ဒုတိယအကြိမ် အမျိုးသားလွှတ်တော် (၁၁) ကြိမ်မြောက် ပုံမှန်အစည်းအဝေး စတုတ္ထနေ့ ကျင်းပ

နေပြည်တော် ဇန်န၀ါရီ ၂၅

ဒုတိယအကြိမ် အမျိုးသားလွှတ်တော်(၁၁)ကြိမ်မြောက် ပုံမှန်အစည်းအဝေး စတုတ္ထနေ့ ကို ယနေ့နံနက် ၁၀ နာရီတွင် နေပြည်တော်ရှိ အမျိုးသားလွှတ်တော် အစည်းအဝေးခန်းမ၌ ကျင်းပသည်။

အစည်းအဝေးတွင် အမျိုးသားလွှတ်တော် ဥက္ကဋ္ဌ မန်းဝင်းခိုင်သန်းက အမျိုးသားလွှတ်တော် ပြည့်သူ့ ငွေစာရင်းကော်မတီ ၊ လွှတ်တော်အခွင့်အရေး ကော်မတီ၊ အစိုးရ၏အာမခံချက်များ၊ ကတိများနှင့် တာဝန်ခံချက်များ စိစစ်ရေး ကော်မတီ၊ အစိုးရမဟုတ်သော ပြည်တွင်းပြည်ပ အဖွဲ့အစည်းများ ဆိုင်ရာ ကော်မတီ၊ ပြည်တွင်းပြည်ပ အလုပ်သမားဆိုင်ရာ ကော်မတီ၊ ပြည်သူတို့၏ တိုင်ကြားစာဆိုင်ရာ ကော်မတီနှင့် စိုက်ပျိုးရေး၊ မွေးမြူရေးနှင့် ရေလုပ်ငန်းဖွံ့ဖြိုး တိုးတက်ရေး ကော်မတီများတွင် ဥက္ကဋ္ဌ၊ အတွင်းရေးမှူးနှင့် အဖွဲ့ဝင်နေရာများ အစားထိုးပြောင်းလဲ ပြင်ဆင်ဖွဲ့စည်းခြင်းကို လွှတ်တော်သို့တင်ပြ၍ အတည်ပြုချက် ရယူသည်။
ဆက်လက်၍ ရှမ်းပြည်နယ် မဲဆန္ဒနယ်အမှတ်(၁၂)မှ ဦးစိုင်းစံအောင်၏ ရှမ်းပြည်နယ်မြောက် ပိုင်း၊ “၀” ကိုယ်ပိုင် အုပ်ချုပ်ခွင့်ရတိုင်း ဟိုပန်ခရိုင်၊ ဟိုပန်မြို့ နယ်တွင် ခရိုင်သာသနာရေးမှူးရုံး ဖွင့်လှစ်ပေးရန် အစီအစဉ် ရှိ/မရှိ မေးခွန်း နှင့်စပ်လျဉ်း၍ သာသနာရေးနှင့် ယဉ်ကျေးမှု ၀န်ကြီးဌာန ဒုတိယ၀န်ကြီး ဦးကြည်မင်းက ၀န်ကြီးဌာနအနေဖြင့် ခရိုင်သာသနာရေးမှူးရုံး တိုးချဲ့ဖွဲ့စည်းခွင့်ပြုရန် တင်ပြ ဆောင်ရွက်ခဲ့ပါကြောင်း၊ သို့သော်စီမံကိန်းနှင့် ဘဏ္ဍာရေး ၀န်ကြီးဌာန၊ စီမံကိန်းနှင့် ဖွဲ့စည်းပုံစိစစ်ရေးအဖွဲ့အနေဖြင့် ပြည်ထောင်စုအဆင့် အဖွဲ့အစည်းများနှင့် ပြည်ထောင်စုဝန်ကြီးဌာနများတွင် ၀န်ထမ်းဖွဲ့စည်းပုံ တိုးချဲ့ပြင်ဆင် ဖွဲ့စည်းခြင်း၊ ၀န်ထမ်းခန့်ခြင်းတို့အပေါ် ချမှတ်သင့်သည့် မူဝါဒ၊ အခြေခံစံများအတွက် မူဝါဒ တစ်ရပ် ညှိနှိုင်း ရေးဆွဲဆောင်ရွက် လျက်ရှိပါကြောင်း၊ ထို့ကြောင့် ဟိုပန်ခရိုင် သာသနာရေးမှူးရုံး တိုးချဲ့ဖွဲ့စည်းခြင်း ကိစ္စကို စီစဉ်ဆောင်ရွက်ပေးနိုင်ခြင်း မရှိပါ ကြောင်း၊ သို့သော် ဟိုပန်မြို့နယ်တွင် မြို့နယ် သာသနာရေးမှူးရုံး ဖွင့်လှစ်ထားရှိပြီး မြို့နယ် သာသနာရေးမှူး ခန့်အပ်ကာ သာသနာရေးဆိုင်ရာ လုပ်ငန်းများ ဆောင်ရွက် လျက်ရှိသဖြင့် ဟိုပန်ခရိုင် သာသနာ ရေးဆိုင်ရာ ကိစ္စရပ်များကိုလည်း ဆောင်ရွက် နိုင်ပါကြောင်း ဖြေကြားသည်။
ချင်းပြည်နယ် မဲဆန္ဒနယ်အမှတ်(၁၀)မှ ဦးလားလ်မင်းထန်၏ ချင်းပြည်နယ်၊ မတူပီမြို့တွင် ခရိုင်အင်္ဂါရပ်နှင့် ညီညွတ်သော မြို့မဈေးတစ်ခုကို ၂၀၁၉-၂၀၂၀ ဘဏ္ဍာရေးနှစ်တွင် တည်ဆောက်ပေးရန် အစီအစဉ်ရှိ/မရှိ မေးခွန်းနှင့် စပ်လျဉ်း၍ နေပြည်တော်ကောင်စီဝင် ဦးညီထွန်းက ခရိုင်အင်္ဂါရပ်နှင့် ညီညွတ်သော မြို့မဈေး တစ်ခုကို ၂၀၁၉ - ၂၀၂၀ ဘဏ္ဍာရေးနှစ်တွင် တည်ဆောက် ပေးနိုင်ရန်အတွက် Developer စနစ်ဖြင့် ဆောင်ရွက်ရန် စိတ်ဝင်စားသူ လုပ်ငန်းရှင်များကို ခေါ်ယူလျက် ရှိပါကြောင်း၊ စိတ်ဝင်စားသူများ ရှိပါက မတူပီမြို့မဈေးအား သုံးထပ်ဈေးအသစ် ဆောင်ရွက်သွားမည် ဖြစ်ပါကြောင်း ဖြေကြားသည်။
မကွေးတိုင်းဒေသကြီး၊ မဲဆန္ဒနယ်အမှတ်(၆)မှ ဦးဝင်းမောင်၏ မကွေးတိုင်း ဒေသကြီး၊ စလင်းမြို့နယ် အတွင်းရှိ လင်းဇင်းဆည်ရေသောက် မြောင်းမတော်ကြီး၊ စလင်းမြောင်းမကြီး၊ ဆင်ဖြူကျွန်းမြောင်း (မုန်းမြောင်းဆည် ရေသောက်လက်တံ) တို့မှ သဲနုန်းတူးဖော်ခြင်း လုပ်ငန်းများနှင့် ကြိုဝန်းနယ် ဒုတိယ ဦးစီးမှူး နေအိမ်ပြုပြင်ခြင်း လုပ်ငန်းတို့ကို ၂၀၁၉-၂၀၂၀ ဘဏ္ဍာရေးနှစ်တွင် အကောင်အထည် ဖော်ဆောင်ရွက် ပေးရန် အစီအစဉ်ရှိ/မရှိ မေးခွန်းနှင့်စပ်လျဉ်း၍ စိုက်ပျိုးရေး၊ မွေးမြူရေး နှင့်ဆည် မြောင်းဝန်ကြီးဌာန ဒုတိယ၀န်ကြီး ဦးလှကျော်က လင်းဇင်း ရေလွှဲဆည်၏ ရေသောက်စနစ်မှ ရေပေးမြောင်းများမှာ (၁၉၃၄)ခုနှစ်က ဖောက်လုပ်ခဲ့သော ရေပေးမြောင်းများ ဖြစ်ပါကြောင်း၊ သက်တမ်းအားဖြင့် ကြာမြင့်ပြီ ဖြစ် ပြီး နှစ်စဉ်ရန်ပုံငွေ ခွဲဝေရရှိမှုအပေါ်မူတည်ပြီး ဆည်မြောင်းနှင့် ရေအသုံးချမှု စီမံခန့်ခွဲ ရေးဦးစီးဌာနမှ တူးမြောင်းများ ရေစီးရေလာ ကောင်းမွန်စေရေးအတွက် သဲနုန်းတူး ဖော်ပြုပြင်ခြင်း လုပ်ငန်းကို ဆောင်ရွက်ပေးလျက် ရှိပါကြောင်း။
ယခုဘဏ္ဍာနှစ်တွင် မြောင်းမတော်မြောင်း ပေတိုင် ပေ (၁၉၀၀၀) မှ (၈၄၀၀၀) အထိ၊ စလင်းမြောင်းမကြီး ပေတိုင် ပေ(၅၅၀၀၀) မှ (၁၀၀၅၃၇) အထိ၊ ဆင်ဖြူကျွန်း မြောင်းပေတိုင် ပေ (၂၅၀၀၀) မှ (၄၅၀၀၀) အထိ စသည့် မြောင်းအပိုင်းများကို သဲနုန်းတူးဖော် ဆောင်ရွက်နိုင်ရန်အတွက် ပြည်ထောင်စုဘတ်ဂျက် သာမန်အသုံးစရိတ် ရန်ပုံငွေတွင် ခွဲဝေရရှိပြီး ဖြစ်သည့်အတွက် လုပ်ငန်း များစတင်ဆောင်ရွက်လျက် ရှိပါကြောင်း။
ကြို့ဝန်းနယ် ဒုတိယဦးစီးမှူးနေအိမ် ပြုပြင်ရန်ကိစ္စနှင့် ပတ်သက်၍ အဆိုပါ နေအိမ်အဆောက်အအုံမှာ လွန်ခဲ့သည့် နှစ်ပေါင်း (၈၀)ကျော်ခန့်က တည်ဆောက် ခဲ့ခြင်းဖြစ်ပါကြောင်း၊ နှစ်ကာလ ကြာမြင့်သည်နှင့် အမျှ အမိုးနှင့် မျက်နှာကျက်များ၊ နံရံနှင့် ကြမ်းခင်းများ ပြန်လည်ပြုပြင်ပေးရန်နှင့် ခြံစည်းရိုးကာရံပေးရန် လိုအပ်လျက်ရှိပါကြောင်း၊ ထို့ကြောင့် အဆိုပါနေအိမ် အဆောက်အအုံ ပြုပြင်ပေးနိုင်ရန် လိုအပ်သည့် ရန်ပုံငွေ တွက်ချက်ပြီး ၂၀၁၉ - ၂၀၂၀ ဘဏ္ဍာနှစ် ပြည်ထောင်စုသာမန် အသုံးစရိတ် ရန်ပုံငွေတွင် ထည့်သွင်းလျာထား တင်ပြတောင်းခံပြီး ရန်ပုံငွေ ရရှိမှုအပေါ်မူတည်၍ ဆည်မြောင်းနှင့် ရေအသုံးချမှု စီမံခန့်ခွဲရေး ဦးစီးဌာနမှ အကောင်အထည်ဖော် ဆောင်ရွက်ပေးသွားမည် ဖြစ်ပါကြောင်း ဖြေကြားသည်။
အလားတူ မန္တလေးတိုင်းဒေသကြီး မဲဆန္ဒနယ်အမှတ်(၇)မှ ဦးကျော်တုတ်နှင့် မွန်ပြည်နယ်မဲဆန္ဒနယ် အမှတ်(၇)မှ ဦးနိုင်သီဟတို့၏ မေးခွန်းများနှင့်စပ်လျဉ်း၍ ဒုတိယ၀န်ကြီး ဦးလှကျော်က ပြန်လည်ရှင်းလင်း ဖြေကြားခဲ့သည်။
ထို့နောက် အမျိုးသား လွှတ်တော် ဥပဒေကြမ်းကော်မတီ အတွင်းရေးမှူး ဒေါက်တာ မြတ်ဉာဏစိုးက ပြည်သူ့လွှတ်တော်က ပြင်ဆင်ချက်ဖြင့် အတည်ပြုပြီး ပေးပို့လာသော မြန်မာနိုင်ငံ အင်ဂျင်နီယာ ကောင်စီဥပဒေကို ပြင်ဆင်သည့် ဥပဒေကြမ်းအား အမျိုးသား လွှတ်တော်က ဆွေးနွေးနိုင်ရန် ဥပဒေကြမ်း ကော်မတီ၏ အစီရင်ခံစာကို ဖတ်ကြားရှင်းလင်းသည်။
ယင်းနောက် အမျိုးသားလွှတ်တော် ဥက္ကဋ္ဌက အဆိုပါ ဥပဒေကြမ်းအား ဆွေးနွေးလိုသည့် လွှတ်တော် ကိုယ်စားလှယ်များရှိပါက အမည်စာရင်း တင်သွင်းနိုင်ကြောင်း ကြေညာသည်။
ဒုတိယအကြိမ် အမျိုးသားလွှတ်တော် (၁၁)ကြိမ်မြောက် ပုံမှန်အစည်းအဝေး ပဉ္စမနေ့ကို ဇန်န၀ါရီ ၂၈ ရက် တွင် ဆက်လက်ကျင်းပသွားမည်ဖြစ်ကြောင်း သိရသည်။
အောင်ရဲသွင်၊လူမော်
(သတင်းစဉ်)