နေပြည်တော် ဇန်န၀ါရီ ၂၅
မင်းလှ မဲဆန္ဒနယ်မှ ဒေါက်တာ ဦးသန်းအောင်စိုး၏ ဆေးဝါး တက္ကသိုလ်များမှ ဘွဲ့ရရရှိသူ ဦးရေ၊ အစိုးရဌာန ပုဂ္ဂလိက လုပ်ငန်းများတွင် ၀င်ရောက်လုပ်ကိုင်နေမှု အခြေအနေနှင့် အလုပ်အကိုင် အခွင့်အလမ်းများမည်သို့ စီစဉ်ဆောင်ရွက် ထားသည်ကို သိလိုခြင်းနှင့် စပ်လျဉ်း၍ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးက အခွင့်အလမ်းများ အနေဖြင့် ဆေးဝါးသိပ္ပံဘွဲ့ ရရှိပြီးပါက နိုင်ငံ့ဝန် ထမ်းအနေဖြင့် လူ့စွမ်းအား အရင်းအမြစ် ဦးစီးဌာန၊ ကုသရေးဦးစီးဌာန၊ ဆေးသုတေသန ဦးစီးဌာန၊ ဆေးဝါးထုတ်လုပ်မှုစက်ရုံနှင့် ရန်ကုန် ဆေးရုံကြီးတို့တွင် ခန့်အပ်ပါကြောင်း။
ပုဂ္ဂလိက ကဏ္ဍအနေဖြင့် ပုဂ္ဂလိက ဆေးဝါးစက်ရုံများတွင် ထုတ်လုပ်မှုအပိုင်း၊ အရည်အသွေး စစ်ဆေးမှုအပိုင်းတို့တွင် ခန့်အပ်ပါကြောင်း၊ ခန့်အပ်ရာတွင်လည်း ပြည်တွင်းသာမက ပြည်ပမှ လာရောက်ဖွင့် လှစ်ထားသည့် ဆေးကုမ္ပဏီများ၊ ဆေးဝါး ရောင်းချနေသည့် ဈေးဆိုင်ကြီးများတွင်လည်း ခန့်အပ်ပါကြောင်း၊ ပုဂ္ဂလိက ဆေးရုံကြီးများရှိ ဆေးနှင့် ပတ်သက်သည့် နေရာတွင် အလုပ်ဝင် နေကြပါကြောင်း၊ ဆေးဝါးတင်သွင်းခြင်း လုပ်ငန်းကို လုပ်ကိုင်နေသည့် ကုမ္ပဏီများတွင်လည်း အများအပြား အလုပ်ဝင်နေကြပါကြောင်း။
ဆေးဝါးသိပ္ပံဖြင့် ဘွဲ့ရရှိသူများသည် အစားအသောက်နှင့် ဆေးဝါး ကွပ်ကဲရေး ဦးစီးဌာန ဆေးဘက်ကျွမ်းကျင်-၂ (ဆေးဝါး)၊ ဆေးဝါး စစ်ဆေးရေးမှူးများ အဖြစ် ၀င်ရောက်တာဝန် ထမ်းဆောင်လျက် ရှိပါကြောင်း၊ လုပ်သက် ၅ နှစ်ပြည့်ပါက ဖွဲ့စည်းပုံ အရ လစ်လပ်နေသော ဦးစီးအရာရှိ အရေအတွက်အပေါ် မူတည်ပြီး ရာထူးတိုးမြှင့် ခန့်ထားလျက် ရှိပါကြောင်း ရှင်းလင်းဖြေကြားသည်။
ရသေ့တောင် မဲဆန္ဒနယ်မှ ဒေါ်ခင်စောဝေ၏ ရသေ့တောင်မြို့နယ် မိုးစဲကျွန်း ကူတောင် တိုက်နယ်ဆေးရုံတွင် လစ်လပ်လျက်ရှိသော ၀န်ထမ်းများ နေရာတွင် အချိန်မီ ဖြည့်တင်းခန့်ထားပေးရန် အစီအစဉ်ရှိ၊ မရှိ မေးခွန်းနှင့် စပ်လျဉ်း၍ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးက ကုသရေးဦးစီးဌာန အနေဖြင့် ရသေ့တောင်မြို့နယ်၊ မိုးစဲကျွန်း ကူတောင်တိုက်နယ် ဆေးရုံအတွက် တိုက်နယ်ဆရာဝန် (၁) ဦးကို ၂၀၁၉ ဧပြီတွင် ခန့်ထားမည် ဖြစ်ပါကြောင်း၊ လက်ရှိ အထက်တန်းသူနာပြု ခွင့်ပြု (၂) ဦးတွင် (၁) ဦးခန့်ထားပါကြောင်း၊ နောက်ထပ် သူနာပြု ခွင့်ပြု (၄) ဦးတွင် (၁) ဦးခန့်ထားပါကြောင်း၊ ဇန်န၀ါရီ ၂၁ ရက်တွင် နောက်ထပ် (၁) ဦးထပ်မံ ခန့်ထားပါကြောင်း၊ နေ့စားဝန်ထမ်း (၁) ဦးလည်း ခန့်ထားပြီး ဖြစ်ပါကြောင်း၊ မိမိအနေဖြင့် ရခိုင်ပြည်နယ်၏ ခက်ခဲသည့် ဒေသ အခြေအနေကိုလည်း သိရှိသည့် အတွက် ဦးစားပေး၍ ရှေ့ဘတ်ဂျက်တွင်လည်း စဉ်းစားပေးမည် ဖြစ်ပါကြောင်း ဖြေကြားသည်။
မင်းတပ် မဲဆန္ဒနယ်မှ ဦးနေလင်းအောင်၏ မင်းတပ်မြို့နယ်ရှိ မကွီအိမ်နူးမြို့ စံကိုက် (၁၆)ခုတင် ဆံ့ ဆေးရုံ တည်ဆောက်ပေးရန် အစီအစဉ်ရှိ၊ မရှိ မေးခွန်းနှင့် စပ်လျဉ်း၍ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့် ထွေးက တိုက်နယ်ဆေးရုံ ဆောက်လုပ်ရန် လျာထားသည့် မြေ နေရာ ၅ ဒသမ ၈ ဧကသည် ရပ်ကွက်အသစ်ဖြစ်သော မကွီအိမ်နူး ရပ်ကွက်တွင် ရှိပါကြောင်း၊ မကွီအိမ်နူး ရပ်ကွက်သည် စီမံကိန်းလျာထားသည့် မြေနေ ရာဖြစ်ပါကြောင်း၊ ဆောက်လုပ်ရန် လျာထားသည့် မြေနေရာသည် ဌာနဆိုင်ရာမှ လတ်တလောတွင် ကွင်းဆင်းမြေပြင် တိုင်းတာ ဆောင်ရွက်လျက်ရှိသည်ကို တွေ့ရှိရပါ ကြောင်း၊ အဆိုပါ မြေအတွက် မြေပေးမိန့် ရရှိမည်ဆိုပါက ၂၀၁၉ - ၂၀၂၀ ဘတ်ဂျက်တွင် လျာထားဆောင်ရွက် ရမည် ဖြစ်ပါကြောင်း၊ မြေပေးမိန့် ရရှိရန်မှာ ပြည်နယ်ဦးစီးမှူး၊ လွှတ်တော်ကိုယ်စားလှယ်များ နှင့် အထွေထွေအုပ်ချုပ်ရေး ဦးစီးဌာနတို့မှ ပါဝင်ပံ့ပိုးရန် လိုအပ်ပါကြောင်း။
ထို့ပြင် မကွီအိမ်နူးမြို့တွင် လတ်တလော၌ စိမ့်စမ်းရေကို အဓိက အသုံးပြုလျက် ရှိပါကြောင်း၊ စိမ့်စမ်းရေ အသုံးပြုလျက် ရှိသည့် မကွီအိမ်နူးရပ်ကွက်နှင့် တိုက်နယ် ဆေးရုံဆောက်မည့် မြေနေရာသည် ငါးမိုင်ခန့်ဝေးပါကြောင်း၊ ထို့ကြောင့် လက်ရှိ အနေအထားအရ ရေမရှိသည့်အတွက် ဆောက်လုပ်၍ မရပါကြောင်း၊ ရေရရှိရန် အတွက် လွှတ်တော်ကိုယ်စားလှယ်များ၊ အထွေထွေ အုပ်ချုပ်ရေး ဦးစီးဌာနနှင့် ချင်း ပြည်နယ် အစိုးရအဖွဲ့တို့မှ စီစဉ်ပေးပြီး ရေနှင့် မြေနေရာ အဆင်ပြေပါက လာမည့်နှစ်တွင် ဘတ်ဂျက်ထည့်ဝင် ထားခြင်းဖြင့် ချင်းပြည်နယ် ပြည်သူများအတွက် အဆင်ပြေသွားမည် ဖြစ်ပါကြောင်း ဖြေကြားသည်။
ဆက်လက်၍ မင်းကင်း မဲဆန္ဒနယ်မှ ဦးမောင်မြင့်၊ ကျိုင်းတုံ မဲဆန္ဒနယ်မှ ဦးစ တီဖန်၊ ညောင်တုန်း မဲဆန္ဒနယ်မှ ဦးအုန်းလွင်နှင့် လွိုင်လင် မဲဆန္ဒနယ်မှ ဦးခင်မောင်သီ တို့၏ မေးခွန်းများနှင့် စပ်လျဉ်း၍ အပြည်ပြည်ဆိုင်ရာ ပူးပေါင်းဆောင်ရွက်ရေး ၀န်ကြီး ဌာန ပြည်ထောင်စုဝန်ကြီး ဦးကျော်တင်နှင့် ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးတို့က ရှင်းလင်းဖြေကြားကြသည်။
ထို့နောက် ဒလ မဲဆန္ဒနယ်မှ ဒေါက်တာဦးစိန်မြအေးက နိုင်ငံတော်၏ မျိုးဆက် သစ်လူငယ်များအား ကျန်းမာလန်းဆန်း ဖြောင့်မတ်သော မျိုးဆက်သစ်များအဖြစ် ကြီးပြင်းလာကြစေရေး၊ လုပ်ငန်းခွင်ရောက် ပြည်သူများ၏ ကာယစိတ္တ ဖွံ့ဖြိုး တိုးတက်စေရေးနှင့် သက်ကြီးနိုင်ငံသားများ ကျန်းမာနုပျို စေရေးတို့နှင့်အတူ မူးယစ်ဆေးဝါးနှင့် အခြား မလိုလားအပ်သော အာရုံများမှ ကင်းလွတ်သက်သာစေနိုင်သည့် အားကစား ကဏ္ဍကို စီမံကိန်းနှင့် ရန်ပုံငွေများချမှတ်၍ တိုက်တွန်းအားပေး ဖော်ဆောင်ပေးနိုင်ပါရန် ပြည်ထောင်စုအစိုးရအား တိုက်တွန်းကြောင်း အဆိုကို တင်သွင်းရာတွင် အဆို၏ ရည်ရွယ်ချက်မှာ အားကစားကဏ္ဍကို စီမံကိန်းနှင့် ရန်ပုံငွေများချမှတ်ပြီး တိုက်တွန်း အားပေး ဖော်ဆောင်ပေးနိုင်ရန်၊ နိုင်ငံတော်၏ မျိုးဆက်သစ်လူငယ်များအား ကျန်းမာ ကြံ့ခိုင်လန်းဆန်း ဖြောင့်မတ်သော မျိုးဆက်သစ်များအဖြစ် ကြီးပြင်းလာကြစေရေး၊ လုပ်ငန်းခွင်ရောက် ပြည်သူများ၏ ကာယစိတ္တ ဖွံ့ဖြိုးတိုးတက်စေရေး၊ သက်ကြီးနိုင်ငံ သားများ ကျန်းမာနုပျိုစေရေးနှင့် မူးယစ်ဆေးဝါးနှင့် အခြားမလိုလားအပ်သော အာရုံများမှ ကင်းလွတ်သက်သာစေရေး တို့ဖြစ်ပါကြောင်း။
ကျင့်သုံးနေဆဲ ဥပဒေဘောင်အတွင်းမှ အမျိုးသားရေး တာဝန်တစ်ရပ်အနေဖြင့် လူထုအားကစား၊ ပြိုင်ပွဲဝင် ထူးချွန် အားကစားတို့ကို လုပ်ငန်းစဉ် တစ်ခုချင်းအတွက် အကောင်အထည်ဖော် ပေးနိုင်ပါရန်၊ သာမန်အသုံးစရိတ်၊ ၀န်ကြီးဌာနများမှ ထူးချွန်အား ကစားသမားများကို ၀န်ထမ်းတစ်နေရာ ခန့်ထားရန် အသုံးစရိတ်၊ အားကစားကွင်း အတွက် အားကစားပစ္စည်း စသည့် Facility များအတွက် ငွေလုံးငွေရင်း အသုံးစရိတ် စသည်တို့ကို အမျိုးသားစီမံကိန်းဖြင့် အသေးစိတ် အစီအစဉ်များကို ရေတိုရေရှည် မျှော်မှန်းချက်များနှင့် ရေးဆွဲရမည်ဖြစ်ပါကြောင်း၊ စီမံကိန်းရှိနေမှသာ ဘတ်ဂျက် တောင်းခံလျာထား နိုင်သကဲ့သို့ ထိုက်တန်စွာ အသုံးချမှုလည်း ဖြစ်လာမည်ဖြစ်ပါ ကြောင်း၊ နိုင်ငံ၏ ရေရှည် ရင်းနှီးမြှုပ်နှံမှုထဲမှ သိသာပေါ်လွင်ပြီး အချိန်ကာလတစ်ခု အတွင်း အကျိုးအမြတ် ပြန်ရစေမည့် မိမိ၏ မျိုးဆက်သစ်များမှ မိဘ ဘိုးဘွားအထိ ကျန်းမာကြံ့ခိုင်သန်စွမ်းပြီး စိတ်ပိုင်းဆိုင်ရာ ယုံကြည်မှုများ ဖြစ်လာစေမည်ဖြစ်သော ကြောင့် အဆိုအား တင်သွင်းရခြင်းဖြစ်ပါကြောင်း ရှင်းလင်းတင်ပြသည်။
ဆက်လက်၍ ကော့မှူး မဲဆန္ဒနယ်မှ ဦးကျော်စိုးဝင်းက အဆိုအား လက်ခံ ဆွေးနွေးနိုင်ရန် ထောက်ခံ တင်ပြသည်။
ထို့နောက် ပြည်သူ့လွှတ်တော်ဥက္ကဋ္ဌ ဦးတီခွန်မြတ်က ယင်းအဆိုနှင့် စပ်လျဉ်း၍ အဆုံးအဖြတ်ရယူရာ လွှတ်တော်က သဘောတူသဖြင့် အဆိုအား လက်ခံဆွေးနွေးရန် ဆုံးဖြတ်ကြောင်း ကြေညာသည်။
ဆက်လက်၍ ပြည်သူ့လွှတ်တော် ဥက္ကဋ္ဌက ယင်းအဆိုနှင့်စပ်လျဉ်း၍ ဆွေးနွေးလို သည့် လွှတ်တော် ကိုယ်စားလှယ်များရှိပါက အမည်စာရင်း တင်သွင်းနိုင်ကြောင်း ကြေညာသည်။
ယင်းနောက် ပြည်သူ့လွှတ်တော် ဥက္ကဋ္ဌ ဦးတီခွန်မြတ်က အမျိုးသားလွှတ်တော်မှ ပြင်ဆင်ချက်ဖြင့် အတည်ပြု၍ ပေးပို့လာသော ၂၀၁၇ ခုနှစ် မြေသိမ်းဥပဒေကြမ်း ကို လက်ခံရှိကြောင်း လွှတ်တော်သို့ အသိပေးသည်။
ထို့နောက် ယင်းဥပဒေကြမ်းနှင့် စပ်လျဉ်း၍ အစီရင်ခံစာကို ဥပဒေကြမ်းကော်မတီဝင် ဒေါ်မာမာခိုင် က ဖတ်ကြားတင်သွင်းပြီး ပြင်ဆင်ချက်အဆို တင်သွင်းလိုသည့် လွှတ်တော် ကိုယ်စားလှယ်များရှိပါက အမည်စာရင်း တင်သွင်းနိုင်ကြောင်း ပြည်သူ့လွှတ်တော် ဥက္ကဋ္ဌက ကြေညာသည်။
ဒုတိယအကြိမ် ပြည်သူ့လွှတ်တော် (၁၁)ကြိမ်မြောက် ပုံမှန်အစည်းအဝေး ပဉ္စမနေ့ကို ဇန်န၀ါရီ ၂၈ ရက်တွင် ဆက်လက်ကျင်းပမည် ဖြစ်ကြောင်း သိရသည်။
အေးအေးသန့် (သတင်းစဉ်)
No comments:
Post a Comment