မြန်မာနိုင်ငံမှာ စီးပွားရေးလုပ်ရတာ လွယ်ကူရဲ့လား ခေါင်းစဉ်ဖြင့် စီးပွားရေးစကားဝိုင်း ကျင်းပ

(အစိုးရအေဂျင်စီများအနေနဲ့လည်း ဆောင်ရွက်လိုက်တဲ့ ပြုပြင်ပြောင်းလဲမှုတွေကို ပုဂ္ဂလိကကဏ္ဍမှာ ထိရောက်စွာ အကျိုးကျေးဇူး ခံစားရတယ်ဆိုတာ သေချာဖို့ လိုအပ်ပါတယ်

မြန်မာနိုင်ငံအထည်ချုပ် လုပ်ငန်းရှင်များအသင်း အတွင်းရေးမှူး ဒေါ်ခိုင်ခိုင်နွယ်)

''မြန်မာနိုင်ငံမှာ စီးပွားရေးလုပ်ရတာ လွယ်ကူရဲ့လား'' ခေါင်းစဉ်ဖြင့် စီးပွားရေး စကားဝိုင်း အပိုင်း (၂)ကိုမြန်မာ့ကုန်သွယ်မှု မြှင့်တင်ရေးအဖွဲ့ ညွှန်ကြားရေးမှူးချုပ် ဦးအောင်စိုး၊ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာန ညွှန်ကြားရေးမှူးချုပ် ဦးအောင်နိုင်ဦး၊ ပြည်တွင်းအခွန်များဦးစီးဌာန ညွှန်ကြားရေးမှူး ဒေါ်သီတာမြင့်နှင့် မြန်မာနိုင်ငံအထည်ချုပ် လုပ်ငန်းရှင် များအသင်း အတွင်းရေးမှူး ဒေါ်ခိုင်ခိုင်နွယ်တို့က ပါဝင်ဆွေးနွေးခဲ့ကြသည် များကို မြန်မာ့အသံနှင့် ရုပ်မြင်သံကြားမှ ရိုက်ကူးထုတ်လွှင့်ခဲ့ပါသည်။

အဆိုပါစကားဝိုင်းတွင် ဆွေးနွေးခဲ့ကြသည်များကို ဖော်ပြအပ်ပါသည်-

အစီအစဉ်မှူး။ ။ Doing Business မှာ ပြည်ပ ကုန်သွယ်မှု Indicator ရဲ့အခြေအနေကို ရှင်းပြပေး ပါဦးခင်ဗျာ။
ဦးအောင်စိုး။ ။ ပို့ကုန်၊ သွင်းကုန်လုပ်ငန်းပေါ့။ ဒီလိုလုပ်ငန်းလုပ်ရတာ လွယ်ရဲ့လားဆိုတဲ့ အညွှန်းကိန်းပေါ့။ ဒီအညွှန်း ကိန်းက Doing Business တစ်ခုလုံးကို တိုင်းတာတဲ့ ၁၀ ခုထဲမှာ တစ်ခုပါတယ်။ ဒီအညွှန်းကိန်းက ကုန်သွယ်မှုကို အခြေခံတာဖြစ်တဲ့အတွက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက အဓိကဦးဆောင်ပြီး ကုန်သွယ်ရေး ဦးစီး ဌာန ညွှန်ကြားရေးမှူးချုပ်က အဓိကတာဝန်ခံအဖွဲ့ခေါင်းဆောင်အဖြစ်နဲ့ ဆောင်ရွက် ပါတယ်။ ကုန်သွယ်ရေးဆိုတော့ ကုန်သွယ်မှုအတွက် ပူးပေါင်းလုပ်ရတဲ့ ဌာနတွေက များတော့ အဲဒီထဲမှာ ဌာန ၁၆ ခု ပါပါတယ်။ အကောက်ခွန်တို့၊ ကျန်းမာရေးဝန်ကြီးဌာနက အစားအသောက်နှင့် ဆေးဝါးကွပ်ကဲရေးဦးစီးဌာန၊ ပြည်တွင်းအခွန်တို့ အကုန်လုံး ပါပါ တယ်။ ထောက်ခံချက်ပေးရတဲ့ သစ်တော၊ စိုက်ပျိုးရေးတို့ ဒါတွေလည်း ပါတယ်။ ဌာနအများဆုံးပါတဲ့ အညွှန်းကိန်းအဖွဲ့ ဖြစ်ပါတယ်။

Doing Business မှာ သူတို့ရဲ့ ဝက်ဘ်ဆိုက်ကနေ တစ်ကမ္ဘာလုံးရဲ့ Doing Business နဲ့ ပတ်သက်တဲ့ အခြေအနေကို သိနိုင်သလို မြန်မာနိုင်ငံနဲ့ပတ်သက်တာလည်း သိနိုင်တယ်။ အခုဆို မြန်မာဘာသာ ပြန်ပြီးတော့ထားတယ်။ မြန်မာဘာသာပြန်ထားတာလည်း ကျွန်တော်တို့ဝက်ဘ်ဆိုက်ပေါ်မှာ တင်ပေးထားပါတယ်။ အဲဒီထဲမှာ အညွှန်းကိန်းတွေနဲ့ ပတ်သက်တာတွေ တစ်ခုချင်း၊ တစ်ခုချင်းစီကို ဖော်ပြထားပါတယ်။ မြန်မာဘာသာပြန်နိုင်တာတော့ ပထမဆုံးပေါ့။ ၂၀၁၈ ခုနှစ် အစီရင်ခံစာကို မြန်မာ ဘာသာပြန်ပြီးတော့ ပြုစုထားပါတယ်။ ဒါကို Soft Copy လိုချင်ရင်လည်း ရနိုင်ပါတယ်။ ကုန်သွယ်ရေးနဲ့ ပတ်သက်လို့ အဓိကတိုင်းတဲ့ အချက်သုံးချက်ရှိတယ်။ လုပ်ငန်းအဆင့်တွေ ဘယ်လောက်များလဲ၊ အချိန်ဘယ်လောက်ကြာလဲ၊ ကုန်ကျစရိတ် ဘယ်လောက်များလဲ ဆိုတာတွေကို တိုင်းတာပါတယ်။

တိုင်းတာမှုမှာ စာရွက်စာတမ်းအပိုင်းရယ်၊ တကယ်ဖြတ်သန်းရတဲ့ လုပ်ငန်းစဉ်ရယ်ဆိုပြီး နှစ်ပိုင်းရှိပါတယ်။ အဲဒီနှစ်ပိုင်း လုံးက ဘယ်လောက်ကြာလဲဆိုတာ သူတို့က တိုင်းတယ်။ ကုန်ကျစရိတ်ကို ပို့ကုန်မှာလည်း တိုင်းတယ်။ သွင်းကုန်မှာ လည်း တိုင်းတယ်။ အဲဒီ သဘောပါပဲ။ အဲဒီ အနေအထားအရ ပြောမယ်ဆိုရင် ကျွန်တော်တို့ရဲ့ ကုန်သွယ်မှု လုပ်ငန်းနဲ့ပတ် သက်တဲ့ အချက်လေးတွေ၊ ကိန်းဂဏန်းလေးတွေ ပြောပြချင်ပါတယ်။

ပထမ စတင်ဝင်ရောက်တဲ့ ၂၀၁၄ ခုနှစ်မှာ ကျွန်တော်တို့ရဲ့အဆင့်က (၁၁၃) ရှိတယ်။ ကျွန်တော်တို့ အိမ်နီးချင်းနိုင်ငံ တွေနဲ့ကြည့်လိုက်ရင် ကျွန်တော်တို့နိုင်ငံက အိန္ဒိယ၊ လာအိုတို့ အထက်မှာတော့ ရောက်နေတယ်။ ကျွန်တော်တို့ဒေသ East Asia and Pacific ဒေသရဲ့ ပျမ်းမျှအဆင့်က (၇၅) ဖြစ်ပါတယ်။ အဲဒီမှာ ကျွန်တော်တို့က (၁၁၃) ဖြစ်နေတယ်။ ၂၀၁၅ ခုနှစ်ကျတော့ ကျွန်တော်တို့ အဆင့်က (၁၀၃) ရောက်သွားတယ်။ အမှတ်ကတော့ ၇၀ ဒသမ ၀၂ ပါ။ ဒီမှာလည်း ကျွန်တော်တို့က အိန္ဒိယနဲ့ လာအိုရဲ့အထက်မှာရှိသေးတယ်။ ပျမ်းမျှကတော့ ၇၃ ဆိုတော့ ကျွန်တော်တို့က ၇၀ ရတော့ မဆိုးဘူးပေါ့။ ၂၀၁၆ ခုနှစ်မှာ ကျွန်တော်တို့က အောက်ရောက် သွားတယ်။ ဒီထဲမှာ လာအိုနဲ့ အိန္ဒိယတို့က ကျွန်တော် တို့ကို ကျော်တက်သွားတယ်။ ကျွန်တော်တို့ အဆင့်က (၁၄၀) ဖြစ်သွားတယ်။ လာအိုက (၁၀၈) နဲ့ အိန္ဒိယ က (၁၃၃)ရတယ်။ ပျမ်းမျှအဆင့်က(၉၇)ဖြစ်ပြီး ဒေသရဲ့ ပျမ်းမျှ အမှတ်က ၆၈ ဒသမ ၆၇ ဖြစ်ပါတယ်။ ကျွန်တော်တို့က ၅၅ ဒသမ ၀၅ ရတယ်။ အဲဒီအချိန်ကစပြီးတော့ ကုန်သွယ်မှုမှာ နည်းနည်းအခက်အခဲ၊ အတားအဆီးလေး တွေရှိလာတယ်။ အဲဒီတော့ ကျွန်တော်တို့ သတိထားမိတာက အဲဒီအချိန်ကလမ်းတွေ ကျပ်တယ်။ ကားလမ်းပေါ်မှာ ကျပ်တော့ ကွန်တိန်နာ တွေက နေ့ခင်းမှာ သွားရခက်လို့ ညပိုင်းမှာဦးစားပေးပြီး သွားရတာ ရှိတယ်။ ဆိပ်ကမ်းထဲမှာ ကျပ်တာတွေရှိတယ်။

အခြားအချက်အလက်တွေလည်းရှိတယ်။ ဌာနပေါင်းက ၁၆ ခုဆိုတော့ ဘယ်နေရာက အဓိကလဲဆိုတာ ပြောဖို့ခက်တယ်။ ဒီဌာန ၁၆ ခုလုံး ပူးပေါင်းပြီးလုပ်မှ တိုးတက်မယ့် အညွှန်းကိန်းဖြစ်ပါတယ်။ ၂၀၁၇ ခုနှစ်ကျတော့လည်း ဒေသအတွင်းမှာ အိန္ဒိယနဲ့ လာအို တို့က အောက်ကိုပြန်ရောက်သွားတယ်။ မလေးရှားနဲ့ ထိုင်းတို့ကတော့ ကျွန်တော်တို့ အထက်မှာပါ။ ကျွန်တော်တို့အဆင့်က (၁၅၉) ဖြစ်ပြီး ရမှတ်က ၄၇ ဒသမ ၄ ဖြစ်နေတယ်။ ၂၀၁၈ ခုနှစ်မှာ ကျွန်တော်တို့က ၄၇ ဒသမ ၆၇ ဆိုတော့ သိပ်မပြောင်းလဲသေးဘူးပေါ့။ အဆင့်ကလည်း (၁၆၃) ပါ။ ကျွန်တော်တို့က မှန်းထားတာက (၁၀၀) လောက်အထိ ရချင်တာဆိုတော့ ဆက်ပြီးကြိုးစားရဦးမှာပေါ့။ ကြိုးစားတဲ့နေရာမှာလည်း ဒါက ပြည်ပကုန်သွယ်မှုပို့ကုန်၊ သွင်းကုန်လုပ်ငန်းဆိုတော့ ကုန်သွယ်ရေးကပါတဲ့ အပိုင်းရှိတယ်။ ကုန်သွယ်ရေးကို မရောက်ဘဲ အကောက်ခွန်နဲ့သွားပြီး လိုင်စင်မလိုတဲ့ ပစ္စည်းတွေကလည်း ၅၀ ရာခိုင်နှုန်းကျော်ကျော်လောက် ရှိနေပြီဖြစ်ပါတယ်။ အဲဒီလိုရှိနေပြီဆိုတော့ ကျန်တဲ့ဌာနတွေကလည်း မြန်မှဖြစ်ပါမယ်။ ကုန်သွယ်ရေးပါတဲ့ အပိုင်းရှိသလို ကုန်သွယ်ရေး မပါတဲ့ အပိုင်းလည်းရှိတယ်။ ဒီလိုမြန်မှ တိုးတက်လာမှာ ဖြစ်ပါတယ်။

နောက်ဆုံး ၂၀၁၈ ခုနှစ်ရဲ့အခြေအနေအရဆိုရင် နယ်စပ်ဖြတ်ကျော်ပြီးတော့ ဆောင်ရွက် ရတဲ့ အပိုင်းတွေမှာ ကြာမြင့် ချိန်က ပို့ကုန်မှာ ၁၄၂ နာရီ ဖြစ်နေတယ်။ သွင်းကုန်မှာက နာရီ ၂၃၀ ဖြစ်နေတယ်။ ဒါက နယ်စပ် ဖြတ်ကျော်မဟုတ်ဘဲ ပင်လယ်ရေကြောင်း ကုန်သွယ်မှု ကိုပဲ တိုင်းတာခြင်း ဖြစ်ပါတယ်။ ကုန်ကျစရိတ်မှာလည်း ပို့ကုန်နဲ့ ပတ်သက်တဲ့လုပ်ငန်းမှာ ဒေါ်လာ ၄၃၀ ဖြစ်နေတယ်။ သွင်းကုန်မှာ ၄၅၇ ဒေါ်လာဖြစ်ပါတယ်။ နယ်စပ်ဖြတ်ကျော်တဲ့ လုပ်ငန်းစဉ်အဆင့်ဆင့်မှာ ကုန်ကျစရိတ်တွေ ဖြစ်ပါတယ်။ စာရွက်စာတမ်းအပိုင်းနဲ့ ပတ်သက်လို့ သူတို့ရဲ့တွေ့ရှိချက်မှာ ဘာတွေ့လဲဆိုတော့ ပို့ကုန်မှာ ၁၄၄ နာရီကြာတယ်။ သွင်းကုန်မှာကျတော့ ၄၈ နာရီပဲကြာတယ်။ သွင်းကုန်ကဝင်လာပြီး ဖြန့်လိုက်တာဆိုတော့ ပိုလွယ်တယ်။ ပို့ကုန်က အဆင့်ဆင့်လုပ်ရတော့ နည်းနည်းကြာတယ်။ အဲဒီတော့ ကုန်ကျစရိတ်အပိုင်းမှာလည်း ပို့ကုန်က ဒေါ်လာ ၁၄၀ နဲ့ သွင်းကုန်က ၂၁၀ ဒေါ်လာဖြစ်နေ တယ်။

ဒါတွေက သူတို့ရဲ့စံနှုန်းတွေနဲ့ လေ့လာမှုအရ တွက်ချက်တဲ့ အချိန်၊ နာရီတွေနဲ့ ကုန်ကျစရိတ် ကိန်းဂဏန်းတွေဖြစ်ပါတယ်။ အဲဒီတော့ ဒါတွေက ဖြေတဲ့သူမှားလို့ မှားတာမျိုးလည်း ဖြစ်နိုင် တယ်။ တကယ့် လက်ရှိအခြေအနေလည်း ဖြစ်နိုင်တယ်။ ဒါတွေကို ကျွန်တော်တို့က အမြဲတမ်း ဆွေးနွေးညှိနှိုင်းပြီးတော့ တိုးတက်အောင် လုပ်နေရမှာ ဖြစ်ပါတယ်။ ဒါတွေ အားလုံးက မှန်တယ်လို့ တရားသေပြောလို့မရဘူး။ သို့သော် ကျွန်တော်တို့က လက်ရှိ အခြေအနေမှာဖြစ်ပေါ်နေတဲ့ အညွှန်းကိန်းတစ်ခု အနေနဲ့တော့ လက်ခံရပါမယ်။ ဒါတွေကို မှားရင်မှားတယ်လို့ ထောက်ပြနိုင်ရမယ်။ မှန်ရင်လည်း ဒီထက်ပိုပြီးကောင်းအောင် ကျွန်တော်တို့ ဆက်ပြီးလုပ်ဆောင်ရမယ်။ လုပ်တဲ့နေရာမှာလည်း ကုန်သွယ်မှုဖြစ်တဲ့ အတွက် ဌာနတစ်ခုတည်း လုပ်လို့မရဘူး။ ၁၆ ဌာနပေါင်းလုပ်ရမှာ ဖြစ်တဲ့အတွက် ဌာနအသီးသီးက ဟန်ချက်ညီညီ လွယ်ကူအောင်လုပ်ပေးမှ ဒီအဆင့်က တိုးတက်မယ်။

နောက်တစ်ခုက နိုင်ငံခြားရင်းနှီးမြှုပ်နှံသူတွေ ရင်းနှီးမြှုပ်နှံမှု လာရင်လည်း သူတို့ထုတ်လုပ် တဲ့ကုန်က ကုန်သွယ်မှုဖြစ်မှာပါ။ ကုန်သွယ်မှုဖြစ်တဲ့အခါကျ သူတို့က လွယ်ကူတာကို ကြိုက်တယ်။ ဒါကြောင့် ကျွန်တော်တို့ဘက်က လွယ်ကူမှ ရင်းနှီးမြှုပ်နှံမှုကို ဖိတ်ခေါ်တဲ့နေရာမှာလည်းဆက်စပ်ပြီးတော့ တိုးတက်လာမှာဖြစ်ပါတယ်။ ဒါကတော့ ကျွန်တော်တို့ရဲ့ ကုန်သွယ်မှုနဲ့ ပတ်သက်တဲ့ လက်ရှိ Doing Business မှာ နှစ်အလိုက် တွေ့ရှိရတဲ့အချက်တွေနဲ့ နောက်ဆုံးအခြေ အနေဖြစ်ပါတယ်။ ဒါကို တင်ပြရင်းနဲ့ သက်ဆိုင်ရာဌာနတွေအားလုံးက ဆက်လက်ပြီးတော့ တိုးတက်အောင် ပူးပေါင်း ဆောင်ရွက် ဖို့ ကြိုးစားနေပါတယ်။ လုပ်ငန်းရှင် တွေအပါအဝင် ကျန်တဲ့သက်ဆိုင်ရာ ဌာနတွေကလည်း အားလုံးဆက်ပြီး တော့ ပူးပေါင်းကြိုးစားကြဖို့ တိုက်တွန်းချင်ပါတယ်။

အစီအစဉ်မှူး။ ။ ပြည်သူကိုအသိပေးချင်တဲ့ကဏ္ဍတွေကိုလည်း ဆွေးနွေးကြဖို့အတွက် ဖိတ်ခေါ်ပါတယ်ခင်ဗျာ။
ဒေါ်ခိုင်ခိုင်နွယ်။ ။ တကယ်တော့လုပ်ငန်းလုပ်ရတာ လွယ်ကူအောင် လုပ်တဲ့အပိုင်းမှာ အစိုးရဌာနတစ်ခုတည်းနဲ့ လုပ်လို့ရတာ မဟုတ်ပါဘူး။ ဒါကို ပုဂ္ဂလိကကဏ္ဍက လုပ်ငန်းရှင်တွေ သိစေချင်ပါတယ်။ အစိုးရဌာနဘက်က ပြုပြင်ပြောင်းလဲမှုတွေ လုပ်ကြမယ်။ ဒီလိုလုပ်တာလည်း ပုဂ္ဂလိကကဏ္ဍမှာ အလုပ်လုပ်ရတာ လွယ်ကူအောင်လုပ်ပေးတာ ဖြစ်ပါ တယ်။ အဲဒီတော့ ပုဂ္ဂလိက ဘက်ကလည်း သူတို့လုပ်တဲ့အခါမှာ မလွယ်ကူတာရှိရင်လည်း ပွင့်ပွင့်လင်းလင်းနဲ့ ဆက်သွယ်ပြော ဆိုနေသင့်တယ်။ Communicate လုပ်နေသင့်တယ်။ ဒီလိုပြောင်းလိုက်တယ်ဆိုရင် ဒီလိုပြောင်းလိုက်တာ ကိုတော့ ကျွန်မတို့ မခံစားရသေးဘူး ဆိုတာ သိအောင်ပေါ့။ ပွင့်ပွင့်လင်းလင်း စကားပြောကြရင် ဘယ်နေရာမှာတော့ ဘယ်လိုရှိလဲဆိုတာ ပိုပြီးရှင်းလင်းအောင်လုပ်နိုင်မယ်လို့ ကျွန်မထင်တယ်။

အဲဒီတော့ အစိုးရအေဂျင်စီတွေကလည်း ပြုပြင်ပြောင်းလဲမှုကို ဆောင်ရွက်ခြင်း (Reform) လုပ်တဲ့နေရာမှာ စီးပွားရေး လုပ်ငန်းတွေအတွက် အမှန်တကယ် အကျိုးရှိလာမည့် ကိစ္စဖြစ်ခြင်း၊ မဖြစ်ခြင်းကို ပုဂ္ဂလိကကဏ္ဍကလည်း မည်သည့် နေရာ၊ မည်သည့် အနေအထားတွေမှာ ပြုပြင်ပြောင်းလဲမှုတွေ ဆောင်ရွက်သင့်တယ်ဆိုတာကို ကိုယ်တိုင်တွေ့ကြုံနေရတဲ့ အခက်အခဲတွေကို အခြေခံပြီးပွင့်လင်းစွာတင်ပြဆွေးနွေးရမှာ ဖြစ်ပါတယ်။ အစိုးရအေဂျင်စီတွေအနေနဲ့လည်း ဆောင်ရွက် လိုက်တဲ့ ပြုပြင်ပြောင်းလဲမှုတွေ ကို ပုဂ္ဂလိကကဏ္ဍမှာ ထိရောက်စွာ အကျိုးကျေးဇူး ခံစားရတယ်ဆိုတာ သေချာဖို့ လိုအပ်ပါတယ်။

နောက်တစ်ခုကလည်း Emphasize လုပ်ချင်တာပါ။ ပုဂ္ဂလိကဘက်ကလည်း ကမ္ဘာ့ဘဏ်ရဲ့ အမှတ်ပေးစနစ်မှာ ပြုပြင် ပြောင်းလဲမှုလုပ်ပြီးတာနဲ့ ပြီးသွားတာ မဟုတ်ပါဘူး။ ပြည်ပ ကုန်သွယ်မှုဆိုရင် ဒီနှစ်မှာ ဆရာတို့ပြောင်းခဲ့တဲ့ Negative List တွေ ထွက်လာတယ်။ Export List တွေထွက်လာတာ ဖြစ်ပါတယ်။ တကယ်ဆို ကျွန်မတို့ အချိန်မီနေခဲ့သေး တာပေါ့။ ဒါပေမယ့် ပုဂ္ဂလိကကိုမေးတော့ တိကျတဲ့အဖြေ မရတဲ့အခါမှာ စောင့်ကြည့်နဲ့ ထွက်လာတော့ အဲဒီမှာ အမှတ်ကတိုးမလာ တော့ဘူး။ Customs ဆို MACCS ကို သုံးတာ ၂၀၁၆ ခုနှစ်ကတည်းကပါ။ ဒါပေမယ့် သူတို့လည်း ကြိုးစားလုပ်တယ်။ တကယ်တမ်း မြေပြင်မှာသုံးရတဲ့အခါကျရင် အဆင်မပြေတဲ့အသံတွေက ပုဂ္ဂလိကဘက်က ထွက်လာတဲ့ အခါမှာ အခုအထိ အမှတ်ကမတက်လာဘူး။ စောင့်ကြည့်ပဲ ရှိနေသေးတယ်။ Customs နဲ့ ဆိပ်ကမ်းဆိုရင် သွင်းကုန်ကို ပိုလွယ်ကူအောင် လုပ်ပေးတယ်။ အချိန်လျော့အောင် လုပ်ပေးတဲ့အပိုင်းဟာ တချို့ Sector မှာ တကယ်ကို လျော့ပါတယ်။ ကျွန်မတို့ အထည်ချုပ် ဆိုရင် တကယ်ပေါင်းလုပ်တဲ့ အပိုင်းတွေရှိတယ်။ ဒါပေမယ့် Sector အားလုံးနဲ့ မဟုတ်တော့ ဒီမေးခွန်းကတခြား Sector ရောက်သွားရင် အဖြေက Negative ထွက်လာမှာ ဖြစ်ပါတယ်။ အဲဒီတော့ စောင့်ကြည့်ဆိုတဲ့ အပိုင်းတွေ ဖြစ်လာတာပါ။

ဒါကြောင့် ပုဂ္ဂလိကကဏ္ဍကိုလည်း ကိုယ့်နိုင်ငံရဲ့ Doing Business ကို ပိုလွယ် ကူအောင်ပေါ့။ ရမှတ်တက်လာရင် အပြည်ပြည်ဆိုင်ရာကလည်း ကိုယ့်ကိုရင်းနှီးမြှုပ်နှံမှု လုပ်ချင်တဲ့အခါကျ ဒါကို သူတို့ကြည့်ကြတယ်။ ဘာလဲဆိုတော့ အညွှန်းကိန်းနဲ့လာတယ်။ ကြည့်တဲ့အခါမှာ Starting Business အလွန်လွယ်တယ်ဆိုရင် အကုန်လုံးက လာချင်ကြ မယ်။ ချေးငွေရရှိနိုင်မှု၊ ပြည်ပကုန်သွယ်မှုတွေ အလွန်လွယ်တယ်ဆိုရင် အားလုံးက လာချင်ကြမှာပါ။ သူတို့ချည်းပဲမဟုတ်ဘူး၊ ကိုယ့်နိုင်ငံမှာရှိတဲ့ လုပ်ငန်းရှင်တွေလည်း ဒါကိုကြည့်လိုက်ရင် ငါတို့အစိုးရဘက်က လုပ်ကိုင်ပေးနေမှုဟာ အလုပ်လုပ်ဖို့ အဆင်ပြေနေပြီဆိုရင် အားတက်သရောရှိလာမယ်။ ခုနက ဆွေးနွေးခဲ့သလို မွေးပြီးရှင်သန် ချင်သလိုပေါ့။ ရှင်သန်တဲ့ အခါမှာလည်း သန်သန်စွမ်းစွမ်း၊ ကျန်းကျန်းမာမာနဲ့ ရှင်သန်ချင် တယ်။ ပိန်ပိန်လှီလှီနဲ့တော့ ဘယ်ရှင်သန်ချင်မလဲ။ ဒါမျိုးလေးတွေက ပုဂ္ဂလိကကဏ္ဍ မှာလည်း ပေါင်းလုပ်ဖို့အတွက် တာဝန်ရှိတယ်ဆိုတာ ပြောချင်ပါတယ်။

ကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ်အနေနဲ့ကတော့ လုပ်ငန်းအဖွဲ့ ၁၀ ခုမှာတော့ ပါဝင်ပါတယ်။ အစည်းအဝေးတွေလည်း တက်နေကြတယ်။ အခုထက်ပိုပြီး ပါဝင်ဖို့လည်း ကြိုးစားမယ်။ အတူဆောင်ရွက်မယ်လို့လည်း ပြောချင်ပါတယ်။

ကျော်သူထက်၊ မျိုးသူဟိန်း

ဓာတ်ပုံ - အေးသန်း

(ဆက်လက်ဖော်ပြပါမည်)