အရှေ့တောင်အာရှဒေသ စပါး-ငါးစနစ်များ ဖွံ့ဖြိုး တိုးတက်လာစေရေး နှီးနှောဖလှယ်ပွဲ အခမ်းအနား ကျင်းပ

နေပြည်တော်  သြဂုတ် ၆

စပါး-ငါးတွဲဘက် စိုက်ပျိုးမွေးမြူရေး သုတေသန ရလဒ်များအရ စပါး တစ်မျိုးတည်းသီးသန့် စိုက်ပျိုးခြင်းထက် စပါး- ငါးရောနှော စိုက်ပျိုးမွေးမြူခြင်း စနစ်သည် စီးပွားရေးအရသာမက အာဟာရ ရရှိမှုအတွက်ပါ ပိုမိုအကျိုးရရှိကြောင်း၊ စပါးခင်းအတွင်း ငါးရှိခြင်းသည် မြေသြဇာဓါတ် ပိုမိုကောင်းမွန်စေပြီး စပါးပင်အတွက် လိုအပ်သည့် အာဟာရကို တိုးတက်ရရှိစေသည့်အပြင် အသေးစား တောင်သူများနှင့် မိသားစုများအတွက် အာဟာရပြည့်ဝရေးနှင့် ဝင်ငွေ တိုးတက် ရရှိရေးကိုပါ အကျိုးပြုနိုင်မည်ဖြစ်သည့်အတွက် အလားအလာကောင်းသော လုပ်ငန်း တစ်ခု ဖြစ်ကြောင်း ယနေ့ နံနက် ၈ နာရီခွဲက နေပြည်တော် ဟိုတယ်ဇုံရှိ Kempinski Hotel တွင် ကျင်းပသည့် အရှေ့တောင် အာရှ ဒေသစပါး-ငါးစနစ်များ ဖွံ့ဖြိုး တိုးတက်လာစေရေး နှီးနှော ဖလှယ်ပွဲတွင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဒေါက်တာ အောင်သူက ဆွေးနွေးပြောကြားသည်။

အခမ်းအနားသို့ နေပြည်တော်ကောင်စီဥက္ကဋ္ဌ ဒေါက်တာမျိုးအောင်နှင့် နေပြည်တော် ကောင်စီဝင် ဦးအေးမောင်စိန်၊ ပြည်ထောင်စုသမ္မတ မြန်မာနိုင်ငံဆိုင်ရာ သြစတြေးလျနိုင်ငံ သံအမတ်ကြီး H.E. Nicholas Coppel ၊ အမြဲတမ်းအတွင်းဝန် ဒေါက်တာခင်ဇော်၊ ACIAR ငါးလုပ်ငန်းဆိုင်ရာ ညွှန်ကြားရေးမှူး Dr. Ann Fleming၊ WorldFish ညွှန်ကြားရေးမှူးချုပ် Dr. Gareth Johnstone၊ IRRI ညွှန်ကြားရေးမှူးချုပ် Dr. Matthew Morell ၊ FAO ဌာနေ ကိုယ်စားလှယ်၊ IWMI မှ ဌာနေ ကိုယ်စားလှယ်၊ Bilateral ဖွံ့ဖြိုးမှုဆိုင်ရာ အေဂျင်စီများ၊ တာဝန်ရှိသူများ၊ ပညာရှင်များ တက်ရောက်ကြသည်။

အခမ်းအနားတွင် ပြည်ထောင်စုဝန်ကြီး ဒေါက်တာအောင်သူ က အဖွင့်အမှာစကား ပြောကြားပြီး ၊ သြစတြေးလျနိုင်ငံ သံအမတ်ကြီး H.E. Nicholas Coppel ၊ ACIAR ငါးလုပ်ငန်းဆိုင်ရာ ညွှန်ကြားရေးမှူး Dr. Ann Fleming နှင့် World Fish Myanmar မှ Country Director Mr. Michael Akester တို့က နှုတ်ခွန်းဆက်စကားများ ပြောကြားကြသည်။

သြစတြေးလျ နိုင်ငံတကာစိုက်ပျိုးရေး သုတေသနဌာန (ACIAR) ၏ ရန်ပုံငွေ အထောက်အပံ့ဖြင့် “မြန်မာနိုင်ငံ၊ ဧရာဝတီမြစ်ဝကျွန်းပေါ်ဒေသတွင် စပါး-ငါးစနစ်များ ဖွံ့ဖြိုးတိုးတက်လာစေရေး” စီမံကိန်းကို ဧရာဝတီမြစ်ဝကျွန်းပေါ် ဒေသရှိ ဂေဟစနစ် ဇုန်များအပေါ် အခြေခံပြီး သင့်လျော်သည့် စပါး-ငါးစနစ်များ၏ ထုတ်လုပ်နိုင်စွမ်းနှင့် အကျိုးအမြတ် ဖြစ်ထွန်းနိုင်စွမ်းတို့ တိုးတက်စေရေး ရည်မှန်းကာ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန အောက်ရှိစိုက်ပျိုးရေးဦးစီးဌာန၊ စိုက်ပျိုးရေးသုတေသန ဦးစီးဌာန၊ ငါးလုပ်ငန်း ဦးစီးဌာနတို့နှင့်အတူ ပူးပေါင်း ဆောင်ရွက်လျက်ရှိပြီး ယင်းစီမံကိန်းကို ၂၀၁၇-၂၀၂၁ ခုနှစ်အထိ CGIAR (Consultative Group for International Agricultural Research)၊ WorldFish ၊ IRRI (International Rice Research Institute) နှင့် IWMI (International Water Management Institute) စသည့် အဖွဲ့အစည်းများက အားဖြည့်ပြီး အကောင်အထည်ဖော် ဆောင်ရွက်သွားမည်ဖြစ်ကြောင်း သိရသည်။

 (သတင်းစဉ်)