ နောက်တစ်ခုက ခရီးသွားလာရေးနဲ့ ပတ်သက်ပြီး သွားလည်လို့ ရတဲ့နေရာတွေကို ပရိုဂျက်တာ နဲ့ ပြသထားမယ်။ ဘယ်နေရာတွေက လှပတယ်၊ လည်လို့ ရတယ်ဆိုတာတွေကို ရှင်းပြမယ်။ ဒေသထွက် ကုန်တွေကို ပြသထားမယ်။ တကယ်လို့ ဝယ်ချင်တယ်ဆိုလည်း ကျွန်တော်တို့ အရောင်းဆိုင် ဖွင့်ထားတဲ့နေရာမှာ သွားဝယ်လို့ ရပါတယ်။ တအာင်းအကနဲ့ အဆိုတွေလည်း ပါပါမယ်၊ ဒီမှာလာပြတဲ့ အခါကျတော့ တစ်ဦးနဲ့တစ်ဦး စည်းလုံးမှု ရှိပါလားဆိုတာ ခံစားမိလာတယ်။ တခြားတိုင်းရင်းသား တွေရဲ့ ယဉ်ကျေးမှုတွေလည်း လေ့လာခွင့်ရလာတယ်။

တွေ့ဆုံမေးမြန်း-သီသီမင်း