မြဝတီမြို့ကို နယ်စပ်မြို့များအင်္ဂါရပ်နှင့်အညီ အကောင်အထည် ဖော်ဆောင်ရွက်နိုင်ရန် ချေးငွေရယူသင့်ကြောင်း ဆွေးနွေး

နေပြည်တော် နိုဝင်ဘာ ၂၆

ဒုတိယအကြိမ် ပြည်ထောင်စုလွှတ်တော် ဒသမပုံမှန်အစည်းအဝေး စတုတ္ထနေ့ကို ယနေ့ နံနက် ၁ဝ နာရီတွင် နေပြည်တော်ရှိ လွှတ်တော် အဆောက်အအုံ ပြည်ထောင်စုလွှတ်တော် အစည်းအဝေးခန်းမ၌ ကျင်းပသည်။

အစည်းအဝေးတွင် ပြည်ထောင်စုလွှတ်တော် နာယက ဦးတီခွန်မြတ်က နိုင်ငံတော် သမ္မတထံမှပေးပို့ထားသော ပြည်ထောင်စုဝန်ကြီး ဦးသောင်းထွန်းအား ရင်းနှီးမြှုပ်နှံမှု နှင့် နိုင်ငံခြား စီးပွားဆက်သွယ်ရေး ဝန်ကြီးဌာန ပြည်ထောင်စုဝန်ကြီးအဖြစ် ပြောင်းလဲ တာဝန်ပေးအပ်ခြင်းကို တင်ပြပြီး လွှတ်တော်က မှတ်တမ်းတင်ကြောင်း ကြေညာသည်။

ယင်းနောက် ပြည်ထောင်စုလွှတ်တော် နာယက က နိုင်ငံတော်သမ္မတထံမှ ပေးပို့ ထားသော လစ်လပ်လျက်ရှိသည့် ပြည်ထောင်စုအစိုးရအဖွဲ့ရုံးဝန်ကြီးဌာန ပြည်ထောင်စု ဝန်ကြီးအဖြစ် ဦးမင်းသူအား ခန့်အပ်တာဝန်ပေးအပ်လိုခြင်းကို လွှတ်တော်သို့တင်ပြ ပြီး ပြည်ထောင်စုဝန်ကြီးအဖြစ် အဆိုပြုထားသည့် ပုဂ္ဂိုလ်နှင့်စပ်လျဉ်း၍ ကန့်ကွက်မှု တစ်စုံတစ်ရာမရှိပါက ခန့်အပ်ရန်သဘောတူကြောင်းကြေညာခြင်း သို့မဟုတ် ကန့်ကွက်လိုသည့် ကိုယ်စားလှယ်ရှိပါက ကန့်ကွက်ကြောင်း အဆိုတင်သွင်းခြင်း အစီအစဉ်ကို နိုဝင်ဘာ ၂၉ ရက်တွင်ကျင်းပမည့် ပြည်ထောင်စုလွှတ်တော် အစည်း အဝေးတွင် ဆောင်ရွက်မည်ဖြစ်ကြောင်း၊ ကန့်ကွက်လိုသူ ကိုယ်စားလှယ်များအနေဖြင့် ကန့်ကွက်ကြောင်းအဆိုကို နာယကထံ တင်သွင်းရမည်ဖြစ်ကြောင်း ကြေညာသည်။

ဆက်လက်၍ ပြည်ထောင်စုလွှတ်တော် နာယက က နိုင်ငံတော်သမ္မတထံမှ ပေးပို့ ထားသော မွန်ပြည်နယ်အစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးအဖြစ် ဗိုလ်မှူးကြီး နေထွဋ်ဦးအား ခန့်အပ်တာဝန်ပေးခြင်းကိုတင်ပြပြီး လွှတ်တော်က မှတ်တမ်း တင်ကြောင်း ကြေညာသည်။

ယင်းနောက် ဥပဒေကြမ်းပူးပေါင်းကော်မတီဝင်များက လွှတ်တော်နှစ်ရပ် သဘော ထားကွဲလွဲသော ''အပြည်ပြည်ဆိုင်ရာ ထေရဝါဒဗုဒ္ဓသာသနာပြုတက္ကသိုလ် ဥပဒေ ကြမ်း'' နှင့် ''မြန်မာနိုင်ငံ မိခင်နှင့်ကလေး စောင့်ရှောက်ရေးအသင်း ဥပဒေကြမ်း''တို့နှင့်စပ်လျဉ်း၍ လေ့လာတွေ့ရှိချက်နှင့် သဘောထား မှတ်ချက်များပါဝင်သော ကော်မတီ၏ အစီရင်ခံစာများကို ဖတ်ကြားကြပြီး ပြည်ထောင်စုလွှတ်တော် နာယကက ယင်းဥပဒေကြမ်းများနှင့် စပ်လျဉ်း၍ ပြင်ဆင်ချက်အဆို တင်သွင်း ဆွေးနွေးလိုသည့် ကိုယ်စားလှယ်များရှိပါက အမည်စာရင်း တင်သွင်းနိုင်ကြောင်း ကြေညာသည်။

ထို့နောက် စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက ပြည်ထောင်စုအစိုးရအဖွဲ့မှ ပေးပို့ ထားသော ပြည်ထောင်စုဝန်ကြီးဌာနအဖွဲ့ အစည်းများ၏ ၂ဝ၁၇-၂ဝ၁၈ ဘဏ္ဍာရေးနှစ် ဒုတိယ ၆ လပတ် အခွန်ကောက် ခံရရှိမှု အခြေအနေနှင့်စပ်လျဉ်း၍ ၂ဝ၁၇-၂ဝ၁၈ ဘဏ္ဍာရေးနှစ်အတွက် အခွန်အကောက် ၂၁ မျိုးထံမှ ကောက်ခံရန် လျာထားချက်ငွေကျပ် ၇၅၄၆ ဒသမ ဝ၃ဝ ဘီလီယံ၊ပြည်တွင်း အခွန်များဦးစီးဌာနက တာဝန်ယူကောက်ခံရမည့် အခွန် အကောက် ၅ မျိုးထံမှ ကောက်ခံရန် လျာထားချက် ငွေကျပ်$ ၅၈၃၁ ဒသမ ၅၉၃ ဘီလီယံဖြစ်သည့်အတွက် ပြည်တွင်း အခွန်များဦးစီးဌာနအနေဖြင့် စုစုပေါင်း အခွန်အကောက်များ၏ ၇၇ ဒသမ ၂၈ ရာခိုင်နှုန်းခန့်ကို တာဝန်ယူကောက်ခံပေးရမည် ဖြစ်ပါကြောင်း။

ပြည်တွင်းအခွန်များဦးစီးဌာနအနေဖြင့် ၂ဝ၁၇-၂ဝ၁၈ ဘဏ္ဍာရေးနှစ်အတွင်း ပြုပြင်ပြီးလျာထားချက် ၅၈၃၁ ဒသမ ၅၉၃ ဘီလီယံအပေါ် ကောက်ခံရရှိမှုအနေဖြင့် ပထမ (၆) လပတ် ဧပြီလမှ စက်တင်ဘာလအထိ ကောက်ခံရရှိမှု ၂၃၆၄ ဒသမ ၉၅၇ ဘီလီယံ၊ ဒုတိယ (၆) လပတ် အောက်တိုဘာလမှ မတ်လအထိ ၃၂၇၅ ဒသမ ၁၄၁ ဘီလီယံဖြစ်ပြီး စုစုပေါင်း ကောက်ခံရရှိမှု ၅၆၄ဝ ဒသမ ဝ၉၈ ဘီလီယံဖြစ်ရာ တစ်နှစ် လုံးအနေဖြင့် လျာထားချက်အပေါ် ၉၆ ဒသမ ၇၂ ရာခိုင်နှုန်းကောက်ခံရရှိခဲ့ပါ ကြောင်း။

အခွန်ကောက်ခံမှုစနစ်ကို ခေတ်မီ ICT နည်းပညာများ အသုံးပြုကောက်ခံနိုင်ရန် ITAS စနစ်ကို ဖော်ဆောင်လျက်ရှိ

အခွန်ဝန်ဆောင်မှုများ ပိုမိုတိုးတက်ကောင်းမွန်လာရေးနှင့် ဝန်ထမ်းများ မသမာမှု ကင်းရှင်းရေးအတွက် ထိုက်သင့်သော သက်သာချောင်ချိရေးများကို ဥပဒေနှင့်အညီ ဆောင်ရွက်ပေးလျက်ရှိပါကြောင်း၊ အခွန်ကောက်ခံမှုစနစ်ကို ခေတ်မီICT နည်းပညာများ အသုံးပြုကောက်ခံနိုင်ရန် ITAS (Integrated Tax Administration System) စနစ်ကို ဖော်ဆောင် လျက်ရှိပါကြောင်း၊ ပြည်သူလူထုသို့ အခွန်ပညာပေးမှု များကို တိုးမြှင့်လုပ်ဆောင်လျက်ရှိသည့်အပြင် အခွန်ဆိုင်ရာစီမံအုပ်ချုပ်မှုဥပဒေ(Tax Administration Law) ကိုလည်း လွှတ်တော်သို့ တင်ပြဆောင်ရွက်လျက်ရှိကြောင်း။

အခွန်ကောက်ခံရရှိမှု၊ အခွန်စနစ်များနှင့်ပတ်သက်ပြီး အကြံပြုဆွေးနွေးခဲ့ကြ သော လွှတ်တော်ကိုယ်စားလှယ်များ၏ အကြံပြုဆွေးနွေးသုံးသပ်မှုများကို မှတ်တမ်း တင်ထားရှိပြီး အလေးထား ဆောင်ရွက် လျက်ရှိပါကြောင်း ရှင်းလင်း ပြောကြားသည်။

အထက်ပါကိစ္စနှင့်စပ်လျဉ်း၍ ပြည်သှူငွေစာရင်းပူးပေါင်းကော်မတီဝင် ဦးဘိုကြီးက လေ့လာတွေ့ရှိချက်နှင့် သဘောထား မှတ်ချက်များ ပါဝင်သော ကော်မတီ၏ အစီရင်ခံစာ (၁၁/၂ဝ၁၈)ကို ဖတ်ကြား တင်ပြပြီး လွှတ်တော်က ဆွေးနွေးစဉ်းစားရန် အဆိုတင်သွင်းသည်။

ပြည်ထောင်စုလွှတ်တော် နာယက က ယင်းအစီရင်ခံစာနှင့်စပ်လျဉ်း၍ ဆွေးနွေးလိုသည့် ကိုယ်စားလှယ်များရှိပါက အမည်စာရင်း တင်သွင်းနိုင်ကြောင်း ကြေညာသည်။

ယင်းနောက် ဒုတိယဝန်ကြီး ဦးမောင်မောင်ဝင်းက နိုင်ငံတော်သမ္မတထံမှ ပေးပို့ ထားသော ရန်ကုန်တိုင်းဒေသကြီးအတွင်း စီမံကိန်းလုပ်ငန်းများ ဆောင်ရွက်ရန်အတွက် ပြင်သစ် ဖွံ့ဖြိုးတိုးတက်ရေးအေဂျင်စီထံမှ ချေးငွေယူရိုသန်း ၇ဝ ရယူရန်ကိစ္စ နှင့် စပ်လျဉ်း၍ ယခု AFDချေးငွေ ယူရိုသန်း ၇ဝ အပေါ် ပေးရမည့်အတိုးသည် ခန့်မှန်း အတိုးနှုန်း ဝ ဒသမ ၇၇ ရာခိုင်နှုန်း ဖြင့် တွက်ချက်ပါက ယူရို ၈ ဒသမ ၂ သန်းခန့် ဖြစ်ပါကြောင်း။

ပြင်သစ်နိုင်ငံ AFD ထံမှ ချေးငွေယူရို သန်း ၇ဝ ချေးယူနိုင်ရေးကိစ္စ ပြည်ထောင်စုလွှတ်တော်မှ အတည်ပြုပေးနိုင်ပါရန် တင်ပြ

ယခုစီမံကိန်းအတွက် ဥရောပသမဂ္ဂ (EU)မှ ပေးအပ်သည့် ထောက်ပံ့ငွေသည် ယူရို ၉ ဒသမ ၅ သန်း ဖြစ်သည့်အတွက် ကျသင့်သည့်အတိုးထက် ပိုမိုသော ထောက်ပံ့ငွေရရှိသည်ကို တွေ့ရှိရပါကြောင်း၊ ပြင်သစ်နိုင်ငံ အပါအဝင် EU အဖွဲ့ အစည်းက မြန်မာနိုင်ငံသို့ ငွေကြေးအကူအညီများ စဉ်ဆက်မပြတ် ပံ့ပိုးပေးနေခြင်းကို တွေ့မြင်နိုင် မည်ဖြစ်ပါကြောင်း၊ သို့ဖြစ်၍ ရန်ကုန်တိုင်းဒေသကြီးအစိုးရက ဦးဆောင်အကောင် အထည်ဖော်ဆောင်ရွက်မည့် သယ်ယူပို့ဆောင်ရေး၊ မြစ်ကမ်းပါးတစ်လျှောက် ဖွံ့ဖြိုးရေး နှင့် မြို့ပြယဉ်ကျေးမှုအမွေအနှစ်များ ထိန်းသိမ်းစောင့်ရှောက်ရေးမဟာဗျူဟာ စီမံကိန်း ဆောင်ရွက်နိုင်ရန် ပြင်သစ်နိုင်ငံ AFD ထံမှ ချေးငွေယူရို သန်း ၇ဝ ချေးယူနိုင်ရေး ကိစ္စကို ပြည်ထောင်စုလွှတ်တော်မှ အတည်ပြုပေးနိုင်ပါရန် တင်ပြအပ်ပါကြောင်း ရှင်းလင်းသည်။

ပြည်ထောင်စုလွှတ်တော် နာယက က ယင်းချေးငွေကိစ္စနှင့်စပ်လျဉ်း၍ လွှတ်တော် အပိုင်းတွင် ထပ်မံစိစစ်လေ့လာရန် လိုအပ်မည်ဖြစ်ကြောင်း၊ ထို့ကြောင့် လွှတ်တော်၏ အဆုံးအဖြတ်ရယူခြင်းကို ခေတ္တဆိုင်းငံ့ထားမည်ဖြစ်ကြောင်းနှင့် ပြည်သူ့ငွေစာရင်း ပူးပေါင်းကော်မတီအနေဖြင့် သက်ဆိုင်ရာဌာန၊ အဖွဲ့အစည်းများ၊ လွှတ်တော်ကော်မတီ များနှင့် တွေ့ဆုံဆွေးနွေးပြီး အဆိုပါ ပြည်ပချေးငွေနှင့်ပတ်သက်သည့် လေ့လာတွေ့ရှိချက်နှင့် သဘောထားမှတ်ချက် အစီရင်ခံစာကို ဆက်လက်ကျင်းပမည့် လွှတ်တော် အစည်းအဝေးတွင် ဖတ်ကြားတင်သွင်းနိုင်ရေး စီမံဆောင်ရွက်ရန် လိုအပ်ကြောင်း ကြေညာသည်။

ဆက်လက်၍ ဒုတိယဝန်ကြီး ဦးမောင်မောင်ဝင်းက နိုင်ငံတော်သမ္မတထံမှ ပေးပို့ ထားသော မဲခေါင်ဒေသဆိုင်ရာ အရင်းအနှီးဈေးကွက် ဖွံ့ဖြိုးတိုးတက်မှုနှင့် ပူးပေါင်း ဆောင်ရွက်မှုဆိုင်ရာ နားလည်မှုစာချွန်လွှာတွင် ပါဝင်လက်မှတ် ရေးထိုးရေးကိစ္စနှင့် စပ်လျဉ်း၍ မဲခေါင်ဒေသဆိုင်ရာ အရင်းအနှီးဈေးကွက် ဖွံ့ဖြိုးတိုးတက်မှုနှင့် ပူးပေါင်း ဆောင်ရွက်မှု ဆိုင်ရာ နိုင်ငံများအကြား နားလည်မှုစာချွန်လွှာတွင် မြန်မာနိုင်ငံမှ ပါဝင် လက်မှတ်ရေးထိုးနိုင်ရန်အတွက် ပြည်ထောင်စု လွှတ်တော်မှ အတည်ပြုပေးပါရန် ပြည်ထောင်စုလွှတ်တော်ဆိုင်ရာ ဥပဒေနှင့်အညီ တင်သွင်း အပ်ပါကြောင်း ရှင်းလင်း ဆွေးနွေးသည်။

ပြည်ထောင်စုလွှတ်တော် နာယက က နားလည်မှုစာချွန်လွှာတွင် ပါဝင်လက်မှတ် ရေးထိုးရေးကိစ္စနှင့်စပ်လျဉ်း၍ ဆက်လက်ဆောင်ရွက်မည့် ပြည်ထောင်စုလွှတ်တော် အစည်းအဝေးတွင် ဆွေးနွေးသွားရန် လျာထားသဖြင့် ဆွေးနွေးလိုသည့် ကိုယ်စားလှယ် များရှိပါက အမည်စာရင်းတင်သွင်းနိုင်ကြောင်း ကြေညာသည်။

ယင်းနောက် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးလှကျော်က နိုင်ငံတော်သမ္မတထံမှ ပေးပို့ထားသော အပြည်ပြည်ဆိုင်ရာ ရော်ဘာ သုတေသနနှင့် နည်းပညာဖွံ့ဖြိုးရေးဘုတ်အဖွဲ့သို့ ဝင်ရောက်ရန်နှင့် နှစ်စဉ် ကြေးထည့်ဝင် ရန်ကိစ္စနှင့်စပ်လျဉ်း၍ နိုင်ငံတော်တွင် အရည်အသွေးကောင်း ရော်ဘာများ တိုးတက် စိုက်ပျိုးထုတ်လုပ် နိုင်ရေးအပေါ် အကျိုးသက်ရောက်မှုရှိပြီး ပို့ကုန်ဈေးကွက်နှင့် ဈေးကောင်းရရှိရေး ဖန်တီးနိုင်မည်ဖြစ်သည့်အတွက် မြန်မာ့ ရော်ဘာကဏ္ဍ ဖွံ့ဖြိုး တိုးတက်မှုကို များစွာအထောက်အကူပြုနိုင်မည်ဖြစ်ပါကြောင်း၊ သို့ဖြစ်၍ အသင်း ဝင်ခွင့်ပြုနိုင်ပါရန် လိုအပ်ပါကြောင်း။

IRRDB အသင်းဝင်ဖြစ်ပါက နိုင်ငံတော်အနေနှင့် နှစ်စဉ်ကြေး အမေရိကန် ဒေါ်လာ ၅၈ဝဝ နှစ်စဉ် ထည့်ဝင်ရမည် ဖြစ်ပါကြောင်း၊ နှစ်စဉ်ကြေးပေးသွင်းရန်အတွက် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ စိုက်ပျိုးရေး ဦးစီးဌာန ၏ ဘတ်ဂျက်တွင် ထည့်သွင်းလျာထားပြီးဖြစ်ပါကြောင်း။

အသင်းဝင်ရောက်ရန် နှင့် နှစ်စဉ်ကြေးထည့်ဝင်ရန်ကိစ္စတို့နှင့် ပတ်သက်ပြီး လုပ်ထုံးလုပ်နည်းနှင့်အညီ အဆင့်ဆင့်တင်ပြ ဆောင်ရွက်ခဲ့ပြီး ပြည်ထောင်စုအစိုးရအဖွဲ့ သဘောတူခွင့်ပြုချက်နှင့်အညီ ပြည်ထောင်စုလွှတ်တော်သို့ အတည်ပြုချက်ရ ယူရန် ဆောင်ရွက်ခြင်းဖြစ်ပါကြောင်း၊ သို့ဖြစ်၍ မြန်မာနိုင်ငံအနေနှင့် အပြည်ပြည်ဆိုင်ရာ ရော်ဘာသုတေသနနှင့် နည်းပညာ ဖွံ့ဖြိုးရေးဘုတ်အဖွဲ့သို့ ဝင်ရောက်ခွင့်ပြုနိုင်ရေးနှင့် နှစ်စဉ်ကြေးထည့်ဝင် ခွင့်ပြုနိုင်ရေးကိစ္စရပ်အပေါ် ပြည်ထောင်စု လွှတ်တော်မှ အတည် ပြုပေးနိုင်ပါရန် ရှင်းလင်းဆွေးနွေးသည်။

ပြည်ထောင်စုလွှတ်တော် နာယက က အထက်ပါကိစ္စနှင့်စပ်လျဉ်း၍ ဆက်လက် ဆောင်ရွက်မည့် ပြည်ထောင်စုလွှတ်တော် အစည်းအဝေးတွင် ဆွေးနွေးသွားရန် လျာထားသဖြင့် ဆွေးနွေးလိုသည့် ကိုယ်စားလှယ်များရှိပါက အမည်စာရင်းတင်သွင်း နိုင်ကြောင်း ကြေညာသည်။

ယင်းနောက် ပင်လယ်ကြောင်း အကောက်ခွန်အက်ဥပဒေကို ပြင်ဆင်သည့် ဥပဒေကြမ်း (၂ဝ၁၈) ခုနှစ်နှင့်စပ်လျဉ်း၍ ထားဝယ်မဲဆန္ဒနယ်မှ ဦးအောင်စိန်နှင့် တပ်မတော်သား ပြည်သူ့လွှတ်တော်ကိုယ်စားလှယ် ဒုတိယဗိုလ်မှူးကြီး အောင်ဇင်မင်း တို့က ဆွေးနွေးကြသည်။

ပြည်ထောင်စုလွှတ်တော် နာယက က ယင်းဥပဒေကြမ်းနှင့်စပ်လျဉ်း၍ ၂ဝ၁၈ခုနှစ် နိုဝင်ဘာ ၂၉ ရက်တွင် ကျင်းပမည့် အစည်းအဝေးတွင် ဆုံးဖြတ်အတည်ပြုရန် လျာထား သဖြင့် ဥပဒေကြမ်းပူးပေါင်းကော်မတီအနေဖြင့် လိုအပ်ပါက သက်ဆိုင်ရာ လွှတ်တော် ကော်မတီများ၊ ပြည်ထောင်စုအဆင့် ဌာနအဖွဲ့အစည်းများ၊ ဆွေးနွေးသွားကြသည့် ကိုယ်စားလှယ်များနှင့် အချိန်မီ ပြန်လည်ဆွေးနွေးကြရန် အသိပေးမှာကြားသည်။

နိုင်ငံတော်သမ္မတထံမှ ပေးပို့ထားသော ဆောက်လုပ်ရေးဝန်ကြီးဌာနနှင့် ကရင် ပြည်နယ်အစိုးရအဖွဲ့တို့က မဟာမဲခေါင် ဒေသခွဲ အရှေ့အနောက် စီးပွားရေးစင်္ကြံလမ်း တစ်လျှောက်ရှိ မြို့များဖွံ့ဖြိုးမှု စီမံကိန်းဆောင်ရွက်ရန်အတွက် ထိုင်းနိုင်ငံ Neighbouring Countries Economic Development Cooperation Agency-NEDA ထံမှ ချေးငွေ အမေရိကန်ဒေါ်လာ ၂၄ ဒသမ ၃ သန်း ရယူရန်ကိစ္စနှင့် စပ်လျဉ်း၍ လွှတ်တော်ကိုယ်စားလှယ်များက ဆွေးနွေးကြသည်။

NEDAချေးငွေဖြင့် ဆောင်ရွက်မည့်လုပ်ငန်းများသည် အမှန်တကယ်လိုအပ်သည့် လုပ်ငန်းများဖြစ်သည့်အတွက် စနစ်တကျ အကောင်အထည်ဖော်ဆောင်ရွက်နိုင်ရန်အတွက် ချေးငွေကို ရယူသင့်ပါကြောင်း ထောက်ခံဆွေးနွေး

လှိုင်းဘွဲမဲဆန္ဒနယ်မှ ဦးခင်ချိုက မြဝတီမြို့သည် နိုင်ငံ၏ကုန်သွယ်ရေးကဏ္ဍတွင် အဓိကကျသည့် နေရာတစ်ခုဖြစ်ပြီး နိုင်ငံ၏ကုန်သွယ်မှုဆိုင်ရာ အခွန်အကောက် များစွာရှာဖွေပေးနေသည့် မြို့တစ်မြို့ဖြစ်ပါကြောင်း၊ ထို့ပြင် မြဝတီမြို့သည် နယ်စပ်မြို့ ဖြစ်သည်နှင့်အညီ ကူးသန်းရောင်းဝယ်မှုများအပြင် နိုင်ငံခြားသား ဝင်ထွက်သွားလာမှု များပြားသည့် နေရာ တစ်ခုဖြစ်ပါကြောင်း၊ ထို့ကြောင့် နယ်စပ်မြို့များ အင်္ဂါရပ်နှင့်အညီ သန့်ရှင်းသာယာရန် လိုအပ်သည့်အတွက် မဟာမဲခေါင် ဒေသ အဖွဲ့ဝင်နိုင်ငံတစ်နိုင်ငံ အနေဖြင့် အခြားအဖွဲ့ဝင်နိုင်ငံများနှင့် ရင်ပေါင်တန်းနိုင်ရန် အမှန်တကယ်လိုအပ် သည့်အပြင် NEDA ချေးငွေဖြင့် ဆောင်ရွက်မည့်လုပ်ငန်းများသည် အမှန်တကယ်လို အပ်သည့်လုပ်ငန်းများဖြစ်သည့်အတွက် စနစ်တ ကျ အကောင်အထည်ဖော်ဆောင်ရွက် နိုင်ရန်အတွက် ချေးငွေကို ရယူသင့်ပါကြောင်း ထောက်ခံဆွေးနွေးသည်။

မြဝတီမဲဆန္ဒနယ်မှ ဦးစိန်ဗိုလ်က မြဝတီမြို့တွင် ၂ဝ၁၈ ခုနှစ်၊ သြဂုတ်လက သောင်းရင်းမြစ်ရေ မကြီးသော်လည်း မြို့မှာရေ လွှမ်းခဲ့ပါကြောင်း၊ ထိုသို့ဖြစ်ရခြင်းသည် ရေထုတ်မြောင်းများ မရှိခြင်းကြောင့်ဖြစ်ပါကြောင်း၊ မြဝတီမြို့၏ ဖွံ့ဖြိုးရေး စီမံကိန်းများ ဆောင်ရွက်ရန်ချေးယူမည့်NEDAချေးငွေသည် ဆိုင်းငံ့ကာလ ၁ဝ နှစ်၊ ပြန်ဆပ်ကာလ ၂ဝ နှစ်၊ ချေးငွေ သက်တမ်း စုစုပေါင်း ၃ဝ နှစ်ဖြစ်ပြီး အတိုးနှုန်း ၁ ဒသမ ၅ ရာခ်ိုင်နှုန်းနှင့် စီမံခန့်ခွဲမှုစရိတ် ချေးငွေပမာဏ၏ ဝ ဒသမ ၁၅ ရာခိုင်နှုန်းဖြစ်သည့်အတွက် သက်သာ သောနှစ်ရှည်ချေးငွေဖြစ်သောကြောင့် ပြည်ထောင်စုလွှတ်တော်မှ အတည်ပြုပေးနိုင် ပါရန် ဆွေးနွေးသည်။

ဘားအံမဲဆန္ဒနယ်မှ ဒေါ်နန်းသန်းသန်းလွင်က မဟာမဲခေါင်ဒေသခွဲ အရှေ့အနောက် စီးပွားရေးစင်္ကြံလမ်းတစ်လျှောက်ရှိ မြို့များဖွံ့ဖြိုးမှုစီမံကိန်း GMS East West Economic Corridor Town Development Project ကို လေ့လာသည့်အခါ မြို့များ ဖွံ့ဖြိုးမှုစီမံကိန်းမြို့ထဲမှ မြဝတီမြို့၏ မြို့ပြအခြေခံအဆောက်အအုံ အဆင့် မြှင့်တင်ရေးစီမံကိန်းအတွက် အမေရိ ကန် ဒေါ်လာ ၂၄ ဒသမ ၃ သန်း အသုံးပြုသွားမည်ဟု သိရှိရပါကြောင်း၊ ကရင်ပြည်နယ်ရှိ မြဝတီမြို့ကို ရေကောင်းရေသန့် လုံလောက်စွာ ပေးဝေရေးစနစ်နှင့် အမှိုက်စွန့်ပစ်သိမ်းဆည်းမှုစနစ် ကောင်းမွန်စွာ စီမံဆောင်ရွက် ပေးနိုင်မည်ဖြစ် သည့်အ တွက် အဆိုပါ စီမံကိန်းများအပေါ် ဝမ်းမြောက်ဝမ်းသာ ကြိုဆိုပါကြောင်း ဆွေးနွေးသည်။

ထို့အတူ မွန်ပြည်နယ်မဲဆန္ဒနယ် အမှတ်(၁၁)မှ ဦးလှမြင့် (ခေါ်) ဦးလှမြင့်သန်းနှင့် ကချင်ပြည်နယ် မဲဆန္ဒနယ်အမှတ်(၁၁)မှ ဒေါက်တာ ခွန်ဝင်းသောင်းတို့ကလည်း ဆွေးနွေးကြသည်။

ယင်းကိစ္စနှင့်စပ်လျဉ်း၍ ပြည်ထောင်စုလွှတ်တော် နာယက က လွှတ်တော်ကိုယ် စားလှယ်များ၏ ဆွေးနွေးချက်များအပေါ် သက်ဆိုင်ရာ ပြည်ထောင်စုအဆင့် အဖွဲ့ အစည်းဝင်က ပြန်လည်ရှင်းလင်းခြင်းနှင့် လွှတ်တော်၏ အဆုံးအဖြတ် ရယူခြင်း တို့ကို ၂ဝ၁၈ နိုဝင်ဘာ ၂၉ ရက်တွင်ကျင်းပမည့် ပြည်ထောင်စုလွှတ်တော် အစည်းအဝေး တွင် ဆောင်ရွက်သွား မည်ဖြစ်ကြောင်း ကြေညာသည်။

သတင်း- မော်စီ၊ မွှေးကြူဇင်

ဓာတ်ပုံ- ကျော်ရဲဆွေ